ფორუმ-თეატრის წარმოდგენები ძალადობას, ბულინგს, ოჯახის წევრების ურთიერთობებს, კონფლიქტებს ეხება. ყველა ეს თემა აქტუალურია, ამიტომაც იწვევს მაყურებლის განსაკუთრებულ ინტერესს ახალგაზრდა მსახიობების გამოჩენა ქუჩაში...
ივლისში ფორუმ-თეატრმა ორი წარმოდგენა გამართა ქუთაისის პარკებში. სხვადასხვა ასაკის მაყურებელი დისკუსიაშიც ჩაერთო. უმეტესობა ერიდება საკუთარი თავის წარდგენას, ფოტოების გადაღებას. თუმცა ყველა ერთხმად აღნიშნავს, რომ ფორუმ-თეატრი საინტერესო ფორმაა საზოგადოებასთან პრობლემებზე საუბრისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ახალგაზრდობის გაძლიერების ცენტრებში საკმაო რაოდენობის ლიდერები არიან. მათ აქვთ თანატოლებთან მუშაობის გამოცდილება და სწორედ მათგან ქალთა ფონდმა „სოხუმმა“ შექმნა ახალგაზრდა ტრენერთა ქსელი.
ქსელის წევრებს ჩაუტარდათ ტრენინგი, რომელზეც განიხილეს ტრენინგის ჩატარების სტრუქტურა და ტრენერისთვის საჭირო უნარ-ჩვევები.
მონაწილეთა გამოცდილებას დაემატა ბევრი ნიუანსი, რადგან ისინი გაცნენ მნიშვნელოვან საკითხებს: მოდულის შექმნა, ტრენინგის მიზნების განსაზღვრა, აუდიტორიასთან კომუნიკაცია, ტრენინგის სპეციფიკა, პრეზენტაციის მომზადება, დარბაზის მოწყობა, დროის განაწილება, ტრენერების მიერ ყველაზე ხშირად დაშვებული შეცდომები და სხვ.
ტრენინგის შედეგად მონაწილეებმა გაიგეს ტრენინგის აგების ძირითადი პრინციპები, ისწავლეს აუდიტორიის მართვა და დროის სწორად განაწილება. მათ უკვე შეუძლიათ ტრენინგების დაგეგმვა და ჩატარება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სასკოლო არდადეგების მიუხედავად, გრძელდება სატრენინგო კურსი ახალგაზრდობის გაძლიერების ცენტრებში.
უკვე ჩატარდა 5 ტრენინგი - თერჯოლის, სამტრედიის, ზუგდიდის, წალენჯიხის და ხობის ჯგუფებთან. ახალგაზრდები გულწრფელად საუბრობდნენ სატრენინგო კურსის შედეგებსა და ცვლილებებზე, რასაც გრძნობენ და ხედავენ. მათ მზადება დაიწყეს შემაჯამებელი შეხვედრებისთვის, სადაც თვითონ წარმოადგენენ პრეზენტაციებს. მნიშვნელოვანია, რომ ტრენინგის მონაწილეები აქტიურად მონაწილეობენ მუნიციპალიტეტებში ჩატარებულ სხვადასხვა ახალგაზრდულ ღონისძიებაში. ესეც ჩვენი მუშაობის ერთ-ერთი შედეგია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ბოლო კვლევის - „მუნიციპალიტეტების მიერ ქალთა მიმართ ოჯახში ძალადობის საკითხებზე პრევენციული ღონისძიებების განხორციელების ეფექტიანობის შეფასების“ - რეკომენდაციებში მნიშვნელოვანი ადგილი უჭირავს სოციალურ მუშაობაზე პასუხისმგებელი ადგილობრივი რგოლების კოორდინაციის და ინფორმაციის გაცვლის ეფექტიანი სისტემის ხელშეწყობას.
ქობულეთის რესურს-ცენტრში ქალთა ფონდი „სოხუმის“ ინიცირებით, საგანმანათლებლო რესურს-ცენტრთან, მერიის ჯანმრთელობისა და სოციალური დაცვის სამსახურთან, ბავშვთა უფლებების დაცვის და მხარდაჭერის განყოფილებასთან და გენდერული თანასწორობის საბჭოსთან თანამშრომლობით ინფორმაციის გაცვლის შეხვედრა ჩატარდა.
შეხვედრის მონაწილეებმა არაერთ საჭირბოროტო საკითხზე ისაუბრეს, რომლებიც ეხებოდა ქალთა მიმართ და ოჯახში ძალადობის საკითხებს, ძალადობის პრევენციას, მოზარდების და მათი ოჯახების ფსიქოსოციალურ და სხვა საჭიროებებს.
შეხვედრამ ცხადი გახადა, რამდენად მნიშვნელოვანია რესურს-ცენტრების მაკოორდინირებელი როლი რეფერირების ადგილობრივ სუბიექტებთან, განსაკუთრებით მერიის სამსახურებთან. დაისახა დიალოგის დროს გამოკვეთილი კონკრეტული საკითხების გადაჭრის გზები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრებში გრძელდება საინფორმაციო შეხვედრები სხვადასხვა სამიზნე ჯგუფთან, რომელიც მიზნად ისახავს ქალთა საჭიროებების გამოვლენას და ადგილზე არსებული პრობლემების იდენტიფიცირებას. მობილიზატორები აქტიურად არიან ჩართულნი შემდგომ პროცესში, რაც გულისხმობს ქეისების შესწავლას და მათ გადამისამართებას.
ზუგდიდის, ბაღდათის, სამტრედიის, წალენჯიხის და თერჯოლის ქალთა მხარდაჭერის ცენტრებში საინფორმაციო შეხვედრების პარალელურად, მთელი თვის განმავლობაში ხუთი ახალი ქეისის იდენტიფიცირება მოხდა. ახალი საჭიროებებიც დაფიქსირდა, რომელთა ადვოკატირებასაც თემის აქტივისტებთან ერთად შეეცდებიან.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წალენჯიხაში მერიის და საკრებულოს სამსახურების მონაწილეობით ჩატარდა კვლევის „მუნიციპალიტეტების მიერ ქალთა მიმართ ოჯახში ძალადობის საკითხებზე პრევენციული ღონისძიებების განხორციელების ეფექტიანობის შეფასება“ პრეზენტაცია.
ანგარიშში შეფასებულია ქალთა მიმართ ძალადობის ან/და ოჯახში ძალადობის საკითხებზე სამიზნე მუნიციპალიტეტების (მათ შორის - წალენჯიხის მუნიციპალიტეტის) მიერ პრევენციული ღონისძიებების განხორციელების ეფექტიანობა და რეფერალური მექანიზმის ადგილობრივ სუბიექტებთან მათი თანამშრომლობის ხარისხი.
კვლევაში ასახულია გამოწვევები და რეკომენდაციები როგორც ცენტრალური, ასევე ადგილობრივი უწყებებისათვის, რათა კიდევ უფრო ეფექტიანად წარიმართოს პრევენციული საქმიანობა.
მონაწილეებისთვის საინტერესო აღმოჩნდა კვლევის შედეგები, რეკომენდაციები კი მეტად მნიშვნელოვანია გენდერული თანასწორობის საბჭოს მომავალი მუშაობის დაგეგმვისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმი“ წარმოგიდგენთ ახალ მონიტორინგის ანგარიშს - „მუნიციპალიტეტების მიერ ქალთა მიმართ ოჯახში ძალადობის საკითხებზე პრევენციული ღონისძიებების განხორციელების ეფექტიანობის შეფასება“. ანგარიშში შეფასებულია ქალთა მიმართ ძალადობის ან/და ოჯახში ძალადობის საკითხებზე სამიზნე მუნიციპალიტეტების მიერ პრევენციული ღონისძიებების განხორციელების ეფექტიანობა და ადგილებზე მოქმედი რეფერალური მექანიზმის სუბიექტებთან მათი თანამშრომლობის ხარისხი. დოკუმენტში ასახულია მნიშვნელოვანი გამოწვევები, მათ შორის, ადრეულ ეტაპზე კრიზისული/მოწყვლადი ოჯახების იდენტიფიცირების და შესაბამისი რეაგირების პრობლემა ოჯახში ძალადობის პრევენციისთვის; არასაკმარისი ინფორმაციის გაცვლა და კოორდინაცია მუნიციპალიტეტებსა და რეფერალური მექანიზმის სუბიექტებს შორის; ასევე, ქალთა მიმართ ძალადობისგან დაცვის მუნიციპალური პროგრამების არარსებობა ან სიმცირე და მოსახლეობის, ასევე სხვადასხვა უწყების წარმომადგენლების ცნობიერების ამაღლების და პროფესიული გადამზადების საჭიროების საკითხები. გამოკვეთილი მიგნებების საფუძველზე შემუშავდა კონკრეტული რეკომენდაციები, რომლებიც მიემართება რელევანტურ უწყებებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
შინაგან საქმეთა სამინისტრომ ბავშვობის ასაკში ქორწინების წინააღმდეგ მიმართული კამპანიის - „ნუ წაართმევ ბავშვობას“ დასკვნითი ღონისძიება გამართა. ღონისძიებაზე შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტმა წარადგინა პრეზენტაცია, რომლითაც სამთავრობო და არასამთავრობო სექტორის, ადგილობრივი და საერთაშორისო ორგანიზაციების წარმომადგენლებს მიეწოდათ ინფორმაცია კამპანიის ფარგლებში განხორციელებული ღონისძიებების თაობაზე. შეხვედრას ჩვენი წარმომადგენლები - ლინდა ჩიხლაძე და ნინო კორინთელი ესწრებოდნენ.
საქართველოს სახალხო დამცველის აპარატისა და ევროპის საბჭოს ორგანიზებით, ქალთა მიმართ და ოჯახში ძალადობის პრევენციის ზომების შეფასების შესახებ მონიტორინგის ინსტრუმენტის პრეზენტაცია გაიმართა.
მონიტორინგის ინსტრუმენტი დაფუძნებულია ქალთა მიმართ ძალადობისა და ოჯახში ძალადობის პრევენციის და მის წინააღმდეგ ბრძოლის ევროპის საბჭოს კონვენციაზე და მისი მიზანია, შეაფასოს სახელმწიფოს პრევენციის მექანიზმის გავლენა ქალთა მიმართ და ოჯახში ძალადობის საკითხებზე, გამოავლინოს კონკრეტული მიღწევები და გამოწვევები. დოკუმენტი ხელს შეუწყობს სახელმწიფო უწყებებს სამომავლო ნაბიჯების დაგეგმვასა და განხორციელებაში.
ღონისძიებას ესწრებოდნენ ჩვენი წარმომადგენლები - ლინდა ჩიხლაძე და ნინო კორინთელი.
ქალთა ფონდი „სოხუმის“ ორგანიზებით თერჯოლაში მრგვალ მაგიდასთან შეიკრიბნენ ადგილობრივი რეფერირების სუბიექტები: საკრებულოს გენდერული თანასწორობის საბჭოს წევრები, ადგილობრივი თვითმმართველობის, პოლიციის, ჯანდაცვის და საგანმანათლებლო სფეროს წარმომადგენლები.
მოწვეულმა იურისტმა შეხვედრის მონაწილეებს გააცნო რეფერირების დოკუმენტი, კონკრეტული პასუხისმგებელი პირების ვალდებულებები და ფუნქციები.
შეხვედრაზე აგრეთვე ისაუბრეს მუნიციპალიტეტში ძალადობის კუთხით არსებულ სიტუაციაზე, პრობლემების იდენტიფიცირებასა და მსხვერპლთა დახმარებაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)