კოპიტნარის დასახლებაში, Danner-ის პროექტის ფარგლებში, დასრულდა საბაზისო ერთთვიანი ჭრა-კერვის კურსი, რომლის მიზანი ქალების პრაქტიკული უნარების განვითარება და მათი ეკონომიკური გაძლიერების ხელშეწყობა იყო.
ერთი თვის განმავლობაში მონაწილეებმა შეისწავლეს კერვის საწყისი ტექნიკები, იმუშავეს პრაქტიკულ დავალებებზე და საკუთარი ხელით შექმნეს პირველი ნამუშევრები. კურსის დასრულების შემდეგ მათ სერტიფიკატები გადაეცათ.
მონაწილეების შეფასებით, კურსი მათთვის მხოლოდ პროფესიული უნარის შეძენა არ ყოფილა. ეს იყო შესაძლებლობა, საკუთარ შესაძლებლობებში მეტად დარწმუნებულიყვნენ, ახალი ინტერესი აღმოეჩინათ და ეფიქრათ, როგორ შეიძლება მიღებული ცოდნა მომავალში პირად თუ ეკონომიკურ გაძლიერებად აქციონ.
„თავიდან მეგონა, ვერ შევძლებდი, მაგრამ როცა ჩემი ხელით შეკერილი ნივთი დავინახე, საკუთარ თავში ახალი ძალა აღმოვაჩინე“, — აღნიშნა ერთ-ერთმა მონაწილემ.
პროექტის ფარგლებში დაგეგმილი მსგავსი აქტივობები ხელს უწყობს ქალების თვითრწმენის გაზრდას, პრაქტიკული უნარების განვითარებას და ადგილობრივ დონეზე მათი შესაძლებლობების გაძლიერებას.
პროექტი ხორციელდება CISU-ის მხარდაჭერით
ქალთა ფონდმა „სოხუმმა“ ონლაინ ფორმატში გამართა გაერთიანებული საინფორმაციო შეხვედრა თემაზე: „ტრავმა-ინფორმირებული მიდგომები ოჯახში ძალადობის კონტექსტში“.
შეხვედრამ 10 მუნიციპალიტეტის წარმომადგენლები გააერთიანა. მონაწილეებმა შეაჯამეს ვორკშოპების ფარგლებში მიღებული ცოდნა, ისაუბრეს პრაქტიკულ გამოცდილებაზე და იმაზე, თუ როგორ შეიძლება ტრავმა-ინფორმირებული მიდგომების გამოყენება ძალადობაგამოვლილი ქალების მხარდაჭერის პროცესში.
დისკუსიის დროს გამოიკვეთა, რომ ტრავმა-ინფორმირებული მიდგომა მხოლოდ თანაგრძნობა არ არის. ეს არის ქალის გამოცდილების, შიშის, დუმილის, გაურკვეველი რეაქციებისა და გადაწყვეტილებების უფრო ღრმად გაგების მცდელობა. მონაწილეთა შეფასებით, ასეთი ცოდნა ეხმარება სპეციალისტებსა და თემის წარმომადგენლებს, ძალადობაგამოვლილ ქალებთან ურთიერთობისას ნაკლები შეფასება და მეტი უსაფრთხოება შექმნან.
შეხვედრაზე მონაწილეებმა გააზიარეს, რომ მიღებული ცოდნის შემდეგ მათთვის უფრო ნათელი გახდა, რატომ შეიძლება ქალმა ვერ ისაუბროს პირველივე შეხვედრაზე, რატომ უჭირს დახმარების თხოვნა და რამდენად მნიშვნელოვანია ნდობაზე დაფუძნებული კომუნიკაცია.
განხილვისას ასევე გამოიკვეთა ადგილობრივ თემებში არსებული საჭიროებები - ტრავმა-ინფორმირებული მიდგომების უფრო ფართოდ დანერგვა, სერვისების გაძლიერება, სპეციალისტების გადამზადება და ქსელური თანამშრომლობის განვითარება.
შეხვედრის მონაწილეებმა აღნიშნეს, რომ მსგავსი სივრცეები მნიშვნელოვანია გამოცდილების გაზიარებისთვის, საერთო გამოწვევების დასანახად და ქალთა მხარდაჭერის უფრო ეფექტიანი პრაქტიკის ჩამოსაყალიბებლად.
პროექტი ხორციელდება CISU-ის მხარდაჭერით
კოპიტნარის დასახლებაში, წყალტუბოს მუნიციპალიტეტში, ქალებისთვის კერვის კურსი დაიწყო.
კურსი მონაწილეებს აძლევს შესაძლებლობას, შეისწავლონ ახალი პრაქტიკული უნარი, მიიღონ პროფესიული გამოცდილება და ჩაერთონ ისეთ სივრცეში, რომელიც მათთვის ცოდნის მიღებასთან ერთად, ურთიერთობის, თვითგამოხატვისა და გაძლიერების შესაძლებლობაცაა.
პირველ შეხვედრაზე მონაწილეები გაეცნენ კურსის მიზანს, სამუშაო პროცესს და იმ ძირითად მიმართულებებს, რომლებსაც მომდევნო კვირების განმავლობაში ეტაპობრივად შეისწავლიან. შეხვედრამ თბილ და საქმიან გარემოში ჩაიარა. მონაწილეების მხრიდან იგრძნობოდა მოლოდინი, ცნობისმოყვარეობა და სურვილი, რომ ახალი ცოდნა რეალურ შესაძლებლობად აქციონ.
კერვა მხოლოდ ტექნიკური უნარი არ არის. ერთი შეხედვით, ის ნემსით, ძაფითა და ქსოვილით იწყება, თუმცა ხშირად გაცილებით მეტს ნიშნავს — ახალი გამოცდილების მიღებას, საკუთარ შესაძლებლობებში დარწმუნებას და მომავლის მიმართ უფრო მკაფიო ხედვის გაჩენას.
მსგავსი კურსები განსაკუთრებით მნიშვნელოვანია იმ ქალებისთვის, რომლებსაც სჭირდებათ მხარდაჭერა, ახალი უნარების განვითარება და სოციალური თუ ეკონომიკური გაძლიერებისკენ გადადგმული პრაქტიკული ნაბიჯები.
წინ მონაწილეებს რამდენიმე კვირის განმავლობაში ელით ახალი ცოდნა, პრაქტიკული მუშაობა, გამოცდილების გაზიარება და, შესაძლოა, ისეთი შესაძლებლობების აღმოჩენაც, რომლებიც კურსის დასაწყისში ჯერ მხოლოდ მოლოდინის სახით არსებობდა.
პროექტი ხორციელდება CISU-ის მხარდაჭერით
ქუთაისში, საქველმოქმედო-ჰუმანიტარული ქალთა ფონდი „სოხუმის“ ორგანიზებით, სამედიცინო პერსონალისთვის ტრენინგი გაიმართა თემაზე: „სამედიცინო პერსონალის როლი ოჯახში ძალადობაგამოვლილ ქალებთან ტრავმა-ინფორმირებული კომუნიკაციისა და მხარდაჭერის პროცესში“.
ტრენინგში მონაწილეობდა 20 სამედიცინო პერსონალი - ექიმები და მედდები ქუთაისიდან, წყალტუბოდან, ხონიდან, სენაკიდან და ზუგდიდიდან.
შეხვედრის მთავარი მიზანი იყო სამედიცინო პერსონალის ცნობიერების ამაღლება ტრავმა-ინფორმირებული მიდგომების, სენსიტიური კომუნიკაციისა და ოჯახში ძალადობის შემთხვევებზე რეაგირების მექანიზმების შესახებ. მონაწილეებმა იმსჯელეს სტერეოტიპული მიდგომების გავლენაზე, ტრავმის შემდეგ ქალის ემოციურ მდგომარეობაზე და იმაზე, თუ როგორ შეიძლება გახდეს სამედიცინო პერსონალთან პირველი კონტაქტი ქალისთვის მხარდაჭერისა და უსაფრთხოების განცდის დასაწყისი.
ტრენინგის ერთ-ერთი მნიშვნელოვანი ნაწილი დაეთმო რეფერირების მექანიზმს. ემა კამკიას ბლოკის ფარგლებში მონაწილეებმა განიხილეს რეფერირების პროცესში ჩართული სუბიექტების როლი, სამედიცინო პერსონალის პასუხისმგებლობები, დოკუმენტირების საკითხები, შესაბამის უწყებებთან თანამშრომლობა და რისკების შეფასების მექანიზმები.
ტრავმა-ინფორმირებული კომუნიკაციის ბლოკს ფასილიტაციას უწევდა ხათუნა გოგუა. მონაწილეებმა იმუშავეს იმაზე, როგორ უნდა წარიმართოს კომუნიკაცია ძალადობაგამოვლილ ქალთან ისე, რომ არ გაღრმავდეს მისი შიში, სირცხვილი ან დაუცველობის განცდა.
დისკუსიისას მონაწილეებმა აღნიშნეს, რომ რეფერირების დოკუმენტაცია უნდა იყოს უფრო კომპაქტური და პრაქტიკული, რათა მისი გამოყენება რეალურ სამუშაო გარემოში უფრო ეფექტურად იყოს შესაძლებელი და დამატებითი დისკომფორტი არ შეუქმნას არც მსხვერპლს და არც სამედიცინო პერსონალს.
„ჩვენ, ექიმები, არასოდეს ვყოფილვართ მსგავსი თემატიკის ტრენინგებზე. მივიღეთ ინფორმაცია, რომელიც არამხოლოდ მნიშვნელოვანია, არამედ აუცილებელია ჩვენს საქმიანობაში“, — აღნიშნა ერთ-ერთმა მონაწილემ.
„მივდივართ ემოციურად და ინფორმაციულად სავსეები. დავფიქრდით საკუთარ პასუხისმგებლობაზე. ჩვენს პრაქტიკაში ხშირად გვაქვს შეხება ძალადობაგამოვლილ ქალებთან და მათთან კომუნიკაცია განსაკუთრებით მნიშვნელოვანია“, — თქვა ტრენინგის მონაწილემ.
შეხვედრის ბოლოს მონაწილეებმა ხაზი გაუსვეს გამოცდილების გაზიარებისა და პრაქტიკული ცოდნის მნიშვნელობას. ტრენინგმა კიდევ ერთხელ გამოკვეთა, რომ ძალადობაგამოვლილ ქალებთან მუშაობის პროცესში სამედიცინო პერსონალის როლი მხოლოდ დიაგნოზითა და მკურნალობით არ შემოიფარგლება — ის უკავშირდება ქალის უსაფრთხოებას, ნდობას და მხარდაჭერას.
პროექტი ხორციელდება CISU-ის მხარდაჭერით
ქუთაისში, საქველმოქმედო-ჰუმანიტარული ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ ჩაატარა ტრენინგი თემაზე: „ტრავმაზე ინფორმირებული მიდგომა და ძალადობის დინამიკის გააზრება ძალადობაგამოვლილ ქალებთან მუშაობაში“.
ტრენინგში მონაწილეობდნენ პარასპეციალისტები და სათემო ლიდერები, რომლებიც ყოველდღიურ საქმიანობაში ძალადობაგამოვლილ ქალებთან მუშაობენ. შეხვედრის მიზანი იყო მონაწილეების გაძლიერება ტრავმაზე ინფორმირებული მიდგომის გამოყენებაში და ძალადობის დინამიკის უფრო სიღრმისეული გააზრება.
ტრენინგის განმავლობაში განხილული იყო ძალადობის სოციალური საფუძვლები, გენდერული ნორმებისა და სტერეოტიპების გავლენა, ძალადობა როგორც კონტროლის სისტემა, ძალადობის ციკლი და სპირალი, ასევე ტრავმის გავლენა ქალის ქცევასა და გადაწყვეტილებებზე.
განსაკუთრებული ყურადღება დაეთმო პრაქტიკულ ქეისებს, ჯგუფურ მუშაობას და ტრავმაზე ინფორმირებული კომუნიკაციის პრინციპებს. მონაწილეებმა იმსჯელეს, როგორ შეიძლება ქალის რეაქციებისა და ქცევის სწორად დანახვა ტრავმის კონტექსტში და როგორ უნდა შეიქმნას უსაფრთხო, არამსჯელობითი სივრცე მხარდაჭერის პროცესში.
შეხვედრამ კიდევ ერთხელ გამოკვეთა, რომ ძალადობაგამოვლილ ქალებთან მუშაობა იწყება გაგებით, სენსიტიური კომუნიკაციითა და იმ გამოცდილების დანახვით, რომელიც ქალის გადაწყვეტილებებსა და ემოციურ მდგომარეობაზე გავლენას ახდენს.
პროექტი ხორციელდება CISU-ის მხარდაჭერით
ქალთა ურთიერთდახმარების ჯგუფის შეხვედრების ნაწილი ონლაინ გაიმართა. წალენჯიხის ჯგუფმა ონლაინ ისაუბრა მუშაობის მნიშვნელობაზე და აღნიშნა მხარდაჭერა, რომელსაც ფონდი „სოხუმი“ იჩენს ქალების მიმართ. შეხვედრის ერთი ნაწილი სწავლებას მიეძღვნა - ტრენერმა ქრისტინე ქუთათელაძემ წარმოადგინა პრეზენტაცია ხელოვნური ინტელექტის თემაზე და უპასუხა შეკითხვებს.
სენაკში ყურადღება გამახვილდა ქალთა სოლიდარობის თემაზე, ძალადობის პრობლემაზე და განსაკუთრებით - ციფრულ ძალადობაზე. შეხვედრის მონაწილეებს დაურიგდა ჩვენი გამოცემა „პარტნიორულ ურთიერთობებში ტექნოლოგიების გამოყენებით ჩადენილი ძალადობა – ამოიცანი და დაიცავი თავი“.
ქობულეთის და დანარჩენი ჯგუფების მორიგი შეხვედრაც საინტერესოდ წარიმართა. ისაუბრეს ქალთა უფლებებზე, მუნიციპალურ სერვისებზე, ცვლილებებსა და სიახლეებზე. მუშაობაში ჩაერთო ფსიქოლოგი, რომელმაც ჯგუფური და ინდივიდუალური კონსულტაციები ჩაატარა.
მოსწონთ ქალებს შეხვედრები, სადაც მსჯელობენ პრობლემებზე და მათ მოგვარებაზე. ჯგუფის მუშაობამ ახალი ცოდნა და გამოცდილება შესძინა თითოეულ მათგანს. იმედი აქვთ, რომ ერთიანი ძალისხმევით მეტის გაკეთება შეუძლიათ.
პროექტი ხორციელდება თანასწორობის ფონდის მხარდაჭერით (კანადა)
რიტრითი გასვლითი სამუშაო შეხვედრაა, ფსიქოლოგიური და ფიზიკური რესტარტი, გადატვირთვა, რომელიც სასიამოვნოდ დაამახსოვრდება ყველას.
ფონდი „სოხუმის“ თანამშრომლებმა ოჯახის წევრებთან ერთად სამი დღე გაატარეს სასტუმრო „ბორჯომი პალასში“. (ძირითადად - შვილები იყვნენ - კარგები, ლამაზები, ნიჭიერები)...
იყო ექსკურსიები რაბათის ციხეში, სერაფიმ საროველის ტაძარში, სადგერის წმინდა გიორგის სახელობის ტაძარში, სეირნობა ბორჯომის პარკში, ქუჩებში...
ფსიქოლოგ ინა აირაპეტიანთან ერთად მუშაობის დროს მონაწილეები ეძებდნენ პასუხებს კითხვებზე: რა მდგომარეობაში ვართ? რა ფაქტორები მოქმედებს ჩვენზე ნეგატიურად? რაზე შეგვიძლია გავლენა? რის შეცვლას შევძლებთ? სად ვიპოვოთ ახალი ძალები და რესურსები?
რა თქმა უნდა, უამრავი შინაგანი რესურსი „აღმოვაჩინეთ“, ჩვენი საშინაო და საგარეო „ნიღბები“ შევქმენით და გავშიფრეთ, „თავდაცვის“ ახალი ტექნიკები ვისწავლეთ, ერთმანეთი უკეთ დავინახეთ, ჩავფიქრდით, ვიტირეთ, ვიცინეთ...
ბოლოს ბავშვებმა სიურპრიზი მოგვიწყვეს: ფორუმ-თეატრის სცენა წარმოადგინეს, იცეკვეს, ლექსები წაიკითხეს...
მივხვდით: რესურსები ჩვენშია, ჩვენი ოჯახებია და კიდევ: ბენეფიციარები, ვისთვისაც მუშაობს ეს ორგანიზაცია, ვის მხარდაჭერასაც ცდილობს, თითქმის 30 წელია...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სასტუმრო „გელათი რეზიდენსში“ გაიმართა შემაჯამებელი კონფერენცია თემაზე „ქალთა გაძლიერება და მდგრადი მხარდაჭერის მექანიზმები თემებში: გამოცდილება, შედეგები და ზეგავლენა“
შეხვედრამ გააერთიანა 50 მონაწილე ქალი სხვადასხვა მუნიციპალიტეტიდან: ურთიერთდახმარების ჯგუფების ლიდერები და წევრები, პარასპეციალისტები, სამოქალაქო ინიციატივების მონაწილეები და ფონდი „სოხუმის“ წარმომადგენლები.
ქალებმა საკუთარი გამოცდილება, მიღწეული ცვლილებები და გამოწვევები გააზიარეს ოთხ თემატურ პანელზე:
- ქალთა ურთიერთდახმარების ჯგუფები, როგორც უსაფრთხო სივრცე ქალთა სოციალური გაძლიერებისა და ციფრული უნარების განვითარებისათვის.
- ქალთა მიერ განხორციელებული სამოქალაქო ინიციატივები, რომლებიც რეალურ ცვლილებად იქცა მუნიციპალიტეტებში.
- პარასპეციალისტების მხარდაჭერა და შედეგები ქალთა ცხოვრებაში
- ძალადობაგამოვლილ ქალთა მხარდაჭერის სერვისებზე ინფორმაციის ციფრული პლატფორმები და სოციალური მედია ქალთა ინფორმირებისა და სერვისებზე ხელმისაწვდომობის გაზრდაში.
პროექტის შეფასებამ აჩვენა, რომ თემზე დაფუძნებული მხარდაჭერის მოდელები აძლიერებს სოციალურ და ეკონომიკურ ჩართულობას, იზრდება ციფრული უსაფრთხოების და ინფორმაციის ხელმისაწვდომობის მნიშვნელობა, ყალიბდება ურთიერთდახმარებისა და სოლიდარობის ქსელები თემებში.
ღონისძიების დასასრულს პროექტში აქტიურად ჩართული ქალები დაჯილდოვდნენ.
პროექტი ხორციელდება თანასწორობის ფონდის მხარდაჭერით (კანადა)
მიგრაცია სერიოზული და საკმაოდ აქტუალური თემაა. განსაკუთრებით ემოციურია საზღვარგარეთ წასული მშობლების და შინ დარჩენილი შვილების ურთიერთობა.
ეს საკითხები არავის ტოვებს გულგრილს: უამრავი მაგალითია, საკუთარი ოჯახის თუ ახლობელ-მეზობლების.
ასე იყო კოპიტნარის დევნილთა დასახლებაში ქალებთან და გოგონებთან ჩატარებულ შეხვედრაზეც. მით უმეტეს, რომ შეხვედრაზე იმყოფებოდა ჩვენი ორგანიზაციის ფსიქოლოგი. იყო ბევრი შეკითხვა, სხვადასხვა ისტორიის გახსენება, ფსიქოლოგის რჩევები...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
