ბაღდათის მუნიციპალიტეტის საკრებულომ საჯარო მოსამსახურეთა ეთიკისა და ქცევის წესების კოდექსი დაამტკიცა.
დოკუმენტზე იმუშავა საკრებულოს იურიდიული და საპროცედურო საკითხთა კომისიის თავმჯდომარემ, რომელიც პროექტის ფარგლებში შექმნილი სამუშაო ჯგუფის წევრია. საკრებულოზე გატანამდე დოკუმენტმა გაიარა ყველა პროცედურა, განთავსებული იყო მუნიციპალიტეტის ვებგვერდზე, სადაც ყველას ჰქონდა მისი გაცნობის საშუალება. სამუშაო ჯგუფის წევრების ლობირების შედეგად დოკუმენტი დამტკიცდა.
კოდექსი, ერთი მხრივ, მოიცავს საჯარო მოხელეთა ქცევისა და ეთიკის ერთიანი სტანდარტის განსაზღვრას, რაც ეფუძნება ზოგად პრინციპებს (სამართლიანობა, მიუკერძოებლობა, პასუხისმგებლობა, პროფესიონალიზმი, ეფექტურობა, ობიექტურობა, პოლიტიკური ნეიტრალიტეტი, მოსახლეობის ინფორმირება იმ უფლებამოსილებების შესახებ, რომლებიც მათ გააჩნიათ საჯარო მოხელეებთან ურთიერთობისას), ხოლო, მეორე მხრივ, საჯარო მოხელეთა ინტერესების დაცვასთან ერთად, დადგენილება ემსახურება ადგილობრივი ხელისუფლებისა და საჯარო სამსახურის მიმართ ნდობის გაზრდას.
ხონის სამუშაო ჯგუფმა მრგვალ მაგიდაზე მნიშვნელოვანი საკითხები დასვა. შეხვედრას ესწრებოდნენ ადგილობრივი თვითმმართველობის, სკოლების, მედიის წარმომადგენლები, სოციალური მუშაკები, ახალგაზრდა ლიდერები.
სამუშაო ჯგუფის ხელმძღვანელმა ალექსანდრე აკობიძემ ჯგუფის მუშაობის პრეზენტაცია გააკეთა. ჯგუფის წევრმა ელისო ჯიქიამ კი აუდიტორიას წარუდგინა პროექტის ფარგლებში ჩატარებული საჯარო მმართველობის რეფორმის მესამე მონიტორინგის შედეგები.
შეკრებილებს უამბეს ცხელ ხაზზე, რომელიც მინიპროექტის შედეგად ამოქმედდა და უკვე აჩვენა თავისი ეფექტიანობა. საუბარი შეეხო ეთიკის კოდექსს, რომელიც მალე მიიღებს საბოლოო ვერსიას. მნიშვნელოვანი იყო მესამე მონიტორინგის ანალიზის შედეგად შემუშავებული რეკომენდაციები გენდერული და მონაწილეობითი ბიუჯეტის კუთხით, მერიის შენობის ადაპტირებასა და სხვა აქტუალურ საკითხებზე.
სამტრედიის, წალენჯიხის, ზუგდიდის და ვანის მუნიციპალიტეტებში ფონდი „სოხუმის“ პროექტის „ქალთა უფლებების გაძლიერება დასავლეთ საქართველოში“ პრეზენტაცია გაიმართა. შეხვედრებს ესწრებოდნენ ადგილობრივი თვითმმართველობის წარმომადგენლები და სამოქალაქო აქტივისტები. აქცენტი გაკეთდა ოჯახში ძალადობის პრობლემაზე რეაგირებისა და თანამშრომლობის პერსპექტივებზე.
შეხვედრების მონაწილეთა აზრით, ერთობლივი აქტივობებით შესაძლებელი გახდება პრობლემების იდენტიფიცირება, გაიზრდება მათი მოგვარების და პრევენციის ხარისხი. ადგილობრივი თვითმმართველობები მზად არიან, აქტიურად ჩაერთონ ოჯახური ძალადობის პრევენციის საკითხებში.
აპრილში გაიმართა ახალი პროექტის პრეზენტაციები თერჯოლის, ვანის, ბაღდათის, სენაკის, ჩოხატაურის, ქობულეთის, ტყიბულის და სამტრედიის მუნიციპალიტეტებში ადგილობრივი თვითმმართველობის წარმომადგენლებისა და სამოქალაქო აქტივისტებისთვის. ამ შეხვედრებმა აჩვენა, რომ მუნიციპალიტეტებში არ არის ფსიქოლოგი და ისინი თანამშრომლობის მოხარულები არიან.
პრეზენტაციების გარდა, აქტიურად მიმდინარეობდა საკონსულტაციო მუშაობა. ფსიქოლოგთან შევიდა 61 ზარი ქუთაისიდან და რეგიონებიდან. ჩატარდა შეხვედრები ოჯახურ წყვილებთან და კრიზისულ ოჯახებთან. ფონდი „სოხუმის“ ოფისში გაიმართა ინდივიდუალური კონსულტაციები და ფსიქოთერაპიული სეანსები ძალადობის მსხვერპლებთან. ახალი პროექტი თანდათან იკრებს ძალას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქვეგრანტების ფარგლებში შესასრულებელი საქმიანობის განხილვა და პანდემიის შესაბამისი რეგულაციების დაცვით საპროექტო მუშაობის სტრატეგიის, გეგმა-გრაფიკის შემუშავება; მრგვალი მაგიდის საკითხების გაცნობა, შეთანხმება გამომსვლელებთან, ფასილიტატორის შერჩევა; საჯარო მმართველობის რეფორმის მესამე მონიტორინგის შედეგად მიღებული რეკომენდაციების გაცნობა და სამომავლო მიზნების დასახვა.
ეს საკითხები განიხილეს „მეწარმე ქალთა ფონდის“ წარმომადგენლებმა შეხვედრებზე, რომლებიც ჩატარდა 23 და 26 აპრილს ცაგერსა და ამბროლაურში მომუშავე პარტნიორ ორგანიზაციებთან და ადგილობრივი ხელისუფლების წარმომადგენლებთან.
მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.
26 აპრილს საქართველოს საგარეო საქმეთა სამინისტრომ, გაეროს ქალთა ორგანიზაციის მხარდაჭერით, სამოქალაქო სექტორის წარმომადგენლებთან საინფორმაციო შეხვედრა გამართა თემაზე: „ჟენევის საერთაშორისო მოლაპარაკებები - ქალები, მშვიდობა და უსაფრთხოება“.
შეხვედრის პირველ ნაწილში სამოქალაქო საზოგადოების წარმომადგენლებს მიმართა შერიგების და სამოქალაქო თანასწორობის საკითხებში სახელმწიფო მინისტრმა - თეა ახვლედიანმა, რომელმაც ისაუბრა სამშვიდობო პროცესებში ქალთა ჩართულობის გააქტიურების მნიშვნელობაზე და სამომავლო გეგმებზე. საგარეო საქმეთა მინისტრის მოადგილემ - ლაშა დარსალიამ დეტალურად განიხილა ჟენევის საერთაშორისო მოლაპარაკებათა პროცესში არსებული დინამიკა და გამოწვევები და ყურადღება გაამახვილა რუსეთისა და მისი საოკუპაციო რეჟიმების წარმომადგენელთა მიერ ჰუმანიტარული თემების პოლიტიზირებასა და ოკუპირებულ ტერიტორიებზე უსაფრთხოებისა და ადამიანის უფლებათა გამოწვევების გადაჭრის მიზანმიმართულ დაბრკოლებაზე. საქართველოში გაეროს რეზიდენტმა კოორდინატორმა - საბინე მახლმა ისაუბრა სამშვიდობო პროცესის ხელშეწყობის საქმეში გაეროს როლზე და კონფლიქტის შედეგად დაზარალებული მოსახლეობის ჰუმანიტარული პრობლემების გადაჭრის კუთხით გაეროს სააგენტოებისა და პროგრამების საქმიანობაზე.
გაზაფხულდა და ფორუმ-თეატრის განახლებულ გუნდს საინტერესო აპრილი აქვს - ღია ცის ქვეშ ხვდება მაყურებელს.
წარმოდგენების ჩვენება გაიმართა ქუთაისის ცენტრალურ ბაღებში და თერჯოლის მოსწავლე ახალგაზრდობის ამფითეატრის სცენაზე.
სულ მალე ფონდი „სოხუმის“ ფორუმ-თეატრს და ჩრდილების თეატრს შეემატება კიდევ ერთი ახალი ფორმატი - თოჯინების თეატრი.
თოჯინების თეატრის პირველ წარმოდგენას საფუძვლად დაედო ქართული ხალხური ზღაპარი „გვრიტი“. შეიქმნა თოჯინების ესკიზები, ახალგაზრდა მსახიობები სიამოვნებით სწავლობენ თოჯინების „მართვას“ და მთელი მონდომებით არიან ჩართულები სარეპეტიციო პროცესში.
21 აპრილს თბილისის წარმომადგენლობის ხელმძღვანელმა - ეკატერინე გამახარიამ მონაწილეობა მიიღო სახალხო დამცველის - ნინო ლომჯარიას სპეციალური ანგარიშის წარდგენაზე - „2019-2020 წლებში ე.წ. გამშვები პუნქტების ჩაკეტვის გავლენა, ოკუპირებულ ტერიტორიებზე მცხოვრები მოსახლეობის უფლებრივ მდგომარეობაზე“.
საქართველოს სახალხო დამცველის შეფასებით, საოკუპაციო ხაზზე გადაადგილებისთვის, დე ფაქტო ხელისუფლების მიერ დადგენილი ფორმალური რეჟიმი და სხვადასხვა ბარიერის დაწესება, როგორიცაა ე.წ. გამშვები პუნქტების არაპროგნოზირებადი ჩაკეტვა, უკანონო დაკავებები, გადაადგილებისათვის აუცილებელ დე ფაქტო დოკუმენტაციასთან დაკავშირებული პრობლემები და სხვა, ზღუდავს ოკუპირებული რეგიონების მკვიდრთა გადაადგილების თავისუფლებას და გაუმართლებელ დაბრკოლებებს უქმნის მათ საარსებო წყაროებზე წვდომაზე.
ეკატერინე გამახარიამ თავის გამოსვლაში ყურადღება გაამახვილა ოკუპირებულ ტერიტორიაზე საქართველოს მოქალაქეებისათვის თავისუფალი გადაადგილების შესაძლებლობაზე, რაც ამჯერად გულისხმობს შესაბამისი დოკუმენტის (ბინადრობის მოწმობის) მიღების პრობლემას. ეს კვლავ ქმნის რისკს, დოკუმენტის გარეშე დარჩენილმა, ათასობით ადამიანმა ისევ მიმართოს მათი სიცოცხლისა და ჯანმრთელობისათვის სარისკო გზას საქართველოს კონტროლირებად ტერიტორიაზე გადაადგილებისათვის.
ტყიბულში პროექტის „ქალთა უფლებების გაძლიერება დასავლეთ საქართველოში“ პრეზენტაცია გაიმართა. ამ კუთხით აქტიურ მუშაობას ფონდი „სოხუმი“ ტყიბულის მუნიციპალიტეტში პირველად იწყებს. პრეზენტაციას დაესწრნენ ადგილობრივი თვითმმართველობის წარმომადგენლები, სამოქალაქო აქტივისტები, პედაგოგები, მშობლები. აქცენტი გაკეთდა ოჯახში ძალადობის პრობლემაზე და ადგილობრივ სტრუქტურებთან თანამშრომლობის პერსპექტივაზე.
შეხვედრის მონაწილეთა აზრით, ერთობლივი აქტივობებით შესაძლებელი გახდება პრობლემების იდენტიფიცირება და გაიზრდება მათი მოგვარების და პრევენციის ხარისხი.
