მოუგვარებელი კონფლიქტები და მათი გავლენა ქალებზე, კონკრეტული ისტორიები და წლების განმავლობაში მოუგვარებელი პრობლემები - ფონდი „სოხუმის“ მიერ გადაღებული დოკუმენტური ფილმი ქართულ-აფხაზური კონფლიქტის პოზიტიური ტრანსფორმაციისათვის ოფიციალურ მოლაპარაკებებში ქალთა ჩართვის მნიშვნელობას უსვამს ხაზს.
ფილმის გმირები კონფლიქტის ზონასა და მოსაზღვრე რეგიონში მცხოვრები ქალბატონები არიან, რომლებიც საკუთარ სატკივარს უზიარებენ მაყურებელს. საკითხის სიმწვავის აღიარებას არ გაურბიან სახელმწიფო ჩინოვნიკებიც და საუბრობენ იმ ღონისძიებების აუცილებლობაზე, რომლებიც კონფლიქტის ზონაში მცხოვრებ ადამიანებს ოდნავ მაინც შეუმსუბუქებს მდგომარეობას. ამ საკითხების მიმართ კი ქალები უფრო მეტ გულისხმიერებას იჩენენ.
როგორია ქვეყანაში არსებული ოფიციალური სტატისტიკა ქალთა პოლიტიკური მონაწილეობის კუთხით, რატომ არ არიან პასუხისმგებელ თანამდებობებზე ქალები, როგორ უნდა მოხდეს მათი პოლიტიკური მონაწილეობის ხელშეწყობა - გადაცემის სტუმრებმა, ოზურგეთის გენდერული საკონსულტაციო საბჭოს წევრებმა დეტალურად ისაუბრეს გავლილ პოლიტიკურ გზაზე, სირთულეებზე, დადებით მხარეებზე, საბჭოსა და ადგილობრივი თვითმმართველობის ნაყოფიერ თანამშრომლობაზე, განსაკუთრებით - ქალთა გააქტიურების კუთხით.
საუბარი შეეხო ოზურგეთში გასამართ რიგგარეშე არჩევნებს. სოფელ ნასაკირალში კენჭს ქალი დეპუტატი იყრის „ქართული ოცნებიდან“.
გადაცემის სტუმრების პოზიციით, მაჟორიტარი კანდიდატობა ნამდვილად არ არის ადვილი, განსაკუთრებით ქალისთვის, მაგრამ ძალიან საინტერესოა და ქალების ჩართულობაც აუცილებელია. ქალები კონკრეტულ საკითხებს უფრო მეტ მნიშვნელობას ანიჭებენ, უფრო მგრძნობიარენი არიან სოციალურ თემებთან დაკავშირებით.
„თუ ჩვენ ვსაუბრობთ, რომ ქალები პოლიტიკაში უნდა გაძლიერდნენ, უნდა მივცეთ წარმოდგენილ პედაგოგ ქალს შანსი და დავამსხვრიოთ მითი, რომ მაჰმადიანი თემი ქალს არ აირჩევს დეპუტატად“, - აღინიშნა გადაცემაში.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ეს ფილმი ეძღვნება ფონდი „სოხუმის“ პროექტს „ქალთა შესაძლებლობების გაფართოება კონფლიქტის ტრანსფორმაციაში ახალი მიდგომების გამოსამუშავებლად“.
ფილმი, რომელიც ტელეკომპანია „რიონის“ ჟურნალისტებმა მოამზადეს, ასახავს პროექტის ფარგლებში განხორციელებულ აქტივობებს: ტრენინგი ქალებისა და ახალგაზრდების ჯგუფთან, მრგვალი მაგიდა და კვლევის პრეზენტაცია, შეხვედრა კვიპროსზე, პროექტის პრეზენტაცია თბილისში.
რა ტიპის საფრთხეები არსებობს საზოგადოებაში, რატომ არიან ქალები მაღალი რისკის ქვეშ, რა სახის პრევენციული ღონისძიებები შეიძლება გატარდეს ადამიანური უსაფრთხოების ხარისხის ასამაღლებლად - ამ საკითხებზე გააკეთეს აქცენტი სტუმრებმა ტელეკომპანია „რიონის“ პირდაპირი ეთერში.
გადაცემას თან ახლდა სიუჟეტი, რესპონდენტები ხაზგასმით საუბრობენ, რომ მათთვის მნიშვნელოვანია უსაფრთხოების ხარისხთან დაკავშირებული ინფორმაციის გაგება.
ტელეგადაცემის მონაწილეებმა დააფიქსირეს, რომ უსაფრთხოების ხარისხის ამაღლება თითოეული ადამიანის თვითშეგნების ამაღლებით უნდა დაიწყოს და მას ადგილობრივი თვითმმართველობის პასუხისმგებლობა უნდა ერთვოდეს. შესაბამისი ეფექტი მხოლოდ კოორდინირებული მუშაობით მიიღება.
მაისში გაზეთ „გურია ნიუსში“ დაიბეჭდა სტატია ტყვიის გადამამუშავებელი საწარმოს შესახებ. „გურია ნიუსმა“, „გურიის მოამბემ“ და „ალიონმა“ გააშუქეს მდინარე ბჟუჟიდან ინერტული მასალების გატანის საკითხი. ეს პრობლემები საფრთხეს უქმნის მოსახლეობას. მათ შესახებ დაფიქსირდა გენდერული საკონსულტაციო საბჭოს იურისტის ანგარიშში, აღინიშნა საბჭოს სხდომაზე.
ოზურგეთში მიმდინარე მუშაობას აქტიურად უჭერენ მხარს ჟურნალისტები და თავადაც მონაწილეობენ აქტუალური პრობლემების მოგვარებაში. სწორედ ამაზე იყო საუბარი ჟურნალისტებთან ტრადიციულ საინფორმაციო შეხვედრაზე, რომელიც გენდერის მედია ცენტრში გაიმართა.
ოზურგეთის „გურიას“ ეთერში გასული ტელესიუჟეტი ოზურგეთის გენდერული საკონსულტაციო საბჭოს სხდომაზე განხილულ საკითხებს შეეხო. რა გამოიკვეთა ჩატარებული საჭიროებათა კვლევის შედეგად; რა კონკრეტული წინადადებები აქვთ სამოქალაქო ჯგუფების წარმომადგენლებს; რომელია მოქალაქეთა ყველაზე მოწყვლადი ჯგუფების პირველი რიგის საჭიროებები, რაც, საბჭოს წევრების აზრით, ადგილობრივ ბიუჯეტში აუცილებლად უნდა აისახოს.
{youtube}Ffm000pmGJc{/youtube}
პროექტი ხორციელდება ჩეხეთის არასამთავრობო ორგანიზაციის „დამოუკიდებელი სოციალურ-ეკოლოგიური მოძრაობის“ მხარდაჭერით