ქალები უკრაინიდან - მარტიდან ასეთი ახალი ბლოგი გაჩნდა ქალთა ფონდი „სოხუმის“ ვებგვერდზე.
მთავარი გმირები ქალები არიან - ხერსონიდან, ჩუგუევიდან, კიევიდან, ხარკოვიდან, ბერდიანსკიდან, ვინიცადან...
ეს არის სევდიანი და იმედიანი ისტორიები.
რამდენიმე ფრაზა სხვადასხვა ჩანახატიდან:
„ბავშვობაში მახსოვს, ბებიები და ბაბუები სულ ერთსა და იმავეს იმეორებდნენ - ოღონდ მშვიდობა იყოს და სხვა არაფერი გვინდაო. ჩვენ მშვიდობა გვქონდა და გვეცინებოდა მათ ნათქვამზე. მათ ომი ჰქონდათ გამოვლილი და იცოდნენ მშვიდობის ფასი. ახლა განსაკუთრებით კარგად ვხვდები ამ სიტყვების აზრს“, - კატერინა მირნაია.
„დედას ოჯახური მეურნეობა აქვს: ქათმები, კვერცხი, ბოსტნეული. სამ ბოსტანში დაუთესია კარტოფილი... ჩვენ გველოდება და უნდა დაგვახვედროს“, - ალინა დზიუბინსკაია.
„ორი დედა მყავს ხერსონში - ჩემი და ჩემი ქმრის, ყველაფერი იქაა - სახლი, ბინა, მეგობრები, ახლობლები, მენატრება და შიში მაქვს მათი დაკარგვის. სულ იმას ვნატრობ, მალე წავიდე ჩემს ქვეყანაში“, - ტატიანა ხოდაკოვსკაია.
https://blogofwomanfundsukhumi.tilda.ws/
ბლოგში უკვე 15 ქალის ამბავია მოთხრობილი. ამბები, რომლებიც ერთმანეთს ჰგავს და განსხავდება კიდეც...
ისეთი ბლოგია, აუცილებლად რომ უნდა წაიკითხოს ადამიანმა. იმიტომ რომ შეიგრძნოს ომის სისასტიკე და ყველაფერი გააკეთოს მშვიდობისთვის...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„სარეაბილიტაციო ცენტრში ჩამოსვლამდე ძალიან განვიცდიდი. ჯერ ერთი, არ ვიცოდი, როგორ დავტოვებდი ყოველდღიურ პრობლემებს, მეორეც - როგორ მიმიღებდნენ აქ. 48 წლის განმავლობაში არასოდეს არ ვყოფილვარ ოჯახს გარეთ გასული. ერთი სიტყვით. ძალიან დაკომპლექსებული მოვდიოდი.
პირველივე შეხვედრაზე ვიგრძენი თბილი გარემო.
მერე ფსიქოლოგს შევხვდი. საოცარი ყურადღება გამოიჩინა და მე თვითონ მიკვირს, იმდენი რამე ვუამბე ჩემზე.
კარგი მეხსიერება მაქვს, ყველაფერი მახსოვს. მამა რომ დათვრებოდა, ხშირად ეჩხუბებოდა დედას. ამიტომ არ მიყვარდა. ნაადრევად დაბრძენებულ ქალს ვგავდი 5-6 წლის ბავშვი. ბევრი რამ მაკლდა. ყველაფერს შენთვის ვაკეთებო, დედა რომ მეტყოდა, თავს ვიდანაშაულებდი, რატომ გავჩნდი-მეთქი...
ახლაც უამრავი პრობლემა მაქვს. მაგრამ სარეაბილიტაციო ცენტრში ყველაფერი დამავიწყდა. ახალი ნაცნობები, საერთო პრობლემები და იმის განცდა, რომ მარტო არ ხარ. ამიტომ იმედით და ენერგიით ივსები. როგორ გვჭირდება ასეთი ურთიერთობები, თანაგრძნობა, ერთმანეთის მოსმენა. ჩემი პატარა ბიჭუნაც ბედნიერია, მოსწონს აქაურობა...
ახლა ვხვდები, როგორ უნდა მეცხოვრა. როგორც დედას, როგორც ქალს. გამოვდივარ იმ ჩაკეტილი წრიდან, რომელშიც ვიყავი. მადლობა ამისთვის ყველას, ვინც დამეხმარა“...
ეს არის მოკლე მონაკვეთი წერილიდან, რომელიც ფონდი „სოხუმის“ ფსიქოლოგს მანანა გოცირიძეს დაუტოვა ერთ-ერთმა ქალმა, რომელმაც ჩვენს ცენტრში სარეაბილიტაციო კურსი გაიარა.
ოქტომბრის დასაწყისიდან დაიწყო ახალგაზრდობის გაძლიერების ცენტრების ახალი ჯგუფების ფორმირება.
ზუგდიდში, თერჯოლაში, ქობულეთში, სენაკსა და ტყიბულში ჩატარდა ტრენინგები კონფლიქტის მართვის და ძალადობის პრევენციის თემაზე (ამ შეხვედრებიდან მხოლოდ ერთი გაიმართა ონლაინ ფორმატში).
ახალგაზრდები დიდი პასუხისმგებლობით ჩაერთნენ მუშაობის პროცესში. მათთვის არაფორმალური განათლების ეს სახე საკმაოდ საინტერესო და შთამბეჭდავი აღმოჩნდა. ისინი აქედანვე მზად არიან, ინიციატივები გამოიჩინონ და მორიგ შეხვედრამდე სხვადასხვა აქტივობა ჩაატარონ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ერთ-ერთი უკრაინელი ქალი ონკოლოგიაში მკურნალობას გადის და ჩვენ აქტიურად ვეხმარებით, სამედიცინო პროცედურებს ვუფინანსებთ. ჩვენი ორგანიზაცია ერთადერთია, ვინც მას გვერდში უდგას ამ რთულ პერიოდში. ანალიზების შემდეგ კარგი ამბები გავიგეთ - მე-4 სტადია არ დადასტურდა და ის განაგრძობს ბრძოლას…
ჩვენს ბაზაში უკრაინიდან 337 ლტოლვილია. ოქტომბერში ბაზაში დავამატეთ 16 ადამიანი. დახმარება გავუწიეთ 31 ოჯახს და 2 ქალს. სამ ოჯახს ვუგრძელებთ საცხოვრებლის თანხის გადახდას, ამ კატეგორიას დაემატა კიდევ 9 ოჯახი.
ვაგრძელებთ სამუშაო ადგილების ძებნასაც. ერთ-ერთი ჩვენი ბენეფიციარი სამკერვალო ფაბრიკაში მოვაწყვეთ. ამ მომენტში არის მცხობელის ვაკანსია მამაკაცისთვის.
ყველა მსურველს შეუძლია მიიღოს ფსიქოლოგის კონსულტაციები. ისინი მონაწილეობენ ქართველი და უკრაინელი ფსიქოლოგების მიერ ჩატარებულ ფსიქო-სარეაბილატაციო სეანსებში. ასევე ვთავაზობთ იურისტის კონსულტაციებს. ჩვენ მოგვმართა მარტოხელა დედამ, რომელსაც ჩამოსვლისთანავე, ვითომ საცხოვრებლის ყიდვისთვის გამოართვეს 1500 დოლარი და მიიმალნენ - სამწუხაროდ, თაღლითების კვალს ვერ მიაგნეს. მას დღემდე ეხმარება იურისტი, რომელმაც ჩვენთან მოიყვანა. ჩვენგან მიიღო სურსათის პაკეტი და ასევე ვეხმარებით ბინის თანხის გადახდაში.
„ყველა ფემიციდის წინააღმდეგ“ კამპანიის ფარგლებში, ქალთა ფონდ „სოხუმის“ ორგანიზებით, საჯარო დისკუსია გაიმართა. ღონისძიებას 180-მდე მონაწილე ესწრებოდა, მათ შორის დასავლეთ საქართველოს 16 მუნიციპალიტეტის თვითმმართველობის, სოციალური სააგენტოების, იურიდიული სამსახურების, ქალთა საკითხებზე მომუშავე ორგანიზაციების წევრები, მეცნიერებისა და განათლების სამინისტროს, მანდატურის სამსახურის, რესურსცენტრების და სკოლის ადმინისტრაციის წარმომადგენლები, ასევე ფონდი „სოხუმის“ სხვადასხვა პროექტის ქალთა/ახალგაზრდული ჯგუფები და ჟურნალისტები.
დამოუკიდებელი ექსპერტის, გოგა ხატიაშვილის მოსაზრებით - „გამოსავალი ერთია, მოვუსმინოთ ყველას!“
ქალთა ფონდი „სოხუმის“ მიერ ორგანიზებული საჯარო დისკუსია/კონფერენცია კიდევ ერთი მცდელობაა, საერთო პრობლემის მოგვარების გზაზე, ერთ დემოკრატიულ სივრცეში და ერთ ენაზე ილაპარაკოს საკანონმდებლო, აღმასრულებელი და სამოქალაქო სექტორის წარმომადგენლებმა.
გენდერული თანასწორობის მუდმივმოქმედი საპარლამენტო საბჭომ, თემატური მოკვლევის - „ქალების წვდომა ფინანსურ რესურსებზე“ ფარგლებში, სამოქალაქო საზოგადოების წარმომადგენლებთან ზეპირი მოსმენა გამართა. შეხვედრის მიზანი იყო ქალებისთვის ფინანსურ რესურსებზე წვდომის ბარიერების შესწავლა და არსებულ მონაცემებზე დაყრდნობით პარლამენტისთვის და სხვა სახელმწიფო ინსტიტუტებისთვის პოლიტიკის ინსტრუმენტების შემუშავების ხელშეწყობა.
თემატური მოკვლევის სამუშაო ჯგუფის შეხვედრაში ქალთა ფონდი „სოხუმის“ წარმომადგენელი - ეკატერინე გამახარიაც იღებდა მონაწილეობას. მან თავის მოხსენებაში ფოკუსი დევნილ და კონფლიქტით დაზარალებულ ქალებზე გააკეთა და ხაზი გაუსვა, რომ ფინანსურ რესურსებზე ქალების ხელმისაწვდომობის უზრუნველყოფა წარმოადგენს არა მხოლოდ ქვეყნის განვითარების, სიღარიბესთან და ქალთა მიმართ ძალადობასთან ბრძოლის უმნიშვნელოვანეს ფაქტორს, არამედ მას ქვეყანაში მშვიდობის მშენებლობის და ნდობის აღდგენის საქმეში უდიდესი დატვირთვა აქვს.
„დღეს არა საუბრების, არამედ კონკრეტული მოქმედებების დროა! რადგან ვიდრე ჩვენ პრობლემებზე ვსაუბრობთ და ვბჭობთ, ქალების დიდი ნაწილი უშუალოდ უპირისპირდება უთანასწორობას, ძალადობას, დრომოჭმულ სტერეოტიპებს და ეკონომიკური დამოკიდებულების მთელ სიმწარეს... ბევრ მათგანს უწევს სამკვდრო-სასიცოცხლო ბრძოლა გადარჩენისთვის... მხოლოდ ეკონომიკურად ძლიერ ქალებს შეუძლიათ საზოგადოებრივ კეთილდღეობაზე ზრუნვა, ქვეყნის განვითარებაში წვლილის შეტანა, ძალადობასთან ბრძოლა, და მდგრადი და ხანგრძლივი მშვიდობის შენება“... - განაცხადა ეკატერინე გამახარიამ.
შეხვედრის მსვლელობისას მონაწილეებმა იმსჯელეს პრობლემების დაძლევის კონკრეტულ გზებზე და ერთმანეთს საკუთარი მიგნებები და რეკომენდაციები გაუზიარეს.
ქალთა მიმართ ძალადობა, ფემიციდი, რეფერირების მექანიზმები და სუბიექტები, ბავშვთა უფლებების დაცვისა და მხარდაჭერის განყოფილების უფლებამოსილება ამ პროცესში - ამ საკითხებზე გაიმართა მსჯელობა ქალთა მხარდაჭერის ცენტრების მიერ ინიცირებულ საინფორმაციო შეხვედრებზე.
მთავარი ფოკუსი გაკეთდა მუნიციპალიტეტებში მოქმედი ბავშვთა განყოფილებების მუშაობაზე. დაფიქსირდა, რომ ახალი განყოფილების მუშაობაზე ინფორმაცია არ არის ყველასთვის ხელმისაწვდომი. აღინიშნა, რომ აუცილებელია საბავშვო ბაღების, სკოლების პედაგოგების თანამშრომლობა ამ განყოფილებასთან, რაც ხელს შეუწყობს ძალადობის შემთხვევების იდენტიფიცირებას და ეფექტიან რეაგირებას.
შეხვედრები ჩატარდა სენაკის, ქობულეთის, ბაღდათის, ზუგდიდის და ტყიბულის ქალთა მხარდაჭერის ცენტრებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სენაკის მერიის სხდომათა დარბაზში ქალთა მიმართ ძალადობის აღკვეთის უწყებათაშორისი კომისიის შეხვედრა გაიმართა. შეხვედრას ესწრებოდნენ კომისიის წევრები, საკრებულოს, სკოლების და ქალთა ფონდი „სოხუმის“ წარმომადგენლები,.
კონკრეტული ქეისების განხილვის შემდეგ შეკრებილებმა იმსჯელეს ძალადობის პრევენციაზე, მსხვერპლთა დაცვაზე, ადგილობრივ სახელმწიფო სტრუქტურებთან თანამშრომლობაზე.
უწყებათაშორისმა კომისიამ მიიღო გადაწყვეტილება, შეუერთდეს ყოველწლიურ 16- დღიან საინფორმაციო კამპანიას გენდერული ძალადობის წინააღმდეგ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მრგვალ მაგიდას სენაკის მერიაში ესწრებოდნენ მერიის ხელმძღვანელი პირები, ჯანმრთელობისა და სოციალური დაცვის სამსახურის, ბავშვთა უფლებების დაცვისა და მხარდაჭერის განყოფილების, სოციალური მომსახურების სააგენტოს და საგანმანათლებლო სექტორის წარმომადგენლები.
შეხვედრაზე ისაუბრეს ფემიციდის ფაქტების საგანგაშო მატების შესახებ. აქცენტი გაკეთდა ოჯახში ძალადობის პრობლემაზე და ადგილობრივ სტრუქტურებთან თანამშრომლობის პერსპექტივაზე.
აღინიშნა, რომ ადგილობრივი ხელისუფლება წარმოადგენს ძალადობისგან დაცვის სახელმწიფო რეფერალური მექანიზმის სუბიექტს - აქვს უფლებამოსილება და ვალდებულება, ჩაერთოს ძალადობის პრევენციის, შემთხვევების იდენტიფიცირების, მსხვერპლთა დახმარების საკითხებში, რასაც მუნიციპალიტეტი შესაბამისი პროგრამებით პასუხობს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„ბავშვთა უფლებების დაცვა და ადგილობრივი თანამშრომლობა სოციალური სერვისების გაუმჯობესების კუთხით“ - ამ თემაზე ინფორმაციის გაცვლის შეხვედრა ამჯერად ქობულეთის მუნიციპალიტეტის სკოლამდელი აღზრდის დასებულებების პერსონალთან ჩატარდა. ღონისძიებას ესწრებოდნენ მერიის ბავშვთა უფლებების დაცვის განყოფილების ხელმძღვანელი, მუნიციპალიტეტის გენდერული საბჭოს თავმჯდომარე, ქალთა ფონდი „სოხუმის“ წარმომადგენლები.
მონაწილეებს გააცნეს მუნიციპალიტეტისთვის შედარებით ახალი სტრუქტურის - ბავშვთა უფლებების დაცვის განყოფილების საქმიანობის სპეციფიკა; ადგილობრივი პროგრამები. გაჟღერდა ინფორმაცია ფონდის მიერ ჩატარებულ მონიტორინგზე, რომელმაც სხვადასხვა მუნიციპალიტეტში არსებული პოზიტიური პრაქტიკა და გამოწვევები გამოკვეთა.
აღინიშნა, რომ სკოლამდელი საგანმანათლებლო დაწესებულებების ზოგიერთ წარმომადგენელს ჯერ კიდევ არა აქვს ბოლომდე გააზრებული პასუხისმგებლობა, რასაც მას აკისრებს კანონი ბავშვთა ოჯახში ძალადობისგან დაცვის კუთხით. გამოიკვეთა საკითხები, როდისაა აუცილებელი კომუნიკაცია ბავშვთა უფლებების დაცვის განყოფილებასთან.
სკოლამდელი დაწესებულებების პედაგოგები შეეხნენ სპეციფიკური საჭიროებების მქონე ბავშვებთან დაკავშირებულ სხვადასხვა მტკივნეულ საკითხს, რომელიც ეხება. მოხდა შეთანხმება სამომავლო თანამშრომლობის თემებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)