ქალთა ფონდი „სოხუმის“ საქმიანობის ახალგაზრდულ მიმართულებაში ერთ-ერთი მთავარია ახალგაზრდების გაძლიერების ცენტრების გააქტიურება.
ყოველთვიურად ტარდება ტრენინგები დასავლეთ საქართველოს 10 მუნიციპალიტეტში. იანვარში ტრენინგების სამუშაო თემები იყო ნაადრევი ქორწინება და კონფლიქტის მოგვარების გზები. აქტუალურმა საკითხებმა დისკუსიები გამოიწვია და ამით კიდევ უფრო საინტერესო გახდა ყველა ტრენინგი.
პირველი ხუთი ტრენინგი გაიმართა ზუგდიდის, სამტრედიის, წალენჯიხის, ქობულეთის და თერჯოლის მუნიციპალიტეტებში.
ახალგაზრდები ტრენინგებზე მიღებულ ცოდნას თავიანთ სკოლებში, ქალაქებსა და სოფლებში ავრცელებენ, რითაც ხელს უწყობენ კონფლიქტების შემცირებას და ძალადობის პრევენციას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხონში შექმნილი ქალთა ქსელი აქტიურად აგრძელებს მუნიციპალიტეტში მუშაობას დევნილთა თემის პრობლემების ადვოკატირების კუთხით. ქსელის აქტივისტები თვალს ადევნებენ იმ პრობლემების ადვოკატირების დინამიკას, რომლებიც მათ მიერ იქნა წამოჭრილი. ისინი მჭიდრო კომუნიკაციაში არიან ადგილობრივი თვითმმართველობის წარმომადგენლებთან.
პრობლემების ნაწილი უკვე აისახა ბიუჯეტში და ისინი 2023 წელს ეტაპობრივად გადაიჭრება. განსაკუთრებით აქტიურად მოხდა ინფრასტრუქტურული საკითხების ლობირება: საცხოვრებელი კორპუსების გადახურვა, ფასადების შეკეთება და საწვიმარი ღარების დამონტაჟება.
ქსელის მოდერატორი შეხვდა მუნიციპალიტეტის გენდერული საბჭოს წევრს. შეხვედრაზე აღინიშნა, რომ გენდერული საბჭოს 2023 წლის სამოქმედო გეგმაში ასახულია ის აქტივობები, რომლებიც ქუთაისში ჩატარებულ ვორკშოპზე დააფიქსირა ხონის ჯგუფმა - ეს ხელს შეუწყობს რეზოლუცია 1325-ის სამოქმედო გეგმის იმპლემენტაციას ადგილობრივ დონეზე.
პროექტი ხორციელდება გაეროს ქალთა ორგანიზაციის
მხარდაჭერით
კიდევ ერთი გამოშვება ქალთა ფონდი „სოხუმის“ დღის სარეაბილიტაციო ცენტრში. უამრავი ლამაზი ნაკეთობა. კიდევ ერთი ჯგუფი, რომელმაც ისწავლა პოლიმერულ თიხასთან მუშაობა და პატარა საოცრებების შექმნა.
ტრადიციულად, ორთვიანი კურსის ბოლოს მოეწყო შემაჯამებელი ღონისძიება. მონაწილეებმა წარმოადგინეს სწავლების განმავლობაში შექმნილი ნამუშევრები, ისაუბრეს თავიანთ თავზე... პრეზენტაცია შთამბეჭდავი იყო და ქალთა ფონდი „სოხუმის“ წარმომადგენლების მოწონება დაიმსახურა.
კურსდამთავრებულებს სერტიფიკატები გადაეცათ. მათ აღნიშნეს, რომ ეს პერიოდი საკმაოდ ნაყოფიერი იყო პროფესიული განვითარების და პირადი ურთიერთობების კუთხით და ისინი წარმატებით გამოიყენებენ ცოდნას პრაქტიკაში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფსიქოლოგის შეხვედრების ერთი ნაწილი ჩატარდა საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში. მესენჯერის მეშვეობით გაიმართა საუბრები ქობულეთის, ტყიბულის და ხურჩის (ზუგდიდის მუნიციპალიტეტი) ქალთა მხარდაჭერის ცენტრების ბენეფიციარებთან. ამას გარდა გაიმართა გასვლითი შეხვედრები სენაკში და ფახულანში (წალენჯიხის მუნიციპალიტეტი) მცხოვრებ ქალებთან. ამ შეხვედრებს 50-ზე მეტი მონაწილე დაესწრო.
რეგიონებში 14 ბენეფიციარმა ონლაინ ინდივიდუალური ფსიქოთერაპიული სესიები გაიარა, ხოლო ქუთაისში, ქალთა ფონდი „სოხუმის“ ოფისში 12 ბენეფიციართან წარიმართა მუშაობა.
ფსიქოლოგმა ასევე გამართა პირველადი შეხვედრები ანამნეზის ასაღებად და დიაგნოსტიკური საქმიანობისთვის დღის ცენტრის 5 ბენეფიციართან - ჯგუფთან, რომელიც პოლიმერულ თიხაზე მუშაობას სწავლობს.
დეკემბერში მუშაობის შედეგები ასეთია: შეძენილი უნარების მეშვეობით ბენეფიციარებმა დაძლიეს უარყოფითი ემოციები და იციან, როგორ უნდა მოიქცნენ მომავალში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანის მუნიციპალიტეტში აქტიური მუშაობა მიმდინარეობს ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისია შექმნისთვის. მორიგი საკონსულტაციო შეხვედრა ჩატარდა ვანის მერთან.
შეხვედრაზე განხილულ იქნა უწყებათაშორისი კომისიის შექმნის დეტალები - თუ ვინ უხელმძღვანელებს კომისიას და რა შემადგენლობით უნდა იყოს ის წარმოდგენილი. ამ ეტაპზე აქტიურად მიმდინარეობს კომისიის დამტკიცებისთვის საჭირო დოკუმენტების შემუშავება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წალენჯიხის მუნიციპალიტეტის გენდერული თანასწორობის საბჭომ ქალთა ფონდ „სოხუმთან“ პარტნიორობით საკრებულოს სხდომათა დარბაზში გამართა მრგვალი მაგიდა თემაზე „ძალადობის პრევენცია და ძალადობის მსხვერპლის დაცვა, სოციალური თანამშრომლობა და რეფერირება“. შეხვედრას ესწრებოდნენ სახელისუფლებო სტრუქტურების და სოციალური ინსტიტუტების წარმომადგენლები. მათ ძალადობის კუთხით მუნიციპალიტეტში არსებული სიტუაცია გააანალიზეს და სოციალური თანამშრომლობის პერსპექტივებზე გაამახვილეს ყურადღება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
პატარა ბიჭუნა დედასთან ერთად შემოვიდა. აქ ხშირად მოჰყავთ ბავშვები, ამიტომ ფსიქოლოგ მანანა გოცირიძის ოთახში ბევრი სათამაშოა. თაროზე უწყინრად იდო კურდღელიც. უკრაინელმა ბიჭუნამ უცებ იყვირა: ბაჭია! მერე ფსიქოლოგს ჰკითხა: შეიძლება ხელში ავიყვანო? რა თქმა უნდა, მისცეს. ეხუტებოდა, ეფერებოდა... მიხვდა მანანა გოცირიძე - რატომაც და უთხრა, თუ გინდა, გაჩუქებო. დედა უხერხულ მდგომარეობაში ჩავარდა - ასეთი ჰქონდა სახლში და ძალიან უყვარდაო...
ბედნიერი წავიდა პატარა ბიჭუნა.
ყველა კმაყოფილი რჩება ქალთა ფონდი „სოხუმის“ ფსიქოლოგთან შეხვედრის შემდეგ. ზოგს ნაკლები პრობლემა აქვს და უფრო მალე სრულდება რეაბილიტაციის პროცესი, ზოგს მეტი ვიზიტი სჭირდება.
უკრაინელ ლტოლვილებთან შეხვედრები მანანა გოცირიძის მუშაობის ერთ-ერთი მნიშვნელოვანი მიმართულებაა. იანვარში ის 6 ოჯახს შეხვდა - 17 ადამიანს. ჩატარდა პირველადი კონსულტაცია, ანამნეზის შეგროვება და მათ შესთავაზეს უფასო ფსიქოთერაპიის გაგრძელება. ოჯახებს ასევე გადაეცათ საჭირო პროდუქტები, საყოფაცხოვრებო და ჰიგიენის საშუალებები, თბილი ტანსაცმელი.
ქალთა მხარდაჭერის ცენტრები აქტიურად განაგრძობენ მოსახლეობის ინფორმირებას მსხვერპლთა დახმარების და მხარდაჭერის სერვისებზე, ეხმარებიან ქალებს სხვადასხვა სახის სოციალური თუ ინფრასტრუქტურული პრობლემის ადვოკატირებაში.
იანვარში სამტრედიის, ტყიბულის, ზუგდიდის, ვანის და წალენჯიხის ქალთა მხარდაჭერის ცენტრებში ინფორმირების შედეგად უკვე გამოიკვეთა კრიზისული ოჯახები, მათთან მუშაობა ინტენსიურად გრძელდება.
საჭიროებიდან გამომდინარე, ყველა ქეისზე ინდივიდუალურად მუშაობს ფონდის ფსიქოლოგი. დახმარების პროცესში აქტიურად არიან ჩართულნი ბავშვთა მხარდაჭერის განყოფილებებიც.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სოციალური სამართლიანობის ცენტრმა ორი კვლევის პრეზენტაცია გამართა: „ორმხრივი გამოტოვების ადგილები - უფლებრივი და სოციალური გამოწვევები გალსა და ახალგორში“ და „გამყოფი ხაზების მიმდებარედ მცხოვრები ქალების გამოწვევები და საჭიროებები“. ღონისძიებას საერთაშორისო, ადგილობრივი სამოქალაქო საზოგადოების ორგანიზაციებისა და სახელმწიფო უწყებების წარმომადგენლებთან ერთად, ფონდი „სოხუმის“ თბილისის წარმომადგენლობის ხელმძღვანელიც ესწრებოდა. ეკატერინე გამახარიამ თავის გამოსვლაში ყურადღება იმ გამოწვევებზე გაამახვილა, რომლებიც დღეს ყველაზე მეტად აწუხებთ კომფლიქტის გამყოფ ხაზთან მცხოვრებ ქალებს, მათ შორის მძიმე ეკონომიკურ-სოციალური მდგომარეობა, უმუშევრობა და ეკონომიკურ საქმიანობაზე ფინანსებზე ხელმისაწვდომობის ბარიერები, გამყოფი ხაზის გასწვრივ თავისუფალი გადაადგილების პრობლემები, ქალთა მიმართ ოჯახში ძალადობის საკითხები და ა.შ.
წყალტუბოს ქალთა საინიციატივო ჯგუფის შეხვედრაზე ისაუბრეს საპროექტო აქტივობებზე, ადვოკატირების შედეგებსა და გეგმებზე.
დამსწრეებმა მიიღეს ინფორმაცია ადგილობრივი სტრუქტურების მიერ შემუშავებულ სტრატეგიაზე - სტრატეგია რეზოლუცია 1325-ის ადგილზე იმპლემენტაციის მიზნით შემუშავდა ტრენინგზე.
სტრატეგიაში შეტანილი ამოცანების შესასრულებლად ქალთა ჯგუფი აქტიურად აგრძელებს თანამშრომლობას ადგილობრივ სტრუქტურებთან.
პროექტი ხორციელდება გაეროს ქალთა ორგანიზაციის
მხარდაჭერით