ქალთა ფონდი „სოხუმის“ იურისტმა ჯგუფური და ინდივიდუალური შეხვედრები ჩაატარა სოფ. დიდი ნეძში (ზუგდიდის მუნიციპალიტეტი), სოფ. დიმში (ბაღდათის მუნიციპალიტეტი), სენაკში, ტყიბულში. ჯგუფურ შეხვედრებში მონაწილეობდნენ მერიის წარმომადგენლები, სკოლის პედაგოგები და სამოქალაქო საზოგადოების წარმომადგენლები. შეხვედრებზე გაკეთდა ვებგვერდის „ძალადობის მსხვერპლთა სერვისების ციფრული რესურსცენტრი“ პრეზენტაცია.
წალენჯიხაში ინდივიდუალური კონსულტაცია მიიღო მარტოხელა ქალმა სტატუსთან დაკავშირებით, ვანში კი ძალადობის მსხვერპლმა ქალმა -განქორწინების საკითხებზე. ყველა შეხვედრა ქალთა მხარდაჭერის ცენტრების ორგანიზატორობით გაიმართა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისის „სიყვარულის ბაღში“ უკრაინის დამოუკიდებლობის დღის აღსანიშნავად უკრაინელი ლტოლვილების ინიცირებული საქველმოქმედო ღონისძიება გაიმართა.
ისმოდა უკრაინის ჰიმნი. ჟღერდა სევდით და ტკივილით გაჯერებული, მაგრამ სიამაყით და გამარჯვების რწმენით ანთებული მესიჯები.
მშვენიერმა უკრაინელმა გოგონებმა ფერადოვანი უკრაინული სიმბოლიკა, ხელნაკეთი ნივთები, უგემრიელესი უკრაინული ტკბილეული გამოფინეს. დონაციის ყუთით ლტოლვილი ოჯახების დასახმარებელი თანხაც შეგროვდა.
პატარებმა განსაკუთრებით იხალისეს, რადგან ბავშვები ომშიც ბავშვები არიან და არავინ დარჩა გულგრილი ანიმატორების პროგრამის მიმართ.
აქციის ორგანიზატორებმა მადლიერება გამოხატეს ქალთა ფონდი „სოხუმის“ მიმართ, რომელიც განსაკუთრებულად ეხმარება უკრაინიდან ლტოლვილებს.
მძიმე დღეები უდგას უკრაინას, მაგრამ ჩვენ გვჯერა, რომ გამარჯვება გარდაუვალია!
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
აგვისტოში ხალხი თითქმის გასულია ქალაქიდან, მაგრამ ბევრია სტუმარი... ძირითადად, სწორედ ისინი ესწრებოდნენ ფორუმ-თეატრის წარმოდგენებს ქუთაისის უბნებში.
ჩატარდა ორი წარმოდგენა., მაყურებელი დაინტერესდა ამ ფორმატით. ზოგიერთს საერთოდ არ ჰქონდა ნანახი და განაგონი, ზოგიერთი ჩაერთო სცენებშიც. სამწუხაროდ, ყველამ უარი თქვა ფოტოების გადაღებაზე, ამიტომაც ფოტოებში ჩანან მხოლოდ მსახიობები და ეპიზოდები სცენებიდან.
ღია ცის ქვეშ წარმოდგენები საკმაოდ დიდ როლს ასრულებს როგორც საზოგადოების ინფორმირების, ძალადობის პრევენციის მექანიზმი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გოგი რევიას ზუგდიდის მუნიციპალიტეტის ადგილობრივ თვითმმართველობაში მუშაობის დიდი გამოცდილება აქვს. ბოლო ათი წელია კი სოციალური დაცვის მიმართულებას ემსახურება, სადაც, სხვა საკითხებთან ერთად, მნიშვნელოვანი ყურადღება გენდერულ თანასწორობასაც ექცევა. ზუგდიდის მუნიციპალიტეტის ბიუჯეტი იყო პირველი, სადაც 2015 წელს ოფიციალურად გაჩნდა ძალადობის მსხვერპლთა დაფინანსების პროგრამა.
„ძალადობის მსხვერპლი ქალის მიერ, რომელიც საზოგადოებისგან შეშინებულია, თავისი პირველი ემოცია გადასცეს მამაკაცს, რომელსაც იცნობს ან საერთოდ არ იცნობს, უხერხული პრობლემაა [ზოგადად], მაგრამ ჩემი დამოკიდებულების გამო, რამდენიმე წუთში ეს ქალები ჩემთან გულღია ხდებიან. მათ იციან, რასაც მე მიყვებიან, ეს ჩვენ შორის რჩება. მე მათ ყოველთვის ვთავაზობდი შედეგიან გამოსავალს და რწმუნდებოდნენ. როცა ერთი, ორი, ათი და მრავალია ასეთი შემთხვევა, უკვე ეს ნდობა ნამდვილად მაქვს მათგან,“ - გვიყვება გოგი რევია, ზუგდიდის მუნიციპალიტეტის მერიის სოციალური დაცვისა და გენდერული თანასწორობის განყოფილების უფროსი რუბრიკაში „გენდერი და საზოგადოება“.
ქალთა მხარდაჭერის ცენტრების ორგანიზებით აგვისტოში სამობილიზაციო შეხვედრებში 158 ადამიანი ჩაერთო. ოჯახური ძალადობის პრობლემები, რეაგირება და მსხვერპლთა დახმარების ეფექტიანი მექანიზმები მწვავე დისკუსიების საფუძველი გახდა. მონაწილეებმა ფემიციდის ფაქტები გააანალიზეს. მათ აღნიშნეს: „ჩვენ გვერდს ვერ ავუვლით ქალთა გახშირებულ მკვლელობას, ეს არის საგანგაშო მაჩვენებელი და უფრო მეტ რეაგირებას მოითხოვს როგორც სახელმწიფოსგან, ასევე საზოგადოებისგან.“
შეხვედრებმა გამოკვეთა მოსახლეობის ინფორმირების კუთხით ქალთა მხარდაჭერის ცენტრების როლის გაძლიერება, რაც შეიძლება მეტმა ადამიანმა უნდა იცოდეს, რომ ძალადობა დასჯადია და მსხვერპლი არ არის მარტო.
სამტრედიის, თერჯოლის, ტყიბულის, ვანის, ბაღდათის, სენაკის, წალენჯიხის, ზუგდიდის, ჩოხატაურის და ქობულეთის ქალთა მხარდაჭერის ცენტრებმა მოსახლეობის ინფორმირების პა რალელურად თვის განმავლობაში ძალადობის რვა ახალი შემთხვევა გამოავლინეს.რეაგირება უკვე დაწყებულია. ფონდი „სოხუმის“ სერვისებს ბენეფიციარები აქტიურად იყენებენ, რაც ზრდის მსხვერპლთა უსაფრთხოების გარანტიებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ზაზა გოჩელაშვილი ბავშვისა და ოჯახის სოციალური მუშაკია ტყიბულის მუნიციპალიტეტში. ასევე ის მოხალისეობრივად აქტიურადაა ჩართული სამოქალაქო სექტორში. ახალგაზრდებთან მუშაობის საკმაოდ დიდი გამოცდილება აქვს.
„ძირითადად სოციალური მუშაკები არიან ქალები და მე, განსაკუთრებით თვითმმართველობების დონეზე, ერთ-ერთი გამონაკლისი ვარ, თუმცა მყავს კოლეგა მამაკაცებიც. შესაბამისად, ძალიან მნიშვნელოვანია, რომ მუნიციპალიტეტში ორი სოციალური მუშაკი იყოს: ქალი და კაცი,“ - საკუთარ გამოცდილებაზე დაყრდნობით გვიყვება ის რუბრიკაში „გენდერი და საზოგადოება“.
13 და 27 ივლისს გენდერული თანასწორობის მუდმივმოქმედმა საპარლამენტო საბჭომ, ადამიანის უფლებათა დაცვისა და სამოქალაქო ინტეგრაციის კომიტეტთან ერთად, ევროკავშირის 12 რეკომენდაციიდან მე-9 რეკომენდაციის შესრულების თაობაზე, რომელიც გენდერული თანასწორობის საკითხებს უკავშირდება, საერთაშორისო და ადგილობრივი არასამთავრობო ორგანიზაციების წარმომადგენლებთან სამუშაო შეხვედრა გამართა.
სხდომების ძირითადი თემები იყო: გენდერული თანასწორობის სახელმწიფო კონცეფციის განახლება, ქალთა ეკონომიკური გაძლიერების კონცეფციის ინიცირება და ქართული კანონმდებლობის შესაბამისობა სტამბოლის კონვენციასთან.
ქალთა ფონდი „სოხუმის“ თბილისის ოფისის ხელმძღვანელმა - ეკა გამახარიამ თავის სიტყვაში ხაზი გაუსვა ქალთა მიმართ ძალადობის პრევენციისა და მასზე ეფექტიანი რეაგირებისათვის ქალთა ეკონომიკური გაძლიერების მნიშვნელობას. გენდერული თანასწორობის მუდმივმოქმედი საპარლამენტო საბჭოს დაპირებით, აღნიშნული საკითხის დეტალურ განხილვას ცალკე სამუშაო შეხვედრა მიეძღვნება.
ახლა სამი ფსიქოლოგი მუშაობს უკრაინელ ლტოლვილებთან.
მანანა გოცირიძე, რომელსაც ბევრი სამუშაო აქვს ქალთა მხარდაჭერის 10 ცენტრში და სარეაბილიტაციო ცენტრში, უკრაინელების ფსიქოემოციურ განწყობაზეც ზრუნავს.
მეორე ფსიქოლოგი, მარინა სტეპანენკო, კიევიდანაა. ახლა მესამე ფსიქოლოგიც გვყავს - ანია შალიმოვა ხერსონიდან.
ქალთა ფონდი „სოხუმის“ მხრიდანაც კარგი ჟესტია - უცხო ქალაქში თავისი პროფესიით დაასაქმო ადამიანი, შემოსავალიც ჰქონდეს და თანაკუთხელებსაც დაეხმაროს.
საქმე ყველასთვის სამყოფია: 197 ადამიანია ჩვენს საინფორმაციო ბაზაში და ყველას სჭირდება გამხნევება, ფსიქოლოგის კომპეტენტური რჩევა...
მანანა გოცირიძე: შევხვდი ოჯახებს, რომლებიც ჩამოვიდნენ კიევიდან, ოდესიდან, ხარკოვიდან და ხერსონიდან. მარტო ამ ქალაქების დასახელებაც კმარა, რომ მივხვდეთ, რა გადაიტანეს, რას განიცდიან... ტარდება პირველადი ფსიქოლოგიური კონსულტირება, ანამნეზის შეგროვება და თითოეულთან იგეგმება შემდგომი შეხვედრები. როცა მათთან მივდივართ, პროდუქტებიც მიგვაქვს და, ვფიქრობ, ესეც კარგი დახმარებაა.
ფსიქოლოგთან შეხვედრები ივლისში ვანის, ქობულეთის, კოკის (ზუგდიდის მუნიციპალიტეტი), წალენჯიხის და სამტრედიის ქალთა მხარდაჭერის ცენტრებმა მოაწყვეს. ამ მუნიციპალიტეტებში გაიმართა ჯგუფური და ინდივიდუალური შეხვედრები 34 ბენეფიციარის მონაწილეობით.
შეხვედრების შედეგები: გამოვლინდა ოჯახში ძალადობის ორი მსხვერპლი, რომლებთანაც გრძელდება მუშაობა.
გასვლითი შეხვედრების გარდა ონლაინ ჩატარდა ინდივიდუალური ფსიქოთერაპიული სესიები რეგიონებში მცხოვრებ 9 ბენეფიციართან.
ქუთაისში, ქალთა ფონდი „სოხუმის“ ოფისში მიმდინარეობდა მუშაობა 16 ადამიანთან და ერთ ოჯახურ წყვილთან.
მუშაობას თანდათან დადებითი შედეგები მოაქვს და ბენეფიციარები მადლობას გამოხატავენ უკეთესი განწყობის, პრობლემების მოგვარების, ოჯახური ფსიქოლოგიური კლიმატის გაუმჯობესების გამო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
შეჩერე ოჯახური ძალადობა! - წერია ერთგან.
ძალადობა არ არის გამოსავალი! - ამბობს მეორე.
ეს ბავშვების გაკეთებული პოსტერებია.
მესამეგან - კვლევის ერთ-ერთი დიაგრამაა.
კითხვაზე: ვინ უნდა იღებდეს გადაწყვეტილებას ოჯახში? პასუხები ასე განაწილდა: ქალი - 12%, კაცი - 32%, ორივე - 56%.
ყველაფერი იმ მოზარდების ნახელავია, რომლებიც ახალგაზრდობის გაძლიერების ცენტრებში გადიან ექვსთვიან სატრენინგო კურსს.
ცენტრები 10 მუნიციპალიტეტში მოქმედებს - სამტრედია, თერჯოლა, ბაღდათი, ვანი, ტყიბული, სენაკი, ზუგდიდი, წალენჯიხა, ჩოხატაური, ქობულეთი.
კონფლიქტის მოგვარების გზები, ძალადობის პრევენცია, ნაადრევი ქორწინება - ამ და სხვა აქტუალურ საკითხებს განიხილავენ ტრენინგებზე. მერე კი მოზარდები ერთგვარ საშინაო დავალებას იღებენ: ვინ გაავრცობს თემას? ვინ მოიფიქრებს სათქმელის ორიგინალურ ფორმას? როგორ შეიძლება გავრცელდეს ინფორმაცია პრობლემაზე?