ივლისში გაგრძელდა სამოქალაქო დიალოგი ქუთაისის, ხონის, ხობის ქალთა ჯგუფებში. მონაწილეებმა მიგრაციის მიზეზებზე, მის ფსიქოსოციალურ შედეგებზე და პრევენციის გზებზე ისაუბრეს.
საინტერესო იყო მათი ხედვა, რა უნდა გაკეთდეს მიგრაციის შემცირების და მისი შედეგების შემსუბუქების, ემიგრაციაში მყოფი ქალების რეინტეგრაციის და მათ ოჯახებში ფსიქოსოციალური კლიმატის გაუმჯობესების; მიგრანტი მშობლების ბავშვების ემოციური და ქცევითი მდგომარეობის თავისებურებების საკითხში პედაგოგებში ცნობიერების ამაღლების კუთხით. ზოგიერთმა მონაწილემ ამ საკითხზე თავისი გამოცდილება გაგვიზიარა:
„ძალიან ბევრი ფსიქოლოგიური ტრავმა დამიტოვა მშობლების ემიგრაციამ, ზოგ მათგანს დღემდე ვებრძვი. ყველაზე უფრო, რაც ემიგრანტი მშობლების შვილებს სჭირდებათ, არის სწორი გარემო“.
„ყველაზე მეტად სკოლის პერიოდი უნდა იყოს მათთვის ჯანსაღი, რადგან სწორედ მასწავლებელმა დააბრუნა ჩემში სინათლე“.
მონაწილეთა ნაწილმა საკუთარი ემოციების გასაჯაროობის სურვილი გამოთქვა:
„მაქვს ჩანახატები და შეგიძლიათ გააზიაროთ, რომ შემეძლოს, ყველას მივცემდი ძალას, რომ ჩემსავით ისაუბრონ ტკივილებზე“.
„სიამოვნებით ჩავერთვები საინტერესო ისტორიების აკინძვაში. მე თავადაც მაქვს მიგრაციის ხანმოკლე, მაგრამ ტკივილიანი გამოცდილება. სხვაც ბევრი ვიცი, ვინც სიამოვნებით გააზიარებდა თავის ემოციას“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისში, სასტუმრო „არგოში“ ჩატარდა ტრენინგი თემაზე „ლიდერობა იძულებით გადაადგილებული და სოფლად მცხოვრები ქალებისთვის“. მონაწილეობდნენ თვითდახმარების ჯგუფის წევრები ქუთაისის, წყალტუბოს, ხონის, ხაშურის, საჩხერის მუნიციპალიტეტებიდან.
ამ ტრენინგით დაიწყო პროექტის „ქალები მოქმედებენ მშვიდობისა და ადგილობრივი თემების გაძლიერებისთვის“ ფარგლებში დაგეგმილი ტრენინგების ციკლი. ტრენინგების მიზანია თვითდახმარების ჯგუფის წევრთა მომზადება სათანადო ცოდნით და უნარებით, დევნილთა და კონფლიქტით დაზარალებულთა თემებში სოციალური მუშაობის გაძლიერებისთვის.
მონაწილეთა შეფასებით, ტრენინგი იყო: საინტერესო, აქტიური, დინამიური, პროდუქტიული.
ტრენინგის პირველი ნაწილი ქალთა ლიდერობის, ლიდერობის მახასიათებლებისა და ძირითადი კომპონენტების განხილვას დაეთმო. მეორე ნაწილი იმიტაციური სავარჯიშოებით და თემატური ვიდეორგოლებით გაგრძელდა. პრეზენტაციის, თვითპრეზენტაციისა და საჯარო გამოსვლის მნიშვნელობა მონაწილეებმა აქტიური ინტერაქციით დაასაბუთეს.
მონაწილეთა აზრით, ქალთა ლიდერობის განვითარება მნიშვნელოვანია ქალთა საჭიროებების იდენტიფიცირებისა და უზრუნველყოფისთვის. ლიდერობის თემაზე სხვა ჯგუფებიც გაივლიან ტრენინგებს, ეს ჯგუფი კი ახალ თემაზე იმუშავებს.
კონფლიქტის მართვისა და ძალადობის პრევენციის სატრენინგო კურსში დასავლეთ საქართველოს ათი მუნიციპალიტეტის მოზარდები ონლაინ ფორმატში აქტიურად ერთვებიან. ისინი გულწრფელად საუბრობენ თანატოლებში არსებულ გამოწვევებზე, სტერეოტიპებზე და ცვლილებების სურვილზე.
„ვხვდები, რომ რაც უფრო მეტს ვიგებ, მით მეტად მინდა გავხადო სხვებიც ინფორმირებული. მინდა, დავიცვა საკუთარი თავიც და სხვასაც დავეხმარო,“ – აღნიშნა ერთ-ერთმა მონაწილემ.
ახალგაზრდებს სურთ, თავიანთ რეგიონებში მშვიდობის ელჩებად იქცნენ და გახდნენ პოზიტიური ცვლილებების ავტორები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხუთ მუნიციპალიტეტში, ქალთა მხარდაჭერის ცენტრებში (ხურჩა/ზუგდიდი, წყალტუბო, სენაკი, ვანი, თერჯოლა) გამართა შეხვედრები ფონდი „სოხუმის“ ფსიქოლოგმა. შეხვედრების ძირითადი თემა იყო „ქალებზე ძალადობა და ურთიერთობების მნიშვნელობა“.
ეს შეხვედრები ნიშნავს მათ მხარდაჭერას და გვერდში დგომას, რაც განსაკუთრებით მნიშვნელოვანია მათთვის, ვინც ოდესმე ძალადობას გადააწყდა. ძალადობა არ არის მხოლოდ ფიზიკური სახის (დარტყმა, ცემა), ის ხშირად არის სიჩუმე, შიში, შეურაცხმყოფელი სიტყვები და დაკარგული თვითშეფასება. ხშირად ძალადობა ხდება უხმოდ, ოჯახის კედლებში, საიდანაც ხმა გარეთ არ გადის. ფსიქოლოგის აზრით, ამიტომაც არის აუცილებელი შეხვედრები და პირადი კავშირები ასეთ ქალებთან, რათა ვუთხრათ: „შენ მარტო არ ხარ“! ერთ შეხვედრაში შეიძლება დაიბადოს ძალა, ალაპარაკდეს, ითხოვოს დახმარება, ჩვენ კი შევძლებთ მის მხარდაჭერას და გადარჩენას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანში, ღია ცის ქვეშ ქალთა ურთიერთდახმარების ჯგუფის მორიგ შეხვედრაზე მონაწილეებმა ერთმანეთს სხვადასხვა ინფორმაცია გაუზიარეს. შეხვედრის ერთი მონაკვეთი ციფრულ წიგნიერებას მიეძღვნა.
ჯგუფის წევრები ყოველთვის დიდი ინტერესით ესწრებიან შეხვედრებს. ასე იყო სოფელ ხურჩაში (ზუგდიდის მუნიციპალიტეტი), ქობულეთში, ჩოხატაურში. ქალთა ურთიერთდახმარების ჯგუფის წევრების საჭიროებების შესაბამისად, წყალტუბოში გაიხსნა ჭრა-კერვის კურსი, რაც ძალიან მნიშვნელოვანია ქალებისთვის.
შეხვედრების ერთი ნაწილი - წყალტუბოში, წალენჯიხაში, თერჯოლაში, ქუთაისში, სენაკში, ხობში - ონლაინ ჩატარდა, თუმცა არანაკლებ აქტიურად და საინტერესოდ.
ციფრული წიგნიერების მასწავლებელთან ერთად შეხვედრებზე ჩაერთო ფსიქოლოგი, რომელმაც სასარგებლო რჩევები მისცა მონაწილეებს.
ჯგუფის წევრები გაეცნენ ახალ მასალებს ჩვენს ვებგვერდზე https://sosfsokhumi.ge/ - „ძალადობაგამოვლილ ქალთა სერვისების ციფრული რესურსცენტრი“.
პროექტის ასისტენტი ნინო ჭაბუკიანი აღნიშნავს: „შეხვედრებზე ვისაუბრეთ სამოქალაქო ინიციატივების შესახებ. ჯგუფის წევრებმა შეავსეს ანკეტები, სადაც ამ ინიციატივებს აფიქსირებენ. მათ აინტერესებთ სხვადასხვა სფერო - მეფრინველეობა, კულინარია, ჭრა-კერვა. ანკეტებშიც ეს და სხვა მიმართულებებია წარმოდგენილი. ქალების აზრით, მათი ინიციატივების მხარდაჭერას დიდი მნიშვნელობა აქვს“.
პროექტი ხორციელდება თანასწორობის ფონდის მხარდაჭერით (კანადა)
ქალთა მხარდაჭერის ცენტრებში ძალადობის შემთხვევების იდენტიფიცირების მაჩვენებელი გაზრდილია. პროცესს ხელი შეუწყო პარასპეციალისტების საქმიანობამ. მთელი თვის განმავლობაში 12 ქეისი გამოვლინდა. სოციალური მუშაობის შედეგად 150-ზე მეტ ბენეფიციარს მიეწოდა ინფორმაცია მსხვერპლთა დახმარების სერვისებზე. ქალები ისმენენ კონსულტაციებს როგორც სამართლებრივი, ასევე ფსიქოლოგიური მიმართულებით. მათ გვერდით მუდმივად არიან ცენტრის მობილიზატორები.
12 ქეისიდან ფსიქოლოგის ჩართულობით მდგომარეობა გაიუმჯობესა ათმა ბენეფიციარმა, სამართლებრივ საკითხებზე იურისტთან აგრძელებს მუშაობას ორი ბენეფიციარი.
ჩვენი ორგანიზაციის სარეაბილიტაციო ცენტრში ფსიქორეაბილიტაცია გაიარა ორმა ქალმა შვილებთან ერთად - მათი სტაბილური მდგომარეობა კომპლექსური მუშაობის შედეგია.
ქალების უკუკავშირიდან:
„როცა ზუსტად იცი, ვის უნდა მიმართო და ამაში დრო არ გეკარგება, ეს მნიშვნელოვანი დახმარებაა“.
„მარტოხელა დედა ვარ, სოციალური დახმარება გამიჩერდა, არ ვიცოდი, ვისთვის მეთხოვა დახმარება, ფონდი „სოხუმის“ წარმომადგენლები დამეხმარნენ“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
თერჯოლის, ვანის და ჩოხატაურის მუნიციპალიტეტებში ინიცირებულ საინფორმაციო შეხვედრებზე ქალები გაეცნენ ჩვენი ორგანიზაციის მიერ ჩატარებული მოკვლევის „ქალთა მიგრაციის გენდერული ასპექტები“ მიგნებებს. იგეგმება მიგრაციის პრევენციისა და მისი ნეგატიური შედეგების შემცირებისკენ მიმართული ინიციატივების განხორციელება, რომლებიც კონკრეტული თემების საჭიროებებზე იქნება დაფუძნებული.
შეხვედრებზე აღინიშნა, რომ მიგრაცია არის პრობლემა, რომელიც მრავალმხრივ მუშაობას საჭიროებს, თუმცა მცირე წვლილის შეტანა ქალთა ჯგუფებსაც შეუძლიათ.
მთავარ გამოწვევებად დასახელდა: ქალთა ეკონომიკური გაძლიერება და იმ ქალების მხარდაჭერა, რომლებმაც მცირე ბიზნესი დაიწყეს, თუმცა არ იციან, როგორ გაზარდონ ბაზარი.
გამოიკვეთა, რომ ამ უნარებით აღჭურვა იქნება მიგრაციის პრევენციის ინსტრუმენტი და დაეხმარება სხვა ქალებსაც, ვისაც ეშინია მსგავს საქმიანობაში ჩართვა და შვილების უკეთესი მომავალისთვის მიგრაციას ხედავს ერთადერთ გამოსავლად.
ყურადღება გამახვილდა მიგრაციის შედეგებზე, ბავშვებზე, რომლებიც დედების გარეშე იზრდებიან. განსაკუთრებული აქცენტი გაკეთდა შვილების ტრავმებზე, რაც ფინანსური კეთილდღეობით არ ბალანსდება.
ქალებმა ამ კუთხით მუშაობა დაისახეს მიზნად როგორც ბავშვებთან, ისე მიგრანტ ქალებთან, რათა ხელი შეუწყონ შვილების და დედების ურთიერთობის გაუმჯობესებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩვენი ახალი მოკვლევა „ქალთა მიგრაციის გენდერული ასპექტები“ იყო მთავარი თემა სენაკში, წყალტუბოში, წალენჯიხასა და ზუგდიდში (სოფელი ხურჩა) გამართულ შეხვედრებზე.
შეხვედრებს ესწრებოდნენ ქალთა მხარდაჭერის ცენტრების აქტივისტები. პრეზენტაციის შემდეგ ქალთა ჯგუფები აქტიურად ჩაერთნენ დისკუსიაში სამოქალაქო ინიციატივების იდეების შესახებ. ქალების აზრით, მნიშვნელოვანია მიგრაციის თემაზე ინფორმაციის გავრცელება, მუშაობის ჩატარება მიგრანტი დედების შვილების მხარდაჭერის და ქალთა ეკონომიკური გაძლიერების კუთხით, ასევე აუცილებელია ქალების ინფორმირება, თუ რა დამცავი მექანიზმები არსებობს იმ შემთხვევაში, როცა ისინი მიდიან სხვა ქვეყნებში და ვის შეიძლება მიმართონ საჭიროების დროს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩვენი ორგანიზაციის სარეაბილიტაციო ცენტრის კარი ყოველთვის ღიაა მათთვის, ვისაც მხარდაჭერა სჭირდება.
25 წლის ქალი, სამი შვილის დედა, დაშინებული და დამცირებული, მძიმე გამოცდილების შემდეგ ცენტრში მოხვდა. პირველ დღესვე აღნიშნა პროფესიული გუნდის გულისხმიერება.
ფსიქოლოგის, იურისტის, სოციალური მუშაკის, ბავშვებთან მუშაობის ასისტენტის ერთობლივმა ძალისხმევამ ეს შედეგი გამოიღო: „ნანახმა ყოველგვარ მოლოდინს გადააჭარბა, ვერც კი წარმომედგინა, რომ მსგავსი მხარდამჭერი სერვისი სადმე არსებობდა... აქ ნამდვილად იგრძნობოდა სითბო, ყურადღება და ზრუნვა“...
ცენტრში მან პირველად დაიჯერა, რომ შეიძლება ცხოვრების თავიდან დაწყება. პატივისცემა, ზრუნვა და გულწრფელი მხარდაჭერა გახდა მისი პირველი ნაბიჯი საკუთარი თავისკენ.
ეს მხოლოდ ერთი ისტორიაა. ცენტრში მოსული ყოველი ქალი თავის ისტორიას წერს...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
