აშშ-ის ელჩი საქართველოში კელი დეგნანი ქუთაისში დაესწრო ქალთა ფონდი „სოხუმის“ პროექტის პრეზენტაციას. შეხვედრა გაიმართა პროექტის პარტნიორის - ასოციაცია „მშვიდობიანი და საქმიანი კავკასიის“ ოფისში USAID-ისა და საქართველოში აშშ-ის საელჩოს წარმომადგენლების მონაწილეობით.
ქალთა ფონდმა „სოხუმმა“ და „მშვიდობიანმა და საქმიანმა კავკასიამ“ წარმოადგინეს USAID-ის პროექტის ფარგლებში ორი წლის მანძილზე მიღწეული შედეგები.
აშშ-ის ელჩმა საქართველოში კელი დეგნანმა გულწრფელი მადლობა გადაუხადა პროექტის წარმომადგენლებს კარგი და მნიშვნელოვანი მუშაობისთვის სამოქალაქო საზოგადოების შესაძლებლობების გაძლიერების, ეკონომიკური და სამედიცინო მიმართულებების განვითარების, ნდობის აღდგენისა და მდგრადი მშვიდობის დამყარების ხელშეწყობისთვის.
შეხვედრაზე ფონდი „სოხუმის“ წარმომადგენლებმა მადლიერება გამოხატეს აშშ-ის საელჩოს ორგანიზაციის პრაქტიკულად პირველი სერიოზული მხარდაჭერის გამო, რამაც გააძლიერა ორგანიზაცია და შექმნა კარგი ბექგრაუნდი. შემდგომში საელჩომ არაერთხელ დააფინანსა ფონდი „სოხუმის“ მნიშვნელოვანი საპროექტო წინადადებები ქალთა მხარდაჭერის და დაცვის კუთხით.
პროექტი ხორციელდება USAID-ის მხარდაჭერით
ეწერის (თერჯოლის მუნიციპალიტეტი) საჯარო სკოლაში ქალთა მიმართ ძალადობის წინააღმდეგ გლობალური 16-დღიანი კამპანიის ფარგლებში ქალთა ფონდი „სოხუმის“ მონიტორინგის ჯგუფმა ჩაატარა საინფორმაციო შეხვედრა, რომელსაც ესწრებოდნენ პედაგოგები და უფროსკლასელები.
შეხვედრაზე აქცენტი გაკეთდა ძალადობის პრობლემის სიმწვავესა და დროულ რეაგირებაზე. მონაწილეები გაეცნენ ბავშვთა უფლებების დაცვის და მხარდაჭერის განყოფილებების საქმიანობის მონიტორინგის შედეგებს. ისაუბრეს განყოფილების სერვისებზე, მიღწევებსა და გამოწვევებზე. გამოიკვეთა, რომ განყოფილების შესახებ ბევრმა არ იცის, ამიტომ საჭიროა ინფორმაციის გავრცელება. მნიშვნელოვნად დასახელდა, რომ განყოფილებებს ჰქონდეს რესურსი მოწყვლადი ოჯახების ეკონომიკური გაძლიერების კუთხით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საქართველოს შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტმა ქალებისა და გოგოების მიმართ ძალადობის აღმოფხვრის საკონსულტაციო ჯგუფთან (Task Force on EVAWG) სამუშაო შეხვედრა გამართა. სამუშაო შეხვედრაში მონაწილეობა ოჯახში ან/და ქალთა მიმართ ძალადობის აღმოფხვრის საკითხებზე მომუშავე საერთაშორისო, არასამთავრობო ორგანიზაციებისა და საქართველოს სახალხო დამცველის აპარატის წარმომადგენლებთან ერთად ჩვენმა თანამშრომელმა - ლინდა ჩიხლაძემაც მიიღო. შეხვედრაზე განიხილეს ბოლო წლების მანძილზე ოჯახში ან/და ქალთა მიმართ ძალადობის წინააღმდეგ ბრძოლის მიმართულებით განხორციელებული საქმიანობები, არსებული გამოწვევები და იმსჯელეს გადაჭრის გზებზე. შეხვედრა შინაგან საქმეთა სამინისტროს ინიციატივით, გაეროს ქალთა ორგანიზაციასთან თანამშრომლობით, შვედეთის მიერ მხარდაჭერილი გაეროს ერთობლივი პროგრამის „გენდერული თანასწორობისთვის“ ფარგლებში გაიმართა.
ასე გულმოდგინედ ალაგებს მანანა ფიფია უკრაინელებისთვის გასატნევ პარკებს. ეს საქმე მას აბარია ქალთა ფონდ „სოხუმში“. თვითონ ყიდულობს ყველაფერს და ყველა პარკში ერთნაირად იდება უამრავი საჭირო რამ: ბრინჯი, წიწიბურა, მაკარონი, ზეთი, კარაქი, კვერცხი, მაწონი, რძე, არაჟანი, ტკბილეული, შაქარი, ყავა, ჩაი, ტომატი, ბოსტნეული, ქათამი, შამპუნი, ფხვნილები, საპონი, ჭურჭლის სარეცხი, ხელსახოცი...
როცა იცის, რომ ოჯახს პატარები ჰყავს, ჩანთაში დამატებით ჩნდება პამპერსი, ბავშვის საკვები, იოგურტი. ზოგისთვის წამლებს ყიდულობს, ზოგს სათვალე სჭირდება, ზოგს - ოთახის ჩუსტები ან თბილი პლედი...
მერე მიემგზავრება ეს ნობათები - ტყიბულში, სენაკში, ჩხოროწყუში, ლანჩხუთში...
ვინც ქუთაისში და მის შემოგარენში ცხოვრობს, ჩვენს ოფისში მოდის და მანანა თვითონ აძლევს მათთვის განკუთვნილ საჩუქრებს. ფოტოებსაც უღებს. არავინ არ ამბობს ფოტოების გადაღებაზე უარს.
დააკვირდით, როგორი ლამაზები არიან. უდიდესი ტკივილი გამოიარეს, ჯერ კიდევ არ ჩანს მათი დარდის დასასრული, მაგრამ მაინც იღიმიან.
ჩვენს სარეაბილიტაციო ცენტრში ნოემბრის 10 დღე გაატარა 5-მა ადამიანმა - იყო სამი ხანდაზმული ქალი და ერთ-ერთის ორი შვილიშვილი. ყველა ცდილობდა მათთვის ოჯახური სიმყუდროვე შეექმნა - სტუმრებს გემრიელი სადილებით უმასპინძლდებოდნენ. რეაბილიტაციის პროცესში აქტიურად იყვნენ ჩართულები სოციალური მუშაკი, იურისტი და ფსიქოლოგი, ბავშვებთან მასწავლებელი მუშაობდა. მოხდა ტრავმების, შიშების, წყენის და სტრესის გადამუშავება, თვითშეფასების ამაღლება.
ქალებმა თავიანთი შთაბეჭდილებები გამოხატეს:
- ცხოვრებაში ბევრგან ვყოფილვარ, მაგრამ ასეთი თბილი დამოკიდებულება არსად მიგრძვნია, ფსიქოლოგის რჩევები ძალიან ძვირფასია ჩემთვის. დიდი მადლობა ასეთი ყურადღებისა და სიკეთისთვის.
- ხანდაზმულებს სითბო სჭირდებათ. აქ დიდი სითბოა - განსაკუთრებით ადამიანური. ყველა გეხმარება, იღიმება, ცდილობს, გასიამოვნოს. ჩემი სული გაახალგაზრდავდა და განახლდა.
- ბევრი წელი ვითმენდი ფსიქოლოგიურ შეურაცხყოფას ოჯახის წევრების მხრიდან. და მხოლოდ ახლა მივხვდი, რომ საკუთარი თავი უნდა მიყვარდეს - ასე მასწავლეს აქ და ამ პრინციპით ვიცხოვრებ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
და-ძმა, ექიმები უკრაინიდან. სასწაულებრივად გადაურჩნენ ომის საშინელებებს. ხარკოვიდან ქუთაისში სექტემბერში ჩამოვიდნენ. მათი მშობლები აქ მუშაობდნენ სამხედრო ექიმებად, სკოლა ქუთაისში დაამთავრეს, აქ ჰყავთ მეგობრები და ნაცნობები.
როგორც ფსიქოლოგ მანანა გოცირიძეს უთხრეს, ჯერ კიდევ სიკვდილის მომასწავებელი სირენის ხმებისგან იღვიძებენ.
„ძნელი წარმოსადგენია, დაიბრუნებს თუ არა ჩვენი ქალაქი თავის სილამაზეს. ხარკოვში თითქმის ყველა საცხოვრებელი კორპუსი განადგურდა. ყველგან ქვების გროვაა, მინა, რკინა... მოსახლეობაში ფსიქოზის მეორე ტალღა მაშინ დაიწყო, როცა მიხვდნენ, რომ ომი მალე არ დასრულდებოდა. ომი ჩვენთვის არის შიში, რომ შეიძლება გაგაუპატიურონ, მოგკლან. ეს არის უიმედობის და სასოწარკვეთის მდგომარეობა. რომ დამთავრდება, მერეც დიდხანს იმოქმედებს ადამიანების ფსიქიკაზე“.
ეს ჩვენი ბენეფიციარების სიტყვებია.
უკრაინელი ლტოლვილების მხარდამჭერი ჯგუფი, წინა თვეების მსგავსად, ნოემბერშიც აქტიურად მუშაობდა. ამ დროისთვის ჩვენს მონაცემთა ბაზაში გვყავს 383 ადამიანი, ნოემბერში დავამატეთ 53 ახალი ადამიანი. ამ თვეში 42 ოჯახს (95 ადამიანი) დავეხმარეთ, 3 ოჯახს ვუყიდეთ თბილი პლედი, 4 ოჯახს - გამათბობელი. ერთ მამაკაცს სამედიცინო პროცედურების (ონკოლოგიური) საფასურის გადახდაში გავუწიეთ დახმარება და სპეციალური საკვებიც შევიძინეთ მისთვის. ასევე დარიგდა ჩუსტები და თეთრეული.
- გრძელდება დახმარება ბინის ქირის გადახდაში, ამ თვეში კიდევ 4 ოჯახი დაემატა, ერთი ოჯახი თბილისში ცხოვრობს, რადგან ასაკოვანი წყვილია, გამონაკლისის სახით, ფონდმა თავის თავზე აიღო მათი ქირის გადახდა.
უკრაინელი ლტოლვილებისთვის გრძელდება უფასო ფსიქოლოგიური დახმარება და მხარდაჭერა.
შეხვედრების სტატისტიკა ნოემბერში:
სამი გასვლითი ფსიქოლოგიური ჯგუფური საკონსულტაციო შეხვედრა ფახულანის (წალენჯიხის მუნიციპალიტეტი), სენაკის, ჩოხატაურის, ვანის ქალთა მხარდაჭერის ცენტრებში და ონლაინ შეხვედრები ტყიბულის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში - 47 მონაწილე.
23 ინდივიდუალური ფსიქოთერაპიული სესია, მათგან 12 - ონლაინ.
5 ფსიქოთერაპიიული სესია დღის ცენტრის ბენეფიციარებთან, რომლებიც სწავლობენ პოლიმერულ თიხასთან მუშაობას.
განსაკუთრებული იყო ჯგუფური შეხვედრა სენაკში. შეხვედრას ესწრებოდნენ ქალები, რომლებიც ჩვენს სარეაბილიტაციო ცენტრში იმყოფებოდნენ. მათ ისაუბრეს თავიანთ წარმატებებზე. იმაზე, რომ სამსახური იშოვეს და ფინანსური მდგომარეობა გამოუკეთდათ.
25 ნოემბერს გაიმართა ქალთა მოძრაობის მარში სექსუალური ძალადობის წინააღმდეგ. მსვლელობას სხვა სოლიდარულ ჯგუფებთან ერთად ქალთა ფონდი „სოხუმის“ თბილისის წარმომადგენლობის ოფისიც შეუერთდა. აქციის ორგანიზატორები და მონაწილეები ამბობენ, რომ ქალის თანხმობის გარეშე მასთან სექსუალური ხასიათის ქმედება გაუპატიურება და ძალადობაა. მათივე განცხადებით, ეს საერთაშორისო კონვენციების, ასევე სასამართლოების მიერ არის აღიარებული, თუმცა არ აღიარებს ქართული კანონმდებლობა.
გენდერული ძალადობის წინააღმდეგ მიმართული 16-დღიანი კამპანიის ფარგლებში, 25 ნოემბერს ძალადობისგან დაცვის ეროვნულმა ქსელმა წარადგინა მამების ძალადობრივი ქცევის და კორექციის პროგრამა „მამაშვილობა“, რომლის მიზანია მამის ქცევის კორექცია და მისი მხარდამჭერ მამად ჩამოყალიბების ხელშეწყობა. ღონისძიებაზე ჩვენმა წარმომადგენელმა ლინდა ჩიხლაძემ ქალთა ფონდი „სოხუმის“ მონიტორინგის ანგარიშის „ადრეულ ეტაპზე მოძალადის ძალადობრივი ქცევის კორექციის მნიშვნელობა და არსებული საუკეთესო გამოცდილება“ მიგნებებზე დაყრდნობით, დამსწრეებს რეკომენდაციები შესთავაზა, თუ რა მნიშვნელობა შეიძლება ჰქონდეს აღნიშნული პროგრამის ადრეულ ეტაპზე დანერგვას.