ბათუმის ამომრჩეველ ქალთა კლუბის შეხვედრაზე განხილულ იქნა პოლიტიკურ პარტიებთან კლუბის აქტივისტების მუშაობის გაძლიერების აუცილებლობა ადგილობრივ თვითმმართველობის არჩევნებში ქალთა ჩართულობის უზრუნველყოფის მიზნით. წინასაარჩევნო პერიოდში მაქსიმალურად გააქტიურდება კლუბის მუშაობა ამ მიმართულებით. დაიგეგმა შეხვედრები პოლიტიკურ პარტიებთან და ასევე შეხვედრების ორგანიზება ქალი-კანდიდატების მხარდასაჭერად.

პროექტი ხორციელდება აშშ საელჩოს მხარდაჭერით

წყალტუბოში ქალთა საინიციატივო ჯგუფი შეიკრიბა. შეხვედრის მონაწილეებმა კიდევ ერთხელ გადახედეს იმ პრობლემებს, რომელთა მოგვარებაც მათი ჩართულობით და ძალისხმევით უკვე მოხერხდა. საერთო შეფასებით, ჯგუფის წევრებს დაუგროვდათ ადვოკატირების კამპანიის ეფექტური წარმოების გამოცდილება, რაც მათ  მუშაობაშიც კარგად აისახა.

ადვოკატირების გეგმიდან გამომდინარე, საინიციატივო ჯგუფი აპირებს მონიტორინგის განხორციელებას, რათა ადგილზე გაეცნოს  სიტუაციას  და ინფორმაცია მოაგროვოს, როგორ მიდის პროცესი და რა ვადებში შეიძლება დასრულდეს ადვოკატირება. 

მონაწილეებმა სხვადასხვა ინსტანციაში გაგზავნილი წერილების პასუხებიც განიხილეს და, შესაბამისად, ადვოკატირების გეგმაში ცვლილებები შეიტანეს.

წყალტუბოს ამომრჩეველ ქალთა კლუბის შეხვედრა დაეთმო კლუბის სამომავლო გეგმის შედგენას, რომელიც მიმართული იქნება პოლიტიკურ პარტიებთან მუშაობის გაძლიერებისაკენ.  კლუბზე დაფიქსირდა, რომ პოლიტიკურმა პარტიებმა უკეთ უნდა გააცნობიერონ ადგილობრივი თვითმმართველობის არჩევნებში ქალთა ჩართულობის აუცილებლობა. კლუბის წევრები და აქტივისტები ამაში თავიანთი წვლილის შეტანას აპირებენ.

პროექტი ხორციელდება აშშ საელჩოს მხარდაჭერით

ოჯახური ბედნიერების საფუძვლები - ამ თემაზე საუბრობდნენ ფსიქოლოგიურ ჯგუფურ საინფორმაციო-საკონსულტაციო შეხვედრაზე წყალტუბოს ქალთა მხარდაჭერის ცენტრში. როგორ და რა ნიადაგზე იგება ოჯახური ბედნიერება, რა გზითაა შესაძლებელი ძალადობის პრევენცია - ამ საკითხებზე აქტიურად მსჯელობდნენ შეკრებილები. განსაკუთრებით დასამახსოვრებელი იყო ქალების ნათქვამი, რომ  ოჯახში კეთილდღეობის ფაქტორებია - ქალის სასიამოვნო ლაპარაკი, უანგარობა და ორმხრივი პასუხისმგებლობა.

ქეთი კუჭავა და ანი ქუთათელაძე აქტიური მონაწილეები იყვნენ ფონდი „სოხუმის“ ორგანიზებული სამდღიანი ტრენინგისა ქართულ-აფხაზური კონფლიქტის ტრანსფორმაციის საკითხებზე. იქ ისწავლეს ფასილიტატორობა და მიიღეს დავალება - დამოუკიდებლად ჩაეტარებინათ ვორკშოპი.

ახალგაზრდა ფასილიტატორებმა კონფლიქტის ტრანსფორმაციის თემას მიუძღვნეს ვორკშოპი წყალტუბოს ოტია იოსელიანის სახელობის №1 საჯარო სკოლაში. ისაუბრეს პრობლემებზე, კონფლიქტის მოგვარების გზებზე, ქალთა სამშვიდობო ინიციატივებზე. იყო ჯგუფური მუშაობები და საინტერესო პრეზენტაციები.

მუშაობა წარიმართა პროექტის „ქალთა შესაძლებლობების განვითარება კონფლიქტის ტრანსფორმაციაში ახალი მიდგომების გამოსამუშავებლად“ ფარგლებში.

ქუთაისის ქალთა მხარდაჭერის ცენტრი ცდილობს მუშაობას სხვადასხვა კატეგორიის ადამიანებთან.  სწორედ ამიტომ პერიოდულად ტარდება შეხვედრები ინკლუზიური ბენეფიციარების ცენტრ „ვალენტინში“. ასე იყო ამჯერადაც. ჯგუფურ ფსიქოლოგიურ შეხვედრას 12 ადამიანი დაესწრო. მუშაობა არტ-თერაპიის მეთოდით წარიმართა.  ბენეფიციარებმა აღნიშნეს, რომ ისინი ყოველთვის სიამოვნებით მონაწილეობენ მსგავს ღონისძიებებში.

5 ივლისს ფონდი „სოხუმის“ ოფისში შეიკრიბნენ ქუთაისის, წყალტუბოს, სენაკის, ფოთისა და ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები. მათ წარმოადგინეს მუშაობის ექვსთვიანი ანგარიშები, ისაუბრეს მომავალი თვის სამუშაო გეგმებზე და სხვადასხვა ტექნიკურ საკითხზე. მობილიზატორები გაეცნენ ძალადობის მონიტორინგის ანკეტის შემაჯამებელ ანალიზს და რეკომენდაციებს.

1 ივლისს წყალტუბოში, დევნილთა პოლიკლინიკაში  კლინიკა „უნიქალმედის“ და ფონდი „სოხუმის“ ერთობლივი აქციის ფარგლებში, ჩატარდა უფასო სამედიცინო კონსულტაცია/კვლევები სოციალურად დაუცველი დევნილი და ადგილობრივი მოსახლეობისთვის.

150-მდე ადამიანმა გაიარა ექიმის კონსულტაციები შემდეგი მიმართულებებით: რადიოლოგია, ექოსკოპიური კვლევა, კარდიოლოგია, ნევროლოგია, თერაპია, უროლოგია,  გასტროენტოროლოგია,  ქირურგია და ენდოკრინოლოგია.

ფონდი „სოხუმი “და კლინიკა „უნიქალ მედი“ ზაფხულის განმავლობაში გააგრძელებენ  აქციებს ხონის, ფოთის, სენაკის და ზუგდიდის მუნიციპალიტეტებში.

ფონდი „სოხუმის“ დაკვეთით ტელეკომპანია „რიონის“ ეთერით სიუჟეტი გავიდა. მასში გაშუქდა ინფორმაცია ხონში ჩატარებული მრგვალი მაგიდის შესახებ, რომელიც მიზნად ისახავდა მოქალაქეთა ინფორმირებას ადამიანური უსაფრთხოების ინკლუზიურ მიდგომებზე.

სიუჟეტში აისახა პროექტის მიმდინარეობა: როგორ მუშაობს ქალთა საინიციატივო ჯგუფი ხონში, რომელი პრობლემის ადვოკატირება მოხერხდა ადგილობრივ ხელისუფლებასთან თანამშრომლობით, ამ ეტაპზე რომელი საკითხის ადვოკატირებაზე უწევთ მუშაობა. მაყურებელი მოისმენს ინტერვიუს იმ ადამიანებთან, რომლებიც ჩართულნი იყვნენ პროექტში და რომელთა ძალისხმევითაც შესაძლებელი გახდა ადამიანური უსაფრთხოების ხარისხის გაუმჯობესება.   

ჩეხეთში, არასამთავრობო ორგანიზაციაში „გენდერული კვლევები“ (Gender Studies) გაიმართა სემინარი საქართველოს მუნიციპალიტეტის წარმომადგენლებისთვის ჩეხეთის რესპუბლიკაში გენდერული მეინსტრიმინგის და გენდერული თანასწორობის საკითხებზე არასამთავრობო ორგანიზაციების მუშაობის კუთხით. საუბარი წარმართა კლარა კოზლოვამ. ის არის ექსპერტი, მონაწილე ფონდი „სოხუმის“ პროექტისა „ვიშეგრადის ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისათვის“ (მხარდამჭერი - ვიშეგრადის ფონდი). მან უამბო სემინარის მონაწილეებს აღნიშნული პროექტის შესახებ და 5 ქვეყნის (ჩეხეთი, პოლონეთი, უნგრეთი, სლოვაკეთი, საქართველო) წარმომადგენელი ექსპერტების მიერ პროექტის ფარგლებში ჩატარებული კვლევის შესახებ პოლიტიკური დოკუმენტებისთვის ადგილობრივი ხელისუფლების ორგანოებში გენდერული პრობლემატიკის გათვალისწინებით ევროპული ინტეგრაციის კონტექსტში.

პროექტი ხორციელდება ვიშეგრადის ფონდისმხარდაჭერით