აპრილში 10 ადამიანი დაემატა ჩვენს სიას. ახლა უკრაინელთა ბაზაში 480 ადამიანია.
ამ თვეში მერიამ ჩვენს ახალ ბენეფიციარებს პერსონალური სამგზავრო ბარათები გადასცა. მათთან დარეგისტრირებულმა ყველა ოჯახმა მიიღო 100-ლარიანი კვების ვაუჩერი მაღაზია Carrefour-ისთვის.
ჩვენ 6 ოჯახს გავუწიეთ დახმარება. საცხოვრებლის ქირა გადავუხადეთ მძიმე მდგომარეობაში მყოფ ერთ ოჯახს - ქუთაისში ცხოვრობს ქალი სამი შვილით, ქმარი ბახმუტთან იბრძვის და თვეზე მეტია, არ გამოსულა კავშირზე.
ჩვენი ორგანიზაციის წარმომადგენლებმა, რომლებიც უკრაინელებთან მუშაობენ, აქტიური მონაწილეობა მიიღეს UNHCR-ის მიერ ორგანიზებულ შეხვედრაში, სადაც უკრაინელი ლტოლვილების პრობლემები განიხილეს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
7 გასვლითი შეხვედრა გამართა ფსიქოლოგმა თერჯოლის, ფახულანის (წალენჯიხის მუნიციპალიტეტი), ხურჩის (ზუგდიდის მუნიციპალიტეტი), სენაკის, ქობულეთის, ტყიბულისა და ჩოხატაურის ქალთა მხარდაჭერის ცენტრებში. ჩატარდა 4 ჯგუფური და 11 ინდივიდუალური კონსულტაცია და 12 ონლაინ შეხვედრა. ქუთაისში 11 ფსიქოთერაპიული სესია გაიმართა.
ყველა კმაყოფილია მუშაობის შედეგებით, მაგრამ განსაკუთრებით შეიძლება აღინიშნოს, რომ ორმა ბენეფიციარმა ახალი უნარების გამომუშავებით შეძლო საკუთარი პრობლემების გადაჭრა და ისწავლა ემოციების კონტროლი, ხოლო სამი მოზარდი გაუმკლავდა ბულინგს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფორუმ-თეატრი ახალ ეტაპზე გადავიდა. განახლდა გუნდი. დაიდგა ახალი სცენები, სადაც ყველა მსახიობი მთავარ როლს ასრულებს.
ფორუმ-თეატრის ბოლო ორი გამოსვლა განსაკუთრებული იყო. ერთი ქალთა ფონდი „სოხუმის“ ეზოში გაიმართა, დონორი ორგანიზაციის - USAID-ის წარმომადგენლების წინაშე. ჩატარდა ხუთი სცენა. ახალგაზრდა მსახიობების გამოსვლამ მაღალი შეფასება მიიღო. ფორუმ-თეატრის გუნდი USAID-ის დაფინანსებული პროექტის ფარგლებში სხვადასხვა რეგიონში ახალგაზრდებს აცნობს ფორუმ-თეატრის სპეციფიკას და აყალიბებს ახალ გუნდებს.
მეორე გამოსვლა ფორუმ-თეატრს ჰქონდა გეგუთის #14 პენიტენციურ დაწესებულებაში. მსჯავრდებულები აქტიურად ჩაერთნენ დისკუსიაში. დაწესებულების ხელმძღვანელმა პირებმა, სოციალურმა მუშაკმა და ფსიქოლოგმა ფორუმ-თეატრის წარმოდგენებს აქტუალური და მნიშვნელოვანი აქტივობა უწოდეს.
ფსიქოლოგმა მანანა გოცირიძემ აპრილში სამ ოჯახთან - უკრაინიდან ჩამოსულ 7 ადამიანთან - ჩაატარა მუშაობა. გაარკვია მათი მდგომარეობა და უფასო ფსიქოთერაპიის კურსი დაიწყო.
დახმარება ყველას სჭირდება, რადგან რთული დღეები გამოიარეს.
41 წლის ოლენა ოჯახთან ერთად მარიუპოლიდან შარშან აგვისტოში ჩამოვიდა. მთელი თვე იყვნენ ჯოჯოხეთში, ყოველდღიურად იღუპებოდნენ მეზობლები. შიში და უიმედობა ჰქონდათ. შემზარავი სანახავი იყო გადაბუგული სახლები, დამწვარი ცხოველები, დანგრეული ქუჩები... იქიდან უკრაინის სხვა ქალაქში გადაიყვანეს, მაგრამ არც იქ იყო სიმშვიდე, საკვები... წამოსვლა გადაწყვიტეს და საქართველო აირჩიეს: ნაცნობი, თბილი, ახლო. ოლენას თქმით, ძალიან კარგია ქალთა ფონდი „სოხუმის“ დახმარება პროდუქტებით, მაგრამ არანაკლებ მნიშვნელოვანია ფსიქოლოგის რჩევები, მხარდაჭერა. ასე უფრო მარტივდება პრობლემების მოგვარება...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ინფორმაცია იმ სერვისებზე, რომლებიც ძალადობის მსხვერპლთა დასახმარებლად არსებობს, აუცილებლად უნდა გაიგოს ადამიანმა, ვისაც მსგავსი ტიპის დახმარება სჭირდება, - ასეთი მოსაზრება ჰქონდათ ქობულეთის, სენაკის და ბაღდათის ქალთა მხარდაჭერის ცენტრებში გამართული საინფორმაციო შეხვედრების მონაწილეებს.
ქალთა მხარდაჭერის ცენტრების მუშაობის მიზანი სწორედ ის არის, რომ ადრესატამდე მივიდეს საჭირო ინფორმაცია. შესაბამისად, გაზრდილია მომართვიანობა ქალთა ფონდი „სოხუმის“ მისამართით. მობილიზატორების დახმარებით ბენეფიციართა ერთი ნაწილი ფსიქოლოგთან შეხვედრისთვის ემზადება. ორი ქალი ჩვენი ორგანიზაციის სარეაბილიტაციო ცენტრში გაივლის სრულ კურსს. ქეისების შინაარსიდან გამომდინარე, მუშაობა მულტიგუნდური პრინციპით მიმდინარეობს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ახალგაზრდების გაძლიერების ცენტრებში ახალი სატრენინგო კურსი დაიწყო.
კურსი 10 მუნიციპალიტეტის ახალგაზრდულ ჯგუფებს მოიცავს. ჯგუფების ჩამოყალიბებაში დაგვეხმარნენ ადგილობრივი თვითმმართველობები და უკვე ჩატარდა 5 ტრენინგი ზუგდიდის, წალენჯიხის, ტყიბულის, თერჯოლის და ქობულეთის მუნიციპალიტეტებში. მუშაობაში 125 ახალგაზრდა მონაწილეობდა. ასევე აქტიურად ჩაერთნენ გენდერული თანასწორობის საბჭოს წევრები, ახალგაზრდული დეპარტამენტების წარმომადგენლები, სკოლის დირექტორები და პედაგოგები.
პირველი ნაბიჯები გადაიდგა. გაჩნდა ახალგაზრდების ახალი ჯგუფების იდეები და ინიციატივები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგის და ადვოკატირების ჯგუფმა დაასრულა საველე სამუშაოები სამიზნე მუნიციპალიტეტებში. ჯგუფმა შეისწავლა ადგილობრივი თვითმმართველობის მიერ ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის კუთხით განხორციელებული პრევენციული ღონისძიებების ეფექტიანობა.
გამოიკვეთა ხარვეზები, რომლებიც გამოსწორებას საჭიროებს. ამისთვის შემუშავდება რეკომენდაციები, რაც საშუალებას მისცემს ადგილობრივ თვითმმართველობებს, განსაზღვრონ ბენეფიციარებზე გათვლილი სტრატეგია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრებში საინფორმაციო შეხვედრების მთავარი თემა კვლავ ქალთა მიმართ ძალადობაა. დღემდე გამოწვევად რჩება ძალადობის შემთხვევების იდენტიფიცირება, მსხვერპლთა მხარდაჭერის სერვისებზე არასაკმარისი ინფორმირება.
აღნიშნული გამოწვევების დასაძლევად, ქალთა მხარდაჭერის ცენტრები აქტიურად მუშაობენ სოფლებში, სხვადასხვა თემში. ისინი ხელს უწყობენ აქტიური, ლიდერი ქალების გამოკვეთას ადგილებზე. ხდება საჭირო ინფორმაციის გავრცელება.
სამტრედიის, ჩოხატაურის, თერჯოლის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში უკვე არის შედეგები ახალი ქეისების გამოვლენის და მსხვერპლთა დახმარების კუთხით.
შეხვედრაზე, მონაწილეებს ასევე მიეწოდათ ინფრომაცია პრაქტიკულ გზამკვლევზე: "გენდერული ნიშნით ძალადობის პრევენცია და მასზე რეაგირება საომარ და ომის შემდგომ პერიოდში - ქალთა ორგანიზაციების გამოცდილებები და რეკომენდაციები", რომელიც ეუთოს (OSCE) მხარდაჭერით, ქსელი WAVE-ისა და მისი ოთხი წევრის მიერ 2022 წელს შემუშავდა. აღნიშნული გზამკვლევი ეყრდნობა საომარი და პოსკონფლიქტური მდგომარეობის სხვადასხვა ეტაპზე ქალთა ორგანიზაციების სპეციფიკურ ცოდნასა და გამოცდილებას და მასში დეტალურად არის აღწერილი სტრატეგიები კონფლიქტის სხვადასხვა ფაზაში გენდერული ძალადობის პრევენციისა და რეაგირებისთვის.
- ომის დროსა და საგანგებო სიტუაციებზე რეაგირების პერიოდი, რომელსაც უკრაინელი და სომეხი პარტნიორები აზიარებენ (სექსუალური ძალადობის კრიზისული ცენტრი (ერევანი, სომხეთი), ცენტრი „ქალთა პერსპექტივები“ (ლვოვი, უკრაინა)
- გაჭიანურებული კონფლიქტი, რომელიც აღწერილია ქართველი პარტნიორის - ქალთა ფონდი „სოხუმის“ მიერ;
- ომის შემდგომი და გრძელვადიანი პერსპექტივა - წარმოდგენილი ბოსნია-ჰერცოგოვინელი პარტნიორის გამოცდილებაზე დაყრდნობით.
(პრაქტიკული სახელმძღანელო ხელმისაწვდომია აქ https://wave-network.org/.../uploads/Toolkit-Georgian.pdf...3IA)
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდ „სოხუმში“ კიდევ ერთი ახალი პროფესიის სასწავლო კურსი მიმდინარეობს.
დღის ცენტრის ბენეფიციარები ორი თვის განმავლობაში (თებერვალი-მარტი) შეისწავლიან ფრჩხილის მოწესრიგების, გელ ლაქის და დაგრძელების ხელოვნებას.
ეს სასწავლო მოდული ქალებმა საკუთარი სურვილით აირჩიეს. ეს არის სასურველი პროფესია, რომელიც ხელს უწყობს დამოუკიდებელი ცხოვრების დაწყებას, თვითრეალიზაციას, წარმატებას.
პროგრამა ხორციელდება პროექტის „ქალთა უფლებების გაძლიერება დასავლეთ საქართველოში“ ფარგლებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მცირე საგრანტო კონკურსმა 10 გამარჯვებული გამოავლინა. ისინი უკვე შეუდგნენ მუშაობას თავიანთ სფეროში.
პირველ ეტაპზე ქალებმა ქუთაისის და ბაღდათის დღის სარეაბილიტაციო ცენტრებში გაიარეს პოლიმერულ თიხაზე მუშაობის, სტილისტის და ბუღალტრის სასწავლო კურსები.
მეორე ეტაპზე მათთვის ჩატარდა ტრენინგები, სადაც შეისწავლეს საკუთარი მიზნების ჩამოყალიბება, საგრანტო წინადადების და ბიზნეს პროექტების დაწერის სპეციფიკა.
შემდეგ დაიწყო საკონკურსო პერიოდი. კონკურსში მონაწილეობდა 20 ადამიანი - 12 ქუთაისიდან და 8 ბაღდათიდან. დაიწერა ბიზნეს პროექტები.
წარდგენილი პროექტებიდან შეირჩა და დაფინანსდა 10. ქალთა ფონდი „სოხუმის“ ფინანსური დახმარებით 8 ქუთაისელმა და 2-მა ბაღდათელმა ქალმა შეძლო მცრე ბიზნესის დაწყება. ასე იცვლება ჩვენი ბენეფიციარების ცხოვრება და იქმნება მათი წარმატების ისტორიები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)