სამი ფსიქოლოგის კეთილი საქმეები

ახლა სამი ფსიქოლოგი მუშაობს უკრაინელ ლტოლვილებთან.

მანანა გოცირიძე, რომელსაც ბევრი სამუშაო აქვს ქალთა მხარდაჭერის 10 ცენტრში და სარეაბილიტაციო ცენტრში, უკრაინელების ფსიქოემოციურ განწყობაზეც ზრუნავს.

მეორე ფსიქოლოგი, მარინა სტეპანენკო,  კიევიდანაა. ახლა მესამე ფსიქოლოგიც გვყავს - ანია შალიმოვა ხერსონიდან.

ქალთა ფონდი „სოხუმის“ მხრიდანაც კარგი ჟესტია - უცხო ქალაქში თავისი პროფესიით დაასაქმო ადამიანი, შემოსავალიც ჰქონდეს და თანაკუთხელებსაც დაეხმაროს.

საქმე ყველასთვის სამყოფია: 197 ადამიანია ჩვენს საინფორმაციო ბაზაში და ყველას სჭირდება გამხნევება, ფსიქოლოგის კომპეტენტური რჩევა...

მანანა გოცირიძე: შევხვდი ოჯახებს, რომლებიც ჩამოვიდნენ კიევიდან, ოდესიდან, ხარკოვიდან და ხერსონიდან. მარტო ამ ქალაქების დასახელებაც კმარა, რომ მივხვდეთ, რა გადაიტანეს, რას განიცდიან... ტარდება პირველადი ფსიქოლოგიური კონსულტირება, ანამნეზის შეგროვება და თითოეულთან იგეგმება შემდგომი შეხვედრები. როცა მათთან მივდივართ, პროდუქტებიც მიგვაქვს და, ვფიქრობ, ესეც კარგი დახმარებაა.

მარინა სტეპანენკო: უკრაინელ ლტოლვილებთან შეხვედრების რეგულარობა მათ  სტაბილურობის განცდას აძლევს. იციან, რომ არის ადგილი, სადაც მათი მისვლა უხარიათ, სადაც მოუსმენენ, დაეხმარებიან. არიან ქალები, რომლებიც მუდმივად ესწრებიან ინდივიდუალურ შეხვედრებს და ეს ხელს უწყობს მათი მდგომარეობის გაუმჯობესებას. საუბარი ყოველთვის სხვადასხვა თემაზეა. განცდები, რა თქმა უნდა, სახლს უკავშირდება, იქიდან მოსულ ამბებს, ახალ ადგილზე ადაპტაციას, ოჯახში ურთიერთობებს... და ყველაფერი უფრო ადვილდება, როცა მხარდაჭერას გრძნობენ.

ანია შალიმოვა: მე სულ ახლახან შევუდექი საქმეს. კარგია, რომ მომეცა ეს შესაძლებლობა. შევხვდი ქალებს და ვუთხარი, რომ გვექნებოდა ფსიქოლოგიური სეანსები, გაუხარდათ. მათ თავიანთი პრობლემები აქვთ - აქ ცხოვრება, ადაპტირება, ბავშვებზე ზრუნვა, ფიქრი უკრაინაში დარჩენილებზე, ყველა ინფორმაციის შიშით მოსმენა... დახმარება ბავშვებისთვისაც საჭიროა. მათ გონებაში დალექილია შიშები: თვითმფრინავის, სატვირთო მანქანების, ხმაურის... მართალია, მშობლებიც ცდილობენ, იმუშაონ თავიანთ შვილებთან, მაგრამ ფსიქოლოგის ჩარევას მეტი ეფექტი აქვს.

რასაც სამივე ფსიქოლოგი ერთნაირად ამბობს, ეს არის შეგრძნებები, რომლებიც ყველა მათ ბენეფიციარს აქვს: გულის, სულის ერთი ნახევარი იქაა, უკრაინაში, მშობლებთან, ქმრებთან, ძმებთან, მეორე ნაწილი - აქ... კეთილი ადამიანების და ფსიქოლოგების დახმარებით ხდება ტკივილის, ბრაზის, სიმძიმის, სტრესის, შფოთვის შემსუბუქება...

 

პროექტი ხორციელდება  ორგანიზაცია Brot für die Welt - Evangelischer

Entwicklungsdienst მხარდაჭერით (გერმანია)

სასარგებლო ბმულები

სოციალური ქსელები