„აქ ბევრ საინტერესო ქალს ვხვდები. ეს ქალები ძლიერები არიან, ერთმანეთს არ გვანან, ტკივილებითაც განსხვავდებიან... მოდიან ახალგაზრდა დედები ან ბებიები შვილიშვილებთან ერთად. ზოგიერთი მათგანი მაკვირვებს პოზიტიური აზროვნებით. ვცდილობთ, შესაძლებლობის ფარგლებში ძალისხმევა მათი კონკრეტული საჭიროებებისკენ მივმართოთ.“
„ცენტრში მოსულ ქალებს ყოველთვის ვთავაზობ ბაგრატის ტაძრის ეზოში გასეირნებას. მიყვარს მათი აღფრთოვანებული სახეების ყურება. წინასააღდგომო დღეებში ბაიებით გადაჭედილი ეზო შეუდარებლად ლამაზი იყო. მერე ახმაურებულ ქალაქს გადავხედეთ, მზეში აკაშკაშებულს. როგორი ქალაქია ქუთაისი, ვკითხე პატარას, რომელიც სხვა ქალაქიდან გვესტუმრა. გოგონამ მიპასუხა: კაილამაზი! ეს ახალი სიტყვა ამ ქალაქის შინაგან სამყაროს, მის სიკარგეს, მის ზნეკეთილობასაც ასახავს და გარეგნულ მშვენიერებასაც უსვამს ხაზს. ხანდახან სარეაბილიტაციო ცენტრში ისეთი შემოქმედებითი ატმოსფეროა, ყველას გვავიწყდება, რის გამოც ერთად ვართ...“
ახლა სარეაბილიტაციო ცენტრში ახალ ნაკადს ელოდებიან. ქალებთან და ბავშვებთან შესახვედრად, მათთან სამუშაოდ ემზადება მთელი ჯგუფი. ყველაზე მთავარი ზრუნვაა, უნდა აგრძნობინონ თითოეულ მათგანს, რომ მარტონი არ არიან. მათ სჭირდებათ რწმენის განმტკიცება, რომ ნებისმიერ დროს და ვითარებაში შეიძლება ყველაფერი თავიდან დაიწყო და იარო წინ!
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)