ფონდი „სოხუმის“ ფსიქოლოგმა სამი საინფორმაციო-საკონსულტაციო შეხვედრა ჩაატარა: 5 აპრილს - ფოთის ქალთა მხარდაჭერის ცენტრში, 6 აპრილს სოფელ წყალტუბოს გამგეობაში (წყალტუბოს მუნიციპალიტეტი) და 10 აპრილს - ხონის ქალთა მხარდაჭერის ცენტრში.

ქალთა მხარდაჭერის ცენტრებში საუბარი გაიმართა ოჯახში ძალადობის პრევენციის თემაზე: პრობლემის გადაჭრის ასერტული მეთოდოლოგია, გადაწყვეტილების მიღების ფსიქოლოგია, ყველაზე მარტივი სტრატეგია - ცდისა და შეცდომის მეთოდი, ახალი  უნარ-ჩვევების გაცნობა.

იქედან გამომდინარე, რომ სოფელ წყალტუბოში მხოლოდ ახალი ბენეფიციარები ესწრებოდნენ - მედმუშაკები და გამგეობის წარმომადგენლები, შეხვედრის თემა  გახდა ფონდი „სოხუმის“ მუშაობა ოჯახში ძალადობის აღმოფხვრისა და პრევენციის კუთხით. მათ მიიღეს ინფორმაცია ფონდის  იურიდიულ და ფსიქოლოგიურ უფასო სერვისებზე.

ხონის კერძო სკოლას ფორუმ-თეატრი პირველად ესტუმრა. სანამ შეხვედრა  დაიწყებოდა, შეკრებილებმა მიიღეს ინფორმაცია ფონდი „სოხუმის“ და ფორუმ-თეატრის სპეციფიკის შესახებ. მსახიობებმა უჩვენეს 5 წარმოდგენა. პირველ შეხვედრაზე დისკუსია და ჩართულობა შედარებით პასიური იყო, მაგრამ ფორუმ-თეატრმა მაყურებლების მოწონება დაიმსახურა. მათ უფრო მასშტაბური ჩვენების მოწყობა ითხოვეს.

ფონდი „სოხუმის“ ფორუმ-თეატრმა 5 წარმოდგენა ჩაატარა ფოთის მე-7 საჯარო სკოლაში. მაყურებელს მოეწონა სცენიდან ნათქვამი სიმართლე. შეკრებილებმა  წარმოდგენებში ჩართვის სურვილი ნაკლებად გამოხატეს, მაგრამ დისკუსიის დროს გამოიკვეთა მათი შეურიგებელი დამოკიდებულება ძალადობის მიმართ.

6 აპრილს წყალტუბოში ფონდი „სოხუმის“ ქალთა საინიციატივო ჯგუფი შეიკრიბა. შეხვედრის მონაწილეებმა მოისმინეს ინფორმაცია, როგორ მუშაობენ სხვა ქალაქების ქალთა ჯგუფები, რა გამოცდილება აქვთ, რა მიღწევები დაუგროვდათ.

ჯგუფის წევრების კომენტარებში გამოიკვეთა, რომ მათთვის მნიშვნელოვანია ფლობდნენ ინფორმაციებს, რა კეთდება ხონში, ქუთაისში რისკების შესამცირებლად და უსაფრთხოების მისაღწევად, რათა სხვათა გამოცდილების გაზიარება მათ საქმიანობაშიც აისახოს.

წყალტუბოს საინიციატივო ჯგუფი ამ ეტაპზე ახალ პრობლემაზე მუშაობს, რომელიც სასტუმრო „მერანის“  კოლექტიურ ცენტრში წყალგაყვანილობის რეაბილიტაციას შეეხება.  მოდერატორმა ადვოკატირების პროცესი გააანალიზა. პროცესის დასაჩქარებლად ჯგუფის წევრებმა მოამზადეს წერილები სხვადასხვა სტრუქტურის მისამართით.

ქალთა სოლიდარობა - ასეთი იყო ფსიქოლოგიური შეხვედრების თემა ქუთაისში, დევნილთა ჩასახლების კოლექტიურ ცენტრებში. სულ გაიმართა 12 ჯგუფური და 3 ინდივიდუალური შეხვედრა - მონაწილეობდა 88 ქალი 21-დან 66 წლამდე.

ყველა შეხვედრა განსხვავებულად ჩატარდა. ქალები ერთმანეთს უზიარებდნენ რეალურ ისტორიებს და თვითონვე აკეთებდნენ დასკვნებს, რომ აუცილებელია სოლიდარობა - ქალების მხრიდან ერთმანეთის მხარდაჭერა. ეს მნიშვნელოვანი ფაქტორია ძალადობის პრევენციის პროცესში. 

27 მარტს ზუგდიდში ჩატარდა ამომრჩეველ ქალთა კლუბის სხდომა თემაზე „ქალთა აქტივობის მნიშვნელობა ქვეყნის საზოგადოებრივ-პოლიტიკურ ცხოვრებაში“. სხდომაზე მიწვეულები იყვნენ საკრებულოს დეპუტატი ქალები ირუზა კაკავა და ედიტა კოდუა. ბევრ რამეზე ისაუბრეს: აქტუალურ საკითხებზე, მოახლოებულ არჩევნებზე, არჩევნების გენდერულ ასპექტებზე და ქალთა პოლიტიკური მონაწილეობის აუცილებლობაზე. კლუბის რამდენიმე წევრი აპირებს, კენჭი იყაროს ადგილობრივი თვითმმართველობის არჩევნებში. მათ მნიშვნელოვანი რჩევები მიიღეს დეპუტატი ქალებისგან.

საქართველო აღმოსავლეთ ევროპაში მეორე ადგილზეა მოლდავეთის შემდეგ გოგონების ნაადრევი ქორწინებებით. მას მოსდევს თურქეთი და ტაჯიკეთი.

გამონაკლისის სახით, 16 წელს მიღწეული არასრულწლოვანი პირის ქორწინება დაიშვებოდა მისი ნებით და მხოლოდ სასამართლოს თანხმობით, ისეთი მიზეზის არსებობისას, როგორიცაა ორსულობა. 2017 წლის იანვრიდან კი ეს გამონაკლისიც გაუქმდა და 18 წლამდე პირთა ქორწინება კანონით სრულად აიკრძალა.

ეს და სხვა აქტუალური საკითხები გაშუქდა ფონდი „სოხუმის“ საინფორმაციო ბიულეტენში. ბიულეტენის ელექტრონული ვერსია გამოდის პროექტის „ქალთა უფლებების გაძლიერება დასავლეთ საქართველოში“ ფარგლებში და ვრცელდება სხვადასხვა შეხვედრაზე.

გადმოწერა

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

გაზაფხული დედათა და ქალთა დღეებთან ასოცირდება საზოგადოებაში. ქუთაისის, ხონის, წყალტუბოს, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებმა, ტრადიციულად, ქალთა სოლიდარობის კვირეული ჩაატარეს - 33 სამობილიზაციო შეხვედრა და 6 მრგვალი მაგიდა ადგილობრივი თვითმმართველობის წარმომადგენლების მონაწილეობით.

ამ შეხვედრების დროს ისაუბრეს ქალთა მოძრაობის ისტორიაზე, წარმატებულ ქალებზე, გენდერული თანასწორობის ქართულ ფესვებზე და მის მნიშვნელობაზე, ოჯახურ ტრადიციებზე. ხაზი გაესვა ქალთა პოლიტიკური გააქტიურების აუცილებლობას საქართველოში.

წყალტუბოს ამომრჩეველ ქალთა კლუბზე შეიმუშავეს რეკომენდაციები, რომლებიც უნდა წარედგინოს პოლიტიკურ პარტიებს თავიათ პროგრამებში ინტეგრირებისათვის.

გამოიკვეთა ახალგაზრდების დასაქმების პრობლემა, მათთვის სტაჟირების პროგრამის დანერგვის და სასტუმრო სერვისების განვითარებასთან დაკავშირებული უფასო კურსების მოწყობის აუცილებლობა.

კლუბზე დაიგეგმა ეკოლოგიური აქციის მოწყობა ადგილობრივი თვითმმართველობის დახმარებით. აქციაში ჩაერთვებიან ახალგაზრდები, რომლებიც თვითმართველობის მიერ მოწოდებული ნარგავებით გაანაშენიანებენ წყალტუბოს სხვადასხვა ადგილს.

პროექტი ხორციელდება აშშ საელჩოს მხარდაჭერით

ხონის, წყალტუბოსა და ფოთის ქალთა მხარდაჭერის ცენტრებშიფსიქოლოგის კონსულტაციებს დაესწრნენ დევნილი და ადგილობრივი ქალები, ზოგიერთი მათგანი - პირველად.

საუბარი შეეხო ქალთა სოლიდარობის მნიშვნელობას ძალადობის პრევენციისთვის.  იყო აგრეთვე მსჯელობა თემაზე „მოტივაცია და ადამიანის შესაძლებლობების ზღვარი“.

უკუკავშირისას ქალებმა აღნიშნეს, რომ ფსიქოლოგის კონსულტაციები მათთვის სასიცოცხლოდ მნიშვნელოვანია, რადგან განტვირთვისა და უარყოფითი ემოციებისაგან გათავისუფლებასთან ერთად ისინი იღებენ ინდივიდუალურ რჩევებს, თუ როგორ გაუმკლავდნენ ამა თუ იმ რთულ სიტუაციას ფსიქიკური ჯანმრთელობის  შენარჩუნებით.