წალენჯიხისა და ზუგდიდის მუნიციპალიტეტების გამყოფ ხაზთან მცხოვრები ახალგაზრდების მონაწილეობით გაიმართა შეხვედრა თემაზე — პარტნიორულ ურთიერთობებში ტექნოლოგიებით ჩადენილი ძალადობა. შეხვედრას უძღვებოდნენ ფასილიტატორები ემა კამკია და ფსიქოლოგი ეკა ქვაჩაკიძე.

შეხვედრაზე ახალგაზრდებთან ერთად განვიხილეთ, როგორ ვლინდება ძალადობა ციფრულ სივრცეში და როგორ შეიძლება ტექნოლოგიები იქცეს კონტროლისა და ზეწოლის ინსტრუმენტად. საუბარი შეეხო ციფრული ძალადობის ამოსაცნობ ნიშნებს, მის ფსიქო-ემოციურ და სოციალურ შედეგებს, ასევე სამართლებრივი დაცვისა და დახმარების არსებულ მექანიზმებს.

პრაქტიკულ ნაწილში მონაწილეებმა მიიღეს ინფორმაცია პირადი ანგარიშების დაცვის, ციფრული მტკიცებულებების სწორად შენახვისა და საჭიროების შემთხვევაში დახმარებისთვის მიმართვის გზების შესახებ.

მონაწილეებმა აღნიშნეს:

„ვფიქრობდი, ონლაინ კონტროლი უბრალოდ ეჭვიანობა იყო. ახლა მივხვდი, რომ ეს ძალადობის ფორმაა.“

„ყველაზე მნიშვნელოვანი იყო იმის ცოდნა, რომ დახმარების მიღება რეალურად შესაძლებელია.“

ამოიცანი. ისაუბრე. იმოქმედე.

გაეცანით გზამკვლევს - „პარტნიორულ ურთიერთობებში ტექნოლოგიებით ჩადენილი ძალადობა — ამოიცანი და დაიცავი თავი“.

პროექტი ხორციელდება WAVE ქსელის მხარდაჭერით

წალენჯიხისა და ზუგდიდის მუნიციპალიტეტების გამყოფ ხაზთან მცხოვრები ქალთა ჯგუფებისთვის ონლაინ შეხვედრა გაიმართა Zoom პლატფორმის საშუალებით. შეხვედრა განხორციელდა ქალთა ფონდი „სოხუმის“ ორგანიზებით და შეეხო ერთ-ერთ ყველაზე რთულ და ხშირად უხილავ თემას — პარტნიორულ ურთიერთობებში ტექნოლოგიებით ჩადენილ ძალადობას.

დისკუსიის დროს მონაწილეებმა იმსჯელეს, როგორ გრძელდება ძალადობა ციფრულ სივრცეში და როგორ შეიძლება ტექნოლოგიები იქცეს კონტროლისა და ზეწოლის ინსტრუმენტად. ქალებმა გააზიარეს ყოველდღიური გამოცდილებები, ის გამოწვევები, რომლებიც ონლაინ სივრცეში იშვიათადაა ხილული, თუმცა რეალურ ფსიქოლოგიურ და სოციალურ ზიანს იწვევს.

განსაკუთრებული ყურადღება დაეთმო პრაქტიკულ საკითხებს: პირადი ანგარიშების დაცვას, ციფრული მტკიცებულებების სწორად შენახვას და იმ სერვისებს, სადაც ქალებს დახმარების მიღება შეუძლიათ.

შეხვედრის ყველაზე მნიშვნელოვანი ნაწილი თავად მონაწილეთა გულწრფელი საუბრები აღმოჩნდა.

ერთ-ერთმა მონაწილემ აღნიშნა:
„სამწუხაროდ, რეგიონებსა და სოფლებში ამ საკითხს ხშირად სხვანაირად უყურებენ. სოციალური ქსელების პაროლებისა და საბანკო მონაცემების მეუღლეებისთვის გაზიარება ბევრისთვის ნორმად ითვლება. ძალიან მნიშვნელოვანია, რომ ამ თემაზე საუბარი დაიწყეთ.“

სხვა მონაწილემ ისაუბრა იმაზე, თუ რატომ რჩება ძალადობა ხშირად უთქმელი:
„ჩვენ ირგვლივ ონლაინ ძალადობის არაერთი შემთხვევაა, მაგრამ ქალები ვერ საუბრობენ — საზოგადოების მიმართ ნდობა ნაკლებია, გოგონებს კი ხშირად მშობლების მხარდაჭერის იმედი არ აქვთ. ყოფილა შემთხვევებიც, როცა გოგონამ თავისი გამოცდილება გაუზიარა ოჯახს და თავად დაადანაშაულეს. ასეთ დროს მოზარდი იკეტება და ემოციურ პრობლემებთან მარტო რჩება.“

დისკუსიამ აჩვენა, რომ პრობლემა მხოლოდ ქალებს არ ეხება:
„ონლაინ ძალადობა მხოლოდ ქალების საკითხი არ არის. ციფრულ სივრცეში ძალადობის მსხვერპლები ხშირად ახალგაზრდა ბიჭებიც ხდებიან.“

ამ შეხვედრამ კიდევ ერთხელ დაადასტურა, რომ პრობლემის აღიარება პირველი ნაბიჯია ცვლილებისკენ.

ამოიცანი. ისაუბრე. იმოქმედე.

გაეცანით გზამკვლევს - „პარტნიორულ ურთიერთობებში ტექნოლოგიებით ჩადენილი ძალადობა — ამოიცანი და დაიცავი თავი“

პროექტი ხორციელდება WAVE ქსელის მხარდაჭერით

გეგუთში, წყალტუბოს მუნიციპალიტეტის ქალების სამიზნე ჯგუფთან გაიმართა ვორკშოპი თემაზე — „ადგილობრივ თემებში ოჯახში ქალთა მიმართ ძალადობის იდენტიფიცირება, მხარდაჭერა და რეაგირება“. შეხვედრას უძღვებოდა ჯგუფის ლიდერი ქალი.

ვორკშოპის მიზანი იყო მონაწილეთა ინფორმირება ოჯახში ძალადობის ფორმების, ამოცნობის გზებისა და მსხვერპლთა მხარდასაჭერი სერვისების შესახებ. ყურადღება დაეთმო პრაქტიკულ მექანიზმებს, რომლებიც ქალებს ეხმარება როგორც საკუთარი თავის დაცვაში, ისე ძალადობის მსხვერპლი სხვა ქალების მხარდაჭერაში.

შეხვედრაზე ქალებმა ღიად ისაუბრეს საკუთარ დაკვირვებებზე. ბევრისთვის ახალი აღმოჩნდა, რომ ძალადობა მხოლოდ ფიზიკური ზიანით არ შემოიფარგლება და მას ეკონომიკური და ფსიქოლოგიური ფორმებიც აქვს.

მონაწილეთა შეფასებები:

• „პირველად გავიგე ეკონომიკური ძალადობის შესახებ.“
• „გავიგე, როგორ დავიცვა თავი და დავეხმარო სხვებს.“
• „მივხვდი, რომ ის, რასაც ნორმად მივიჩნევდი, ძალადობის ფორმებს შეიცავს.“
• „ბევრი ქალი ფსიქოლოგიურ ძალადობას ნორმალურად აღიქვამს.“
• „ასეთი ინფორმაციის ქონა ძალიან მნიშვნელოვანია.“
• „ეს თემები ყველასთან უნდა განიხილებოდეს — ქალებთან, მამაკაცებთან და ახალგაზრდებთან.“
• „გავიგეთ წყალტუბოს მერიის ადგილობრივი პროგრამის შესახებ.“

მონაწილეებმა აღნიშნეს, რომ ინფორმაციის ნაკლებობა კვლავ მთავარ ბარიერად რჩება, ბევრმა ქალმა არ იცის, სად და როგორ მიიღოს დახმარება, რაც დროულ რეაგირებას ართულებს.

პროექტი ხორციელდება CISU-ის მხარდაჭერით

სენაკის თვითდახმარების ჯგუფის მიერ წარმოდგენილი ინიციატივა „სოციალური სახლი თემის საჭიროებისთვის“  მალე ამუშავდება. 

საერთო სარგებლობისთვის განკუთვნილი წვრილი საყოფაცხოვრებო ინსტრუმენტები, ბაღის იარაღები, რომლებიც ჯგუფის წევრებმა ინიციატივის ფარგლებში შეიძინეს, უკვე ადგილზეა. 

მაღალი წნევის კერხერის სარეცხი აპარატი მთლიანად შეცვლის ხალიჩების, მანქანების და სხვა მოცულობითი ნივთების ხელით რეცხვის პროცესს, გააადვილებს ქალების, კაცების შრომას და გაზრდის თემის სარგებელს. 

ბაღის, ეზოს კეთილმოწყობისთვის საჭირო ხელსაწყოები დაეხმარება თემის წევრებს იმ საერთო პრობლემების მოგვარებაში, რომლებიც დასახლებაში წლების განმავლობაში არსებობდა. 

„სოციალური სახლის“ სერვისით ისარგებლებს დევნილთა მთელი თემი: ქალები, კაცები, ახალგაზრდები.

თვითდახმარების ჯგუფის წევრებს სამომავლოდ ახალი იდეები აქვთ, რაც „სოციალური სახლის“ ფუნქციის გაფართოებას უკავშირდება. 

პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.

ტაძრის მიმდებარე ტერიტორიაზე ძველი სკვერის განახლება და სკვერების აღჭურვა ძელსკამებით და ნაგვის ურნებით -  ფინიშს უახლოვდება ეს ორი ინიციატივა, რომელსაც ხონის ქალთა თვითდახმარების ჯგუფი „თემის ძალა“ ახორციელებს დევნილთა დასახლებაში.

სამოქალაქო ინიციატივების ფარგლებში მოთხოვნილი თანხა სრულად ათვისებულია,   ინვენტარი შეძენილია და თემის მოსახლეობა სამუშაოების დასაწყებად გამოდარებას ელოდება.

ატრაქციონები, ძელსკამები, ნაგვის ურნები, ბალახის საკრეჭი აპარატი - ამ ყველაფრის და მათ მოსაწყობად საჭირო მასალის შეძენა ნიშნავს კომფორტულ ღია სივრცეებს, მოწესრიგებულ გარემოს. 

ინიციატივების განხორციელების შედეგად გაიზრდება თემში მცხოვრები ადამიანების ჩართულობა  და პასუხისმგებლობა საკუთარი დასახლების მიმართ.

პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.

ფოთის თვითდახმარების ჯგუფის აქტიური მუშაობის პროცესში გამოიკვეთა დევნილთა დასახლების კრიტიკული საჭიროებები. ქალთა ინიციატივამ ჩვენი ორგანიზაციის ფინანსური მხარდაჭერა მიიღო. შედეგად, სარდაფებში ჩამდგარი წყლის პრობლემა არ შეაწუხებს მოსახლეობას - ხუთი კორპუსისთვის შეძენილია ტუმბოები. 

გარდა ამისა, დაწყებულია შიდა სამღებრო სამუშაოები, სადარბაზოების კოსმეტიკური მოწესრიგება, რაც საცხოვრებელ გარემოს ბევრად უფრო უსაფრთხოს და სასიამოვნოს გახდის. თვის ბოლომდე ყველა საჭირო მასალა მიეწოდება დასახლებას და სამუშაოებიც ეტაპობრივად დასრულდება.

ინიციატივის ერთ-ერთი მთავარი ღირებულება ადგილობრივი მოსახლეობის აქტიური ჩართულობაა. დევნილები თავად გაალამაზებენ და შეცვლიან არსებულ მდგომარეობას. ეს არის კარგი მაგალითი იმისა, თუ როგორ შეუძლია თემის გაერთიანებასა და სამოქალაქო აქტიურობას რეალური ცვლილებების მიღწევა.

პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.

დასრულდა საშობაო-საახალწლო არდადეგები, სკოლებში სასწავლო პროცესი განახლდა და ჩვენი ახალგაზრდული ჯგუფებიც ამუშავდნენ...

დაიწყო სატრენინგო კურსი 10 სამიზნე მუნიციპალიტეტში. უკვე  ჩატარდა ტრენინგები ექვსი მუნიციპალიტეტის ახალგაზრდობის გაძლიერების ცენტრებში - გეგმის მიხედვით, შეფერხების გარეშე.

შეხვედრების მონაწილეები ინტერესით უსმენენ ტრენერებს,  ერთვებიან დისკუსიებში და მსჯელობენ მნიშვნელოვან თემებზე.

ყველგან გამოიკვეთა ახალგაზრდა ლიდერები რომლებიც ემზადებიან შემაჯამებელი შეხვედრების ჩატარებისთვის.

პროექტი ხორციელდება  ორგანიზაცია Brot für die Welt - Evangelischer 

Entwicklungsdienst მხარდაჭერით (გერმანია)

მშობლების და შვილების ურთიერთობა, ნარკომანია, მიგრაცია - ეს და სხვა აქტუალური თემები წარმოადგინა ფორუმ-თეატრმა ქუთაისის ახალგაზრდულ ცენტრში.

თანატოლების წინაშე გამოსვლა განსაკუთრებით საინტერესო და სასიამოვნოა ახალგაზრდა მსახიობებისთვის. მაყურებელი აქტიურად ჩაერთო სხვადასხვა სცენაში, თავისებურად „შეცვალა“ სიტუაციის მიმდინარეობა და თავისი აზრი გამოხატა დისკუსიის დროსაც.

ასე დაიწყო ახალი სამუშაო წელი ჩვენმა ფორუმ-თეატრმა. დაიგეგმა თებერვალში ჩვენებები რაოდენობრივად უფრო დიდ აუდიტორიასთან. 

პროექტი ხორციელდება  ორგანიზაცია Brot für die Welt - Evangelischer 

Entwicklungsdienst მხარდაჭერით (გერმანია)

სენაკის სათემო ცენტრში მანიკურის კურსდამთავრებულებმა მოაწყვეს მასტერკლასი ქალებისთვის. ეს იყო აქტივობა სამოქალაქო ინიციატივის ფარგლებში, რომელიც სენაკის დევნილთა დასახლებაში განხორციელდა ნოემბერ-იანვარში. 

მასტერკლასის მონაწილე: სპეციალისტთან ამ პროცედურის ჩატარების პირველი პრაქტიკა იყო ჩემთვის. ძალიან კარგი ინიციატივაა, არა მარტო დავინახეთ, რა ისწავლეს ჩვენმა გოგოებმა, არამედ ჩვენც გავიხალისეთ ეს დღე.

ერთ-ერთი კურსდამთავრებული: საუკეთესო შესაძლებლობაა ჩემთვის და როგორც დამწყებ სპეციალისტს ძალიან მახარებს, რომ ქალებმა დაინახეს, რა შემიძლია.

პროექტი ხორციელდება  ორგანიზაცია Brot für die Welt - Evangelischer 

Entwicklungsdienst მხარდაჭერით (გერმანია)

ახალგაზრდობის გაძლიერების ყველა ცენტრში, ყოველ სატრენინგო კურსზე ვლინდება  ლიდერები, რომლებიც აქტიურ მონაწილეებთან ერთად თანატოლებში აზიარებენ ტრენინგებზე მიღებულ ცოდნას, ავრცელებენ ინფორმაციას კონფლიქტის მართვისა და ძალადობის პრევენციის საკითხებზე.

ახლანდელი სატრენინგო კურსის მონაწილეებიც აქტიურად არიან ჩართულები ამ პროცესში და ატარებენ ინიცირებულ ღონისძიებებს. მათ გარკვეულ დახმარებას უწევენ პედაგოგები, რომლებიც მიიჩნევენ, რომ ასეთი მუშაობა კარგი ეფექტის მომტანია მოზარდებისთვის.

პროექტი ხორციელდება  ორგანიზაცია Brot für die Welt - Evangelischer 

Entwicklungsdienst მხარდაჭერით (გერმანია)