ქუთაისის, სენაკისა და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში  გაიმართა ჯგუფური ფსიქოლოგიური შეხვედრები ძირითადი თემით - ქალთა სოლიდარობა.

ქალების მეგობრობის პრინციპებიც ისეთივეა, როგორც ნებისმიერ ახლო ურთერთობაში: გულწრფელობა, გახსნილობა, პრობლემათა განხილვა, სიმპათია და პატივისცემა, სხვების მოსმენის ნიჭი და მიღება ისეთად, როგორიც არის.

ამას გარდა ჩატარდა ინდივიდუალური კონსულტაციები ოჯახში ფსიქოლოგიური ძალადობის პრობლემებზე. ქალებმა ყურადღებით მოისმინეს ფონდი „სოხუმის“ ფსიქოლოგის კომპეტენტური რჩევები.

ფოთის ქალთა მხარდაჭერის ცენტრში გაიმართა ფონდი „სოხუმის“ პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია. შეხვედრას დაესწრნენ ადგილობრივი ხელისუფლების წარმომადგენლები, აქტივისტი ქალები.

პრეზენტაციის შემდეგ დისკუსია გაიმართა. მონაწილეებმა, ძირითადად,  სოციალურ საკითხებზე გააკეთეს აქცენტი, რადგან მიაჩნიათ, რომ ამ კუთხით არსებული საფრთხეები სერიოზულ დისკომფორტს უქმნის ქალებს. ფოთის ადგილობრივი ხელისუფლების წარმომადგენლებმა იმ პროგრამებზე ისაუბრეს, რომლებიც ადგილობრივი ბიუჯეტიდან ხორციელდება. მონაწილეები განსაკუთრებით დაინტერესდნენ იმ დახმარებით, რომელიც მრავალშვილიან დედებს ეხება.

მონაწილეთა საერთო შეფასებით, მსგავსი საკითხების განხილვა ადგილობრივი ხელისუფლების წარმომადგენლებთან  ერთად გაზრდის თანამშრომლობის ხარისხს და პრობლემების გადაჭრას შეუწყობს ხელს. 

ქალთა სოლიდარობის კვირეულის ფარგლებში ფოთის ქალთა მხარდაჭერის ცენტრის ინიციატივით ჩატარდა მრგვალი მაგიდა.

შეხვედრას ესწრებოდნენ კოლექტიურ ცენტრებში მცხოვრები დევნილები.  მრგვალ მაგიდაზე მოწვეულნი იყვნენ ქალაქ ფოთის მერიის და მალთაყვის უბნის ტერიტორიული ორგანოს წარმომადგენლები.

მრგვალი მაგიდის დროს დევნილებს ჰქონდათ შესაძლებლობა, გაცნობოდნენ ფოთის სოციალურ და ჯანდაცვის პროგრამებს, ახალგაზრდებისთვის დაგეგმილ ღონისძიებებს. მათ შეძლეს თავიანთი პრობლემების დაფიქსირება ადგილობრივი თვითმმართველობის წარმომადგენლების წინაშე, რაც თანამშრომლობის და პრობლემების მოგვარების საწინდარია.

ხონის ქალთა მხარდაჭერის ცენტრის მობილიზატორების ინიციატივით საკრებულოს სხდომათა დარბაზში ჩატარდა მრგვალი მაგიდა თემაზე „ქალთა სოლიდარობა - უკეთესი მომავლისათვის“.

ღონისძიებას დაესწრნენ ადგილობრივი თვითმმართველობის წარმომადგენლები. შეხვედრაზე ითქვა ქალთა სოლიდარობის კვირეულის და ქალთა მხარდაჭერის ცენტრის საქმიანობის შესახებ.

მონაწილეებმა აღნიშნეს, რომ ქალების მიმართ პატივისცემა არ გამოიხატება 8 მარტს მირთმეული ყვავილებით, რომ ქალთა უფლებების დაცვა აქტუალური საკითხია, რისთვისაც აუცილებელია სამთავრობო და არასამთავრობო სექტორის ძალისხმევის გაერთიანება.

ფონდი „სოხუმის“ პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია გაიმართა ხონის მუნიციპალიტეტის სხდომათა დარბაზში.

კვლევის შედეგების გაცნობის შემდეგ მონაწილეებმა - სხვადასხვა სტრუქტურის წარმომადგენლებმა - მოისმინეს ცალკეულ ქალაქებში შემუშავებული რეკომენდაციები. აქცენტი გაკეთდა იმ წინადადებებზე, რომლებიც ხონის ჯგუფის მიერ იქნა მოწოდებული.

დისკუსიისას საუბარი შეეხო საზოგადოების უსაფრთხო ცხოვრების კომპონენტებს. მონაწილეთა აზრით, ქალთა უსაფრთხოების ხარისხის ამაღლება საზოგადოების კონსოლიდაციით უნდა დაიწყოს და პასუხისმგებლობა უნდა აიღონ იმ სტრუქტურებმა, რომელთაც ამ მიმართულებით გარკვეული პოზიტიური ცვლილებების მოხდენა შეუძლიათ.

ფოთის მე-7 სკოლაში ნაჩვენები იყო ფონდი „სოხუმის“ ფორუმ-თეატრის წარმოდგენები. ღონისძიებას დაესწრო  35 მოსწავლე.

მაყურებელი ძალიან გააღიზიანა პირველმა სცენამ, რომელშიც წარმოდგენილია მამის აგრესიული დამოკიდებულება ქალიშვილის მიმართ, თუმცა აღინიშნა, რომ ეს რეალური ცხოვრებისეული სცენაა. მოსწავლეები აქტიურად ჩაერთნენ დისკუსიებში, გამოხატეს თავიანთი მოსაზრებები.

წარმოდგენას ესწრებოდა სკოლის დირექტორი, რომელმაც ახლებური კუთხით დაინახა მოსწავლეები, მათი შეხედულებები. მან გამოთქვა სკოლაში ფორუმ-თეატრის შექმნის სურვილი და ითხოვა დახმარება ამ საქმეში.

წყალტუბოს 1-ლ სკოლაში ჩატარდა ფორუმ-თეატრის წარმოდგენა. ესწრებოდა 55 ადამიანი, ნაჩვენები იყო 5 წარმოდგენა. გაიმართა  დისკუსია, რომელშიც აქტიურად ჩაერთნენ მასწავლებლები და დირექტორი. მოსწავლეებმა მონაწილეობა მიიღეს წარმოდგენებშიც და ძალიან საინტერესოდაც გამოუვიდათ.

დედა-შვილის სცენის შემდეგ ახალგაზრდების დიდმა ნაწილმა დედა გაამართლა და აღნიშნა, რომ შვილი არასწორად იქცეოდა. ეს მეტყველებს მათ კარგ აღზრდაზე და უფროსის მიმართ პატივისცემაზე.

ბათუმსა და ქობულეთში პროექტის „თაობათა კულტურული დიალოგი, როგორც პოზიტიური გამოცდილების ციკლი“ ფარგლებში უფროსკლასელებთან და სტუდენტებთან გენდერული განათლების ვორკშოპების მომდევნო ციკლი ჩატარდა. ვორკშოპების თემატიკა მრავალფეროვანი იყო:  „ქალთა და გოგონათა უფლებები“; „ოჯახში ძალადობა და მისი სოციალური შედეგები“; „შშმ პირები - მათთან დაკავშირებული ტერმინები და საზოგადოებრივი სტერეოტიპები“; „თაობათა გადასახედიდან - პიროვნებათშორისი კომუნიკაციები ოჯახსა და საზოგადოებაში“.

ახალგაზრდების დიდმა ინტერესმა და ჩართულობამ მსგავსი საქმიანობის საჭიროებას კიდევ ერთხელ გაუსვა ხაზი. მაღალი შეფასება მისცეს ჩატარებულ შეხვედრებს მშობლებმა და პედაგოგებმა. მათი ნაწილი სიამოვნებით ჩაერთო ახალგაზრდებთან დიალოგში და მომავალი თანამშრომლობის სურვილი გამოხატა.

ძალადობის მსხვერპლთან მუშაობა - ქალთა მხარდაჭერის ცენტრების მთავარი ამოცანა, იურისტებისა და ფსიქოლოგების საინფორმაციო-საკონსულტაციო შეხვედრები და მიღებული შედეგები, ადგილობრივ თვითმმართველობასთან თანამშრომლობა მოქალაქეთა ინფორმირებისა და პრობლემათა ადვოკატირების მიზნით - ამ და სხვა საკითხებზე უამბობს მკითხველს და ფონდი „სოხუმის“ ბენეფიციარებს საინფორმაციო ბიულეტენის მეორე ნომერი, რომელიც ასახავს თებერვლის განმავლობაში გაწეულ მუშაობას პროექტის „ქალთა უფლებების გაძლიერება დასავლეთ საქართველოში“ ფარგლებში.

გადმოწერა

ტელეკომპანია „რიონის“ ეთერით გავიდა ფონდი „სოხუმის“ მიერ მომზადებული სიუჟეტი, რომელიც ფონდი „სოხუმის“ მიერ გამოცემული პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაციას ასახავდა.   ღონისძიება სენაკის მუნიციპალიტეტის სხდომათა დარბაზში გაიმართა და საზოგადოების სხვადასხვა სპექტრის წარმომადგენლები დაესწრნენ.

სიუჟეტის ძირითადი ღერძი ისეა აგებული, რომ შეკრებილი აუდიტორიის მოსაზრებები  უსაფრთხოებასთან დაკავშირებით სხვადასხვა პოზიციიდან არის ასახული. 

ყველა გამომსვლელი აფიქსირებს, რომ კვლევის შედეგები იძლევა საშუალებას, სხვადასხვა სამსახურმა საკუთარი პასუხისმგებლობა გააცნობიეროს, ყველა მიმართულებით დაიწყოს მუშაობა, რადგან არის საკითხები, რომელთა  ადგილობრივ დონეზე გადაწყვეტა უსაფრთხოების ხარისხის მაჩვენებელს მნიშვნელოვნად შეცვლის.