ფსიქოლოგიური კონსულტაციები, ფსიქოთერაპიული სესიები - ერთ-ერთი ნაწილია იმ დახმარების, რომელსაც ჩვენი ორგანიზაცია უწევს უკრაინიდან ლტოლვილებს.

ამ ადამიანებთან ნოემბერში აქტიურად მუშაობდა ქალთა ფონდი „სოხუმის“ ფსიქოლოგი მანანა გოცირიძე. დევნილთა ფსიქორეაბილიტაციის მრავალწლიანი გამოცდილება ეხმარება მას, კარგად შეიგრძნოს უკრაინელთა განცდები. ისიც, ვისთან რა მეთოდით უმჯობესია მუშაობა. ამიტომაც გამოხატავენ ბენეფიციარები კმაყოფილებას მასთან ურთიერთობით.

6 ოჯახის წევრები იმყოფებოდნენ ფსიქოლოგთან თვის განმავლობაში, 18-მა ადამიანმა მიიღო კონსულტაცია. სამი კი ინდივიდუალურ ფსიქოთერაპიულ სესიებს ესწრება.

როგორც თავად ამბობენ, ქუთაისში მცხოვრები უკრაინელებისთვის ეს დიდი მხარდაჭერაა.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

ხობის მუნიციპალიტეტში არის ლამაზი სოფელი პირველი მაისი. იქ პირველად ჩავიდა ჩვენი ფსიქოლოგი მანანა გოცირიძე საბავშვო ბაღში მომუშავე ქალებთან სასაუბროდ.

შეხვედრის ინიციატორი იყო ნინო ურიდია, ქალთა მხარდაჭერის ცენტრის მობილიზატორი. მან თქვა, რომ ერთი შეხვედრისგან არ ელოდა ამდენ სარგებელს.

ხობში დიდი ხანი არ არის, რაც ქალთა მხარდაჭერის ცენტრი შეიქმნა და ფსიქოლოგიური კონსულტაციების სიკეთეზეც ნაკლებად იციან.

შეხვედრის ბოლოს კმაყოფილი ქალები ამბობდნენ:

• როგორ სწრაფად გაირბინა დრომ. კიდევ ბევრი დაგვრჩა სათქმელი.
• რამდენი საინტერესო და სასარგებლო რამ გავიგე.
• სხვანაირად შევხედე ცხოვრებას, გადავაფასე პრიორიტეტები.
• დავფიქრდი ჩემს ქცევაზე, ემოციებზე, რას ვაკეთებ და როგორ მოქმედებს ეს ჩემზე.
• მადლობა ამ შეხვედრისთვის ყველას, ვინც მოამზადა და განსაკუთრებით - ფსიქოლოგს.
• ხშირად ჩაგვიტარეთ ასეთი შეხვედრები.

ფსიქოლოგმა ამას გარდა 14 ფსიქოთერაპიული სესია ჩაატარა ქუთაისში და 11 ინდივიდუალური ონლაინ კონსულტაცია სხვადასხვა რეგიონში. ერთ პატარა ბიჭუნასაც გაესაუბრა ცალკე, არტთერაპიის მეშვეობით დაეხმარა სკოლასთან ადაპტაციაში, წარუმატებლობის შიშის დაძლევაში.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

ბევრი პრობლემა აქვთ ჩვენთან ჩამოსულ უკრაინელებს. ვაუჩერებით დახმარება, რასაც ჩვენი ორგანიზაცია აკეთებს, კარგი დახმარებაა მათთვის. მაგრამ სხვა კუთხითაც ხდება მხარდაჭერა: 2 ოჯახს კომუნალური გადასახადები დაუფარეს, 7 ოჯახს ბინის ქირის გადახდაში დაეხმარნენ, ერთს კი ტელეფონის საფასური  დაურიცხეს.

ერთ-ერთ ონკოპაციენტს 400 ლარის მედიკამენტი შეუძინეს. მეორეს ექიმთან კონსულტაციის თანხა გადაუხადეს.

ტყიბულში მცხოვრებმა ერთ-ერთმა ლტოლვილმა გასათბობი მოწყობილობის შეძენაში ითხოვა დახმარება და ეს საკითხიც მალე მოგვარდება.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

ერთი დღით ადრე გახსნა ქალთა ფონდმა „სოხუმმა“ საერთაშორისო საინფორმაციო კამპანია „16 აქტიური დღე ქალთა  მიმართ ძალადობის წინააღმდეგ“.

24 ნოემბერი. საღამოს 7 საათი.

ქუთაისი, რამაზ შენგელიას სახელობის სტადიონი - შენგელია არენა.

მატჩი ქუთაისის „ტორპედოსა“ და თბილისის „დინამოს“ შორის.

და... ყველაზე უჩვეულო და განსაკუთრებული:

ფეხბურთელები გამოვიდნენ თეთრი მაისურებით, რომელზეც ეწერა ჩვენი კამპანიის სლოგანი: „დაარღვიე დუმილი! აღკვეთე ძალადობა!“

ფეხბურთელებმა ეს სლოგანი დიდი ბანერის სახითაც გამოიტანეს.

ქუთაისის „ტორპედო“ ადრეც იყო 16-დღიანი კამპანიის სახე - 2003 წელს და 2013 წელს.

2003 წელს აქციაც გაიმართა სტადიონზე, თბილისის „დინამოსთან“ მატჩის წინ. მაშინ გრძელი თეთრი ლენტი შემოატარეს სტადიონზე ფეხბურთელებმა წარწერით: „ძალადობა ბოროტებაა! გავერთიანდეთ ქალთა მიმართ ძალადობის წინააღმდეგ!“

იმ დროისთვის ეს საკმაოდ სერიოზული განაცხადი და უჩვეულო აქცია იყო!

ჩვენი და სხვა ორგანიზაციების ძალისხმევის  შედეგად ალაპარაკდნენ, რომ ძალადობა სცდება ერთი ოჯახის პრობლემას და ბევრად მეტი მავნე შედეგი აქვს, ვიდრე გვგონია. პარლამენტმა სამი წლის შემდეგ, 2006 წელს მიიღო კანონი ოჯახში ძალადობის წინააღმდეგ...

20-22 ნოემბერს GIZ-ის გლობალური პროგრამის „განვითარებაზე ორიენტირებული მიგრაციის მხარდაჭერა“ ფარგლებში ქსელის წევრებს შორის გაიმართა სამუშაო შეხვედრა სასტუმრო „ამბასადორი კაჭრეთში“.

შეხვედრაზე ქალთა ფონდი „სოხუმის“ გამოცდილება ჩვენმა წარმომადგენელმა - ლინდა ჩიხლაძემ გაუზიარა მონაწილეებს.

ბოლო თვეებში უკრაინელები ვაუჩერებს იღებენ ქალთა ფონდ „სოხუმში“. ოჯახის წევრთა რაოდენობის მიხედვით გაიცემა ერთი, ორი ან სამი ასლარიანი ვაუჩერი. ვაუჩერით მათ ერთი თვის განმავლობაში შეუძლიათ საჭირო პროდუქტების შეძენა. როგორც უკრაინელები აღნიშნავენ, ეს სისტემა მოსახერხებელი და პრაქტიკულია.

ნოემბერში 32 ოჯახს გაეწია ვაუჩერებით დახმარება. ახლა ჩვენს მონაცემთა ბაზაში 370 ადამიანია - ვინც ჩვენი მხარდაჭერით სარგებლობს. ამ თვეში 13 ახალი ადამიანი დაემატა.

მართალია, ჩვენი ორგანიზაცია უკრაინელ ლტოლვილთა ბევრ საჭიროებას ვერ უზრუნველყოფს, მაგრამ ისინი ძალიან აფასებენ ჩვენს თანადგომას.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

კიშინიოვში (მოლდოვა) ეკატერინე გამახარია, ქალთა ფონდის „სოხუმის“ თბილისის წარმომადგენლობის ხელმძღვანელი, მოლდოვის სამშვიდობო მოლაპარაკებებთან შექმნილ ქალთა მრჩეველთა საბჭოს (WAB) წარმომადგენლებთან არაფორმალურ სადისკუსიო სესიას გაუძღვა. სესია გაიმართა Folke Bernadotte Academy (FBA) და UN Women-ის მხარდაჭერით, როგორც ვორკშოპის ნაწილი, რომელიც მიზნად ისახავდა საბჭოს წევრთა ადვოკატირების და მოლაპარაკებების უნარ-ჩვევების გაძლიერებას.

არაფორმალური სადისკუსიო სესიის დროს, ეკატერინემ ქალთა საბჭოს წევრებს საქართველოს სამშვიდობო პროცესებში ადგილობრივი ქალი-აქტივისტების ჩართულობის გამოცდილება გაუზიარა და დეტალურად მიმოიხილა სამშვიდობო მოლაპარაკებების დელეგატებსა და ადგილობრივ ქალთა ორგანიზაციებს შორის თანამშრომლობის დინამიკა, არსებული მიღწევები და გამოწვევები. სესია საკმაოდ ინტერაქტიულ და ღია რეჟიმში მიმდინარეობდა.

„მჯერა, გამოცდილების გაზიარების და ცოდნის გაცვლის სარგებლიანობის. შეხვედრამ დამარწმუნა, რომ მოლდოველ და ქართველ სამშვიდობო აქტივისტ ქალებს შეუძლიათ ისწავლონ ერთმანეთისგან, გააძლიერონ ერთმანეთი და გააერთიანონ ძალისხმევა ინკლუზიური მშვიდობის შენების გზაზე“, - აღნიშნა ეკატერინემ თავისი ვიზიტის შესახებ.

ქალთა ფონდი „სოხუმის“ ფსიქოლოგმა ეკატერინე ქვაჩაკიძემ თერჯოლის, სამტრედიის, ქობულეთის, ზუგდიდის და ვანის ქალთა მხარდჭერის ცენტრებში ჩაატარა შეხვედრები ჯგუფური და ინდივიდუალური ფორმატით. მონაწილეთა შორის იყვნენ: ძალადობის მსხვერპლები, კრიზისული ოჯახების წარმომადგენლები, სკოლის პედაგოგები.

ჯგუფური შეხვედრების ძირითადი თემა იყო „ტრავმული გამოცდილების გავლენა მსხვერპლსა და მოძალადეზე“. ტრავმული გამოცდილების მქონე ადამიანებს ხშირად აწუხებთ ფსიქოლოგიური სტრესი. ასეთ სიტუაციაში აუცილებელია ბავშვებთან ინდივიდუალური მუშაობა, მუშაობა ოჯახთან, მასწავლებლებთან, რის შედეგადაც მივიღებთ ეფექტურ შედეგს.

შეხვედრები მიმდინარეობდა კითხვა-პასუხის რეჟიმში. მონაწილეები საკმაოდ აქტიურობდნენ და გამოხატავდნენ კეთილგანწყობას. მათი აზრით, ასეთი შეხვედრები აუცილებელი და სასარგებლოა.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

ექვსთვიანი სატრენინგო კურსის ტრენინგები გეგმის მიხედვით ტარდება. უკვე გაიმართა 5 ტრენინგი ჩოხატაურის, სამტრედიის, სენაკის, ქობულეთის და თერჯოლის ახალგაზრდობის გაძლიერების ცენტრებში.

ეს იყო აქტუალური საკითხების განხილვა, მსჯელობა პრობლემებზე, ჯგუფური თუ ინდივიდუალური სამუშაოები, რაც დიდ ინტერესს იწვევს ახალგაზრდებში. შეხვედრებს ესწრებოდნენ მონაწილეთა მშობლები და პედაგოგები. ჩვენთვის სტიმულის მომცემია აქტიური ჩართულობა სკოლების და ოჯახების მხრიდან.

უნდა აღინიშნოს ჩვენი ინიციატივაც - ახალ ჯგუფებში ქალთა ფონდი „სოხუმის“ ტრენერებთან ერთად ტრენინგებს კურსდამთავრებულებიც ატარებენ მათთვის საინტერესო თემატიკაზე. ამას განსაკუთრებული მნიშვნელობა ენიჭება ჩვენს მუშაობაში.

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

ოჯახური ძალადობა, კანონმდებლობა, ძალადობის პრევენცია და ცნობიერების ამაღლება-ამ საკითებზე ზუგდიდის მუნიციპალიტეტის სოფელ კოკის ქალთა საინიციატივო ჯგუფის წევრებს ტრენინგი ჩაუტარდათ.ისაუბრეს ძალადობის ფორმებზე, მისგან დამცავ მექანიზმებსა და სახელმწიფო სერვისებზე. მშვიდობისა და არაძალადობრივი კულტურის პოპულარიზაციის თემას მიეძღვნა კოკის ახალგაზრდულ საინიციატივო ჯგუფთან გამართული შეხვედრა.ახალგაზრდებს მიეწოდათ ინფორმაცია კამპანიის ,,16 აქტიური დღე ქალთა მიმართ ძალადობის წინააღმდეგ ,, შესახებ.