ქართული სუფრა არა მხოლოდ სადილობას ნიშნავს. ეს ერთად ყოფნის, ერთმანეთისთვის გრძნობების გაზიარების რიტუალია. ამიტომაც გადავწყვიტეთ, სუფრასთან მოგვეწვია „ჩვენი უკრაინელები“ - ასე ვეძახით უკრაინიდან ჩამოსულ ქალებს. ისინიც სიამოვნებით მოვიდნენ ჩვენს ოფისში: ირინა, ნატალია, მარინა...
ქართული კერძები ჩვენით დავამზადეთ - ჩახოხბილი და ფხალი, მჭადი და ხაჭაპური, საცივი, ჩანახი, კუბდარი... კერძების რეცეპტებიც ამოვუბეჭდეთ და გავატანეთ.
თან ქართულ სუფრულ ტრადიციებზე ვისაუბრეთ, თან - ჩვენს განცდებზე. იმათ თავისი თქვეს, ჩვენ - ჩვენი, უკრაინის ომმა რომ გაგვიახლა...
სუფრა ერთგვარ ფსიქორეაბილიტაციად იქცა. კმაყოფილები წავიდნენ, ტკივილი დაივიწყეს ცოტა ხნით. იციან, რომ ქალთა ფონდი „სოხუმი“ მათი მხარდამჭერია, მათი დამხმარე და ცდილობს მათი ყოველდღიური პრობლემების მოგვარებას...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ურბანული კვლევების ცენტრმა ჩაატარა პანელური დისკუსია თემაზე „განსახლების საკითხები და ომი: უკრაინისა და საქართველოს გამოცდილება“. შეხვედრაზე მომხსენებელთა შორის იყო ქალთა ფონდი „სოხუმის“ თბილისის წარმომადგენელი ეკატერინე გამახარია. დისკუსია მიეძღვნა ომის გავლენას უკრაინის საბინაო სექტორზე, უკრაინასა და საქართველოში კონფლიქტით დაზარალებული/დევნილების საბინაო მდგომარეობის და განსახლების პოლიტიკის განხილვას. მონაწილეები მსჯელობდნენ საბინაო უზრუნველყოფის მექანიზმების გაუმჯობესების გზებზეც.
ეკატერინე გამახარიამ ყურადღება გაამახვილა დევნილთა განსახლების არსებული პოლიტიკის ხარვეზებზე და ხაზი გაუსვა მისი ეფექტიანობის შეფასების და განხორციელებული პოლიტიკით დევნილთა კმაყოფილების შესწავლის აუცილებლობას. დისკუსიის დროს გამოიკვეთა განსახლების პოლიტიკის დევნილთა მრავალფეროვანი და სპეციფიკური ჯგუფების საჭიროებებზე და ინტერესებზე მორგების მნიშვნელობა. ასევე, კერძო სექტორში მცხოვრები, უყურადღებოდ დარჩენილი დევნილების წინაშე არსებული გამოწვევების ძირეულად შესწავლის საჭიროება.
შეხვედრის დროს ხაზი გაესვა განსახლების პოლიტიკის დაგეგმვის პროცესში როგორც თავად დევნილთა, ასევე სამოქალაქო საზოგადოების და კერძო სექტორის წარმომადგენელთა ჩართულობის უზრუნველყოფის საჭიროებას. მსჯელობა ასევე შეეხო თვითდინებაზე მიშვებული გაქირავების პოლიტიკის გაკონტროლებას და დარეგულირებას ფასების არაადეკვატური ავარდნის თავიდან აცილების მიზნით.
უკრაინიდან მომხსენებელთა შორის იყვნენ:
- ანასტასია ბობროვა, ორგანიზაცია Cedos-ის ანალიტიკოსი და მკვლევარი; ინიციატივა „Re.Housing for Ukraine“-ის კოორდინატორი
- ივან ვერბიცკი, ორგანიზაცია Cedod-ის დირექტორი.
შეხვედრას მოდერატორობას უწევდა ნანო ზაზანაშვილი, ურბანული კვლევების ცენტრის პროექტების ხელმძღვანელი და მკვლევარი.
ადამიანის უფლებების საბჭოს გენდერული თანასწორობის, ქალთა მიმართ ძალადობის და ოჯახში ძალადობის საკითხებზე მომუშავე უწყებათაშორისი კომისიის სხდომა ჰიბრიდულ რეჟიმში გაიმართა. სხდომაში მონაწილეობდა როგორც ცენტრალური ხელისუფლების რელევანტური უწყებების წარმომადგენლები, ასევე საერთაშორისო და ადგილობრივი სამოქალაქო საზოგადოების ორგანიზაციების წარმომადგენლები. შეხვედრას ხელმძღვანელობდა პრემიერ-მინისტრის მრჩეველი ადამიანის უფლებათა დაცვის საკითხებში - ნიკო თათულაშვილი. მონაწილეებმა ერთმანეთს გაუზიარეს ის ძირითადი ინდივიდუალური მიღწევები და გამოწვევები, რომლებიც თან ახლავს გენდერული თანასწორობისთვის და ქალთა და ოჯახში ძალადობის წინააღმდეგ მუშაობის პროცესს.
სხდომას ქალთა ფონდი „სოხუმის“ თბილისის ოფისის წარმომადგენელი ლინდა ჩიხლაძე ესწრებოდა. მან დამსწრეებს ფონდი „სოხუმის“ გამოცდილება გაუზიარა და, მოკლე დროის მიუხედავად, ყურადღება გადაუდებელ საჭიროებებზე გაამახვილა. კერძოდ: ბავშვთა მოვლის სერვისების არსებობის მნიშვნელობაზე ქალთა დასაქმების ხელშესაწყობად ოჯახში ძალადობის ეფექტიანი პრევენციისთვის; სოფლებში მერის წარმომადგენლების ჩართულობით ქალთა/ოჯახში ძალადობის ადრეულ ეტაპზე გამოვლენის მნიშვნელობაზე. პარალელურად, მათი გენდერული სენსიტიურობის გაზრდასა და პროფესიული გადამზადებების საჭიროებაზეც ისაუბრა; მუნიციპალური სერვისის მისაღებად არსებულ იმ ბარიერებზე, რაც დაზარალებულ ქალს არ აძლევს უფლებას, კრიზისულ სიტუაციაში გამოიყენოს სხვა მუნიციპალიტეტში არსებული სერვისები, მსხვერპლის სტატუსისა და რეგისტრაციის უქონლობის გამო. ლინდა ჩიხლაძემ ასევე დასვა კითხვა, თუ რა მდგომარეობაა მოძალადის ქცევის კორექციის მიმდინარე პროგრამებთან დაკავშირებით და აქვთ თუ არა დაგეგმილი ამ პროგრამების ეფექტიანობის შეფასება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
თვის მანძილზე აქტიურად მუშაობდა ქალთა ფონდი „სოხუმის“ იურისტი იამზე გუმბერიძე. ბაღდათში ის დაესწრო ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისიის პრეზენტაციას - ამ კომისიის შექმნით ქალთა ფონდი „სოხუმის“ ინიციატივას პირველმა ბაღდათის მუნიციპალიტეტმა დაუჭირა მხარი.
ტრადიციულად, წარიმართა მუშაობა ქალთა მხარდაჭერის ცენტრებთან. ინდივიდუალური შეხვედრა ჩატარდა ბაღდათში, ჯგუფური - თერჯოლაში (მონაწილეობდა 16 ადამიანი), წალენჯიხაში კი იყო როგორც ინდივიდუალური, ასევე ჯგუფური შეხვედრები (7 ბენეფიციარის მონაწილეობით).
ჯგუფურ შეხვედრებზე გამოვლინდა ქალები ძალადობის მსხვერპლის ნიშნებით და მათი შვილები. იურისტმა გააცნო მათ კანონი, რომელიც ძალადობის წინააღმდეგ მოქმედებს და მსხვერპლის დაცვის მექანიზმები. ამ შეხვედრების გარდა სატელეფონო კონსულტაცია ჩაუტარდა ჩოხატაურელ ბენეფიციარს. შეხვედრების მონაწილეებმა მიიღეს პასუხები თავიანთ კითხვებზე - ეს ხელს უწყობს მათი პრობლემების მოგვარებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩოხატაურის, ტყიბულის და ქობულეთის მუნიციპალიტეტებში ჩატარებული შეხვედრებით დასრულდა გაზაფხულის ბოლო თვე ახალგაზრდობის გაძლიერების ცენტრებში.
ყველა შეხვედრა საინტერესო იყო, მონაწილეები აქტიურად მსჯელობდნენ კონფლიქტებისა და ძალადობის თემაზე. თუმცა ქობულთში ცოცხლად ჩატარებული ტრენინგი მაინც გამოირჩეოდა კრეატიული აქტივობებით.
როგორც მონაწილეები ამბობენ, ტრენინგები ყველა ასაკის მოზარდისთვის კარგი შესაძლებლობაა, იყოს ინფორმირებული ცხოვრებისეულ საკითხებზე.
როგორც ყოველთვის, მაისშიც 10 მუნიციპალიტეტში შექმნილ ახალგაზრდულ ჯგუფებთან ჩატარდა ტრენინგები. მონაწილეთა საერთო რაოდენობა იყო 207. ყველა მათგანი აქტიურად იყო ჩართული აქტუალური პრობლემების განხილვაში, დებატებში, ჯგუფურ მუშაობასა თუ როლურ თამაშებში. მონაწილეთა ნაწილი შემდეგ თავად ატარებს საინტერესო ე.წ. ინიცირებულ ღონისძიებებს. სწორედ ეს არის ახალგაზრდებთან მუშაობის სერიოზული შედეგი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმი“ წარმოგიდგენთ რუბრიკას „გენდერი და საზოგადოება“.
ამჯერად ჩვენი რუბრიკის სტუმარია სოფო ნატრიაშვილი - ბაღდათის მუნიციპალიტეტის საკრებულოს გენდერული საბჭოს მდივანი.
ფონდი „სოხუმი“ აგრძელებს გენდერული სტერეოტიპების მსხვრევის კამპანიას - თანასწორობის, ტოლერანტული და არაძალადობრივი კულტურისა და გარემოს დასამკვიდრებლად ჩვენს საზოგადოებაში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ფსიქოლოგმა მანანა გოცირიძემ ინდივიდუალური და ჯგუფური შეხვედრები ჩაატარა წალენჯიხის, ტყიბულის, ბაღდათის, ჩოხატაურის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. შეხვედრებში მონაწილეობა მიიღო 24-მა ბენეფიციარმა. გამოვლინდა ოჯახში ძალადობის ორი მსხვერპლი, რომლებთანაც გრძელდება ფსიქოთერაპიული სესიები.
ასევე ტარდება ინდივიდუალური ონლაინ ფსიქოთერაპიული სესიები რეგიონებში მცხოვრებ 12 ადამიანთან. ქუთაისში მცხოვრებ ბენეფიციარებს კი აქვთ შესაძლებლობა, ფონდი „სოხუმის“ ოფისში მიიღონ კონსულტაციები - ამ შესაძლებლობით ისარგებლა 21-მა ბენეფიციარმა (მათგან 3 ახალია) და ორმა ოჯახურმა წყვილმა.
ერთ-ერთმა 43 წლის ბენეფიციარმა აღნიშნა, რომ მისი ცხოვრება უფრო აეწყო: „მადლობელი ვარ თქვენი, უკეთესი განწყობა მაქვს და სულიერი წონასწორობა. თქვენთან ურთიერთობისას იყო პოზიტიური და ნდობით სავსე ატმოსფერო. ძალების მოზღვავებას ვგრძნობ და სურვილს, ცხოვრება უკეთესობისკენ შევცვალო“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
დავითი პირველი უკრაინელია, რომელიც ქუთაისში დაიბადა. ბიჭუნას დედაა მარია ფესინა-რუხაძე. 9 თვის ორსული ქალი ძლივს გამოვიდა დონეცკიდან, ჯერ ლვოვში ჩავიდნენ, მერე - პოლონეთში და საზღვარზე 9-საათიანი ლოდინის შემდეგ ჩამოფრინდა თბილისში, იქიდან კი - ქუთაისში.
მის ჩამოსვლამდე ქალთა ფონდ „სოხუმს“ თერჯოლიდან დაუკავშირდა ელისო რუხაძე. გვთხოვდა, დავხმარებოდით უკრაინის მოქალაქეს, რომელიც უკვე გზაში იყო - მოგვეძებნა მისთვის ექიმი. მას ბევრი გაეგონა ჩვენს ორგანიზაციაზე და იცოდა, რომ დახმარებას ვუწევდით უკრაინელ ლტოლვილებს.
სანამ მარიამ ქუთაისამდე ჩამოაღწია, ლტოლვილთა საკითხებზე მომუშავე ჯგუფმა ოპერატიულად შეაგროვა ინფორმაცია, სად შეიძლებოდათ მიეღოთ ორსული. გვერდში დაგვიდგა კლინიკა „ბომონდის“ დირექტორი მამუკა მიქაძე - კლინიკამ ყველა ხარჯი თავის თავზე აიღო. ყველაფერმა კარგად ჩაიარა - დავითი 5 მაისს დაიბადა (ექიმი - ნინო რამიშვილი).
ფორუმ-თეატრმა მაისი აქტიური მუშაობით დაასრულა. 4 სცენა წარმოადგინა ქუთაისის ბოტანიკური ბაღში, სადაც მონაწილეობა მიიღო გენდერული კლუბის ჩატარებულ ღონისძიებაზე. შემდეგ კი წარმოდგენები გამართა „SOS - ბავშვთა სოფელში“.
მაყურებლებისთვის საინტერესო იყო ყველა სცენა, მაგრამ განსაკუთრებული ყურადრება მაინც მიგრაციამ და შვილებისა და მშობლების ურთიერთობამ მიიპყრო. ამ აქტუალურმა თემებმა სადისკუსიოდ განაწყო შეკრებილები. მაყურებელი წარმოდგენებშიც აქტიურად ჩაერთო.
ფორუმ-თეატრის განახლებული გუნდი ონლაინ მუშაობის შემდეგ სიამოვნებით ურთიერთობს მაყურებელთან, მსჯელობს პრობლემებზე და ეძებს იდეებს ახალი წარმოდგენებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- ეს 10 დღე ნაყოფიერად დატვირთული იყო. ბავშვებს მოეწონათ თამაშები: სახალისო მათემატიკა, შინაური ცხოველები, ინგლისური და ქართული ანბანი, რუბიკის კუბიკების აწყობა... ჩვენ ერთად ვხატავდით, ვძერწავდით, ვკითხულობდით ზღაპრებს, ვუყურებდით ანიმაციურ ფილმებს, ვცეკავავდით, ვთამაშობდით, ვისწავლეთ ფერადი ფურცლებისგან ვარდების გაკეთება. თან ბევრს ვლაპარაკობდით. მისვამდნენ შეკითხვებს და მეც ვპასუხობდი მათთვის გასაგებ ენაზე, - ამბობს ანა ლომიძე, სარეაბილიტაციო ცენტრის არასრულწლოვნებთან მუშაობის ასისტენტი.
ქალთა ფონდი „სოხუმის“ სარეაბილიტაციო ცენტრი წელს გაიხსნა ქუთაისის ერთ-ერთ ლამაზ უბანში. აქ 10-15 დღე შეუძლია იცხოვროს ქალმა ბავშვებთან ერთად. მასთან მუშაობენ სოციალური მუშაკი, ფსიქოლოგი და იურისტი.
ბავშვები რომ უყურადღებოდ არ დარჩნენ და თავისუფალი დრო საინტერესოდ გაატარონ, ცენტრში არასრულწლოვნებთან მუშაობის ასისტენტმა დაიწყო მუშაობა. ანას ჯერ მხოლოდ ერთ ჯგუფთან ჰქონდა ურთიერთობა, მაგრამ უკვე აქვს სათქმელიც და წარმატების პატარა ისტორიაც.