ბაღდათში გაიმართა მუნიციპალური უწყებათაშორისი კომისიის მორიგი შეხვედრა. კომისიის წევრებმა დაგეგმეს აქტივობები, რომლებიც ჩატარდება სამოქალაქო ინიციატივის ფარგლებში. ეს აქტივობები გაზრდის კომისიის ცნობადობას, რაც აუცილებელია მისი მიზნობრივი მუშაობისთვის - ქეისების განხილვის და მათზე დროული რეაგირების მხრივ.
დაგეგმილი ღონისძიებები მოიაზრებს მუნიციპალიტეტის მერის წარმომადგენლების, სკოლამდელი სააღმზრდელო დაწესებულების მენეჯერების და ახალგაზრდების ჩართულობის გაზრდას. ყოველივე ეს მნიშვნელოვანია კომისიის ეფექტიანი ფუნქციონირებისთვის, ოჯახში ძალადობის ფაქტების დროული გამოვლენისა და პრევენციისთვის.
პროექტი ხორციელდება გენდერული თანასწორობის ფონდის მხარდაჭერით (კანადა)
მონიტორინგის ჯგუფმა განაგრძო საინფორმაციო შეხვედრების ციკლი მოწყვლად ჯგუფებთან. მორიგი შეხვედრა ჩატარდა ვანის მუნიციპალიტეტში. შეხვედრის მონაწილეებს მიეწოდათ ინფორმაცია იმ მექანიზმებზე, რომლებიც არსებობს ქვეყანაში ძალადობის მსხვერპლთა დახმარებისა და გაძლიერების კუთხით. მათთვის მეტად მნიშვნელოვანი აღმოჩნდა ინფორმაცია ადგილობრივი თვითმმართველობის პროგრამების, განსაკუთრებით კი ოჯახების გაძლიერების პროგრამის შესახებ, რომელიც ბავშვთა უფლებების დაცვისა და დახმარების განყოფილებას აქვს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩოხატაურის მერიის უწყებათაშორისი კომისიის სამუშაო შეხვედრაზე მოხდა სამოქალაქო ინიციატივებისთვის იდეების დეტალების შეჯერება და მათზე პასუხისმგებელი პირების შერჩევა.
გადაწყდა, რომ ჩატარდება „პოზიტიური მშობლობის ტრენინგი“ და ჩოხატაურის მუნიციპალიტეტის ქალთა საჭიროებების კვლევა. ინიციატივების განხორციელებაში ჩაერთვებიან მერიის სტრუქტურები, საგანმანათლებლო სფეროს წარმომადგენლები, აქტიური მოქალაქეები.
პროექტი ხორციელდება გენდერული თანასწორობის ფონდის მხარდაჭერით (კანადა)
„ქსელის შექმნა, ქსელური მუშაობის პრინციპების განსაზღვრა და სამომავლო პერსპექტივები“ - ამ თემაზე ონლაინ გაიმართა ქსელური შეხვედრა. მასში მონაწილეობდნენ აქტიური ლიდერი ქალები და გოგონები ქუთაისის, ხონის და წყალტუბოს მუნიციპალიტეტების დევნილთა თემებიდან.
პროექტის ასისტენტებმა შესრულებული აქტივობები შეაფასეს და გამოწვევებზე ისაუბრეს. გამოსვლებში გაჟღერდა ინფორმაციები ქალების მხარდაჭერის და ამხანაგობების გაძლიერების აუცილებლობაზე.
მომდევნო პანელში შეხვედრის მონაწილე ქალებმა ტრენინგებზე მიღებული უნარების მნიშვნელობაზე გააკეთეს აქცენტი. მიაჩნიათ, რომ პროექტში ჩართულობა მათთვის ახალი შესაძლებლობაა თავიანთ თემში იდენტიფიცირებული პრობლემების ადვოკატირებისთვის.
მუშაობა მიმდინარეობს ცენტრ „აფხაზეთთან“ პარტნიორობით, პროექტის „კონფლიქტების ტრანსფორმაციის მხარდაჭერა სამხრეთ კავკასიაში და მოლდოვაში“ ფარგლებში.
150-ზე მეტი ბენეფიციარის ინფორმირება მსხვერპლთა დახმარების პრევენციულ მექანიზმებზე და დახმარების სერვისებზე, ათი ახალი კრიზისული ოჯახის იდენტიფიცირება და მათთან მუშაობის ინდივიდუალური გეგმების მომზადება, ორი რეაბილიტირებული ოჯახი, ფსიქოლოგთან მუშაობით გაუმჯობესებული ხუთი ქალის ისტორია, სხვადასხვა თემში გამოვლენილი ახალი გენდერული საჭიროებები - ეს მონაცემები გაჩნდა ქალთა მხარდაჭერის ცენტრების თებერვლის თვის ანგარიშებში.
ცენტრების მობილიზატორები აქტიურად თანამშრომლობენ კრიზისულ ოჯახებთან, რათა მათ ყველა საჭირო სერვისი მიიღონ და მდგომარეობა გაიუმჯობესონ. უკვე ჩაინიშნა ადვოკატირების პროცესი სხვადასხვა თემში იდენტიფიცირებული პრობლემების საპასუხოდ, რაც თემის აქტივისტებთან ერთად გაგრძელდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანის ქალთა მხარდაჭერის ცენტრის შეხვედრებზე იკრიბებიან ქალები, რომლებსაც არაერთი გამოწვევა აქვთ და პრობლემების მოგვარებაზეც ერთად მუშაობენ. ერთ-ერთ შეხვედრაზე ქალებმა გამოხატეს ჭრა-კერვის შესწავლის სურვილი.
ვანში, ისევე როგორც ზოგიერთ სხვა მუნიციპალიტეტში, ქალთა ფონდმა „სოხუმმა“ ჭრა-კერვის კურსები გახსნა. ამ საქმეს ასწავლის მაკა დადუნაშვილი, რომელიც ქალთა მხარდაჭერის ცენტრის ერთ-ერთი აქტივისტია. ფონდმა „სოხუმმა“ შეიძინა საკერავი მანქანები, ნაჭრები, ძაფები და ყველაფერი, რაც საჭიროა ნორმალური სწავლებისთვის. აწი ჯერი ქალების მონდომებაზეა...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინელები, რომელთაც ჩვენთან კავშირი აქვთ, სხვადასხვა სახის დახმარებას იღებენ. მათი საერთო რაოდენობა ახლა 398-ია (წლის დასაწყისიდან 20 ადამიანი დაემატა).
თებერვალში გაიცა 55 სასურსათო ვაუჩერი, რომელიც მიიღო 37-მა ოჯახმა. ორ ოჯახს ჩვენი ორგანიზაცია დაეხმარა კომუნალური ხარჯების, 6 ოჯახს კი - ბინის ქირის გადახდაში. როგორც წინა თვეებში, ახლაც იყო სატელეფონო ხარჯების, მედიკამენტების საფასურის თუ სამედიცინო პროცედურების თანხის ანაზღაურება. ყოველივე ამის გამო უკრაინიდან ჩამოსული ადამიანები მადლიერებას გამოხატავენ ქალთა ფონდი „სოხუმის“ მისამართით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდმა „სოხუმმა“ გამოსცა „გენდერულ ძალადობაზე რეაგირების პრაქტიკული გზამკვლევი სამედიცინო დაწესებულების წარმომადგენლებისთვის“. გზამკვლევი მიზნად ისახავს სამედიცინო დაწესებულების წარმომადგენლებისთვის, მათ შორის ექიმებისა და ექთნებისთვის, რომელთაც უშუალო კავშირი აქვთ პაციენტებთან, ისეთი ინფორმაციის და ინსტრუმენტების მიწოდებას, რაც ხელს შეუწყობს მათი მხრიდან გენდერულ ძალადობაზე დროულ, ყოვლისმომცველ, მრავალსექტორულ რეაგირებას.
პრაქტიკული გზამკვლევი მოიცავს შემდეგ საკითხებს:
- ქალთა მიმართ ძალადობის და ოჯახში ძალადობის შესახებ ზოგადი ინფორმაცია;
- სამედიცინო დაწესებულების წარმომადგენლების მიერ გენდერულ ძალადობაზე რეაგირების საერთაშორისო და ეროვნული სტანდარტები;
- სამედიცინო პერსონალის როლი გენდერულ ძალადობაზე რეაგირების საქმეში;
- სამედიცინო პერსონალის მხრიდან გენდერულ ძალადობაზე ეფექტიანი რეაგირებისთვის შესაბამისი სტრატეგიები, ნაბიჯები და რეკომენდაციები;
- რეფერირების და მულტისექტორული თანამშრომლობის მნიშვნელობა ქალთა მიმართ ძალადობაზე ეფექტიანი რეაგირების საქმეში.
პროექტი ხორციელდება გენდერული თანასწორობის ფონდის
მხარდაჭერით (კანადა)
ქალთა ფონდი „სოხუმის“ ოფისი ჟრიამულით აივსო. ქუთაისელ, წყალტუბოელ და ზუგდიდელ ახალგაზრდებს ტრენერმა რუსუდან კარკაძემ ჩაუტარა ტრენინგი დეზინფორმაციის თემაზე.
განხილული იყო შემდეგი საკითხები: მედიაწიგნიერება, ციფრული ინსტრუმენტები, დეზინფორმაცია, კიბერბულინგი. მონაწილეები დაეუფლნენ ყალბი ინფორმაციის რეალობისგან გარჩევის პრაქტიკულ უნარებს, დეზინფორმაციასთან ბრძოლის სხვადასხვა კონკრეტულ მეთოდს, ყოველდღიურ ცხოვრებაში მისი გამოყენების მიზნით. ისინი გაეცნენ სხვადასხვა ვებგვერდს და შეასრულეს სახალისო ონლაინ ტესტი დეზინფორმაციის არსის უკეთ გაგების მიზნით.
ტრენინგის მონაწილეებმა შეავსეს ანკეტები, რის საფუძველზეც მოხდება მათი შერჩევა სამშვიდობო აქტივობებში ჩასართავად.
თებერვლის დასაწყისიდან აქტიურად დაიწყო სატრენინგო კურსები ახალგაზრდობის გაძლიერების ცენტრებში. გეგმის მიხედვით ტარდება შეხვედრები კონფლიქტოლოგიის და ძალადობის საკითხებზე. ტრენინგების პარალელურად, ახალგაზრდები ინიცირებულ ღონისძიებებს მართავენ ყველა მუნიციპალიტეტში.
ახლა მიმდინარეობს აქტიური მზადება შემაჯამებელი შეხვედრებისთვის. იგეგმება საინტერესო ინიციატივები. შეიქმნა ლიდერთა ჯგუფები, რომლებიც მუშაობენ პრეზენტაციებზე და წარმოადგენენ პროექტის გავლენას და შედეგებს.
ტრენინგები უკვე ჩატარდა ხუთ მუნიციპალიტეტში: სამტრედიაში, ზუგდიდში, თერჯოლაში, ჩოხატაურში და ბაღდათში (ონლაინ).
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)