ეს არის ფრაგმენტები ბავშვების წერილებიდან.
მშობლებს მიმართავენ. სიყვარულს გამოხატავენ და პრობლემებზე საუბრობენ.
ქალთა ფონდი „სოხუმის“ ახალგაზრდობის გაძლიერების ცენტრებისთვის ჩატარებული ერთ-ერთი შეხვედრის ნაწილი შვილებისა და მშობლების ურთერთობას მიეძღვნა. მაშინ გაჩნდა იდეა, ბავშვებს მესიჯები გაეგზავნათ დედებისთვის და მამებისთვის...
დანარჩენს თვითონ წაიკითხავთ:
- მინახავს დედა, ჩემი ან ჩემი ძმის სიტყვების გამო აცრემლებული. როცა მას ვუყურებ, მეც გული მტკივა, ვუფიქრდები ჩემს დანაშაულს... მისი ცრემლი ჩემთვის დიდი ტკივილია. ბოდიშს ვუხდი და ვეუბნები, რომ ძალიან მიყვარს...
- დარწმუნებული ვარ, როდესაც შვილი მეყოლება ისიც ისევე მომექცევა, როგორც მე ვექცეოდი ჩემს მშობლებს, ამიტომ ვცდილობ, გული არ ვატკინო მათ.
ქალთა ფონდი „სოხუმის“ ფსიქოლოგის მანანა გოცირიძის დღიურიდან:
ხ., 28 წლის: „განქორწინების შემდეგ ჩემთვის ცხოვრება გაჩერდა. ყველაფერი განაცრისფრდა. მოსაწყენი, უინტერესო გახდა. ხშირად ვფიქრობდი, რატომ უნდა მეცოცხლა ასეთი სირცხვილის შემდეგ. ჩემთან ერთად ტიროდა დედაც. ერთხელ ასე აცრემლებულებს მოგვისწრო დედაჩემის მეგობარმა ქალმა და გვირჩია, დახმარებისთვის მიგვემართა ფონდი „სოხუმის“ ფსიქოლოგისთვის. თითქმის რვა თვე ხელახლა ვსწავლობდი სამყაროს დანახვას. არ ვიცი, როგორ გამოვხატო მადლიერება ჩემს სახეზე დაბრუნებული ღიმილისა და დედიკოს თვალებში ჩამდგარი სხივისთვის. ბედნიერები ვართ.“
ასეთი ისტორიები ბევრი აქვს ფსიქოლოგს. ეს თანმიმდევრული ხანგრძლივი მუშაობის შედეგებია. ასეთი ინტენსიური მუშაობა ჩატარდა თებერვალშიც:
- ტყიბულის, ხურჩის (ზუგდიდის მუნიციპალიტეტი), ქობულეთის, თერჯოლის, სენაკის, წალენჯიხის ქალთა მხარდაჭერის ცენტრების ორგანიზებული ონლაინ ჯგუფური შეხვედრები – 48 ბენეფიციარის მონაწილეობით;
უფასო იურიდიული კონსულტაციები, დახმარება საბუთების მომზადებაში – ეს სერვისი ძალიან მნიშვნელოვანია იმ ათი მუნიციპალიტეტის ბენეფიციარებისთვის, სადაც მუშაობს ქალთა ფონდი „სოხუმი“ პროექტის „ქალთა უფლებების გაძლიერება დასავლეთ საქართველოში“ ფარლებში.
თებერვალში თერჯოლის, ტყიბულის, წალენჯიხის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებმა მოაწყვეს ონლაინ ჯგუფური შეხვედრები იურისტთან. ქობულეთის და ჩოხატაურის ქალთა მხარდაჭერის ცენტრების ბენეფიციარებისთვის კი გაიცა ინდივიდუალური იურიდიული კონსულტაციები.
შეხვედრებში მონაწილეობდა 38 ბენეფიციარი 25-დან 68 წლამდე. მათთვის მსგავს შეხვედრებს დიდი მნიშვნელობა და სარგებელი აქვს, რადგან ამ გზით აგვარებენ თავიანთ პრობლემებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგისა და ადვოკატირების ჯგუფმა იანვარ-თებერვალში ჩაატარა მერის წარმომადგენლების საჭიროებების სწრაფი მოკვლევა სამიზნე მუნიციპალიტეტებში (სამტრედია, ვანი, თერჯოლა, ბაღდათი, ტყიბული, წალენჯიხა, ზუგდიდი, სენაკი, ქობულეთი, ჩოხატაური).
სწრაფი მოკვლევა მიზნად ისახავდა საჭიროებების გამოვლენას საგანმანათლებლო ტრენინგების დასაგეგმად სამი მიმართულებით: სამოქალაქო მონაწილეობა, სოციალური მუშაობა, ელექტრონული მომსახურება.
მერიის პასუხისმგებელმა პირებმა მხარი დაუჭირეს ქალთა ფონდი „სოხუმის“ ინიციატივას. რესპონდენტებთან მუშაობისთვის გამოყენებულია ონლაინ/სატელეფონო გამოკითხვის მეთოდი. შემუშავდა მარტივი ონლაინ კითხვარი, რომელიც შეავსო 184-მა რესპონდენტმა.
სწრაფმა მოკვლევამ თვალსაჩინო გახადა ის საკითხები, რომლებზეც მერის წარმომადგენლები საჭიროებენ მეტ ინფორმაციას, კვალიფიკაციას და უნარ-ჩვევებს.
ქობულეთის, ზუგდიდის, ჩოხატაურის, წალენჯიხის და სენაკის ახალგაზრდულ ცენტრებში დასასრულს მიუახლოვდა ექვსთვიანი სატრენინგო კურსი. ბოლო შეხვედრაზე მონაწილეებმა განიხილეს თემები: „კონფლიქტის მოგვარების გზები. ეთიკისა და ესთეტიკის ნორმები. მშობლებისა და შვილების ურთიერთობა, პრობლემები და მიზეზები“. ახლა ისინი ემზადებიან შემაჯამებელი ღონისძიებისთვის, რომელიც მარტის დასაწყისში გაიმართება. ხუთი ჯგუფიდან შერჩეულია 20 პრეზენტატორი, რომლებიც პროექტის გავლენაზე ისაუბრებენ.
თებერვალში დასავლეთ საქართველოს ათ მუნიციპალიტეტში 10 ტრენინგი ჩატარდა. ტრენინგებში ჩართული იყო 196 მონაწილე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საინფორმაციო შეხვედრების და ადგილობრივ თვითმმართველობებთან თანამშრომლობის შედეგად გაიზარდა ძალადობის შემთხვევების იდენტიფიცირება და მომართვიანობა. შემდეგ იწყება რეაგირება, რაც ბენეფიციარებთან ნდობის მაჩვენებელს აუმჯობესებს.
საინფორმაციო შეხვედრები ჩატარდა ვანის, წალენჯიხის, ჩოხატაურის და თერჯოლის ქალთა მხარდაჭერის ცენტრებში. ქალთა პრობლემებზე რეაგირებისთვის აქტიურად გამოიყენება ფონდი „სოხუმის“ სერვისები - ფსიქოლოგის და იურისტის კონსულტაციები, საჭიროების შემთხვევაში კი - სრული სარეაბილიტაციო კურსი.
მობილიზატორების შეფასებით, მომართვიანობის გაზრდას ხელი შეუწყო საინფორმაციო შეხვედრებმა, რაშიც სხვადასხვა თემის წარმომადგენლები მონაწილეობდნენ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
https://www.facebook.com/watch/?v=702768274079179
თებერვალში ფორუმ-თეატრი ცოცხლადაც მუშაობდა და ონლაინაც. ტარდებოდა რეპეტიციები, ვიდეორგოლების ჩაწერა. ახალგაზრდა მსახიობებმა ორი წარმოდგენა გამართეს ქუთაისის ცენტრალურ პარკებში. მართალია, თეატრს არ ჰყავდა ბევრი მაყურებელი, მაგრამ, მიუხედავად ამისა, წარმოდგენების ჩატარება მაინც მნიშვნელოვანია ძალადობის პრევენციის თვალსაზრისით.
ქალთა ფონდი „სოხუმის“ ფეისბუქგვერდზე განთავსდა ფორუმ-თეატრის მსახიობების მონოლოგები, რომელთაც ასობით ადამიანი გაეცნო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ეს ყველაფერი ჩვენი შეხვედრების შემდეგ ხდება. თვეში ერთი შეხვედრა/ტრენინგი ტარდება და ტრენინგიდან ტრენინგამდე ბავშვები სხვადასხვა ფორმით გამოხატავენ სათქმელს - იმას, რაც ისწავლეს, რაც მოსწონთ და აღელვებთ.
სამტრედიის ჯგუფის მომზადებული ვიდეორგოლი, ზუგდიდისა და ქობულეთის ჯგუფების ჩატარებული საინფორმაციო შეხვედრები და კიდევ უამრავი რამ: დიაგრამები, წერილები მშობლებს, კომიქსები, ვიდეორგოლები, ნახატები, პრეზენტაციები...
ამ ღონისძიებებს ინიცირებულ ღონისძიებებს ვეძახით, რადგან ისინი ჩვენი ტრენინგების გამოძახილია. თებერვალში ათ ახალგაზრდულ ცენტრში ჩატარებული შეხვედრების თემები იყო: კონფლიქტი, ეთიკა, ესთეტიკა, მშობლებისა და შვილების ურთიერთობები. ცენტრების ლიდერების მიერ ჩატარებული აქტივობებიც ამ საკითხებს მიეძღვნა.
Haven House 1964 წელს გახსნილი პირველი ქალთა თავშესაფარია კალიფორნიაში, რომელიც ალბათ ლამაზ მწვანე ეზოში იდგა. ისეთივე, როგორც ჩვენი სარეაბილიტაციო/კრიზისული ცენტრია ქუთაისის ერთ-ერთ კოლორიტულ უბანში. აქ ყველა კუთხეში სიმყუდროვეა, ისეთი, რომ შეხვალ და დამშვიდდები.
აქ შეუძლია მოხვდეს ქალი, რომელიც რთულ პირობებში იმყოფება, მაგრამ არ აქვს ძალადობის მსხვერპლის სტატუსი და ამის გამო ვერ მიიღებენ თავშესაფარში. სანამ სათანადო პროცედურებს გაივლის, ქალს შეუძლია ამ არაჩვეულებრივ გარემოში დაჰყოს გარკვეული ხანი.
სოციალური მუშაკი, ფსიქოლოგი და იურისტი ძალადობაგამოვლილ ქალს სამომავლო გზის გარკვევაში ეხმარებიან: უმსუბუქებენ მდგომარეობას. თუ საჭიროა, ამზადებენ საჭირო საბუთებს.
ბიზნესის დაგეგმვა, მარკეტინგის არსი და მისი მნიშვნელობა, მარკეტინგული სტრატეგია, ბიზნეს ოპერაციები, მენეჯმენტი და იურიდიული საკითხები, ფინანსური მენეჯმენტი - ამ საკითხებზე გაიმართა ორდღიანი ტრენინგი დღის სარეაბილიტაციო ცენტრის ბენეფიციარებისთვის.
ქალთა ფონდმა „სოხუმმა“ მათ მისცა შესაძლებლობა, დაეუფლონ ახალ პროფესიებს, შეიძინონ ახალი ცოდნა და უნარები, ტრენინგის შემდეგ კი ბიზნესპროექტების დაწერასაც შეძლებენ.
მომდევნო ეტაპი ბიზნესიდეების კონკურსია. დღის სარეაბილიტაციო ცენტრის ბენეფიციარები ჩაერთვებიან კონკურსში. საუკეთესო იდეების ავტორები მცირე გრანტებს მიიღებენ, რაც მათ დასაქმებას და კეთილდღეობას შეუწყობს ხელს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)