თვის განმავლობაში ბევრი ადამიანი დაუკავშირდა ფონდი „სოხუმის“ ფსიქოლოგს - ზოგმა ტელეფონზე დაურეკა, ზოგმა - მესენჯერში, სკაიპში... ქუთაისიდან და ხურჩიდან (ზუგდიდის მუნიციპალიტეტი) დარეკა ხუთ-ხუთმა ბენეფიციარმა, ფოთიდან - სამმა, ხონიდანაც - სამმა, წყალტუბოდან - ექვსმა, სენაკიდან - შვიდმა. რეკავდნენ ყოფილი კლიენტები იტალიიდან, დუბაიდან, გერმანიიდან, თურქეთიდან, უკრაინიდან.
სულ 54 ზარი იყო. ადამიანები გამოხატავდნენ შეშფოთებას, გაურკვევლობას, შიშს, ისტერიკას, ითხოვდნენ გარკვევას ამ არაორდინალურ სიტუაციაში. ფსიქოლოგმა ყველას მისცა კონკრეტული რჩევა. კლიენტებთან ურთიერთობისთვის მან ასევე აქტიურად გამოიყენა ფონდი „სოხუმის“ ფეისბუქგვერდი - გაკეთდა პუბლიკაციები დეპრესიის და პანიკის შესახებ, დაიწერა პრაქტიკული რჩევები, რომ სულით არ დავეცეთ. ყოველივე ამან ხელი შეუწყო ჩვენი ბენეფიციარების ფსიქოლოგიური განწყობის გაუმჯობესებას.
მიუხედავად ქვეყანაში არსებული სიტუაციისა, ფონდი „სოხუმის“ 10 ქალთა მხარდაჭერის ცენტრის მობილიზატორებმა მარტის თვეში აქტიური მუშაობა ჩაატარეს. მათ შეძლეს ბენეფიციართა მობილიზება და ონლაინ აქციის გამართვა ფემიციდის წინააღმდეგ. წელს ფემიციდი ყოველდღიურობად გვექცა: 2 თვეში 8 ქალი მოკლეს. დამნაშავეს ყველა სხვაში ხედავს. ფემიციდი სოციალურ პრობლემად იქცა და დროა, პასუხისმგებლობა თითოეულმა ჩვენგანმა იგრძნოს. აქციაში აქტიურად ჩაერთნენ ქალები, მამაკაცები და განსაკუთრებით - ახალგაზრდები.
საინფორმაციო შეხვედრები ერთ-ერთი მთავარი აქტივობაა წყალტუბოს ქალთა მხარდაჭერის ცენტრის მცირე პროექტში „მედპერსონალი ძალადობის წინააღმდეგ“. თებერვალში შეხვედრები ჩატარდა საზოგადოებრივი ჯანდაცვის წყალტუბოს ცენტრის ხელმძღვანელთან და დევნილთა პოლიკლინიკის პერსონალთან. ფონდი „სოხუმის“ იურისტი და ფსიქოლოგი მათ ესაუბრნენ სამედიცინო პერსონალის ჩართულობის მნიშვნელობაზე ოჯახში ძალადობის გამოვლენასა და ადგილობრივ კოორდინაციაში - ქალთა მიმართ ძალადობის პრევენციისთვის.
ქუთაისის ქალთა მხარდაჭერის ცენტრის მცირე პროექტის „არაძალადობრივი მომავალი თაობა“ ფარგლებში ჩატარდა ტრენინგები მე-5 და მე-17 საჯარო სკოლებში. ახალგაზრდულ ჯგუფებს მიეწოდა ინფორმაცია კონფლიქტების გამოვლენისა და ადრეული პრევენციის თემაზე. მათი მხრიდან დაფიქსირდა ინტერესი, ამ კუთხით აქტიურად იმუშაონ თანატოლებთან და ისწავლონ კონფლიქტური სიტუაციების მართვა.
საინფორმაციო შეხვედრები ჩატარდა სამიზნე სკოლების მშობლებთანაც. მათ მიიღეს ინფორმაცია ადგილობრივი მუნიციპალიტეტის პროგრამებზე.
ფახულანის ქალთა მხარდაჭერის ცენტრის მცირე პროექტის „ჯანსაღი მომავალი თაობისათვის“ ფარგლებში ჩატარდა მუშაობა წალენჯიხის მუნიციპალიტეტში.
სოფელ ლიის არასრული სკოლის მოსწავლეებთან ჩატარდა ტრენინგი. კონფლიქტი, ძალადობა, გენდერული სტეროტიპები, უთანასწორობა, ბულინგი, პრევენცია - არაერთი ნაცნობი თუ უცნობი სიტყვა იქნა ნახსენები ტრენინგზე და მთავარი: როგორ მოვაგვაროთ ჩვენს ყოველდღიურობაში წამოქმნილი პრობლემები.
მეორე აქტივობა გაიმართა სოფელ ფახულანში - შეხვედრა არასრული სკოლის პედაგოგებთან და მოსწავლეებთან კონფლიქტოლოგის, იურისტისა და ფსიქოლოგის ჩართულობით. შეხვედრის მიზანი იყო ინფორმირება ძალადობის და კონფლიქტების მართვის თემაზე.
„მედპერსონალი ძალადობის წინააღმდეგ“ - ამ მცირე პროექტის ფარგლებში წყალტუბოს ქალთა მხარდაჭერის ცენტრი აქტიურ მუშაობას გეგმავს წყალტუბოს მუნიციპალიტეტის ქალაქისა და თემის სამედიცინო ამბულატორიის ოჯახის ექიმებსა და ექთნებთან.
იანვარში ჩატარდა საინფორმაციო შეხვედრები მუნიციპალიტეტის გენდერული თანასწორობის საბჭოს წევრებთან და სამედიცინო დაწესებულებების ხელმძღვანელებთან. პროექტის ფარგლებში დაგეგმილი ღონისძიებების შემდეგ სამედიცინო პერსონალი აქტიურად ჩაერთვება ადგილობრივ კოორდინაციაში ქალთა მიმართ/ოჯახში ძალადობის ფაქტების გამოვლენისა და პრევენციის კუთხით.
„ოჯახში ძალადობის პრევენცია ოზურგეთის მუნიციპალიტეტში“ - ამ პროექტის ფარგლებში ოზურგეთის ქალთა მხარდაჭერის ცენტრი აქტიურ მუშაობას განახორციელებს მუნიციპალიტეტის საბავშვო ბაღების აღმზრდელებთან და აღსაზრდელთა მშობლებთან. ეს მუშაობა ხელს შეუწყობს ძალადობის ფაქტების გამოვლენას დროული რეაგირებისათვის. პროექტის ფარგლებში ჩატარდა საინფორმაციო შეხვედრა თვითმმართველობის წარმომადგენლებთან და ბაღების გაერთიანების ხელმძღვანელთან, დაიგეგმა საპროექტო ღონისძიებები. მშობლებთან ჩატარებულ შეხვედრაზე მათ მიიღეს ინფორმაცია მუნიციპალურ პროგრამებზე.
„ჰარმონიული გარემო პატარებისთვის“ - ლანჩხუთის ქალთა მხარდაჭერის ცენტრის ამ მცირე პროექტის მიზანია ლანჩხუთის მუნიციპალიტეტის საბავშვო ბაღების აღმზრდელებისა და აღსაზრდელთა მშობლების ინფორმირება ძალადობისა და ბულინგის თემაზე, ფაქტების პრევენციისთვის ძალადობაზე რეაგირების ჯგუფის შექმნა. პროექტი ხელს შეუწყობს კომუნიკაციის გაუმჯობესებას სკოლამდელი დაწესებულების პერსონალს, მშობლებსა და რეფერალური მექანიზმის სუბიექტებს შორის.
იანვარში ჩატარდა საინფორმაციო შეხვედრები გენდერული თანასწორობის საბჭოს წევრებთან, მერის მოადგილესთან და სოციალური სამსახურის ხელმძღვანელთან. ისინი აქტიურად იქნებიან ჩართულები პროექტის განხორციელებაში.
ორი მიმართულებით დაიწყო მუშაობა ხონის ქალთა მხარდაჭერის ცენტრმა.
პროექტი „ადგილობრივი თანამშრომლობა - ოჯახში ძალადობის პრობლემის პრევენცია და მსხვერპლის დაცვა“ მოიაზრებს ხონის მუნიციპალიტეტის 12 ტერიტორიული ერთეულის წარმომადგენლების გადამზადებას ოჯახში ძალადობის საკითხებზე. შედეგად - თორმეტივე ერთეულში შეიქმნება რეაგირების ჯგუფები.
პროექტი „ოჯახი ძალადობის გარეშე“ ხელს შეუწყობს ხონის მუნიციპალიტეტის ორი სკოლის (სოფელ ნამაშევის და მე-4 საჯარო სკოლის) პედაგოგების, მოსწავლეების და მშობლების სამოქალაქო განათლების დონის ამაღლებას გენდერისა და ძალადობის საკითხებზე - საინფორმაციო შეხვედრებითა და ფორუმ-თეატრის წარმოდგენებით.
იანვარში პროექტების ფარგლებში ჩატარდა საინფორმაციო შეხვედრები სამიზნე აუდიტორიასთან. მუშაობა აქტიურ ეტაპზეა.
ზუგდიდის ქალთა მხარდაჭერის ცენტრმა პროექტების განხორციელება დაიწყო. პროექტი „ბულინგი და მისგან დაცვის მექანიზმები“ მოიაზრებს მუშაობას კონფლიქტის გამყოფ ზოლთან განლაგებულ სოფლებში - კოკი, ორსანტია, ახალკახათი. მისი მიზანია ბულინგის შემთხვევების შემცირება რეაგირების ჯგუფების შექმნის გზით. მეორე პროექტი „ოჯახში ძალადობის აღმოფხვრის გზები“ განხორციელდება ხურჩაში, კოკსა და კახათში და ხელს შეუწყობს ოჯახში ძალადობის შემთხვევების შემცირებას სამართლებრივი დონის ამაღლების გზით.
უკვე გაიმართა საინფორმაციო შეხვედრები სამიზნე სოფლების დეპუტატებთან, მერის წარმომადგენლებთან, სკოლების პედაგოგებთან. ასევე მოეწყო იურისტისა და ფსიქოლოგის საინფორმაციო შეხვედრა ადგილობრივ ქალებთან.