ურბანული კვლევების ცენტრმა ჩაატარა პანელური დისკუსია თემაზე „განსახლების საკითხები და ომი: უკრაინისა და საქართველოს გამოცდილება“. შეხვედრაზე მომხსენებელთა შორის იყო ქალთა ფონდი „სოხუმის“ თბილისის წარმომადგენელი ეკატერინე გამახარია. დისკუსია მიეძღვნა ომის გავლენას უკრაინის საბინაო სექტორზე, უკრაინასა და საქართველოში კონფლიქტით დაზარალებული/დევნილების საბინაო მდგომარეობის და განსახლების პოლიტიკის განხილვას. მონაწილეები მსჯელობდნენ საბინაო უზრუნველყოფის მექანიზმების გაუმჯობესების გზებზეც.
ეკატერინე გამახარიამ ყურადღება გაამახვილა დევნილთა განსახლების არსებული პოლიტიკის ხარვეზებზე და ხაზი გაუსვა მისი ეფექტიანობის შეფასების და განხორციელებული პოლიტიკით დევნილთა კმაყოფილების შესწავლის აუცილებლობას. დისკუსიის დროს გამოიკვეთა განსახლების პოლიტიკის დევნილთა მრავალფეროვანი და სპეციფიკური ჯგუფების საჭიროებებზე და ინტერესებზე მორგების მნიშვნელობა. ასევე, კერძო სექტორში მცხოვრები, უყურადღებოდ დარჩენილი დევნილების წინაშე არსებული გამოწვევების ძირეულად შესწავლის საჭიროება.
შეხვედრის დროს ხაზი გაესვა განსახლების პოლიტიკის დაგეგმვის პროცესში როგორც თავად დევნილთა, ასევე სამოქალაქო საზოგადოების და კერძო სექტორის წარმომადგენელთა ჩართულობის უზრუნველყოფის საჭიროებას. მსჯელობა ასევე შეეხო თვითდინებაზე მიშვებული გაქირავების პოლიტიკის გაკონტროლებას და დარეგულირებას ფასების არაადეკვატური ავარდნის თავიდან აცილების მიზნით.
უკრაინიდან მომხსენებელთა შორის იყვნენ:
- ანასტასია ბობროვა, ორგანიზაცია Cedos-ის ანალიტიკოსი და მკვლევარი; ინიციატივა „Re.Housing for Ukraine“-ის კოორდინატორი
- ივან ვერბიცკი, ორგანიზაცია Cedod-ის დირექტორი.
შეხვედრას მოდერატორობას უწევდა ნანო ზაზანაშვილი, ურბანული კვლევების ცენტრის პროექტების ხელმძღვანელი და მკვლევარი.
ადამიანის უფლებების საბჭოს გენდერული თანასწორობის, ქალთა მიმართ ძალადობის და ოჯახში ძალადობის საკითხებზე მომუშავე უწყებათაშორისი კომისიის სხდომა ჰიბრიდულ რეჟიმში გაიმართა. სხდომაში მონაწილეობდა როგორც ცენტრალური ხელისუფლების რელევანტური უწყებების წარმომადგენლები, ასევე საერთაშორისო და ადგილობრივი სამოქალაქო საზოგადოების ორგანიზაციების წარმომადგენლები. შეხვედრას ხელმძღვანელობდა პრემიერ-მინისტრის მრჩეველი ადამიანის უფლებათა დაცვის საკითხებში - ნიკო თათულაშვილი. მონაწილეებმა ერთმანეთს გაუზიარეს ის ძირითადი ინდივიდუალური მიღწევები და გამოწვევები, რომლებიც თან ახლავს გენდერული თანასწორობისთვის და ქალთა და ოჯახში ძალადობის წინააღმდეგ მუშაობის პროცესს.
სხდომას ქალთა ფონდი „სოხუმის“ თბილისის ოფისის წარმომადგენელი ლინდა ჩიხლაძე ესწრებოდა. მან დამსწრეებს ფონდი „სოხუმის“ გამოცდილება გაუზიარა და, მოკლე დროის მიუხედავად, ყურადღება გადაუდებელ საჭიროებებზე გაამახვილა. კერძოდ: ბავშვთა მოვლის სერვისების არსებობის მნიშვნელობაზე ქალთა დასაქმების ხელშესაწყობად ოჯახში ძალადობის ეფექტიანი პრევენციისთვის; სოფლებში მერის წარმომადგენლების ჩართულობით ქალთა/ოჯახში ძალადობის ადრეულ ეტაპზე გამოვლენის მნიშვნელობაზე. პარალელურად, მათი გენდერული სენსიტიურობის გაზრდასა და პროფესიული გადამზადებების საჭიროებაზეც ისაუბრა; მუნიციპალური სერვისის მისაღებად არსებულ იმ ბარიერებზე, რაც დაზარალებულ ქალს არ აძლევს უფლებას, კრიზისულ სიტუაციაში გამოიყენოს სხვა მუნიციპალიტეტში არსებული სერვისები, მსხვერპლის სტატუსისა და რეგისტრაციის უქონლობის გამო. ლინდა ჩიხლაძემ ასევე დასვა კითხვა, თუ რა მდგომარეობაა მოძალადის ქცევის კორექციის მიმდინარე პროგრამებთან დაკავშირებით და აქვთ თუ არა დაგეგმილი ამ პროგრამების ეფექტიანობის შეფასება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ თბილისის წარმომადგენლობის ორგანიზებით ახალი მონიტორინგის ანგარიშის „ადრეულ ეტაპზე მოძალადის ძალადობრივი ქცევის კორექციის მნიშვნელობა და არსებული საუკეთესო გამოცდილება“ პრეზენტაცია ონლაინ - Zoom პლატფორმის საშუალებით გაიმართა, რომელიც ორგანიზაციის მკვლევარმა - ნინო კორინთელმა წარმოადგინა.
შეხვედრას სახელმწიფო უწყებებისა და ადგილობრივი ორგანიზაციების წარმომადგენლებთან ერთად საერთაშორისო ორგანიზაციების წარმომადგენლები და დასავლეთ საქართველოს 10 მუნიციპალიტეტის საჯარო მოხელეებიც ესწრებოდნენ.
„დიდი მადლობა ასეთი მნიშვნელოვანი ღონისძიების ორგანიზებისთვის თქვენ, სადაც სხვადასხვა უწყების წარმომადგენლებს, ექსპერტებს, ადგილობრივი თვითმართველობების წარმომადგენლებს ჩვენ-ჩვენი გამოცდილებების, მიგნებების, სტატისტიკის, მიღწეული შედეგების, გამოწვევების გაზიარების შესაძლებლობა გვეძლევა ინფორმაციის შევსების თვალსაზრისით. მსგავსი შეხვედრები ყოველთვის ახალი ინიციატივების, ცვლილებების და სერვისების წინაპირობებს ქმნის,“ - ინდირა რობაქიძე, თბილისის ძალადობის მსხვერპლთა მომსახურების კრიზისული ცენტრის უფროსი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მე ვარ სოფიკო კუხალაშვილი, დაბადებული 1992 წელს, აფხაზეთიდან დევნილი, ვცხოვრობ ხონში. მინდა მოკლედ მოგიყვეთ ჩემი პატარა წარმატების შესახებ, რასაც თავად მივაღწიე.
2017 წელს ვიყავი სოფლად და ბებომ მაჩუქა ერთი გოჭი, რითაც დაიწყო ჩემი პატარა ბიზნესი. ეს გოჭი, რომელიც უნდა გამეზარდა და შემდეგ დამეკლა, იყო დედალი, როცა წამოიზარდა და გახდა 7 თვის, შემეცოდა დასაკლავად, ამიტომ გადავწყვიტე რომ გამემრავლებინა და ეგრეც მოვიქეცი, შეჯვარება მოვახდინე რომ ნამატი მყოლოდა. შეჯვარებიდან 4 თვეში მეყოლა პატარა გოჭები, როცა ეს დავინახე ჩემს სიხარულს საზღვარი არ ჰქონდა. რატომღაც მათი მოვლა და პატრონობა ძალიან საინტერესო და სასიამოვნო გახდა ჩემთვის.
შემდეგ გადავწყვიტე, რომ ეს ყველაფერი უფრო ფერმერობისკენ წასულიყო. ასეც მოხდა, შევძელი იმდენი, რომ დამედგა შენობა, რომელშიც დავაბინავე ღორები. ამაში ჩემი მშობლების დახმარება მჭირდებოდა ფინასურად. ამ შენობაში არამარტო ერთი დედა ღორი არამედ 10 მინიმუმ იყო. შემდეგ შევუდექი მოძიებას თუ საიდან შეიძლებოდა მომეყვანა კარგი საშენი ღორები, რომ წარმატებული ფერმერი ვყოფილიყავი და შედეგი საუკეთესო ყოფილიყო.
დროდადრო ყველას გვესაჭიროება ფსიქოლოგიური განტვირთვა.
სწორედ ამ მიზნით ფონდი „სოხუმის“ ორგანიზებით დიდინეძის სკოლის პედაგოგებთან ჩატარდა ტრენინგი.
არტ თერაპია, როლური თამაშები და ტესტები. ეს ის მცირე ჩამონათვალია, რაც მონაწილეებთან შეასრულა ფონდი „სოხუმის“ ფსიქოლოგმა მანანა გოცირიძემ.
ქალბატონები ძალზედ კმაყოფილნი დარჩნენ და აღნიშნეს, რომ მსგავსი აქტივობები აუცილებელია ენერგიით ასავსებად, მეტი შემართებითა და ენთუზიაზმით მუშაობისთვის.
პროექტი ხორციელდება USAID-ის მხარდაჭერით
ქართული სუფრა არა მხოლოდ სადილობას ნიშნავს. ეს ერთად ყოფნის, ერთმანეთისთვის გრძნობების გაზიარების რიტუალია. ამიტომაც გადავწყვიტეთ, სუფრასთან მოგვეწვია „ჩვენი უკრაინელები“ - ასე ვეძახით უკრაინიდან ჩამოსულ ქალებს. ისინიც სიამოვნებით მოვიდნენ ჩვენს ოფისში: ირინა, ნატალია, მარინა...
ქართული კერძები ჩვენით დავამზადეთ - ჩახოხბილი და ფხალი, მჭადი და ხაჭაპური, საცივი, ჩანახი, კუბდარი... კერძების რეცეპტებიც ამოვუბეჭდეთ და გავატანეთ.
თან ქართულ სუფრულ ტრადიციებზე ვისაუბრეთ, თან - ჩვენს განცდებზე. იმათ თავისი თქვეს, ჩვენ - ჩვენი, უკრაინის ომმა რომ გაგვიახლა...
სუფრა ერთგვარ ფსიქორეაბილიტაციად იქცა. კმაყოფილები წავიდნენ, ტკივილი დაივიწყეს ცოტა ხნით. იციან, რომ ქალთა ფონდი „სოხუმი“ მათი მხარდამჭერია, მათი დამხმარე და ცდილობს მათი ყოველდღიური პრობლემების მოგვარებას...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ყოველთვის ისმის შეკითხვა ჩემი და სხვათა მისამართით, როგორ გავხდი წარმატებული ქალბატონი. ამ თემაზე ქალთა ფონდი „სოხუმის“ მიერ ორგანიზებულ ერთ-ერთ შეხვედრაზე მომიწია საუბარი.
ვფიქრობ, საინტერესოდ ავხსენი წარმატების ჩემებური ფორმულა.
წარმატების მისაღწევად ყველა ადამიანმა ინდივიდუალური გზა უნდა შეიმუშავოს, რაც ყველაზე მთავარს - შრომისმოყვარეობას, მუდმივ მოძრაობას, მიზანდასახულობას, ლოგიკურად აზროვნების უნარსა და ცოტა იღბალსაც მოიცავს.
არ ვთვლი, რომ სხვის მიერ განვლილი გზა წარმატებისკენ ჩემთვის ნათელი მაგალითია, რადგან ყველაფერი ინდივიდუალურია, როგორც თავად ადამიანი, ასევე, მისი უნარები და შესაძლებლობები, ამიტომ ჩვენი სამუშაო გეგმა სწორედ მაშინ მოგვიტანს შედეგს, როცა ჩვენს შესაძლებლობებზე იქნება მორგებული.
ბავშვობიდან გამოვირჩეოდი არაერთმხრივი შემოქმედებითი უნარით და დღემდე ამ უნარებს ვავითარებ, უფროსწორად, ნებისმიერ საქმიანობას შემოქმედებითად ვუდგები. სირთულეებსაც ადვილად ვუმკლავდები, მიზნისკენ სვლისას, თავისთავადია, არაერთგვაროვანი პრობლემის არსებობა, მაგრამ ეს ვერ უშლის ხელს საქმისადმი სწრაფვას.
ქუთაისის ქალთა საინიციატივო ჯგუფის წევრებთან ონლაინ შეხვედრაზე მონაწილეებმა აპრილში გამართული ტრენინგების ციკლი შეაფასეს და მიღებული ინფორმაციების საჭიროებაზე ისაუბრეს.
„ჩემთვის საინტერესო და მნიშვნელოვანი იყო ეს ტრენინგები, მომცა აქტიური მოქალაქისთვის აუცილებელ თემებში გარკვევის შესაძლებლობა.“
„ტრენინგების ციკლი დაგვეხმარება იმაში, რომ უფრო აქტიურები გავხდეთ და შევძლოთ ჩვენი საჭიროებების პრიორიტეტულობის გარკვევა და ადვოკატირება.“
შეხვედრის დასასრულს მონაწილეებს მიეწოდათ ინფორმაცია მომავალი თვის სატრენინგო თემებზე.
პროექტი ხორციელდება გაეროს ქალთა ორგანიზაციის
მხარდაჭერით
„რომ არა ასეთი შეხვედრები, თვითმმართველობის პროგრამებზე ინფორმაცია არ მექნებოდა, თურმე რამდენი რამ გაუთვალისწინებიათ და, დარწმუნებული ვარ, როგორც მე, ისე ბევრს არ აქვს ამაზე ინფორმაცია.“
„არა მარტო ინფორმაცია მივიღე, მცირე სწავლებაც გავიარე, როგორ გამოვიყენო ონლაინ სივრცე საინტერესო ინფორმაციის მისაღებად.“
ეს შეხვედრების მონაწილეთა უკუკავშირია. შეხვედრები გაიმართა თერჯოლის, სამტრედიის, ბაღდათის და ვანის მუნიციპალიტეტებში მცხოვრებ ბენეფიციარებთან. ისინი გაეცნენ, სწორად როგორ გამოიყენონ ინტერნეტ სივრცე, როგორ იპოვონ საჭირო მასალა თუ დოკუმენტი. შეხვედრაზე ასევე მიიღეს დეტალური ინფორმაცია ქალთა ფონდი „სოხუმის“ ვებგვერდზე „ძალადობის მსხვერპლთა სერვისების ციფრული რესურსცენტრი“.
პროექტი ხორციელდება გენდერული თანასწორობის ფონდის მხარდაჭერით (კანადა)
თვის მანძილზე აქტიურად მუშაობდა ქალთა ფონდი „სოხუმის“ იურისტი იამზე გუმბერიძე. ბაღდათში ის დაესწრო ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისიის პრეზენტაციას - ამ კომისიის შექმნით ქალთა ფონდი „სოხუმის“ ინიციატივას პირველმა ბაღდათის მუნიციპალიტეტმა დაუჭირა მხარი.
ტრადიციულად, წარიმართა მუშაობა ქალთა მხარდაჭერის ცენტრებთან. ინდივიდუალური შეხვედრა ჩატარდა ბაღდათში, ჯგუფური - თერჯოლაში (მონაწილეობდა 16 ადამიანი), წალენჯიხაში კი იყო როგორც ინდივიდუალური, ასევე ჯგუფური შეხვედრები (7 ბენეფიციარის მონაწილეობით).
ჯგუფურ შეხვედრებზე გამოვლინდა ქალები ძალადობის მსხვერპლის ნიშნებით და მათი შვილები. იურისტმა გააცნო მათ კანონი, რომელიც ძალადობის წინააღმდეგ მოქმედებს და მსხვერპლის დაცვის მექანიზმები. ამ შეხვედრების გარდა სატელეფონო კონსულტაცია ჩაუტარდა ჩოხატაურელ ბენეფიციარს. შეხვედრების მონაწილეებმა მიიღეს პასუხები თავიანთ კითხვებზე - ეს ხელს უწყობს მათი პრობლემების მოგვარებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)