22 იანვარს საინფორმაციო შეხვედრა ჩატარდა სენაკის სამხედრო დასახლებაში, სადაც დევნილებთან ერთად ადგილობრივებიც ცხოვრობენ. შეკრებილები იცნობენ ფონდ „სოხუმს“, მაგრამ მათ ინტერესი გამოიწვია ინფორმაციამ სენაკის გენდერული საკონსულტაციო საბჭოს აქტიური მუშაობის შესახებ - განსაკუთრებით იმ ფაქტმა, რომ მუნიციპალიტეტის 2016 წლის ბიუჯეტში გათვალისწინებულია საბჭოს მიერ წარდგენილი გენდერული რეკომენდაციები.

დევნილებმა ისაუბრეს თავიანთი პრობლემების (დაუკანონებელი ფართები, გაზიფიცირება, დატბორილი სარდაფები) შესახებ.

გადაწყდა, რომ ადვოკატირებაში ჩაერთოს ფონდი „სოხუმის“ იურისტი, რათა დაჩქარდეს პრობლემების მოგვარება.

ქალთა ჯგუფებთან კონფლიქტოლოგიის ვორკშოპები ჩატარდა ქუთაისში, ხურჩასა და სოფელ ივანდიდში (ხონის მუნიციპალიტეტი). მონაწილეებმა მოისმინეს ინფორმაციები, რას ნიშნავს კონფლიქტის ანალიზი და რა მეთოდები არსებობს.

მონაწილეები თვლიან, რომ კონფლიქტის გაანალიზება დაპირისპირებულ მხარეებს ეხმარება სწორი გადაწყვეტილების მიღებაში.

განსაკუთრებული დაინტერესება გამოიწვია ამ საკითხმა სოფელ ივანდიდში:

„ჩვენს გვერდით, წლების განმავლობაში გრძელდება ძალადობის ფაქტები ოჯახებში,  მეზობლებს ჩარევის უფლებას არ გვაძლევენ. კონფლიქტის შემდეგ ქალი ურიგდება მეუღლეს, იმ მოტივით, რომ ოჯახს ვერ დაანგრევს.“

მათი აზრით, მსგავსი ტიპის ინფორმაციები რაც შეიძლება მეტმა ქალმა უნდა მიიღოს, რადგან კონფლიქტის მართვა დაეხმარება მათ, თავიდან აიცილონ ძალადობა.

ოზურგეთის გენდერის მედიაცენტრში გაიმართა შეხვედრა ოზურგეთელ ჟურნალისტებთან.

ფონდი „სოხუმის“ წარმომადგენლის მოწოდებული ინფორმაციით, ოზურგეთის თვითმმართველობამ მხარი დაუჭირა გენდერული საკონსულტაციო საბჭოს მიერ წარდგენილ გენდერული თანასწორობის გეგმას და 2016 წელს გენდერული საკითხებისთვის: 500 ათას ლარზე მეტი გამოიყო ქალაქისა და მუნიციპალიტეტის ბიუჯეტებში.

შეხვედრის მონაწილეებისთვის ეს  საინტერესო ინფორმაცია მომავალი მასალების თემა გახდება. შეხვედრაზე გაჩნდა მედიაპროექტის იდეაც, რომელიც მოიწონა გენდერულმა საკონსულტაციო საბჭომ.

ოზურგეთის ისტორიულ მუზეუმში ჩატარდა საინფორმაციო შეხვედრა, რომლის მონაწილეები გაეცნენ ფონდი „სოხუმის“ საქმიანობას ოზურგეთში, რომელსაც ახორციელებენ გენდერული საკონსულტაციო საბჭო და ამომრჩეველ ქალთა კლუბი. გაიგეს  გენდერული პოლიტიკის შესახებ, რომელიც დამტკიცებულია ქალაქისა და მუნიციპალიტეტის ახალ ბიუჯეტებში.

პირველი გამოხმაურებები მოჰყვა „C“ ჰეპატიტით და ონკოდაავადებულთა პროგრამებს. დაინტერესებული პირები დეტალურ ინფორმაციას მიიღებენ სოციალურ სამსახურში.

დაიგეგმა იურისტის ვიზიტიც, რომელიც შენობის რეაბილიტაციასთან დაკავშირებული საკითხის ადვოკატირებაში დაეხმარება მუზეუმის თანამშრომლებს.

გენდერული საკონსულტაციო საბჭოს მორიგი სამუშაო შეხვედრა ეხებოდა ადგილობრივი თვითმმართველობის ჩართულობას ოჯახში ძალადობის პრევენციის ღონისძიებებში.

საბჭოს წევრებმა დააფიქსირეს მოსაზრება რომ ადგილობრივი თვითმმართველი ორგანოები მონაწილეობას უნდა ღებულობდნენ ოჯახში ძალადობის პრევენციაში, რაც შეიძლება მოიცავდეს ცნობიერების ამაღლებას, კონფლიქტის გამომწვევი მიზეზების შესწავლას და ანალიზს, მედიაციას და ა.შ.

აგრეთვე ოჯახში ძალადობის შედეგად დაზარალებული პირების დახმარებისა და რეაბილიტაციის სფეროში, რაც თავის მხრივ შეიძლება მოიცავდეს – ადგილებზე კრიზისული ცენტრების მოწყობას, ადგილობრივ სოციალურ პროგრამებში მსხვერპლთა საჭიროებების გათვალისწინებას, დასაქმებაში ხელშეწყობას.

აღინიშნა, რომ პრობლემის მოგვარების ერთ-ერთი მთავარი ინსტრუმენტი ადგილობრივ დონეზე ზუსტად თვითმმართველობა უნდა იყოს.

ქუთაისის, ხურჩის, სენაკის ქალთა მხარდაჭერის ცენტრებში გაიმართა ჯგუფური ფსიქოლოგიური და ინდივიდუალური კონსულტაციები. ესწრებოდა 36 ქალი 25-დან 65 წლამდე.

შეხვედრების ძირითადი თემა იყო ნეგატიური ემოციების და სტრესოგენური ფაქტორების დაძლევა და მათზე კონტროლი, რაც ოჯახში ძალადობის ერთ-ერთი პრევენციული ზომაა - რათა ქალებმა შეძლონ პირობების შექმნა თავიანთი ნეგატიური ემოციების კონტროლისთვის, ამასთანავე განუვითარდეთ უნარი, გავლენა მოახდინონ და შეცვალონ ნეგატიური ემოციები სუნთქვითი ვარჯიშებისა და მედიტაციის მეშვეობით.

ქუთაისის კლინიკური საავადმყოფოს კოლექტიურ ცენტრში გაიმართა შეხვედრა დევნილებთან. ისინი გარემონტებულ შენობაში ცხოვრობენ, მაგრამ საცხოვრებელი ფართები  ჯერჯერობით მათ საკუთრებაში არ არის და, ცოტა არ იყოს,  შიშის გრძნობა ეუფლებათ.

ფონდი „სოხუმის“  წარმომადგენლები (პროექტის ასისტენტი და იურისტი) დაეხმარნენ დევნილებს წერილის მომზადებაში ლტოლვილთა და განსახლების მინისტრის სახელზე. ხელმოწერების შეგროვების შემდეგ წერილი გაიგზავნება  უწყებაში და ასე დაიწყება საკითხის ადვოკატირება.

30 დეკემბერს ფონდი „სოხუმის“ ოფისში ორგანიზაციის ხელმძღვანელმა სამახსოვრო პრიზები გადასცა ჟურნალისტებს, რომელთაც გაიმარჯვეს ფონდის მიერ რეგიონალური მედიის წარმომადგენლებისთვის გამოცხადებულ კონკურსში „ჟურნალისტები - არაძალადობრივი ცნობიერების ხელშეწყობისათვის“. 

რეგიონალური მედიის ჟურნალისტების სოციალური პასუხისმგებლობა მაღალ შეფასებას იმსახურებს, განსაკუთრებით ისეთი სენსიტიური თემის გაშუქებაში, როგორიც არის გენდერული ძალადობა.

ჟურნალისტებმა მადლიერება გამოხატეს იმის გამო, რომ  მათ მოაზრებენ  როგორც საიმედო  პარტნიორებს და ხდება მათი შრომის წახალისება.