ხონის ქალთა მხარდაჭერის ცენტრის ინიციატივით ამჯერად გაიმართა ფსიქოლოგიური საკონსულტაციო შეხვედრა სოფელ გოჩა-ჯიხაიშში მცხოვრებ სოციალურად დაუცველ ოჯახთან.

ოჯახში 8 ადამიანია, არავინ არ მუშაობს. ოჯახის ზოგიერთი წევრი სოციალურად არაადაპტირებულია, ზოგს ჯანმრთელობის პრობლემები აქვს. ბავშვებს აღენიშნებათ სიძნელეები სწავლების პროცესში. ამ ოჯახს არაერთხელ დაეხმარნენ ადგილობრივი თვითმმართველობის და ფონდი „სოხუმის“ წარმომადგენლები, მაგრამ ერთჯერადი დახმარება ხელს ვერ უწყობს მათი პრობლემების სრულფასოვან მოგვარებას. საჭიროა მეტი მხარდაჭერა. დახმარების მსურველებს შეუძლიათ მიმართონ ფონდ „სოხუმს“ ან ხონის მუნიციპალიტეტის ადგილობრივ თვითმმართველობას.

ხონის ამომრჩეველ ქალთა კლუბის მორიგ სხდომაზე ადგილობრივი  თვითმმართველობის არჩევნებზე, ქალის როლის მნიშვნელობასა და პოლიტიკაში მეტი ქალის  ჩართულობაზე ისაუბრეს.

სხდომის დროს შეიქმნა სამუშაო  ჯგუფები, რომლებიც   შეხვდებიან  ხონში არსებული  პოლიტიკური პარტიების წარმომადგენლებს არჩევნებში ქალი-კანდიდატების წინ წამოწევის მიზნით.

პროექტიხორციელდებააშშ საელჩოსმხარდაჭერით

200-მდე ადამიანი შეიკრიბა 16 ივლისს სოფელ კოკში (ზუგდიდის მუნიციპალიტეტი) - აქ იყვნენ არა მარტო ამ სოფლის, არამედ მუნიციპალიტეტის სხვა სოფლების - ორსანტიის, ხურჩის, კახათის მცხოვრებნი. აქციას კარგი ორგანიზება გაუკეთა ფონდი „სოხუმის“ ხურჩა/კოკის ქალთა მხარდაჭერის ცენტრმა - მობილიზატორებმა აქტიურად გაავრცელეს ინფორმაცია ძალიან საჭირო და სასარგებლო აქციის შესახებ.

ქუთაისის კლინიკა „უნიქალმედიმ“ ამ დღეს აფხაზეთთან ახლომდებარე სოფლებში უფასო გამოკვლევები და კონსულტაციები ჩაატარა შემდეგი მიმართულებებით: რადიოლოგია, ექოსკოპიური კვლევა, კარდიოლოგია, ნევროლოგია, თერაპია, უროლოგია,  გასტროენტოროლოგია,  ქირურგია და ენდოკრინოლოგია.

აქცია მხოლოდ ამით არ დასრულებულა - კლინიკის მედიკოსებმა 9 ადამიანი იმ დღესვე ჩამოიყვანეს ქუთაისში თავიანთი ტრანსპორტით. 16 ადამიანი ამჟამად სტაციონარშია მოთავსებული - მათ უფასოდ უტარდება მკურნალობა. განსაკუთრებული ის არის, რომ თანხის ნაწილს სახელმწიფო დაზღვევა ანაზღაურებს, დანარჩენ თანხას კი, ადმინისტრაციის გადაწყვეტილებით, კლინიკა დაფარავს.

მათ, ვინც აქციის დღეს ვერ მოასწრო უფასო სერვისით სარგებლობა, კლინიკა 50%-იანი შეღავათით მოემსახურება.

ეს მართლაც უპრეცედენტო აქციაა, რომელიც ქუთაისის კლინიკა „უნიქალმედიმ“ მოაწყო ფონდ „სოხუმთან“ გაფორმებული მემორანდუმის ფარგლებში.

აქცია გაგრძელდება ფოთში, ხონსა და სენაკში.   

ინფორმაცია ხონის ქალთა საინიციატივო ჯგუფის მუშაობის შესახებ ყოველთვიურ გაზეთ „ხონში“ დაიბეჭდა - ამ სიახლით დაიწყო შეხვედრა საინიციატივო ჯგუფის მოდერატორმა.

შეხვედრაზე ისაუბრეს იმაზე, რა მდგომარეობაშია ადვოკატირების პროცესი.

- უკვე მიღებულია ოფიციალური პასუხები ადგილობრივი თვითმმართველობის მისამართით გაგზავნილ წერილებზე. ერთი საკითხი ეხება ცენტრალურ გზაზე ზებრა გადასასვლელს. მეორე -ქალაქის ტერიტორიაზე ახალი სკვერის გაშენებას გულისხმობს.  ორივე საკითხი მნიშვნელოვანია მოქალაქეთა უსაფრთხოებისთვის. ადგილობრივი ხელისუფლება მზად არის, აღნიშნული ინიციატივები განიხილოს და მხარი დაუჭიროს - აღნიშნა მოდერატორმა. 

- მე ყოველთვის ვეწინააღმდეგებოდი ქალთა წასვლას საზღვარგარეთ. განსაკუთრებით იმ ასაკში, როცა შვილებს დედა ძალიან სჭირდებათ. სამწუხაროდ, იგივე პრობლემის წინაშე ჩვენი ოჯახიც დადგა და მე მხარი დაუჭირე დედის წინადადებას, თურქეთში წასულიყო სამუშაოდ. ამ საკითხს უკვე ასე მტკივნეულად არ განვიცდი. მთავარია, ყველამ იგრძნოს საკუთარი პასუხისმგებლობა.

- ჩემს მეზობლად ცხოვრობს ოჯახი. დედა სამუშაოდ წავიდა. ბავშვს ბებია ზრდის. მამამ დალევას მოუხშირა და სულ კონფლიქტი ჰქონდათ. გოგონა ბებიას საერთოდ არ უჯერებდა. ოჯახში ფინანსები გამოუჩნდათ, მაგრამ ყველაფერი აირია. დედა იძულებული გახდა,  დაბრუნებულიყო.

ასეთი ისტორიების გარჩევის ფონზე გაიმართა  ვორკშოპები წყალტუბოში, ხონსა და კოკში (ზუგდიდის მუნიციპალიტეტი). აზრთა სხვადასხვაობის მიუხედავად, ახალგაზრდები მიიჩნევენ, რომ  ქალთა მიგრაცია კონფლიქტების მოგვარების საფუძველი შეიძლება გახდეს, თუ ოჯახის ყველა წევრი თავის წილ პასუხისმგებლობას იგრძნობს.

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

სოციალური მომსახურების სააგენტოს ხონის წარმომადგენლობაში ჩატარდა შეხვედრა თემაზე „დევნილთა რეფორმა“. მონაწილეებმა განიხილეს დევნილთა რეფორმის ფარგლებში განხილული სხვადასხვა ვერსია და საკუთარი პოზიციები დააფიქსირეს.

(PIN-ის პროექტი „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“  -დაფინანსებულია ევროკავშირის და ჩეხეთის საგარეო საქმეთა სამინისტროს მიერ).

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით 

ფონდი „სოხუმის“ ხონის ქალთა საინიციატივო ჯგუფმა დონორი ორგანიზაცია „ორბელიანი საქართველოს“ მხარდაჭერით პლაზმური ტელევიზორი მიიღო. პროექტიდან გამომდინარე, ხონის საბავშვო ბიბლიოთეკის ბაზაზე შეიქმნა მოზარდთა კლუბი „გენდერული სათვალე“. კლუბის წევრები ყოველთვიურად შეიკრიბებიან, მოეწყობა ფილმების ჩვენება და დისკუსიები გენდერული რაკურსით. იგეგმება წარმატებული ქალების მოწვევა და სხვა სახის აქტივობები.

ეს იდეა ქალთა საინიციატივო ჯგუფის ერთ-ერთ შეხვედრაზე გაჩნდა, რაც შემდგომში დონორის მოძიებით და პროექტის მომზადებით გაგრძელდა. ჯგუფის წევრების აზრით, მოზარდთა ინფორმირება გენდერულ საკითხებზე ამ ფორმატით, მნიშვნელოვნად შეამცირებს საზოგადოებაში ქალთა მიმართ ძალადობის საფრთხეს და ხელს შეუწყობს გენდერული თანასწორობის დამკვიდრებას.

ფონდ „სოხუმსა“ და კლინიკა „უნიქალმედის“ შორის თანამშრომლობის მემორანდუმი გაფორმდა. მემორანდუმი გულისხმობს ფონდი „სოხუმის“ ქალთა მხარდაჭერის ცენტრებში ექიმთა ჯგუფის ჩაყვანას და ბენეფიციარებისათვის უფასო კონსულტაციების უზრუნველყოფას. კონსულტაციები ჩატარდება ხონის, წყალტუბოს, ფოთის, სენაკის და ზუგდიდის მუნიციპალიტეტებში.

ქუთაისის საინიციატივო ჯგუფი იმ გრძელვადიანი პრობლემების ადვოკატირების მონიტორინგს აწარმოებს, რომელთა გადაწყვეტა, გეგმის მიხედვით, გარკვეულ ვადებს გულისხმობს.

პროცესში აქტიურად არიან ჩართული ის მოქალაქეები, რომელთაც ინტერესებშიც შედის საკითხის დადებითად გადაწყვეტა. 

მონიტორინგმა გამოავლინა, რომ აუცილებელია ცვლილების შეტანა სამოქმედო გეგმაში: ახალი მოკავშირეების, ახალი ადრესატების პოვნა ადვოკატირების ეფექტურად დასრულებისათვის.

საინიციატივო ჯგუფის ჩარევით, რაც სხვადასხვა სტრუქტურის წარმომადგენლებთან სატელეფონო დიალოგს მოიცავდა, რამდენიმე სოციალური პრობლემის მოგვარებაც მოხერხდა.   

ხონის საკრებულოს სხდომათა დარბაზში ხონის სოციალურ საკითხებში მრჩეველთა საბჭოს მორიგი სხდომა გაიმართა.

თემატიკა: PIN-ის დაფინანსებული პროექტების მიმდინარეობის მოკლე მიმოხილვა;  მუნიციპალიტეტის სოციალური პრიორიტეტები - სარეკომენდაციო წინადადებები „პრიორიტეტების დოკუმენტისთვის“; ადგილობრივი თვითმმართველობის სოციალური ბიუჯეტის მონიტორინგის ძირითადი მიგნებები; სოციალური სერვისების მიმწოდებელი ორგანიზაციების („პანაცეა“, „მწვანე რეგიონები“, დევნილთა ინტეგრაციის ცენტრი) საქმიანობის მოკლე ანგარიში; გლობალური დასაქმების ონლაინ პლატფორმის „ციფრული მოქალაქის“ პროექტი - როგორც პერსპექტივა ხონის სოციალური სტრატეგიის რეალიზებისთვის.

სხდომაზე გამოიკვეთა ახალი ინიციატივები უფრო ეფექტური  სოციალური პოლიტიკის დასანერგად, გაიმართა დისკუსია ბენეფიციართა საჭიროებებზე მორგებული სოციალური დახმარების სახეების თაობაზე. საუბარი შეეხო სკოლამდელი განათლების სერვისში არსებულ გამოწვევებს. დაისახა თვითმმართველობის და სამოქალაქო ჯგუფების ერთობლივი სამომავლო სტრატეგია შშმ ახალგაზრდების დღის ცენტრის საქმიანობის გაფართოებისთვის.

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით