„ადგილობრივი თანამშრომლობა ბავშვზე და ოჯახებზე ორიენტირებული სოციალური გარემოსთვის“ - ამ თემაზე გაიმართა შეხვედრა წალენჯიხის ცენტრალურ ბიბლიოთეკაში.
შეხვედრას მერიის სხვადასხვა სამსახურის წარმომადგენლები და პედაგოგები ესწრებოდნენ. ისინი გაეცნენ ფონდი „სოხუმის“ მიერ ჩატარებული ბავშვთა უფლებების დაცვის და მხარდაჭერის განყოფილებების საქმიანობის მონიტორინგის შედეგებს. ასევე ისაუბრეს წალენჯიხის მუნიციპალიტეტის ბავშვთა უფლებების დაცვის და მხარდაჭერის განყოფილების პრაქტიკასა და არსებულ გამოწვევებზე. დაფიქსირდა რეკომენდაციები, რომლებიც გაზრდის ამ კუთხით მუშაობის ეფექტს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გაეროს ქალთა ორგანიზაცია საქართველოში გაეროს მუდმივი კოორდინატორის ოფისსა და გაეროს სხვადასხვა სააგენტოს წარმომადგენლებთან თანამშრომლობით, „ქალებზე, მშვიდობასა და უსაფრთხოებაზე“ ღია კარის დღე გაიმართა.
შეხვედრა გახსნეს საქართველოში გაეროს მუდმივმა კოორდინატორმა საბინე მახლიმ, გაეროს ქალთა ორგანიზაციის წარმომადგენელმა კაორი იშიკავამ და ჟენევის საერთაშორისო მოლაპარაკებებში გაეროს წარმომადგენელმა აიშე ჯიჰან სულთანოღლუმ.
შეხვედრა გაეროს სისტემის წარმომადგენლებსა და სამოქალაქო საზოგადოებას, დევნილ და კონფლიქტის შედეგად დაზარალებულ ქალებსა და ახალგაზრდებს შორის დიალოგის მხარდაჭერას და ქალების, მშვიდობის და უსაფრთხოების საკითხებისა და პრიორიტეტების შესახებ ინფორმაციის გაცვლას მოიცავდა, სადაც ქალთა ფონდი „სოხუმის“ თბილისის წარმომადგენლობის ხელმძღვანელი - ეკატერინე გამახარია და ქალთა ფონდი „სოხუმის“ მიერ მობილიზებული სამი სათემო ლიდერიც მონაწილეობდა.
როგორი იყო ოქტომბერი ქალთა ფონდი „სოხუმის“ ფსიქოლოგებისთვის, რომლებიც უკრაინელ ლტოლვილებთან მუშაობენ?
ვთხოვეთ მათ, მოკლედ ესაუბრათ თავიანთ მუშაობაზე.
მარინა სტეპანენკო: „ოქტომბერში გაიზარდა მათი რაოდენობა, ვინც ფსიქოლოგიურ დახმარებას მიმართა. ძირითადად, ესენი არიან ადამიანები, რომლებსაც აწუხებთ ოჯახიდან განშორების სტრესი, მარტოობა, დაბნეულობა, დაუცველობის განცდა. ასეთ მდგომარეობაში მნიშვნელოვანია მხარდაჭერის პოვნა და მიღება. ასევე, გაუგო საკუთარ თავს და დაეხმარო“.
მანანა გოცირიძე: „ოქტომბერში შედგა პირველადი შეხვედრები ქუთაისში მცხოვრებ უკრაინულ ოჯახებთან. ყველამ აღნიშნა, რომ ჩვენი ორგანიზაცია ერთადერთია, ვინც გულთან ახლოს მიიტანა მათი ტკივილი და ტრაგედია, იცის თანაგრძნობა და მადლიერები არიან უფასო ფსიქოლოგიური მხარდაჭერისა და ესოდენ საჭირო ჰუმანიტარული დახმარებისთვის“.
ანა შალიმოვა: „ყოველთვიურად ვეცნობი უკრაინიდან ჩამოსულ ახალ ოჯახებს. ბევრი ჩამოდის ჩემი მშობლიური ხერსონიდან. ხშირად, სამსახურისკენ რომ მივდივარ, ვხვდები უკრაინულ ოჯახებს, რომელთ შვილები სკოლაში მიჰყავთ. ვესალმებით და ვუღიმით ერთმანეთს. უკვე 30-ზე მეტი უკრაინულ ოჯახს ვიცნობ ჩვენი ულამაზესი უკრაინის სხვადასხვა კუთხიდან. ასევე ვაგრძელებ საკონსულტაციო მუშაობას და ჩემს მომსახურებას ვთავაზობ ბავშვებს და მოზარდებს. მე ვეხმარები შფოთვის შემცირების კუთხით, მშობლებსა და შვილებს შორის ურთიერთობების გაუმჯობესებაში, ფობიებისა და პანიკისგან თავის დაღწევში. ჩემი მუშაობა გულისხმობს ჩემი ცოდნისა და უნარების მუდმივ გაუმჯობესებას და ამიტომ ვცდილობ, ყურადღება მივაქციო ჩემს განათლებას და სწავლებას“.
საქართველოს მთავრობის ადმინისტრაციაში გენდერული თანასწორობის, ქალთა მიმართ ძალადობის და ოჯახში ძალადობის საკითხებზე მომუშავე უწყებათაშორისი კომისიის მორიგი სხდომა გაიმართა. მას უძღვებოდა საქართველოს პრემიერ-მინისტრის მრჩეველი ადამიანის უფლებათა დაცვის საკითხებში, უწყებათაშორისი კომისიის თავმჯდომარე, ნიკო თათულაშვილი. შეხვედრაში მონაწილეობას ქალთა ფონდი „სოხუმის“ თბილისის წარმომადგენლობაც იღებდა სხვა არასამთავრობო და საერთაშორისო ორგანიზაციების წარმომადგენლებთან ერთად.
შეხვედრაზე აღინიშნა, რომ 25 ოქტომბერს საქართველოს მთავრობის დადგენილებით დამტკიცდა ქალების, მშვიდობისა და უსაფრთხოების შესახებ გაეროს უშიშროების საბჭოს რეზოლუციების განხორციელების 2022-2024 წლების საქართველოს ეროვნული სამოქმედო გეგმა და ქალთა მიმართ ძალადობისა და ოჯახში ძალადობის წინააღმდეგ ბრძოლისა და მსხვერპლთა დასაცავად 2022-2024 წლებში გასატარებელ ღონისძიებათა სამოქმედო გეგმა. კომისიის სხდომის ერთ-ერთ ძირითად საკითხს წარმოადგენდა აღნიშნული სამთავრობო სამოქმედო გეგმების აღსრულების ხელშეწყობა და მონიტორინგი.
ერთი ქალი სარეაბილიტაციო ცენტრში ყოფნისას დადებითი ემოციებით აივსო, გააცნობიერა თავისი ადგილი ცხოვრებაში, იგრძნო სიმშვიდე და თავისუფლება. ახლა ის მზად არის, იბრძოლოს უკეთესი ცხოვრებისთვის. მეორე ამბობს, რომ მიიღო საჭირო ცოდნა. მიხვდა, რამდენად მნიშვნელოვანია ადეკვატური თვითშეფასება და, რაც მთავარია, იცის, რომ უნდა ისწავლოს, რათა თავისი ქალიშვილისთვის ღირსეული დედა იყოს...
ეს ყველაფერი ქალთა ფონდი „სოხუმის“ სარეაბილიტაციო ცენტრში მათი ყოფნის დამსახურებაა. ოქტომბერში ცენტრში იმყოფებოდა სამი ქალი პატარა ბავშვებთან ერთად - ოჯახში ძალადობის მსხვერპლები, რომელთაც განიცადეს სტრესი და ტრავმა.
მათ ინტენსიური სარეაბილიტაციო სამუშაოები ჩაუტარდათ - პროცესში აქტიურად იყვნენ ჩართულები სოციალური მუშაკი, იურისტი და ფსიქოლოგი.
მუშაობის შედეგები მათ კომენტარებში ჩანს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სამტრედიის, ქობულეთის, წალენჯიხისა და ტყიბულის ქალთა მხარდაჭერის ცენტრებში (აქ - ონლაინ) გაიმართა ჯგუფური და ინდივიდუალური ფსიქოლოგიური შეხვედრები, მათში მონაწილეობა მიიღო 35 ბენეფიციარმა.
ერთი თვის განმავლობაში ფსიქოლოგი ქუთაისის ოფისში ატარებდა ფსიქოთერაპიულ სამუშაოს და ონლაინ ინდივიდუალურ კონსულტაციებს რეგიონებში.
პარასკევობით ფსიქოლოგი ატარებდა ჯგუფურ შეხვედრებს ქალთა ფონდი „სოხუმის“ დღის ცენტრის ბენეფიციარებთან - ქალებთან, რომლებიც გადიან პოლიმერულ თიხაზე მუშაობის კურსს. მათთან ტარდებოდა სესიები შიშების, სტრესის, ტრავმების დაძლევისა და თვითშეფასების ამაღლებისთვის.
დღის ცენტრის ერთ-ერთმა ბენეფიციარმა თქვა: „ჩემთვის განსაკუთრებულია ყველაფერი, რაც მოხდა ამ თვეში - სავსე ვარ საკუთარი თავის და სხვების სიყვარულით, ამიტომაც ვახერხებ ლამაზი ნაკეთობების შექმნას“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალები უკრაინიდან - მარტიდან ასეთი ახალი ბლოგი გაჩნდა ქალთა ფონდი „სოხუმის“ ვებგვერდზე.
მთავარი გმირები ქალები არიან - ხერსონიდან, ჩუგუევიდან, კიევიდან, ხარკოვიდან, ბერდიანსკიდან, ვინიცადან...
ეს არის სევდიანი და იმედიანი ისტორიები.
რამდენიმე ფრაზა სხვადასხვა ჩანახატიდან:
„ბავშვობაში მახსოვს, ბებიები და ბაბუები სულ ერთსა და იმავეს იმეორებდნენ - ოღონდ მშვიდობა იყოს და სხვა არაფერი გვინდაო. ჩვენ მშვიდობა გვქონდა და გვეცინებოდა მათ ნათქვამზე. მათ ომი ჰქონდათ გამოვლილი და იცოდნენ მშვიდობის ფასი. ახლა განსაკუთრებით კარგად ვხვდები ამ სიტყვების აზრს“, - კატერინა მირნაია.
„დედას ოჯახური მეურნეობა აქვს: ქათმები, კვერცხი, ბოსტნეული. სამ ბოსტანში დაუთესია კარტოფილი... ჩვენ გველოდება და უნდა დაგვახვედროს“, - ალინა დზიუბინსკაია.
„ორი დედა მყავს ხერსონში - ჩემი და ჩემი ქმრის, ყველაფერი იქაა - სახლი, ბინა, მეგობრები, ახლობლები, მენატრება და შიში მაქვს მათი დაკარგვის. სულ იმას ვნატრობ, მალე წავიდე ჩემს ქვეყანაში“, - ტატიანა ხოდაკოვსკაია.
https://blogofwomanfundsukhumi.tilda.ws/
ბლოგში უკვე 15 ქალის ამბავია მოთხრობილი. ამბები, რომლებიც ერთმანეთს ჰგავს და განსხავდება კიდეც...
ისეთი ბლოგია, აუცილებლად რომ უნდა წაიკითხოს ადამიანმა. იმიტომ რომ შეიგრძნოს ომის სისასტიკე და ყველაფერი გააკეთოს მშვიდობისთვის...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრებში იურისტმა ოქტომბერში 5 შეხვედრა ჩაატარა: ქობულეთში ინდივიდუალური შეხვედრა გაიმართა, ტყიბულში მცხოვრებ ბენეფიციარებთან - ონლაინ შეხვედრა, ხოლო ბაღდათში, ფახულანსა (წალენჯიხის მუნიციპალიტეტი) და სამტრედიაში - ჯგუფური შეხვედრები ახალფაზრდულ ცენტრში, საბავშვო ბაღში და ამბულატორიაში.
ჯგუფურ შეხვედრებს ესწრებოდნენ სკოლების თანამშრომლები, საბავშვო ბაღის აღმზრდელები, უფროსკლასელები და სამოქალაქო სექტორის წარმომადგენლები.
ქალთა ფონდი „სოხუმის“ წარმომადგენლებმა გააკეთეს ვებგვერდის „ძალადობის მსხვერპლთა სერვისების ციფრული რესურსცენტრი“ პრეზენტაცია, ძალადობის მსხვერპლ ქალს კი YOU აპლიკაციით და SOS ღილაკით აღჭურვილი მობილური ტელეფონი გადაეცა.
გარკვეული მუშაობა ჩატარდა ფონდი „სოხუმის“ სარეაბილიტაციო ცენტრში ფსიქოლოგთან და სოციალურ მუშაკთან ერთად.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სამტრედიის მუნიციპალიტეტი ბავშვთა უფლებების დაცვის და მხარდაჭერის განყოფილების ფორმირების ეტაპზეა. ამიტომ სამტრედიაში გამართულ საინფორმაციო შეხვედრაზე მოწვეული იყვნენ სენაკის, ლანჩხუთის, ხონის, წყალტუბოსა და ბაღდათის მუნიციპალიტეტების ბავშვთა განყოფილებების წარმომადგენლები. შეხვედრას ესწრებოდნენ მუნიციპალიტეტის მერის პირველი მოადგილე ვლადიმერ ზაქრაძე, საკრებულოს თავმჯდომარის მოადგილე ნათია პაპავა, ადმინისტრაციული ერთეულის წარმომადგენლები და საჯარო მოხელეები.
შეხვედრაზე საუკეთესო გარემო შეიქმნა იმისთვის, რომ სტუმრებს თავიანთი გამოცდილება გაეზიარებინათ კონკრეტული ქეისების განხილვის საფუძველზე. მათ განყოფილების აქტიური მუშაობისათვის მნიშვნელოვან სპეციფიკურ საკითხებზე ისაუბრეს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„სარეაბილიტაციო ცენტრში ჩამოსვლამდე ძალიან განვიცდიდი. ჯერ ერთი, არ ვიცოდი, როგორ დავტოვებდი ყოველდღიურ პრობლემებს, მეორეც - როგორ მიმიღებდნენ აქ. 48 წლის განმავლობაში არასოდეს არ ვყოფილვარ ოჯახს გარეთ გასული. ერთი სიტყვით. ძალიან დაკომპლექსებული მოვდიოდი.
პირველივე შეხვედრაზე ვიგრძენი თბილი გარემო.
მერე ფსიქოლოგს შევხვდი. საოცარი ყურადღება გამოიჩინა და მე თვითონ მიკვირს, იმდენი რამე ვუამბე ჩემზე.
კარგი მეხსიერება მაქვს, ყველაფერი მახსოვს. მამა რომ დათვრებოდა, ხშირად ეჩხუბებოდა დედას. ამიტომ არ მიყვარდა. ნაადრევად დაბრძენებულ ქალს ვგავდი 5-6 წლის ბავშვი. ბევრი რამ მაკლდა. ყველაფერს შენთვის ვაკეთებო, დედა რომ მეტყოდა, თავს ვიდანაშაულებდი, რატომ გავჩნდი-მეთქი...
ახლაც უამრავი პრობლემა მაქვს. მაგრამ სარეაბილიტაციო ცენტრში ყველაფერი დამავიწყდა. ახალი ნაცნობები, საერთო პრობლემები და იმის განცდა, რომ მარტო არ ხარ. ამიტომ იმედით და ენერგიით ივსები. როგორ გვჭირდება ასეთი ურთიერთობები, თანაგრძნობა, ერთმანეთის მოსმენა. ჩემი პატარა ბიჭუნაც ბედნიერია, მოსწონს აქაურობა...
ახლა ვხვდები, როგორ უნდა მეცხოვრა. როგორც დედას, როგორც ქალს. გამოვდივარ იმ ჩაკეტილი წრიდან, რომელშიც ვიყავი. მადლობა ამისთვის ყველას, ვინც დამეხმარა“...
ეს არის მოკლე მონაკვეთი წერილიდან, რომელიც ფონდი „სოხუმის“ ფსიქოლოგს მანანა გოცირიძეს დაუტოვა ერთ-ერთმა ქალმა, რომელმაც ჩვენს ცენტრში სარეაბილიტაციო კურსი გაიარა.