სენაკის ქალთა მხარდაჭერის ცენტრის მცირე პროექტის „მშობლები ჯანსაღი თაობისათვის“ ფარგლებში სოფელ მენჯის საბავშვო ბაღში ჩატარდა ტრენინგი თემაზე „ოჯახში ძალადობის ტიპები, ნიშნები, რეფერირების გზები და მექანიზმები“. ტრენინგში მონაწილეობდნენ ბაღის გამგე, აღმზრდელები და მშობლები. ღონისძიებაში ჩართვის სურვილი გამოთქვეს თემის დეპუტატმა და გამგებლის წარმომადგენელმა. მონაწილეებმა მიიღეს ინფორმაცია, თუ როგორ უნდა მოახდინონ ძალადობის ფაქტების გამოვლენა და რეაგირება.

ფონდი „სოხუმის“ დღის ცენტრში მუშაობა დაასრულა ჭრა-კერვის კურსმა. მონაწილეები დაეუფლნენ კერვის ტექნიკას, კარგად შეისწავლეს ყველა აუცილებელი ნიუანსი. შემაჯამებელ გაკვეთილზე წარმოდგენილი იყო მათი ნაშრომები, რომელთაც ჟიურის მოწონება დაიმსახურეს. მონაწილეთა თქმით, პროექტი დაეხმარა მათ, გამხდარიყვნენ უფრო მოტივირებულები. გაუჩნდათ სურვილი, რეალობად აქციონ საკუთარი იდეები, სამომავლოდ მცირე ბიზნესის წამოწყებასთან დაკავშირებით, რაც მათ ცხოვრებას მნიშვნელოვნად გააუმჯობესებს. 

ფოთის მე-11 საბავშვო ბაღის აღმზრდელები და პედაგოგები შეიკრიბნენ ტრენინგზე, რომელზეც განხილული იყო გენდერისა და ოჯახში ძალადობის საკითხები. ყურადღება გამახვილდა რეაგირების მექანიზმებზე და იმაზე, რომ მათ ევალებათ იმ ბავშვების გამოვლენა, რომლებიც ძალადობის რისკ ჯგუფის ოჯახიდან არიან.

გარდა ამისა, მე-3 საბავშვო ბაღში ჩატარდა იურისტის შეხვედრა აღმზრდელებთან, ფსიქოლოგმა კი აღსაზრდელებთან იმუშავა არტთერაპიის მეთოდით. მუშაობის პროცესში ჩაერთნენ აღმზრდელებიც.

ეს აქტივობები ფოთის ქალთა მხარდაჭერის ცენტრის მცირე პროექტის ნაწილია.

პროექტის „ოჯახში ძალადობის თავიდან აცილების სისტემის მხარდაჭერა“ ფარგლებში ფონდი „სოხუმის“ დღის ცენტრში დასრულდა ორი ჯგუფის საბუღალტრო აღრიცხვის კურსი. ქალებმა გაიარეს შემდეგი საკითხები: ბუღალტრული აღრიცხვის თეორიული საფუძვლები საერთაშორისო სტანდარტებით, ბუღალტრული აღრიცხვის რეგულირება საქართველოში, საწარმოთა ორგანიზაციულ-სამართლებრივი ფორმები, საქართველოს კანონმდებლობა, აღრიცხვის მეთოდოლოგია, ორისის პროგრამა. ბოლო გაკვეთილზე ჩაუტარდათ შემაჯამებელი ტესტირება, რომელზეც ჯგუფებმა დადებითი შედეგები აჩვენეს. კურსდამთავრებულებს გადაეცა სერტიფიკატები.