საინტერესო ფორმატით წარიმართა დიალოგი სამოქალაქო განათლების მიმართულებით მომუშავე სპეციალისტებთან. ონლაინ შეხვედრის თემა - „მიგრაციის ფსიქოსოციალური, ეკონომიკური, სამართლებრივი, სტრუქტურული ასპექტები და მისი პრევენციის ღონისძიებები“.
მონაწილებს გავაცანით ფონდი „სოხუმის“ კვლევის მიგნებები, ციფრული რესურსი www.sosfsokhumi.ge, ვისაუბრეთ ქალთა მიგრაციის ძირითად ფაქტორებზე, უკონტროლო მიგრაციის ფსიქოსოციალურ შედეგებსა და შემცირების მნიშვნელობაზე.
გაიმართა საინტერესო დიალოგი მიგრაციის პრევენციის მექანიზმებზე, მიგრაციული ტენდენციის ჯგუფებზე. შეხვედრის მონაწილეებმა გაგვიზიარეს საკუთარი დაკვირვება, რომ თუ წინა წლებში მიგრაცია უფრო ქალაქის მოსახლეობას შეეხებოდა, უკვე სოფლებიც იცლება, რადგან სოფლის მეურნეობაში ძალიან რთულად შემოდის ინოვაციები, ნიადაგი გამოიფიტა, შემოსავალმა მნიშვნელოვნად იკლო. ნაკლებად ხდება წარმატებული ადგილობრივი მეწარმეების პოპულარიზაცია.
ითქვა, რომ უკონტროლო მიგრაციის შემცირება რთულია შესაბამისი პოზიტიური სოციალურ-ეკონომიკური გარემოს გარეშე, მაგრამ ამის პარალელურად, აუცილებელია, საზოგადოებამ გაიაზროს, რა ნეგატიური ფსიქოემოციური შედეგები მოსდევს მიგრაციას ოჯახებისთვის: გაუცხოება, მშობლების სითბოს მოკლებული ბავშვები, ზედმეტად მძიმე ზრუნვის ტვირთი ხანდაზმულებისთვის, რომ არაფერი ვთქვათ „ტვინების გადინებაზე“, დემოგრაფიული სურათის შეცვლაზე. ამიტომ მნიშვნელოვნად მიაჩნიათ საზოგადოებრივი დიალოგი მიგრაციის საკითხებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გეგმის მიხედვით წარიმართა ურთიერთდახმარების ჯგუფის შეხვედრები დასავლეთ საქართველოს მუნიციპალიტეტებში. ხუთი შეხვედრა ასისტენტმა ნინო ჭაბუკიანმა ჩაატარა თერჯოლაში, ვანში, ქუთაისში, წყალტუბოსა და ქობულეთში, დანარჩენი ხუთი შეხვედრის ორგანიზება და ჩატარება კი ლიდერების საქმეა და კარგადაც გაართვეს თავი.
ზუგდიდში, ჩოხატაურში, სენაკში, წალენჯიხასა და ხობში გამართულ შეხვედრებზე ჯგუფების წევრებმა განიხილეს სამოქალაქო ინიციატივების კონკურსთან დაკავშირებული საკითხები. აქცენტი გაკეთდა შენიშვნებზე, რომ შემდეგ ეტაპს უფრო მომზადებულები შეხვდნენ.
პროექტი ხორციელდება თანასწორობის ფონდის მხარდაჭერით (კანადა)
ქუთაისის, ხონის, ხობის ქალთა ჯგუფებში სამოქალაქო ინიციატივების განხორციელებისთვის მზადება იწყება. მას წინ უძღოდა სამოქალაქო დიალოგი მიგრაციის მიზეზებზე, მის ფსიქოსოციალურ შედეგებზე და პრევენციის გზებზე.
შეხვედრებზე საინტერესო მოსაზრებები გააჟღერეს ახალგაზრდებმა, რომელთაც საკითხის მიმართ საკუთარი დამოკიდებულება გააჩნიათ და მიიჩნევენ, რომ არის უამრავი ფაქიზი თემა, რომლის გააზრება საზოგადოებისთვის ძალიან მნიშვნელოვანია. მაგალითად, მათი დაკვირვებით, ზოგჯერ მშობლები ძვირადღირებული ნივთებით თავისდაუნებურად შვილების თანატოლებთან გაუცხოებას უწყობენ ხელს, რაც კიდევ უფრო ამძიმებს მათ ფსიქოემოციურ მდგომარეობას.
ამ ეტაპზე მიმდინარეობს კონსულტაციები საინიციატივო ჯგუფებთან, ხდება ღონისძიებების დაგეგმვა და სათანადო რესურსების მოძიება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ივლისში გაგრძელდა სამოქალაქო დიალოგი ქუთაისის, ხონის, ხობის ქალთა ჯგუფებში. მონაწილეებმა მიგრაციის მიზეზებზე, მის ფსიქოსოციალურ შედეგებზე და პრევენციის გზებზე ისაუბრეს.
საინტერესო იყო მათი ხედვა, რა უნდა გაკეთდეს მიგრაციის შემცირების და მისი შედეგების შემსუბუქების, ემიგრაციაში მყოფი ქალების რეინტეგრაციის და მათ ოჯახებში ფსიქოსოციალური კლიმატის გაუმჯობესების; მიგრანტი მშობლების ბავშვების ემოციური და ქცევითი მდგომარეობის თავისებურებების საკითხში პედაგოგებში ცნობიერების ამაღლების კუთხით. ზოგიერთმა მონაწილემ ამ საკითხზე თავისი გამოცდილება გაგვიზიარა:
„ძალიან ბევრი ფსიქოლოგიური ტრავმა დამიტოვა მშობლების ემიგრაციამ, ზოგ მათგანს დღემდე ვებრძვი. ყველაზე უფრო, რაც ემიგრანტი მშობლების შვილებს სჭირდებათ, არის სწორი გარემო“.
„ყველაზე მეტად სკოლის პერიოდი უნდა იყოს მათთვის ჯანსაღი, რადგან სწორედ მასწავლებელმა დააბრუნა ჩემში სინათლე“.
მონაწილეთა ნაწილმა საკუთარი ემოციების გასაჯაროობის სურვილი გამოთქვა:
„მაქვს ჩანახატები და შეგიძლიათ გააზიაროთ, რომ შემეძლოს, ყველას მივცემდი ძალას, რომ ჩემსავით ისაუბრონ ტკივილებზე“.
„სიამოვნებით ჩავერთვები საინტერესო ისტორიების აკინძვაში. მე თავადაც მაქვს მიგრაციის ხანმოკლე, მაგრამ ტკივილიანი გამოცდილება. სხვაც ბევრი ვიცი, ვინც სიამოვნებით გააზიარებდა თავის ემოციას“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანში, ღია ცის ქვეშ ქალთა ურთიერთდახმარების ჯგუფის მორიგ შეხვედრაზე მონაწილეებმა ერთმანეთს სხვადასხვა ინფორმაცია გაუზიარეს. შეხვედრის ერთი მონაკვეთი ციფრულ წიგნიერებას მიეძღვნა.
ჯგუფის წევრები ყოველთვის დიდი ინტერესით ესწრებიან შეხვედრებს. ასე იყო სოფელ ხურჩაში (ზუგდიდის მუნიციპალიტეტი), ქობულეთში, ჩოხატაურში. ქალთა ურთიერთდახმარების ჯგუფის წევრების საჭიროებების შესაბამისად, წყალტუბოში გაიხსნა ჭრა-კერვის კურსი, რაც ძალიან მნიშვნელოვანია ქალებისთვის.
შეხვედრების ერთი ნაწილი - წყალტუბოში, წალენჯიხაში, თერჯოლაში, ქუთაისში, სენაკში, ხობში - ონლაინ ჩატარდა, თუმცა არანაკლებ აქტიურად და საინტერესოდ.
ციფრული წიგნიერების მასწავლებელთან ერთად შეხვედრებზე ჩაერთო ფსიქოლოგი, რომელმაც სასარგებლო რჩევები მისცა მონაწილეებს.
ჯგუფის წევრები გაეცნენ ახალ მასალებს ჩვენს ვებგვერდზე https://sosfsokhumi.ge/ - „ძალადობაგამოვლილ ქალთა სერვისების ციფრული რესურსცენტრი“.
პროექტის ასისტენტი ნინო ჭაბუკიანი აღნიშნავს: „შეხვედრებზე ვისაუბრეთ სამოქალაქო ინიციატივების შესახებ. ჯგუფის წევრებმა შეავსეს ანკეტები, სადაც ამ ინიციატივებს აფიქსირებენ. მათ აინტერესებთ სხვადასხვა სფერო - მეფრინველეობა, კულინარია, ჭრა-კერვა. ანკეტებშიც ეს და სხვა მიმართულებებია წარმოდგენილი. ქალების აზრით, მათი ინიციატივების მხარდაჭერას დიდი მნიშვნელობა აქვს“.
პროექტი ხორციელდება თანასწორობის ფონდის მხარდაჭერით (კანადა)
თერჯოლის, ვანის და ჩოხატაურის მუნიციპალიტეტებში ინიცირებულ საინფორმაციო შეხვედრებზე ქალები გაეცნენ ჩვენი ორგანიზაციის მიერ ჩატარებული მოკვლევის „ქალთა მიგრაციის გენდერული ასპექტები“ მიგნებებს. იგეგმება მიგრაციის პრევენციისა და მისი ნეგატიური შედეგების შემცირებისკენ მიმართული ინიციატივების განხორციელება, რომლებიც კონკრეტული თემების საჭიროებებზე იქნება დაფუძნებული.
შეხვედრებზე აღინიშნა, რომ მიგრაცია არის პრობლემა, რომელიც მრავალმხრივ მუშაობას საჭიროებს, თუმცა მცირე წვლილის შეტანა ქალთა ჯგუფებსაც შეუძლიათ.
მთავარ გამოწვევებად დასახელდა: ქალთა ეკონომიკური გაძლიერება და იმ ქალების მხარდაჭერა, რომლებმაც მცირე ბიზნესი დაიწყეს, თუმცა არ იციან, როგორ გაზარდონ ბაზარი.
გამოიკვეთა, რომ ამ უნარებით აღჭურვა იქნება მიგრაციის პრევენციის ინსტრუმენტი და დაეხმარება სხვა ქალებსაც, ვისაც ეშინია მსგავს საქმიანობაში ჩართვა და შვილების უკეთესი მომავალისთვის მიგრაციას ხედავს ერთადერთ გამოსავლად.
ყურადღება გამახვილდა მიგრაციის შედეგებზე, ბავშვებზე, რომლებიც დედების გარეშე იზრდებიან. განსაკუთრებული აქცენტი გაკეთდა შვილების ტრავმებზე, რაც ფინანსური კეთილდღეობით არ ბალანსდება.
ქალებმა ამ კუთხით მუშაობა დაისახეს მიზნად როგორც ბავშვებთან, ისე მიგრანტ ქალებთან, რათა ხელი შეუწყონ შვილების და დედების ურთიერთობის გაუმჯობესებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩვენი ახალი მოკვლევა „ქალთა მიგრაციის გენდერული ასპექტები“ იყო მთავარი თემა სენაკში, წყალტუბოში, წალენჯიხასა და ზუგდიდში (სოფელი ხურჩა) გამართულ შეხვედრებზე.
შეხვედრებს ესწრებოდნენ ქალთა მხარდაჭერის ცენტრების აქტივისტები. პრეზენტაციის შემდეგ ქალთა ჯგუფები აქტიურად ჩაერთნენ დისკუსიაში სამოქალაქო ინიციატივების იდეების შესახებ. ქალების აზრით, მნიშვნელოვანია მიგრაციის თემაზე ინფორმაციის გავრცელება, მუშაობის ჩატარება მიგრანტი დედების შვილების მხარდაჭერის და ქალთა ეკონომიკური გაძლიერების კუთხით, ასევე აუცილებელია ქალების ინფორმირება, თუ რა დამცავი მექანიზმები არსებობს იმ შემთხვევაში, როცა ისინი მიდიან სხვა ქვეყნებში და ვის შეიძლება მიმართონ საჭიროების დროს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისის ქალთა ჯგუფებთან მიგრაციის საკითხებზე სამოქალაქო დიალოგი გაიმართა. შეხვედრის მონაწილეები - სხვადასხვა სოციალური ჯგუფის წარმომადგენელი ქალები - გაეცნენ ქალთა ფონდი „სოხუმის“ კვლევას „ქალთა მიგრაციის გამომწვევი მიზეზების გენდერული განზომილება: უფლებრივი მდგომარეობისა და სოციალურ-სტრუქტურული ფაქტორების ჭრილში“. შემდეგ გაიმართა დიალოგი ქალთა მიგრაციის მიზეზებზე და მის სოციალურ შედეგებზე, მიგრაციის პრევენციის ღონისძიებებზე.
მონაწილეებმა მოიყვანეს არაერთი მაგალითი - პოზიტიური ეკონომიკური ეფექტის პარალელურად, როგორი მატრავმირებელი ეფექტი აქვს მიგრაციას თავად მიგრანტ ქალებზე, მათი ოჯახის წევრებზე, განსაკუთრებით - ბავშვებზე. გულისტკივილით აღნიშნეს გაუცხოების და სხვა ფსიქოემოციური სირთულეების მომენტები.
შედგა დისკუსია იმის თაობაზე, სტრუქტურულ გადაწყვეტილებებთან ერთად, რა ძალისხმევა შეიძლება გასწიონ საზოგადოების რიგითმა წევრებმა, რათა შემცირდეს მიგრაციის ტენდენცია, შემცირდეს მისი ფსიქოემოციური ნეგატიური შედეგები.
გამოითქვა საინტერესო იდეები თემის დონეზე გასატარებელი ღონისძიებების, ამისთვის საჭირო რესურსების შესახებ. შემდგომ ეტაპზე ყველაზე საინტერესო ინიციატივების შერჩევა და მისი განხორციელება იგეგმება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ურთიერთდახმარების ჯგუფის მორიგ შეხვედრებზე განიხილეს სხვადასხვა ქეისი, იმსჯელეს პრობლემებზე, ეკონომიკური მდგომარეობის გაუმჯობესებაზე. წყალტუბოში ქალები ეძებენ სეზონურ სამუშაოებს (მოცვის, თხილის შეგროვება ან ზღვისპირა კურორტებზე მუშაობა). ზოგიერთ მათგანს აქვს ეს გამოცდილება და სხვებსაც ურჩევს, რადგან ამ შემოსავლებით ბევრ საჭიროებას მოაგვარებენ...
ხობში ჯგუფის ერთ-ერთ წევრს გადაეცა სმარტფონი, რაც გაამარტივებს მისთვის აუცილებელ კომუნიკაციას.
ქობულეთის ჯგუფის წევრები განსაკუთრებით ემადლიერებიან ჩვენს ორგანიზაციას, რადგან ამდენი სითბო და ყურადღება არავის გამოუხატავს მათ მიმართ.
ჩოხატაურის ჯგუფთან ონლაინ ჩართვა გაიმართა. ჩვენი ორგანიზაციის ფსიქოლოგიც ჩაერთო, როგორც სხვა შეხვედრებში. ურთიერთდახმარების ჯგუფის წევრების აზრით, ფსიქოლოგის სასარგებლო რჩევები მათთვის სერიოზული მხარდაჭერაა.
შეხვედრების მონაწილეებისთვის დიდი სტიმულია, რომ ასეთი ჯგუფი 10 მუნიციპალიტეტში მოქმედებს და, პროექტის ასისტენტის, ნინო ჭაბუკიანის დახმარებით, მათ აქვთ ერთმანეთის გამოცდილების გაზიარების შესაძლებლობა.
პროექტი ხორციელდება თანასწორობის ფონდის მხარდაჭერით (კანადა)
