წარმოგიდგენთ ქალთა ფონდი „სოხუმის“ ახალი მონიტორინგის ანგარიშს: „ქალთა მიმართ ძალადობის რისკების კვლევა“, რომლის მიზანია ორგანიზაციის 10 სამიზნე მუნიციპალიტეტში ოჯახში და ქალთა მიმართ ძალადობის რისკების განსაზღვრა და შეფასება, შემთხვევებზე დროული რეაგირებისა და რელევანტური ადვოკატირებისთვის.
კვლევის მონაცემებით ნათლად გამოიკვეთა ქალების ცხოვრებაში პირად უსაფრთხოებასთან დაკავშირებული გამოწვევები, რაც მეტწილად განპირობებულია უმუშევრობისა და სიღარიბის მაღალი დონით, ოჯახში ძალადობის ფაქტებით. სამწუხაროდ, კვლავ არასახარბიელოა ქალთა ინფორმირება და ხელმისაწვდომობა ძალადობის მსხვერპლთა მომსახურებებზე. კვლევის თანახმად, ქალებმა საკუთარი უსაფრთხოების განცდა საშუალოდ შეაფასეს და ხაზი გაუსვეს სიცოცხლისთვის, ჯანმრთელობის, საკუთრებისა და სიტყვის თავისუფლებისთვის საფრთხის შემქმნელ ქმედებებს მათ ცხოვრებაში.
კვლევის მიგნებების საფუძველზე შემუშავებული რეკომენდაციები მოიცავს: ქალთა ეკონომიკური გაძლიერების პროგრამებს, ცნობიერების ამაღლების კამპანიებს, მუნიციპალიტეტების როლის გაზრდას, რეფერალური მექანიზმის სუბიექტებს შორის თანამშრომლობასა და კოორდინაციას, განხორციელებული ღონისძიებების მონიტორინგისა და შეფასების ქმედითი სისტემის დანერგვას, რელევანტური სპეციალისტების უწყვეტ გადამზადებას.
დღის სარეაბილიტაციო ცენტრის ქუთაისის ჯგუფისთვის ფონდი „სოხუმის“ ოფისში გაიმართა ორდღიანი ტრენინგი ბიზნესის და მეწარმეობის, ბიზნეს იდეის და ბიზნესის დაგეგმვის შესახებ. მონაწილეებმა მოისმინეს კვალიფიციური რჩევები პროდუქციის/სერვისის მახასიათებლებსა და ფასწარმოებაზე, რაც აუცილებელი ინფორმაციაა საკუთარი ბიზნესის განვითარებისათვის.
საინტერესოა ტრენინგის მონაწილეთა უკუკავშირი:
„მივიღე ცოდნა ბიზნეს გეგმის შედგენაში, რომ მერე დამოუკიდებლად შევძლო წინსვლა.“
„შემაქეს და განცდა მაქვს, რომ ჩემი იდეა გაიმარჯვებს, რადგან ახალია საზოგადოებისთვის.“
„ვისწავლე, როგორ განვსაზღვრო სწორად ბიუჯეტი. როგორი რეკლამა გავაკეთო გაყიდვებში წარმატების მისაღწევად.“
ტრენინგი არის კარგი მხარდაჭერა საკუთარი ბიზნესის დაწყებაში და დაეხმარება მონაწილეებს, უკეთ მოემზადონ ქალთა ფონდი „სოხუმის“ საგრანტო კონკურსისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სატრენინგო კურსი აქტიურად გრძელდება ახალგაზრდობის გაძლიერების ცენტრებში. ახალგაზრდები ინტერესით ეცნობიან ახალ თემებს, ეჩვევიან ინდივიდუალურ თუ ჯგუფურ მუშაობას, სწავლობენ დისკუსიების კულტურას.
დეკემბრის ტრენინგები დაემთხვა საინფორმაციო კამპანიას „16 აქტიური დღე ქალთა მიმართ ძალადობის წინააღმდეგ“. ამიტომ გადაწყდა, რომ ათივე ცენტრი (სამტრედია, თერჯოლა, ვანი, ბაღდათი, სენაკი, ზუგდიდი, წალენჯიხა, ხობი, ქობულეთი, ჩოხატაური) ჩართულიყო კამპანიაში.
ახალგაზრდებმა ნოემბრიდან დაიწყეს მზადება და ყველა დაგეგმილი ინიცირებული აქტივობა დროულად ჩაატარეს: კრეატიული ღონისძიებები, ინტერვიუები, გამოფენები, აქციები... ყველაფრის ავტორები და შემსრულებლები თვითონ იყვნენ. ორგანიზებაში მაქსიმალურად ჩაერთნენ პედაგოგები და სკოლის ადმინისტრაციის წარმომადგენლები.
ახალგაზრდობის გაძლიერების ცენტრების ახალგაზრდებმა დიდი გამოცდილება მიიღეს წლევანდელ კამპანიაში აქტიური ჩართულობით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინელების თქმით, ჩვენ ვრჩებით ერთადერთ ორგანიზაციად, რომელიც მათ მუდმივად ეხმარება ბევრ საკითხში.
ჩვენს მონაცემთა ბაზაში 387 ადამიანია, დეკემბერში 17 ახალი დაგვემატა. ვაუჩერებით დახმარება გაეწია 39 ოჯახს. ასევე იყო სხვა სახის მხარდაჭერა: 4 ოჯახს გადავუხადეთ კომუნალური გადასახადები, 6 ოჯახს - ბინის ქირა, ხოლო ერთ ადამიანს - ტელეფონის ხარჯები.
11 უკრაინელი ქალი მონაწილეობდა ქალთა ფონდი „სოხუმის“ ღონისძიებაში, რომელიც მიეძღვნა კამპანიის „16 აქტიური დღე ქალთა მიმართ ძალადობის წინააღმდეგ“ დასრულებას. სამმა მათგანმა მადლობა გადაუხადა და მაღალი შეფასება მისცა ფონდის მუშაობას, ფსიქოლოგისა და იურისტის კონსულტაციებს, რომლებიც სხვადასხვა ეტაპზე უწევდნენ და აგრძელებენ მათ დახმარებას. ამ შეხვედრაზე ქალებმა ერთმანეთი გაიცნეს და რეგულარული კომუნიკაცია გადაწყვიტეს. იულია რეზვანმა განსაკუთრებული მადლობა გადაიხადა იმისთვის, რომ ამ შეხვედრისთვის ეკლერები შეუკვეთეს (ის ნამცხვრებს აცხობს). ეს მისთვის დიდი დახმარებაა და მოხარულია, რომ „ამ რთულ პერიოდში ჩვენ ყველანაირად მხარს ვუჭერთ უკრაინელ ქალებს“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
16-დღიანი გლობალური კამპანიის ფარგლებში დაიწყო და დეკემბრის ბოლომდე გრძელდება ახალგაზრდების აქტივობები.
10 მუნიციპალიტეტში დღემდე 1000-მდე ახალგაზრდამ მიიღო მონაწილეობა თემატურ დისკუსიებში, ტრენინგებში, გამოფენებში, ქუჩის აქციებსა და პერფორმანსებში, რომლებიც ძალადობის წინააღმდეგ ბრძოლას და პრევენციას ეხებოდა.
„უმთავრესი, რაც წელს გამოიკვეთა, არის ადგილობრივი თვითმმართველობების, განათლების რესურსცენტრების, ახალგაზრდული დეპარტამენტების, სკოლის დირექციების, პედაგოგების და მშობლების განსაკუთრებული პარტნიორობა ჩვენს კამპანიაში. ჩვენმა კონსტრუქციულმა და შედეგიანმა ნაბიჯებმა განაპირობა მთავარი - ნდობა: რომ ყველაფერი, რასაც ვაკეთებთ, ახალგაზრდების სწორ განათლებას ემსახურება,“ - აღნიშნა ახალგაზრდებთან მუშაობის ასისტენტმა ნინო ჭაბუკიანმა.
კამპანიაში ახალგაზრდების მნიშვნელოვან წვლილზე საუბრობენ ტრენერები, რომლებიც 10 მუნიციპალიტეტის ახალგაზრდობის გაძლიერების ცენტრებში ატარებენ ტრენინგებს:
კარზეა მომდგარი ახალი წელი და ქალთა ფონდი „სოხუმის“ სარეაბილიტაციო ცენტრში მასპინძლებმა და სტუმრებმა ლამაზი საახალწლო გარემო შექმნეს.
დეკემბერში აქ იმყოფებოდა ძალადობის მსხვერპლთა კიდევ ერთი ჯგუფი - ორი ქალი ბავშვებთან ერთად, სულ 6 ადამიანი. ორი კვირის განმავლობაში მათ გაიარეს კომპლექსური მუშაობა ფსიქოლოგთან, იურისტთან და სოციალურ მუშაკთან. ბავშვები საინტერესოდ და კრეატიულად ატარებდნენ დროს პედაგოგთან ერთად.
2023 წელს შვილებიანად 30-ზე მეტმა ქალმა მიიღო ჩვენი მხარდაჭერა.
ფსიქოლოგმა მანანა გოცირიძემ ერთ-ერთი ქალის ისტორია გაგვიზიარა. ნანი (პირობითი სახელი) 45 წლისაა. ის ჩვენი ერთ-ერთი სამიზნე მუნიციპალიტეტიდან ჩამოიყვანეს ორ შვილთან ერთად.
ნანი რამდენჯერმე წავიდა სახლიდან და მოლაპარაკებების და ხვეწნა-მუდარის შემდეგ ისევ დაბრუნდა. სამი წლის წინ პოლიციაც კი გამოიძახა, მაგრამ შემდეგ განცხადება გამოითხოვა.
„ჩემზე ახლაც ამბობენ, ეს ის ქალია, ქმრის ჩასმა რომ უნდოდაო ციხეში. დედაჩემმა ყველაფერი გააკეთა, რომ ქმართან დავრჩენილიყავი - არ არის კარგი, განქორწინებულს რომ დაგიძახებენ, მოითმინე, დაგეხმარებით, სად დაბრუნდები, შენი რძალია სახლში და შენი ადგილი აქ არ არის, უკვე სტუმარი ხარო. გათხოვების შემდეგ დავიკარგე და დღემდე ვერ ვპოულობ ჩემს თავს. მხოლოდ ბავშვები მაძლევენ სტიმულს, მაგრამ უკვე არ მინდა, ამ გარემოში მყავდეს ბავშვები. მანამდე კარების სრულად გამოხურვა ვერ მოვახერხე. იმედი მაქვს, რომ ამჯერად შევძლებ.“
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წალენჯიხის მუნიციპალიტეტის გენდერული თანასწორობის საბჭოსთან თანამშრომლობით ქალთა ფონდმა „სოხუმმა“ ჩაატარა საინფორმაციო შეხვედრების ციკლი ქალებთან. შეხვედრები გაიმართა ქალაქ ჯვარში და სოფლებში: ნაკიფუ, ლია, ფახულანი, საჩინო, ჯგალი.
მონაწილეებს მიეწოდათ ინფორმაცია მსოფლიოში მიმდინარე კამპანიაზე „16 აქტიური დღე ქალთა მიმართ ძალადობის წინააღმდეგ“, დარიგდა საგანგებოდ მომზადებული საინფორმაციო ფურცლები. ნარინჯისფერი ბაფთებით შეხვედრების მონაწილეებმა კამპანიის მხარდაჭერა გამოხატეს.
საშა შვიდი წლისაა, კირილი - რვის, არტიომი - 15-ის, დედით უკრაინელი და მამით ქართველი ლევანი კი - ათის.
ეს ბავშვები დედებთან ერთად ხშირად მოდიან ფსიქოლოგ მანანა გოცირიძესთან. იმიტომ რომ დახმარება სჭირდებათ - ომმა შეცვალა მათი ცხოვრების სტილი, ხასიათი...
მარტოობის შიში, ადაპტაციის სირთულე, ჰიპერაქტიურობა, ჩაკეტილობა - ამ პრობლემებზე მუშაობს ფსიქოლოგი უკრაინიდან ჩამოსულ ბავშვებთან.
ბავშვების პარალელურად, მიმდინარეობს კონსულტაციები ზრდასრულებთან ნეგატიური ემოციების „ვენტილაციაზე.“
დეკემბერში ფსიქოლოგი 14 უკრაინელ ლტოლვილს შეხვდა. მათთვის განსაკუთრებულად ძვირფასი და საჭიროა ეს შეხვედრები, ფსიქოლოგის უფასო კონსულტაციები, სასარგებლო რჩევები და დახმარება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ მიერ დასავლეთ საქართველოში მოქმედი ქალთა სამოქალაქო სექტორის წარმომადგენლებისთვის პრაქტიკული ტრენინგი ჩატარდა. ტრენინგი ეძღვნებოდა თემას: „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში.“ ტრენინგს ფონდი „სოხუმის“ თბილისის ოფისის ხელმძღვანელი - ეკატერინე გამახარია უძღვებოდა.
ტრენინგზე მონაწილეები გაეცნენ ომისა და კონფლიქტების დროს გენდერული ძალადობის ტიპიურ ფორმებს და იმსჯელეს ქალებსა და გოგონებზე და სხვა მოწყვლად ჯგუფებზე, შეიარაღებული/ძალადობრივი კონფლიქტების პირდაპირ და არაპირდაპირ ზეგავლენაზე. ტრენინგის მსვლელობისას მონაწილეები აქტიურად უზიარებდნენ ერთმანეთს ომის შემდგომი პერიოდის პირად გამოცდილებას და მსჯელობდნენ იმ სტრატეგიებზე, რომლებიც მნიშვნელოვანია ქალების ძალადობისგან ეფექტიანი დაცვისთვის.
ტრენინგი გაიმართა WAVE ქსელში გაერთიანებული ქალთა ორგანიზაციების: სექსუალური ძალადობის მსხვერპლთა კრიზისული ცენტრი“ (ერევანი, სომხეთი), ქალთა ფონდი „სოხუმი“ (ქუთაისი და თბილისი, საქართველო); გაერთიანებულ ქალთა ფონდი „ბანია ლუკა“ (ბანია ლუკა, ბოსნია და ჰერცეგოვინა) შემუშავებული ტრენინგ მოდულის გამოყენებით, რომელიც დაეყრდნო 2022 წელს გამოცემულ გზამკვლევს „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში: ქალთა არასამთავრობო ორგანიზაციების გამოცდილება და რეკომენდაციები“.
გზამკვლევი ხელმისაწვდომია შემდეგ ბმულზე - https://wave-network.org/wp-content/uploads/Toolkit-Georgian.pdf?fbclid=IwAR3BARq16d_osbFVok5ogeTVDevjYSeVIkdY2zTYzR6zg0sJWSSH6wO9sa8
გაეროს ქალთა ორგანიზაციამ და საქართველოს სტატისტიკის ეროვნულმა სამსახურმა (საქსტატმა), ევროკავშირის მხარდაჭერით, სასტუმრო „რადისონ ბლუ ივერიაში“ ქალთა მიმართ ძალადობის შესახებ ახალი ეროვნული კვლევა წარადგინეს.
ღონისძიებას ქალთა მიმართ და ოჯახში ძალადობის თემებზე მომუშავე არასამთავრობო, სამთავრობო და საერთაშორისო ორგანიზაციების წარმომადგენლები ესწრებოდნენ. პრეზენტაციაზე შეკრებილები საქართველოში ქალთა მიმართ ძალადობის ეროვნული კვლევის შედეგებს გაეცნენ და იმსჯელეს იმ ნაბიჯებზე, რომლებიც უნდა გადაიდგას ქალთა მიმართ ძალადობის აღმოსაფხვრელად საკანონმდებლო და პოლიტიკის მიმართულებით.
პრეზენტაციას ჩვენი წარმომადგენელი - ლინდა ჩიხლაძე ესწრებოდა.