პანდემიამ ფორუმ-თეატრის მსახიობებს ბევრი ახალი რამ ასწავლა:  ვიდეორგოლების გადაღება, მონტაჟი, მუსიკის ფონის შერჩევა...

ახალგაზრდებმა თებერვალშიც ონლაინ იმუშავეს. ფონდი „სოხუმის“ ფეისბუქგვერდზე გამოჩნდა მათი ნამუშევარი - პერსონალური ვიდეორგოლები სხვადასხვა აქტუალურ თემაზე.ამასთანავე ატარებდნენ რეპეტიციებს, რომ ღირსეულად შეხვდნენ მონატრებულ მაყურებელს.

მარტიდან ფორუმ-თეატრის მსახიობები წარმოდგენებს გამართავენ სხვადასხვა ქალაქის პარკებსა და სკვერებში.  

 

15 ახალი ორგანიზაცია შეემატა სამოქალაქო საზოგადოებას 8 მუნიციპალიტეტში. ეს ჩვენი პროექტის ერთ-ერთი მნიშვნელოვანი შედეგია. მათ დარეგისტრირების შემდეგ საჭირო სწავლებაც უტარდებათ.

„პროექტებისა და საგრანტო განაცხადების შემუშავება“ - ახალბედა ორგანიზაციების წარმომადგენლები ამ თემაზე ჩატარებულ ტრენინგს დაესწრნენ და გაეცნენ საპროექტო საგრანტო განაცხადების შედგენის პროცესსა და ეტაპებს. ონლაინ ფორმატის მიუხედავად, ტრენინგი მონაწილეთა აქტიური ჩართულობით მიმდინარეობდა. განხილული თეორიული საკითხები და კონკრეტული მაგალითები დაეხმარება მათ განაცხადის ფორმის მიხედვით საპროექტო იდეის  შემუშავებაში.

18-19 თებერვალს იმერეთის, სამეგრელოს, გურიის და აჭარის 16 ადგილობრივი თვითმმართველობისა და სამხარეო ადმინისტრაციის წარმომადგენლებთან ორდღიანი ტრენინგი ჩატარდა. პირველ დღეს განიხილეს მუნიციპალური გენდერული თანასწორობის სტრატეგიის შემუშავების საკითხი, ორგანიზაციული, ტექნიკური და მეთოდოლოგიური ასპექტები. მეორე დღე კი მუნიციპალური სამოქმედო გეგმების შემუშავებას დაეთმო.

ტრენინგის მონაწილეებს ჰქონდათ საინტერესო გამოსვლები მუნიციპალიტეტებში არსებული მიდგომების, წარმატებული პრაქტიკის და გამოწვევების საკითხებზე.

„ძალიან საჭირო პროექტია“, „ნამდვილად დიდ საქმეს აკეთებთ“, „ამ თემებზე სწავლება მთელი საქართველოს მასშტაბით უნდა ტარდებოდეს“, „მე მზად ვარ თანამშრომლობისთვის“, „უკვე მეორე წრეზე მუშაობს კონფლიქტოლოგი ჩვენს სკოლაში. ჩვენი სკოლა ყოველთვის ღიაა თქვენს მისაღებად,“ „დიდი მადლობა გაწეული შრომისთვის“, „გელით ჩოხატაურის მუნიციპალიტეტში, აქტიურად ვითანამშრომლებთ, გპირდებით!“, „თვალს გადევნებთ და აღფრთოვანებული ვარ ასეთი ახალგაზრდებით“ - ეს და ამგვარი მოსაზრებები გამოითქვა და დაიწერა ჩათში Zoom-ის პლატფორმაზე შეხვედრის დროს.

- როგორ აისახა პანდემიის გავლენა ოჯახურ ურთიერთობებზე. რა პრობლემები აქვთ ოჯახურ წყვილებს და რა რესურსები არსებობს ოჯახური კონფლიქტების ადრეული პრევენციისთვის - ამ საკითხებზე გაიმართა ონლაინ საუბარი თერჯოლაში, სენაკში, ქუთაისში, ხონში მცხოვრებ ოჯახურ წყვილებთან.

მონაწილეები მიიჩნევენ, რომ კონფლიქტურ სიტუაციებს ამწვავებს უმუშევრობა და ფსიქოლოგიური დაძაბულობა. მათი თქმით, განსაკუთრებით რთული აღმოჩნდა ადაპტაციის პერიოდი დაწყებითი კლასის მოსაწავლეებისთვის, რომლებსაც გაუჭირდათ ონლაინ ფორმატიდან უშუალო სწავლებაზე გადასვლა.

აღინიშნა, რომ ნებისმიერ ოჯახში შეიძლება შეიქმნას  კონფლიქტური სიტუაცია. მსგავსი შეხვედრები, კომუნიკაცია, ინფორმირება ამ თემებზე ამცირებს წყვილებს შორის დაპირისპირებას და ხელს უწყობს კონფლიქტების პრევენციას.

რა გაკეთდა, რა შედეგები მივიღეთ, როგორ დავძლიეთ გამოწვევები, როგორია სამომავლო მუშაობის პერსპექტივები?

ამ კითხვებზე გაიცა პასუხები საერთაშორისო სემინარზე, რომელიც ზუმის პლატფორმაზე გაიმართა 17 თებერვალს. სემინარში მონაწილეობა მიიღეს პროექტში „ონლაინ ხმის ელექტრონული მრიცხველი 2020 წლის საპარლამენტო არჩევნებისთვის“ ჩართულმა ადამიანებმა - ფონდი „სოხუმის“ წარმომადგენლებმა და ექსპერტებმა ვიშეგრადის ქვეყნებიდან: კლარა კოზლოვამ (ჩეხეთი), კატარჟინა ზელინსკამ (პოლონეთი) და პეტერ გურანმა (სლოვაკეთი).

ეს იყო აქტიური მუშაობის რამდენიმე საათი: გამოცდილების გაზიარება, მიღებულ გაკვეთილებზე საუბარი და მომავალი საქმიანობის სტრატეგიის შემუშავება.

ეს ქობულეთის ადგილობრივ თვითმმართველობასთან თანამშრომლობის პირველი წარმატებული შედეგია!

ყველაფერი ასე დაიწყო:

ფონდი „სოხუმი“ ადგილობრივი თვითმმართველობების გენდერული თანასწორობის საბჭოებთან  მათი შექმნის დღიდან თანამშრომლობს. ამ ჩამონათვალში ქობულეთის მუნიციპალიტეტი 2019 წელს მოხვდა. 11 მუნიციპალიტეტიდან ის იყო ერთადერთი, რომელსაც არცერთი პროგრამა არ ჰქონდა ოჯახში ძალადობის მსხვერპლთა დახმარებისათვის.

ფონდი „სოხუმის“ ადვოკატირებისა და მონიტორინგის ჯგუფმა და თბილისის წარმომადგენლობამ აქტიური მუშაობა დაიწყეს პროგრამის შემუშავებისთვის.

ისინი უკვე არიან ლიდერები, რადგან ფონდი „სოხუმის“ ქალთა მხარდაჭერის ცენტრების მუშაობას წარმართავენ 11 მუნიციპალიტეტში. ტრენინგიც ბევრი გაუვლიათ, თუმცა სწავლება არასოდესაა ზედმეტი. ამიტომაც ქალთა მხარდაჭერის ცენტრების მობილიზატორებისთვის ჩატარდა ორდღიანი ტრენინგი, რომელზეც განხილული იყო აქტუალური თემები: ლიდერობის ფენომენი, სამოქალაქო აქტივიზმი და ადვოკატირების სტრატეგია.

ონლაინ სივრცე მონაწილეებისთვის იქცა ადგილად, სადაც მათ შეძლეს თავიანთი ცოდნის და ინფორმაციის გაზიარება ერთმანეთისთვის, ახლებური რაკურსით დაინახეს ლიდერობა, გუნდთან მუშაობის და ადგილობრივი პრობლემების ადვოკატირების საკითხი.

 

10-11 თებერვალს საკონსულტაციო შეხვედრები გაიმართა ცაგერსა და ამბროლაურში მომუშავე პარტნიორი ორგანიზაციების და ადგილობრივი სამთავრობო სტრუქტურების წარმომადგენლებთან,  სადაც განხილული იქნა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში დაგეგმილი მესამე მონიტორინგის კითხვარი, განისაზღვრა რესპონდენტები. გამოიკვეთა ადგილობრივ მუნიციპალიტეტში გამჭვირვალობის, ეფექტიანობისა და ინკლუზიურობის კუთხით დღის წესრიგში მდგარი დასაძლევი გამოწვევები, რომელზედაც ქვეგრანტების ფარგლებში შემუშავდება მინიპროექტები ადგილობრივი სამოქალაქო სექტორის მიერ.

„სკოლები გენდერული თანასწორობის, გენდერული სტერეოტიპების და ოჯახში ძალადობის გამოწვევების პირისპირ“ - ეს პუბლიკაცია გასულ წელს მოამზადა ფონდი „სოხუმის“ მონიტორინგისა და ადვოკატირების ჯგუფმა. მასში აისახა დასავლეთ საქართველოს 11 მუნიციპალიტეტში ჩატარებული კვლევის  შედეგები. ამჟამად მიმდინარეობს აქტიური მუშაობა, რათა სკოლებში გატარდეს მიზანმიმართული პოლიტიკა გენდერული სტერეოტიპების წინააღმდეგ.

ამ საქმეში ჩვენი პარტნიორი გახდა გაზეთი „ახალი განათლება“, რომელიც გამოდის 1998 წლიდან კვირაში ერთხელ და ხელმოწერით ვრცელდება საქართველოს სკოლებში, უმაღლეს სასწავლებლებში, განათლების მიმართულებით მომუშავე სამთავრობო თუ არასამთავრობო ორგანიზაციებში. კიდევ უფრო ფართო აუდიტორია ჰყავს გაზეთის ინტერნეტვერსიას.

მე ვისწავლე, მივხვდი, გავიგე, უკვე შემიძლია - ამ სიტყვებს მოზარდები ამბობენ ჩვენი ვორკშოპების შემდეგ.

ეს სიტყვები ცვლილებებს გამოხატავს მათ ხასიათში, ქცევაში, დამოკიდებულებებში.

სწორედ ეს იყო ჩვენი მიზანი: ამ გოგო-ბიჭებს ესწავლათ, გაეგოთ, გაეკეთებინათ...

„კონფლიქტის მართვის სწავლება სკოლებში“ - ასე ჰქვია მეთოდოლოგიას, რომლითაც ხელმძღვანელობს ფონდი „სოხუმის“ ახალგაზრდული მიმართულების კონფლიქტოლოგი  ლარისა (ლელა) შენგელია.

წესი ასეთია: სკოლაში შეირჩევა ჯგუფი 10-15 მოსწავლისგან - ძირითადად, მეშვიდე-მეცხრეკლასელები. ჯგუფთან თვეში ერთხელ იმართება ვორკშოპი სხვადასხვა თემაზე: რა არის კონფლიქტი, კონფლიქტის სტადიები,  კონფლიქტის მოგვარება ადრეულ სტადიაზე და ა.შ.

დონორი ორგანიზაციები

სასარგებლო ბმულები

სოციალური ქსელები