ხუთი თვეა, უკრაინაში ომია. სამწუხაროდ, ჩვენს ქვეყანაში მატულობს ლტოლვილთა რიცხვიც.
წინა თვის ბოლოს ჩვენს ბაზაში უკრაინიდან ჩამოსული 122 ადამიანი იყო, ახლა კი 197-ია. მათი ნაწილი ქუთაისში ცხოვრობს, ნაწილი - წყალტუბოში, სენაკში, ზუგდიდში, ტყიბულში, ხარაგაულში, ვანში, სამტრედიაში.
ქალთა ფონდმა „სოხუმმა“ ივლისში 15 ოჯახს გაუწია დახმარება. დაეხმარა ცალკეულ ადამიანებსაც. ვინაიდან აგვისტო საშვებულებო პერიოდია, მხარდაჭერის ჯგუფი ცდილობს, ამ თვეში კიდევ დაარიგოს დახმარების პაკეტები.
2 ივლისს ჩვენი ორგანიზაციის თანამშრომლები მონაწილეობდნენ გაეროს ლტოლვილთა უმაღლესი კომისარიატის ორგანიზებულ შეხვედრაში, სადაც ესწრებოდნენ ჯანდაცვის, საგარეო საქმეთა საინისტროს და სხვა უწყებების წარმომადგენლები. დაისვა ბევრი საჭირბოროტო საკითხი, რომლებიც სასწრაფო გადაწყვეტას საჭიროებს, მაგ., მცირეწლოვანი ბავშვების მკურნალობის, მშობიარობის, უფასო აცრების საკითხი.
სოფელ ფახულანში (წალენჯიხის მუნიციპალიტეტი), კონფლიქტის გამყოფ ხაზზე, ჭრა-კერვის მორიგი კურსები ტარდება. აქ ასწავლიან თანამედროვე ტექნიკის გამოყენებას, ქსოვილების შერჩევას, მარტივიდან ყველაზე რთულამდე - სხვადასხვა ნაწარმის გამოჭრას და შეკერვას. ასე ხდება შემოქმედებითი ენერგიის რეალიზება.
როგორც კურსის მონაწილეები ამბობენ, საოცარი შეგრძნებაა, გააცოცხლო შენი იდეა, საკუთარი ხელით შექმნა სამოსი, შენი განუმეორებელი სტილი და გარდერობი. მათ იციან, რომ მიღებული ცოდნა შეუძლიათ გამოიყენონ საკუთარი მცირე ბიზნესის დასაწყებად, ისევე, როგორც ფახულანის თუ ქუთაისის დღის სარებილიტაციო ცენტრის არაერთმა კურსდამთავრებულმა შეძლო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
კიდევ ერთი მრგვალი მაგიდა გაიმართა ადგილობრივი რეფერირების სუბიექტების მონაწილეობით - ამჯერად ქობულეთის საკრებულოს სხდომათა დარბაზში.
შეხვედრას ესწრებოდნენ: ქობულეთის საკრებულოს გენდერული თანასწორობის საბჭოს წევრები, მერიის, სოციალური სამსახურების, პოლიციის სამმართველოს წარმომადგენლები. მოწვეულნი იყვნენ ლანჩხუთის მერიის სოციალური და ჯანდაცვის სამსახურის უფროსი და ბავშვთა განყოფილების სოციალური მუშაკი, რომლებმაც თავიანთი მუშაობის სპეციფიკა და პრაქტიკა გაუზიარეს ქობულეთელ კოლეგებს.
შეხვედრაზე ისაუბრეს ძალადობის პრევენციასა და მსხვერპლთა დაცვაზე, ადგილობრივ სტრუქტურებთან თანამშრომლობაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
97 მოზარდი მონაწილეობდა ვანში, წალენჯიხაში, ტყიბულში, სენაკსა და ქობულეთში ჩატარებულ ტრენინგებზე. ზოგიერთი შეხვედრა ტრადიციული ფორმით, ცოცხლად გაიმართა, ზოგიერთი კი ინტერნეტსივრცეში მოეწყო. ფორმის მიუხედავად, ყველა შეხვედრა ერთნაირად საინტერესო, აქტიური და შემეცნებითი იყო.
ნაადრევი ქორწინება და კონფლიქტის მოგვარების გზები - ამ საკითხებზე იმსჯელეს მოსწავლეებმა ტრენერებთან ერთად. ისინი იხსენებდნენ შესაბამის მაგალითებს, ასაბუთებდნენ, რა ნეგატიური შედეგები ახლავს ნაადრევ ქორწინებას, ან რა მნიშვნელობა აქვს კონფლიქტის ადრეულ სტადიაზე მოგვარებას.
ასეთი ტიპის შეხვედრები მოზარდებს თავისუფალი მსჯელობის საშუალებას აძლევს. ისინი სწავლობენ აზრის გამოხატვას, აქტიურ მოსმენას, შეკითხვების დასმას და პასუხების გაცემას...
ჯგუფური მუშაობის, დისკუსიის და საუბრის კულტურა - ყველა ეს უნარ-ჩვევა, რომელიც ახალგაზრდებმა შეიძინეს ან განიმტკიცეს, სატრენინგო კურსის დამსახურებაა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სენაკის დევნილ ქალთა საინიციატივო ჯგუფის სამუშაო შეხვედრაზე ინტერაქტიულ რეჟიმში გაიმართა მსჯელობა შემდეგ საკითხებზე: რატომ არის მნიშვნელოვანი ქსელური მუშაობა, რა სარგებელი შეიძლება მოიტანოს პრობლემების ადვოკატირების მიმართულებით.
მონაწილეებმა საკუთარი პოზიციები გამოხატეს: რა პასუხისმგებლობა შეიძლება დაეკისროთ ქსელის წევრებს, რამდენად მნიშვნელოვანია გუნდური მუშაობა.
მათი შეფასებით, ქსელის სახელით დასმული პრობლემა უფრო მეტად არის შედეგზე ორიენტირებული, რადგანაც პრობლემის მოგვარების რესურსები უფრო მეტია.
შეხვედრის დასასრულს მონაწილეებმა მზადყოფნა გამოთქვეს, რომ სენაკის მუნიციპალიტეტში შეიქმნას ლოკალური ქსელი, რომელიც შემდგომში ფართო ქსელურ მუშაობას დაუდებს სათავეს.
პროექტი ხორციელდება
გაეროს ქალთა ორგანიზაციის მხარდაჭერით
სენაკის, ტყიბულის და თერჯოლის ქალთა მხარდაჭერის ცენტრებში გამართულ შეხვედრებზე მონაწილეებმა ოჯახური ძალადობის შემთხვევების იდენტიფიცირების სირთულეებზე ისაუბრეს. მათ ხაზი გაუსვეს იმ ფაქტს, რომ არსებობენ კონფლიქტური ოჯახები, რომლებიც ამ პრობლემაზე ნაკლებად საუბრობენ, სწორედ ასეთ ოჯახებში განსაკუთრებით მაღალია ძალადობის განვითარების რისკები.
მობილიზატორებმა მონაწილეებს მიაწოდეს ინფორმაცია, რამდენად მნიშვნელოვანია კონფლიქტის პრევენცია ადრეულ სტადიაში და მუშაობა იმ რისკებზე, რომლებიც ძალადობის განვითარებას უწყობს ხელს.
საინფორმაციო შეხვედრებზე გამოიკვეთა კონკრეტული ქეისები. პროცესში ფსიქოლოგი და იურისტი ჩაერთვებიან და ინდივიდუალურ შეხვედრებს ჩაატარებენ. მსგავსი ფორმატით მუშაობა ამცირებს კონფლიქტის განვითარების რისკებს ცალკეულ ოჯახებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხელნაკეთი საჩუქრის მიღება ყველას სიამოვნებს. პოლიმერული თიხისგან ბევრი საინტერესო ნივთი იქმნება: სამკაულები, ჩარჩოები, პატარა სკულპტურები. მათი შექმნით ავტორი დიდ სიამოვნებასაც იღებს და შემოსავალსაც. ამიტომაც იზრდება ინტერესი ამ ხელსაქმის მიმართ.
ქალთა ფონდი „სოხუმის“ დღის სარეაბილიტაციო ცენტრში წარმატებით გრძელდება პოლიმერულ თიხაზე მუშაობის კურსი. ქალები შემუშავებული სქემის მიხედვით, ნაბიჯ ნაბიჯ სწავლობენ ორიგინალური ნივთების დამზადებას. ისინი უკვე თავად ასრულებენ სხვადასხვა კომპოზიციას. როგორც აღნიშნავენ - თიხაზე მუშაობას პოზიტივი მოაქვს...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდმა „სოხუმმა“ მრგვალი მაგიდის ფორმატის შეხვედრა გამართა ადგილობრივი რეფერირების სუბიექტების მონაწილეობით თერჯოლის საკრებულოს სხდომათა დარბაზში.
შეხვედრას ესწრებოდნენ საკრებულოს გენდერული თანასწორობის საბჭოს წევრები, მერიისა და სოციალური სამსახურების, პოლიციის სამმართველოს წარმომადგენლები. შეკრებილებმა ისაუბრეს ოჯახში ძალადობის პრევენციასა და მსხვერპლთა დაცვაზე, სოციალურ პარტნიორობაზე. ჩატარდა კვლევის „მსხვერპლთათვის არსებული სერვისების მონიტორინგი“ პრეზენტაცია. აქცენტი გაკეთდა ოჯახში ძალადობის პრობლემაზე და ადგილობრივ სტრუქტურებთან თანამშრომლობის პერსპექტივაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქობულეთის ქალთა მხარდაჭერის ცენტრმა საინფორმაციო შეხვედრები სოფლის დასახლებაში ჩაატარა. მონაწილეებმა პერიფერიებში ინფორმაციის გავრცელების აუცილებლობაზე გააკეთეს აქცენტი.
სოციალური პრობლემები, ქალთა საჭიროებები, ოჯახური კონფლიქტების გახშირება - ამ თემებზე საუბრისას ახალი ძალადობის შემთხვევების იდენტიფიცირება მოხდა ზუგდიდის მუნიციპალიტეტის სოფლებში - ხურჩაში, კოკში, კახათში გამართულ შეხვედრებზე.
საბავშვო ბაღები ოჯახური კონფლიქტების იდენტიფიცირების წყარო უნდა გახდეს, მანამდე ამ რგოლის სრულად ინფორმირება უნდა მოხდეს, - ასეთი მოსაზრება ჰქონდათ სამტრედიის ქალთა მხარდაჭერის მიერ გამართულ შეხვედრაზე, რომელსაც საბავშვო ბაღის აღმზრდელები და პედაგოგები ესწრებოდნენ.
ქალთა მხარდაჭერის ცენტრების მუშაობა მიზნად ისახავს ოჯახური ძალადობის შემთხვევების პრევენციას და იდენტიფიცირებული ქეისების ეფექტიან მართვას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
რა ინფორმაციას ვაწვდით მოზარდებს? როგორი ხედვა უყალიბდებათ მათ? რა შეიძლება დაეხმაროს მათი ცნობიერების ამაღლებაში?
სწორედ მოზარდთა ჯანსაღი აზროვნების ჩამოყალიბებას უწყობს ხელს ახალგაზრდობის გაძლიერების ცენტრები, რომლებიც დასავლეთ საქართველოს 10 მუნიციპალიტეტში მოქმედებს.
ივლისის პირველი დღეებიდან დაიწყო სატრენინგო კურსი ახალგაზრდებთან და პირველი ხუთი ტრენინგიც ჩატარდა სამტრედიაში, ბაღდათში, ზუგდიდში, ჩოხატაურსა და თერჯოლაში.
შეხვედრებზე განიხილეს ნაადრევი ქორწინების პრობლემა და კონფლიქტის მოგვარების გზები.
ერთმანეთისგან განსხვავებული იყო ხუთივე ტრენინგი, რომელშიც 97 მოზარდი მონაწილეობდა: აქტიური დისკუსიები, საინტერესო ქეისების განხილვა, გულახდილი უკუკავშირი.
ქალთა ფონდი „სოხუმი“ ცდილობს, მისცეს ახალგაზრდებს შესაძლებლობა, იაზროვნონ დროსთან შეფარდებით, ღირებულებებზე მორგებულად, მომავლის საკეთილდღეოდ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)