იანვარში ჩატარდა 6 საინფორმაციო შეხვედრა დასავლეთ საქართველოს 6 ქალაქის -ქუთაისი, წყალტუბო, ხონი, სენაკი, ფოთი და ზუგდიდი - ადგილობრივი თვითმმართველობის წარმომადგენლებთან.  მათ მიეწოდათ ინფორმაცია ქალთა მხარდაჭერის ცენტრების მუშაობის შესახებ, მომავალ გეგმებზე.

ქალთა მხარდაჭერის ცენტრის მობილიზატორები და აქტივისტი ქალბატონები დაესწრნენ საკრებულოს სხდომებს, გაეცნენ სიახლეებს, ადგილობრივი თვითმმართველობის  ინიციატივებს.

სენაკის ქალთა მხარდაჭერის ცენტრის წარმომადგენლები მიწვეულნი იყვნენ გამგებლის მიერ ინიცირებულ შეხვედრაზე სამოქალაქო მრჩეველთა საბჭოს წარმომადგენლებთან, აგრეთვე სენაკის მუნიციპალიტეტის გამგეობის სააქტო დარბაზში გამართულ ეკოლოგიური პროექტის პრეზენტაციაზე.

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

ქუთაისის ბიუჯეტი გენდერული გახდა - ეს იყო მთავარი მესიჯი, რომელიც ფონდ სოხუმში შეკრებილმა ჟურნალისტებმა მიიღეს. მათი უმრავლესობა აქტიურად თანამშრომლობს ჩვენს ორგანიზაციასთან, განსაკუთრებულ ყურადღებას აქცევს გენდერული საკითხების გაშუქებას და ცდილობს, გავლენა მოახდინოს საზოგადოებაში არსებულ სტერეოტიპებზე. თუმცა შეხვედრაზე იყვნენ ახალბედა ჟურნალისტებიც, რომლებისთვისაც საინტერესო აღმოჩნდა ფონდის საქმიანობის გაცნობა და თანამშრომლობის სურვილიც გაუჩნდათ.

შეხვედრის მონაწილეებმა შეაჯამეს თავიანთი გენდერული გამოცდილება და კიდევ უფრო აქტიური მუშაობის გეგმები დასახეს.

იანვარში ქუთაისის, წყალტუბოს, ხონის, ფოთის, სენაკის, ხურჩის (ზუგდიდის მუნიციპალიტეტი) ქალთა მხარდაჭერის ცენტრებში ჩატარდა იურიდიული საინფორმაციო-საკონსულტაციო შეხვედრები. შეკრებილებმა მიიღეს კონსულტაციები სხვადასხვა საკითხზე: განქორწინება, ალიმენტის დანიშვნა, კრედიტთან დაკავშირებული პრობლემები, ოჯახში ძალადობის აღკვეთის მექანიზმები და პრევენცია, უძრავი ქონების შეძენა და რეგისტრაცია, სოციალური საკითხების კუთხით კანონდებლობაში შესული ცვლილებები.

ფონდი „სოხუმის“ თაოსნობით დაიბეჭდა კიდევ ერთი მეთოდური სახელმძღვანელო-გზამკვლევი, რომელიც ადგილობრივი ბიუჯეტის მონიტორინგისა და გენდერული ანალიზის კუთხით დახმარებას გაუწევს ყველა დაინტერესებულ მხარეს.

„გზამკვლევი“, პირველ რიგში, კარგ სამსახურს გაუწევს ქუთაისის, სენაკის, ოზურგეთის და ბათუმის გენდერულ საკონსულტაციო საბჭოებს, რომლებიც, ყოველწლიურად, საკუთარი ძალებით ახორციელებენ ადგილობრივი გენდერული საჭიროებებისა და ბიუჯეტის ანალიზს, რათა მათ საფუძველზე მოხდეს რეკომენდაციების მომზადება თვითმმართველობების საბიუჯეტო პროგრამებში შესაბამისი პროგრამების დასანერგად.

გადმოწერა

საახალწლო დღეების შემდეგ ქალთა მხარდაჭერის ცენტრების მობილიზატორებმა ჩაატარეს 33 სამობილიზაციო შეხვედრა ქალაქებსა და სოფლებში - დევნილებთან და ადგილობრივ მოსახლეობასათან.

შეხვედრებზე განხილული იყო ძალადობის წინააღმდეგ მიმართულ კანონში მიმდინარე ცვლილება, რომლის მიხედვითაც გათვალისწინებულია ადგილობრივი თვითმმართველობის როლის გაზრდა ოჯახში ძალადობის პრევენციის კუთხით.

კონფლიქტოლოგიის ვორკშოპებზე ახალგაზრდებმა მოისმინეს ინფორმაციები. როგორ ხდება კონფლიქტის ანალიზი, რისთვის არის საჭირო.

სენაკში მონაწილეებს „ხახვის“ მეთოდი დაამახსოვრდათ. განსაკუთრებით საინტერესო დისკუსიები გაიმართა ფოთის ჯგუფში. იხსენებდნენ რეალურ ისტორიებს, რომლის საფუძველზეც ხდებოდა ანალიზი.

- კონფლიქტის ანალიზი გეხმარება იმაში, რომ საკუთარი შეცდომები დაინახო. ეს ძალიან მნიშვნელოვანია, რადგან ყოველთვის, როცა დაპირისპირებაა, ორივე მხარეს მიაჩნია, რომ მხოლოდ ის არის მართალი.

წყალტუბოში ახალგაზრდებმა ჩათვალეს, რომ „ხახვის“ მეთოდით ანალიზი მათთვის უფრო გასაგები იყო, ამიტომ კარგია, ამ ინფორმაციებს ადრეული ასაკიდან გაეცნონ მოზარდები.

მონაწილეთა მოსაზრებით, საკუთარი პოზიციების, ინტერესებისა და საჭიროებების გაანალიზების შემდეგ უფრო ადვილია ოჯახური კონფლიქტების მართვა. ნაკლები კონფლიქტები კი იმას ნიშნავს, რომ ნაკლები იქნება  ძალადობის ფაქტები.

იანვარში ფორუმ-თეატრმა ორი წარმოდგენა გამართა - ქუთაისში, სიყვარულის პარკში და წყალტუბოს მე-3 სკოლაში.

ფორუმ-თეატრის გამოსვლა ეფექტურია ღია ცის ქვეშ, გამვლელები ჩერდებიან და ინტერესით უყურებენ, მაგრამ არანაკლებ მნიშვნელოვანია წარმოდგენა და დისკუსია სკოლის მოსწავლეებთან.

წყალტუბოში ძალიან მოეწონათ ფორუმ-თეატრი და გამოითქვა მსგავსი თეატრის ჩამოყალიბების სურვილი.  

ფსიქოლოგის შეხვედრებს წყალტუბოში, ფოთში და ხონის მუნიციპალიტეტის სოფელ ივანდიდში 30 ადამიანი დაესწრო.

შეხვედრების ძირითადი თემა იყო სუიციდის რისკი ძალადობრივ გარემოში, ფსიქოლოგიური ტრავმების კვალი და სუიციდის პრევენცია. მიზანი კი - ქალთა ინფორმირებულობა ძალადობის ფატალური შედეგების თავიდან აცილებისთვის.

ფრაზები „დავიღალე, ცხოვრება აღარ მინდა, ახლა თავს მოვიკლავ და მერე შენ ნახე, რა მოგივა!“ – პასიური აზრებია, რომლებიც, შველისკენ მიმართული, გაუცნობიერებელი სიგნალებია და ამიტომ გარშემომყოფებმა უყურადღებოდ არ უნდა დატოვონ.

შეხვედრები ინტერაქტიულად წარიმართა და თემა კონსულტაციის ყველა მონაწილისთვის საინტერესო და მნიშვნელოვანი აღმოჩნდა. განსაკუთრებით დიდი რეზონანსი გამოიწვია სოფელ ივანდიდში, რადგან სოფელს ახლო წარსულში ჰქონდა სამწუხარო გამოცდილება თანასოფლელის სუიციდის გამო.

სენაკის გენდერული საკონსულტაციო საბჭოს 2016 წლის პირველი სხდომა 22 იანვარს გაიმართა. საბჭოს წევრებმა იმსჯელეს 2016-2017 წლების ღონისძიებების გეგმაზე ქალთა მიმართ ძალადობის და ოჯახში ძალადობის ბრძოლის კუთხით (კერძოდ, იმ მუხლებზე, რომლებიც უშუალოდ ადგილობრივ თვითმმართველობას ეხება) და წარმოადგინეს გარკვეული ცვლილებები და დამატებები.

საბჭოს სხდომაზე აქტიურად განიხილეს ახალი საპროექტო იდეები, დიდი აქცენტით სენაკის მუნიციპალიტეტის სოფლებზე. თებერვალში დაგეგმილია ტრენინგების ჩატარება გენდერისა და გენდერული ძალადობის თემაზე სოფლის რწმუნებულებისა და დეპუტატებისთვის.