წყალტუბოს მუნიციპალიტეტის მერიაში შემაჯამებელი შეხვედრა გაიმართა პროექტის „რეგიონული და ადგილობრივი ადმინისტრაციების შესაძლებლობების გაძლიერება გაეროს უშიშროების საბჭოს რეზოლუცია 1325 ეროვნული სამოქმედო გეგმის ადგილობრივ დონეზე ლოკალიზაციის პროცესში და ამ პროცესებში დიალოგის აქტივიზაცია და ქალთა მონაწილეობის გაძლიერება“ ფარგლებში. შეხვედრას ესწრებოდნენ წყალტუბოს, ზუგდიდისა და წალენჯიხის თვითმმართველობის წარმომადგენლები.
სამუშაო ჯგუფების წევრებმა ერთმანეთს გაუზიარეს გამოცდილება, არსებული მიღწევები და გამოწვევები, იმსჯელეს სამომავლო სტრატეგიებზე.
მაისში საინფორმაციო შეხვედრები გაიმართა პედაგოგებთან და სამედიცინო სფეროს წარმომადგენლებთან თერჯოლის, წყალტუბოს, ხონის, სამტრედიის, ბაღდათის და ვანის მუნიციპალიტეტებში.
მონაწილეებს მიეწოდათ ინფორმაცია ფონდი „სოხუმის“ ახალ პროექტზე„ოჯახში ძალადობის პრევენციის, მსხვერპლის მხარდაჭერის და მოძალადესთან თერაპიული მუშაობის სისტემის გაძლიერება“.
პროექტის ფარგლებში ფონდი „სოხუმი“ ქალთა მიმართ და ოჯახში ძალადობის გამოვლენის, მასზე რეაგირების და რეფერირების საკითხებზე მოამზადებს 50 პედაგოგს, 40 სამედიცინო მუშაკს და 50 პოლიციელს.
პედაგოგებმა და სამედიცინო სფეროს წარმომადგენლებმა შეავსეს ტრენინგის მონაწილის შესარჩევი ანკეტები და გამოხატეს მზადყოფნა თანამშრომლობისთვის.
ფონდ „სოხუმში“ ხორციელდება პარტნიორული პროექტი „ოჯახში ძალადობის პრევენციის, მსხვერპლის მხარდაჭერის და მოძალადესთან თერაპიული მუშაობის სისტემის გაძლიერება“ - პოლონეთის ორგანიზაციის HumanDoc foundation-ის მხარდაჭერით.
მაისში დაიწყო პროფესიული კურსები სამი მიმართულებით: პოლიმერული თიხის ნაკეთობების დამზადება, ჭრა-კერვის და საბუღალტრო აღრიცხვის სწავლება. ქალები და გოგონები ეუფლებიან ახალ პროფესიებს, რაც მომავალში დაეხმარება მათ ოჯახის ეკონომიკური მდგომარეობის გაუმჯობესებაში.
წალენჯიხის მუნიციპალიტეტში გაეროს რეზოლუცია 1325-ის ლოკალიზაციის სამუშაო ჯგუფმა საინფორმაციო შეხვედრები დაასრულა. სამიზნე ჯგუფებს წარმოადგენდნენ: დევნილი ქალები და გოგონები, ახალგაზრდები, კონფლიქტით დაზარალებული მოქალაქეები. წალენჯიხის გარდა, შეხვედრების ციკლი გაიმართა სოფლებში: ლია, ჯგალი, ფახულანი, წყოუში.
მონაწილეებმა მიიღეს ინფორმაცია პროექტზე, რომელიც ემსახურება სამიზნე ჯგუფის საჭიროებების გამოვლენას და მათზე დაფუძნებული ინიციატივების ადვოკატირებას; ისაუბრეს საკუთარ პრობლემებზე.
სამუშაო ჯგუფის ინიციატივით განხორციელდა შემეცნებითი, სპორტული და კულტურული ღონისძიებები ახალგაზრდებისათვის, რომელიც მათ ინფორმირებას და სოციალურ ინტეგრაციას შეუწყობს ხელს. საინტერესოდ წარიმართა დიალოგი თვითმმართველობასთან, შეხვედრები პრობლემათა ადვოკატირების მიზნით.
14-17 მაისს ფონდი „სოხუმის“ თბილისის ოფისის წარმომადგენელმა, ეკატერინე გამახარიამ მონაწილეობა მიიღო ევროპისა და ევრაზიის რეგიონში პროექტების განმახორციელებელთა შეხვედრაში, რომელიც ჩატარდა სარაევოში, ბოსნიასა და ჰერცეგოვინაში. სამუშაო შეხვედრას ორგანიზება გაუწიეს და ჩაატარეს აშშ-ის სახელმწიფო დეპარტამენტის, Vital Voice-ის გლობალური პარტნიორობის და GuideHouse წარმომადგენლებმა. აშშ-ს სახელმწიფო დეპარტამენტის ხელშეწყობით განხორციელებული პროექტების შემსრულებელმა, სხვადასხვა ქვეყნის პარტნიორებმა ერთმანეთს გაუზიარეს სამუშაო გამოცდილება, მიღწევები და გამოწვევები. მათ განიხილეს აქტუალური საკითხები: გენდერული ძალადობის რეგიონალური ტენდენციები - გამოწვევები და შესაძლებლობები პოსტკონფლიქტურ სივრცეში, მარგინალური თემების ეკონომიკური გაძლიერება და ჩართულობის ხელშეწყობა, საპროექტო წინადადებების შემუშავების საუკეთესო პრაქტიკები და ფონდების მოძიების ინოვაციური მიდგომები, ციფრული უსაფრთხოება და პრაქტიკული აპლიკაციები და ა.შ. სამუშაო შეხვედრისას შეიქმნა პარტნიორებთან სოციალიზაციის, ინფორმაციის გაცვლის, სამომავლო თანამშრომლობის დასახვის შესაძლებლობები.
კანონის „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ მონიტორინგის ფარგლებში მაისში კვლევის ობიექტი იყო ძალადობის მსხვერპლი 6 ქალი. ჩაღრმავებული ინტერვიუ მიზნად ისახავდა ინფორმაციის შეგროვებას: რამდენად ენდობიან ქალები სამართალდამცავ სტრუქტურებს, ეფექტურია თუ არა მათთან თანამშრომლობა უსაფრთხოების თვალსაზრისით, გამოკითხვის პროცესში რამდენად არის დაცული გენდერული ასპექტები, როგორია რეფერალურ სუბიექტებთან თანამშრომლობა.
ირკვევა, რომ მსხვერპლი ქალები ძალადობის შემთხვევაში, ძირითადად, სამართალდამცავ სტრუქტურებს მიმართავენ. აღნიშნავენ მათ პროფესიონალიზს, თუმცა მიანიშნებენ დაკითხვის პროცესში ქალი-გამომძიებლების აუცილებლობაზე.
გრძელდება სამართალდამცავი სტრუქტურების წარმომადგენელთა კვლევა „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ კანონის მონიტორინგის ფარგლებში. აპრილში კვლევის ლოკაცია იყო: ზუგდიდი, ოზურგეთი, ხონი, წყალტუბო. სტანდარტული შეკითხვები მოიცავდა შემდეგ საკითხებს: აქვთ თუ არა სპეციალიზაცია ძალადობის საკითხებზე, რამდენად ეფექტურად მუშაობს კანონი პრაქტიკაში, რა გამოწვევები არსებობს ამ სფეროში.
18 აპრილს, ფონდი „სოხუმის“ თბილისის წარმომადგენლობის ოფისში გაიმართა შეხვედრა შვედური საერთაშორისო ორგანიზაციის Kvinna till Kvinna-ს პარტნიორი ორგანიზაციების წარმომადგენლებთან ისრაელიდან. ისინი დეტალურად გაეცნენ ფონდი „სოხუმის“ საქმიანობის მიმართულებებს და მუშაობის გამოცდილებას. თბილისის ოფისის წარმომადგენლებმა კოლეგებს გაუზიარეს ფონდის ხანგრძლივი მუშაობის პროცესში განხორციელებული პროექტები, მიღწეული წარმატებები და საქმიანობის გზაზე ჯერ კიდევ არსებული გამოწვევები. ისრაელის არასამთავრობო ორგანიზაციების წარმომადგენლებმა ისაუბრეს თავიანთი ორგანიზაციების გამოცდილებაზე გენდერული თანასწორობის, ქალთა ეკონომიკური თუ პოლიტიკური გაძლიერების, გენდერულ ძალადობასთან ბრძოლის და მშვიდობის მშენებლობის მიმართულებით. ორგანიზაციებმა ხაზი გაუსვეს, რომ აღმოაჩინეს ძალიან ბევრი მსგავსება მათი და ფონდი „სოხუმის“ მუშაობის მიდგომებში და აქტივობებში და გამოთქვეს მომავალში შეხვედრების და თანამშრომლობის სურვილი.
17 აპრილს ქუთაისში, ფონდი „სოხუმის“ ორგანიზებით სამოქალაქო ფორუმი გაიმართა. ფორუმის მუშაობაში აქტიური მონაწილეობა მიიღეს კოალიცია „ქალი და მშვიდობის“ წარმომადგენლებმა.
კოალიცია „ქალი და მშვიდობა“ ფონდმა „სოხუმმა“ დააფუძნა გასულ წელს. კოალიციაში შევიდა დასავლეთ საქართველოს 4 რეგიონის (იმერეთი, სამეგრელო, გურია, აჭარა) ქალთა 10 არასამთავრობო ორგანიზაცია: ფონდი „სოხუმი“ (ქუთაისი), პედაგოგთა კავშირი „განათლება და სამყარო“ (ქუთაისი), მეწარმე ქალთა ფონდი (ქუთაისი), ქალთა კლუბი (ხონი), ქალთა ასოციაცია „იმედი“ (ზუგდიდი), ასოციაცია „მერკური“ (ზუგდიდი), განათლებისა და განვითარების ცენტრი „თოლისკური“ (ხობი), ქალთა საზოგადოებრივი გაერთიანება (ოზურგეთი), განათლებისა და თანასწორობის ცენტრი (ოზურგეთი), განათლების, განვითარებისა და დასაქმების ცენტრი (ბათუმი).
ფორუმის პირველი ნაწილი კონფლიქტების ადრეული გაფრთხილების გენდერული კონცეფციის განხილვას მიეძღვნა თეორიულ და პრაქტიკულ ასპექტში.
მეორე ნაწილში კი მონაწილეებმა 5 ჯგუფში იმუშავეს კონფლიქტების ანალიზზე ეკოლოგიის, ჯანდაცვის, ოჯახში ძალადობის და რელიგიის სფეროში, რაც მიზეზების, გავლენისა და პასუხისმგებელი სუბიექტების განსაზღვრას გულისხმობს.
კოალიცია სამომავლოდაც აქტიურ მუშაობას აპირებს.