ფონდი „სოხუმის“ ქალთა მხარდაჭერის ცენტრების მობილიზატორებმა ჩაატარეს 33 სამობილიზაციო შეხვედრა კოლექტიურ ცენტრებსა და სოფლებში.  შეხვედრების თემა იყო ადვოკატირება - ადვოკატირების გზები და საშუალებები.

შეხვედრებზე ასევე მონაწილეებმა მიიღეს ინფორმაცია კიბოს წინააღმდეგ ბრძოლის საერთაშორისო დღესთან დაკავშირებით (აღინიშნება 4 თებერვალს) და უფასო გამოკვლევების შესახებ სკრინინგის პროგრამის ფარგლებში - რა ტიპის გამოკვლევის საშუალება აქვს საქართველოს თითოეულ მოქალაქეს და რატომ არის მნიშვნელოვანი ამ პროგრამების გამოყენება.

სენაკის მუნიციპალიტეტის გამგეობისა და  ფონდი „სოხუმის“ ინიციატივით სენაკში გაიმართა ტრენინგები თემაზე: „გენდერი და გენდერული ძალადობა“.

17 თებერვალს გამგეობის დარბაზში გამართულ ტრენინგს ესწრებოდნენ ახალგაზრდები სენაკის კერძო და საჯარო სკოლებიდან. მონაწილეებისთვის თემა საინტერესო აღმოჩნდა. გამოყენებული იყო თემატური სავარჯიშოები, როლური თამაშები.

ტრენინგი ხელს შეუწყობს მოსწავლეებში გენდერული თანასწორობის სწორ აღქმას და  არაძალადობრივი ცნობიერების ჩამოყალიბებას.

18 თებერვალს თემის განხილვა საკრებულოს სხდომათა დარბაზში გაგრძელდა. აუდიტორიას წარმოადგენდნენ სენაკის მუნიციპალიტეტის ადმინისტრაციული ერთეულების ხელმძღვანელები და საკრებულოს დეპუტატები.

მონაწილეებმა განსაკუთრებული აქცენტი გააკეთეს ძალადობის პრევენციულ მექანიზმებზე, გაიხსენეს რეალური ისტორიები, როგორ მოაგვარეს კონკრეტული ოჯახური კონფლიქტები. ბოლოს შემუშავდა რეკომენდაციები სოფლებში ძალადობის პრევენციის და მსხვერპლის დახმარების მიზნით.

17 თებერვალს ქუთაისის გენდერული საკონსულტაციო საბჭოს სხდომა გაიმართა. სხდომას ესწრებოდნენ ამომრჩეველ ქალთა კლუბის წევრები. მათ იმ პრობლემებზე გააკეთეს აქცენტი, რომლებიც ქალთა კლუბზე არაერთხელ გაჟღერდა. პრობლემათა ადვოკატირების მიზნით გენდერულმა საბჭომ სხდომაზე მოიწვია მერიის ინფრასტრუქტურის, ტრანსპორტისა და დასუფთავების ხელძღვანელი მალხაზ ბასილაძე. მან იმ პროგრამებზე ისაუბრა, რომელთაც ქუთაისის ადგილობრივი ბიუჯეტი ითვალისწინებს. დაისახა ადვოკატირების სამოქმედო გეგმა, ამ პროცესში საბჭოს წევრებიც ჩაერთვებიან .

დღის წესრიგით, საკრებულოს დეპუტატებმა შეაფასეს ფონდი „სოხუმის“ მიერ  გამართული ქსელური შეხვედრის შედეგები.  მათი თქმით, ამ შეხვედრაზე მიიღეს ის ინფორმაცია, რაც ძალადობის წინააღმდეგ ადგილობრივი ხელისუფლების პასუხისმგებლობას და აქტიურ მუშაობას გულისხმობს.

17 თებერვალს თბილისში გაიმართა ფონდი „სოხუმის“ კვლევის „ქალთა ხმების გაძლიერება კონფლიქტის ტრანსფორმაციის პროცესში“ პრეზენტაცია, რომელსაც ესწრებოდნენ საზოგადოების სხვადასხვა ჯგუფის, მასმედიის, სახელისუფლებო სტრუქტურების, დიპლომატიური კორპუსის  წარმომადგენლები.

ფორუმზე შეკრებილებმა მიიღეს დეტალური ინფორმაცია კვლევის შედეგად დაბეჭდილი ბროშურის „ქალთა მონაწილეობა ჟენევის მოლაპარაკებებში: პრობლემები, წარმატებები, პერსპექტივები“ შესახებ და ნახეს ამავე თემაზე გადაღებული დოკუმენტური  ფილმი.

შეხვედრაზე მოხდა იმ საკითხების წამოწევა, რომლებიც აწუხებთ კონფლიქტის ზონაში მცხოვრებთ და რომელთა  გარშემო კონსტრუქციულ მოლაპარაკებებსა და შეთანხმებებში ძალიან მნიშვნელოვანია ქალების მონაწილეობა, საკითხების მოგვარებაში მათი ხედვის გათვალისწინება.

გაიმართა დისკუსია კონფლიქტების სამშვიდობო  მოგვარების პროცესში მეტი ქალის ჩართვის საკითხებზე. დაფიქსირდა უფრო მოქნილი ფორმატის არსებობის აუცილებლობაც, რომელში ჩართვის საშუალებაც ექნებათ საზოგადოებისა და არასამთავრობო სექტორის წარმომადგენლებს - მათ, ვისაც პრაქტიკული შეხება აქვს  პრობლემასთან.

15 თებერვალს ჩატარდა ქუთაისის ამომრჩეველ ქალთა კლუბის სხდომა. სხდომას ესწრებოდნენ კლუბის აქტივისტი ქალბატონები და ახალი წევრები. მოწვეული იყო  მერიის სოციალური სამსახურის უფროსის მოადგილე მამუკა სანიკიძე. მან შეკრებილებს გააცნო  2016 წლის  ბიუჯეტის მიხედვით გაწერილი სოციალური პროგრამები და განუმარტა სარგებლობის პირობები. ითქვა, რომ წელს არის ახალი პროგრამა, რომელიც სმენადაქვეითებულთა - კოხლეალური იმპლანტით მოსარგებლე ბენეფიციართა დახმარებას გულისხმობს ელემენტებით და სადენებით. ასევე ახალია პროგრამა, რომელიც საბინაო ფონდის - დროებითი საცხოვრისის შექმნას გულისხმობს.

კლუბის წევრებმა აღნიშნეს, რომ ამ ინფორმაციებს გაავრცელებენ და ბევრი ადამიანი გაიგებს  საჭირო პროგრამების შესახებ.

რამდენიმე ქალბატონმა  პირადი - სხვადასხვა სახის პრობლემების შესახებ მოახსენა სტუმარს, მან ჩაინიშნა და გარკვევას და დახმარებას შეპირდა.

ადგილობრივი პრობლემის ადვოკატირების მიზნით კლუბის 7 წევრი მიწვეულია გენდერული საკონსულტაციო საბჭოს სხდომაზე, სადაც საქალაქო ტრანსპორტის საკითხს განიხილავენ.

15 თებერვალს ჩატარდა შეხვედრა ქუთაისის ერთ-ერთ კოლექტიურ ცენტრში, სადაც შეკრებილებს მიეწოდა ინფორმაცია დევნილთა კანონის შესახებ. შეხვედრაზე  გაზიარებულ იქნა ყველა ის პრობლემა, რაც დევნილებს აქვთ. ერთ-ერთი ქალბატონის პრობლემის მოსაგვარებლად კი, რომელიც უკიდურესად ავადმყოფია და დამოუკიდელად გადაადგილება არ შეუძლია, დაიწერა განცხადება იძულებით გაადგილებულ და განსახლების სამინისტროში, რასაც თან დაერთო სამედიცინო ცნობა.

ტელეჟურნალმა „7 დღე“ თავისი ერთ-ერთი ბლოკი გენდერული საკონსულტაციო საბჭოების ქსელის მეორე შეხვედრას დაუთმო, რომელიც ფონდი „სოხუმის“ ორგანიზებით ამჯერად ქუთაისში გაიმართა. ქსელი გაფართოებული ფორმატით შეიკრიბა და მას საკრებულოების და მერიების/გამგეობების წარმომადგენლებიც ესწრებოდნენ.

სიუჟეტში შეხვედრის ორგანიზატორები და მონაწილეები მოგვითხრობენ ქსელური მუშაობის შედეგებზე. ამ ეტაპზე მოხდა რეკომენდაციების შემუშავება ქალთა და ოჯახში ძალადობისაგან დაცვის სამოქმედო გეგმისთვის, რომელიც ამ მიმართულებით თვითმმართველობის მონაწილეობის სფეროებს განსაზღვრავს და შეიცავს კონკრეტულ საკითხებს, რაც უნდა გაკეთდეს ძალადობის პრევენციის, დაზარალებულთა დახმარების კუთხით.

რესპონდენტების შეფასებით, შეხვედრა ძალიან პროდუქტიული და დროული იყო, რაც    საკითხის მოგვარებაში  თვითმმართველობის მეტ ჩართვას განაპირობებს.

- სასიხარულოა, როცა მოგაგებენ სითბოსა და სიყვარულს, მაგრამ ორმაგად სასიხარულოა, როცა თავადაც შეგიძლია გასცე! - ამ სულისკვეთებით ჩატარდა აქცია ბათუმში, რომელიც ფონდი „სოხუმის“ ახალგაზრდა აქტივისტებმა საქველმოქმედო ფონდ „იალქანის“ აღსაზრდელებიც ჩართეს. მათ პატარებს სიმბოლური საჩუქრები მიართვეს, შემდეგ კი მათი მონაწილეობით ქალაქში ყვავილების თაიგულები, გულის სიმბოლოები, ბუშტები დაარიგეს.

„ბედნიერები ვართ, რომ მივულოცეთ  ბათუმელებს სიყვარულის დღე“, „გვინდა, ყველა დღეს უყვარდეთ ადამიანებს ერთმანეთი“, - ასე გამოეხმაურნენ პატარები აქციას.

 ღონისძიებისადმი მიძღვნილი ტელესიუჟეტები მოხვდა ტელეკომპანიების - „აჭარასა“ და „ტვ 25“-ის ეთერში.

ქალთა მხარდაჭერის ცენტრების ინიცირებით ქუთაისში, ხონში, წყალტუბოში, სენაკში, ფოთსა და სოფელ კოკში (ზუგდიდის მუნიციპალიტეტი) ჩატარდა აქციები - სიყვარული ძალადობის გარეშე!

აქციებმა გააერთიანა ქალები და ახალგაზრდები ერთი მიზნის გარშემო - რომ ქალებს სჭირდება სიყვარული ძალადობის გარეშე!

ამ ღონისძიებებით ფონდი „სოხუმის“ ქალთა მხარდაჭერის ცენტრები შეუერთდნენ საერთაშორისო კამპანიას - ერთი მილიარდი ამბოხებული ქალთა მიმართ ძალადობის წინააღმდეგ!