ფონდ „სოხუმში“ დაიწყო სამზადისი 16-დღიანი კამპანიისთვის ქალთა მიმართ ძალადობის წინააღმდეგ.

4 ნოემბერს გაიმართა გაფართოებული კრება, რომელსაც ესწრებოდნენ პროექტის „ქალთა უფლებების გაძლიერება დასავლეთ საქართველოში“ ხელმძღვანელები, ასისტენტები, იურისტები, ფსიქოლოგები და ქუთაისის, ხონის, წყალტუბოს, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები.

შეკრებილებმა განიხილეს კამპანიის ჩატარების გეგმა, აქტივობები, შეიტანეს შესწორებები, გამოთქვეს იდეები და ინიციატივები.

გეგმის მიხედვით, გაწერილია 100-ზე მეტი ღონისძიება, რომელშიც მონაწილეობს ფონდი „სოხუმის“ ყველა რგოლი.

ერთიანი ძალისხმევით, დასავლეთ საქართველოს მასშტაბით კიდევ ერთხელ ჩატარდება მძლავრი საინფორმაციო კამპანია ძალადობის პრევენციისა და მსხვერპლის დაცვის მიზნით.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

    

ქ. ბათუმის N2 სკოლაში პროექტის „ბათუმის ახალგაზრდები არაძალადობრივი საზოგადოებისათვის“ ფარგლებში გაიმართა ახალგაზრდული სამოქალაქო ფორუმი. პროექტს ახორციელებდა ბათუმის გენდერულ საკონსულტაციო საბჭოსთან არსებული გაერთიანება „სამოქალაქო ინიციატივების ჯგუფი“ ბათუმის მერიისა და ფონდი „სოხუმის“ მხარდაჭერით.

ფორუმს ესწრებოდნენ ბათუმის სკოლების მოსწავლეები, პედაგოგ-მასწავლებლები, თვითმმართველობის, გენდერული საბჭოს, ადგილობრივი საზოგადოების წარმომადგენლები. ბათუმის 6 სკოლაში დაფუძნებულმა ახალგაზრდულმა ფორუმ-თეატრებმა  პრობლემაზე რეაგირებისათვის მაყურებელს შესთავაზეს ხელოვნების ინოვაციური მეთოდი, რომლითაც ხდება რიგითი მოქალაქეების, განსაკუთრებით ახალგაზრდების ჩართვა პრობლემის მიზეზების, მისი გადაწყვეტის გზების ძიებაში.  სკოლების მიერ მომზადებული ფორუმ-თეატრის წარმოდგენების შემდეგ გაიმართა დისკუსია, ჩამოყალიბდა წინადადებები და რეკომენდაციები ძალადობის პრევენციის, ჯანსაღი ცხოვრების წესის ხელშეწყობის მიმართულებით. ჯგუფური სამუშაოების დროს ახალგაზრდებმა განსაკუთრებით ხაზი გაუსვეს სოციალური ტოლერანტობის და ბულინგის პრობლემას. ასევე აღინიშნა აჭარის მაღალმთიან სოფლებში ძალადობის პრობლემაზე ინფორმირების კუთხით მუშაობის აუცილებლობა.

პროექტი ხელს შეუწყობს ძალადობის პრობლემის სწორ გააზრებას, მის მიმართ შეურიგებლობას, საზოგადოების გაერთიანებას ძალადობის პრევენციისა და მსხვერპლის დახმარებისათვის.

სასტუმრო „ხვამლის“ კოლექტიურ ცენტრში დევნილები რთულ და გაურკვეველ მდგომარეობაში ცხოვრობენ. ფონდი „სოხუმის“ წარმომადგენლებთან ერთად ისინი ცდილობენ თავიანთი პრობლემების ადვოკატირებას. გააგზავნეს წერილი ლტოლვილთა და განსახლების სამინისტროში, მაგრამ პასუხი ჯერაც არ მიუღიათ.

3 ნოემბერს ჩატარებულ საინფორმაციო შეხვედრაზე განცხადება თავიდან დაიწერა. კოლექტიურ ცენტრში მცხოვრები ოჯახები განცხადებას ხელს მოაწერენ და სამინისტროსგან ოფიციალურ   პასუხს დაელოდებიან.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

   

მონაწილეთა რაოდენობა: 10 ქალი 22-დან 60 წლამდე.

პირველად მონაწილეობდა: 7 ადამიანი.

ფსიქოლოგის საუბრის თემა: აგრესია, მისი ფორმები, სახეები და მიზეზები.

იურისტის საუბრის თემა: შესწორებები კანონში ძალადობის წინააღმდეგ.

თემები ერთმანეთთან იყო დაკავშირებული. აგრესია არის გზა ძალადობისკენ. და -კანონი, რომელიც 2006 წელს მიიღეს, ჯერაც განიცდის ცვლილებებს და კიდევ ვერ გახდა მძლავრი მექანიზმი ძალადობის წინააღმდეგ.

მონაწილეები ერთხმად ამბობდნენ, რომ ჩვენი საზოგადოება აგრესიულია. რომ სისასტიკე, ღვარძლი, თავხედობა, შური, ბოროტება, ყვირილი - ჩვენი ურთიერთობის სიმპტომებია. რისი შეცვლაა შესაძლებელი? როგორ? რისი გაკეთება შეუძლიათ ქალებს? - სწორედ ამაზე საუბრობდნენ ფსიქოლოგისა და იურისტის შეხვედრაზე სენაკის ქალთა მხარდაჭერის ცენტრში.

ქალებმა არა მარტო ახალი ინფორმაცია მიიღეს, არამედ პრაქტიკული რჩევებიც და პასუხებიც მათთვის საინტერესო კითხვებზე.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

3 ნოემბერს ფონდი „სოხუმის“ იურისტმა ჩაატარა საინფორმაციო-საკონსულტაციო შეხვედრა ქუთაისში, სასტუმრო „ხვამლის“ კოლექტიურ ცენტრში მცხოვრებ დევნილებთან. მათ მიიღეს კონსულტაცია საცხოვრებელი პრობლემების მოგვარებასთან დაკავშირებით. შეხვედრის მონაწილეებს მიეწოდათ ინფორმაცია ოჯახში ძალადობის პრობლემის, მისი აღკვეთის მექანიზმებისა  და პრევენციის შესახებ.

ამას გარდა, ისინი გაეცნენ ანდერძთან დაკავშირებულ საკითხებს (კანონით მემკვიდრეობა, ანდერძით მემკვიდრეობა, შინაურული ანდერძი, დახურული ანდერძი, სავალდებულო წილი და სხვ.).

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

     

აფხაზეთის ავტონომიური რესპუბლიკის მე-5 და მე-6 სკოლების (ქუთაისი) მოსწავლეებთან ფონდმა „სოხუმმა“ ჩაატარა ოთხ-ოთხი ვორკშოპი „კონფლიქტების მართვის სწავლება სკოლაში“.

მოსწავლეებმა ინტერესით განიხილეს, რა არის მშვიდობა, რასთან ასოცირდება მათთვის მშვიდობა (ფერებთან, მუსიკასთან), მიეცათ განმარტება კონფლიქტზე, მის დადებით და უარყოფით მხარეებზე, კონფლიქტის წარმოქმნის მიზეზებზე და გაეცნენ მისი მართვის უნარ-ჩვევებს.

ეს ვორკშოპები დაეფუძნა სომეხი კოლეგების გამოცდილებას და მეთოდიკას (შემუშავდა ორგანიზაციაში „ქალები განვითარებისათვის“).

აქტიური მუშაობის დასრულების შემდეგ ბავშვებმა კმაყოფილებაც გამოხატეს და უკმაყოფილებაც. კმაყოფილება იმის გამო, რომ აქტუალური, საჭირო და აუცილებელი თემები განიხილეს და კონფლიქტების მართვის პრაქტიკული უნარ-ჩვევები გამოიმუშავეს.

უკმაყოფილონი დარჩნენ იმის გამო, რომ ცოტა დრო იყო განკუთვნილი ასეთი საინტერესო მუშაობისთვის, თუმცა იმედი აქვთ, რომ ვორკშოპები განახლდება.

ვორკშოპები მოეწონათ პედაგოგებსაც და მათ გადაწყვიტეს, სამოქალაქო განათლების  რამდენიმე საათი დაუთმონ კონფლიქტების მართვას.

 

2 ნოემბერს ჰააგაში, ნიდერლანდებში, გაიმართა WAVE-ის (ევროპელი ქალები ქალთა მიმართ ძალადობის წინააღმდეგ) ქსელის მე-17 კონფერენცია - „ქალების ერთიანი ძალა - ძალადობის შესაჩერებლად!“

ქსელი შედგება 92 წევრისგან - ევროპის ქვეყნების ქალთა ორგანიზაციები და ქსელები. კონფერენციაში მონაწილეობდნენ ორგანიზაციები 50 ქვეყნიდან. საქართველოს წარმოადგენდა ფონდი „სოხუმი“.

გაეროს სპეციალური მომხსენებელი ქალთა მიმართ ძალადობასთან დაკავშირებულ საკითხებზე დუბრავკა სიმონოვიჩი შეეხო ძალადობის მიზეზებსა და შედეგებს, ქალების დაცვის საერთაშორისო მექანიზმებს, მათ შორის - კონვენციას ქალთა მიმართ ყველა ფორმის დისკრიმინაციის ლიკვიდაციის შესახებ და სტამბულის კონვენციას.

წარმოდგენილი იყო მოკლე პრეზენტაციები რამდენიმე ორგანიზაციის მუშაობის შესახებ. გაიმართა დისკუსიები და ვორკშოპები, რის შემდეგაც შემუშავდა რეკომენდაციები. კონფერენციის მეორე ნაწილი მიეძღვნა საერთო კრებას, ქსელი წარსდგა ფინანსური ანგარიშით და ჩატარდა გამგეობის არჩევნები მომდევნო ორი წლით. ამას გარდა, მოხდა კორინა სეიფის სახელობის ჯილდოს მინიჭება - ეს არის არაჩვეულებრივი ქალი, ფემინისტი, ქალთა მიმართ ძალადობისა და გენდერთან დაკავშირებული საკითხების მკვლევარი.

 

ოზურგეთის გენდერული საკონსულტაციო საბჭოს იურისტის საინფორმაციო-საკონსულტაციო შეხვედრების შედეგად რამდენიმე პრობლემა უკვე მოგვარდა. ჩანჩიბაძისა და ნიკოლაძის ქუჩაზე დასრულდა გზის სარეაბილიტაციო სამუშაოები, დაიგო  ასფალტის საფარი.

ამჯერად იურისტი შეხვდა ოზურგეთის მუნიციპალიტეტის სოფელ გაღმა დვაბზუს მცხოვრებლებს. შეხვედრაზე აღინიშნა, რომ გაღმა დვაბზუს მიმართულებით მიმავალი გზა ამორტიზირებულია. ასევე სკოლის მიმდებარე გზაზე უნდა გაკეთდეს  შემაფერხებელი  ბარიერი, რომელიც მძღოლებს აიძულებს გზის ამ მონაკვეთში ნელა იარონ.

შეხვედრაზე გაიცა სამოქალაქო, სოციალური და  ადმინისტრაციული სამართლის სახის კონსულტაციები.  

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

   

თბილისში გაიმართა ორდღიანი კონფერენცია, რომელიც ადგილობრივ თვითმმართველობებში გენდერული თანასწორობის პრინციპების დანერგვას მიეძღვნა (ორგანიზატორები: გაეროს ქალთა ორგანიზაცია, ქალთა საინფორმაციო ცენტრი და ქალთა ფონდი „ტასო“).

მასში მონაწილეობა მიიღეს ფონდი „სოხუმის“ მიერ შექმნილმა გენდერულმა საკონსულტაციო საბჭოებმა.

პირველ დღეს მონაწილეებმა თვითმმართველობებში გენდერული თანასწორობისთვის აუცილებელ ინსტიტუციურ მექანიზმებზე იმსჯელეს და „ერთი ფანჯრის“ პრინციპის დანერგვისთვის ჩატარებული მუშაობის შედეგები შეაჯამეს.

კონფერენციის მეორე დღე გენდერულად მგრძნობიარე ბიუჯეტირების განხილვას დაეთმო. ქუთისის, სენაკის, ოზურგეთის და ბათუმის გენდერული საკონსულტაციო საბჭოების წარმომადგენლებმა კონფერენციის მონაწილეებს გაუზიარეს საკუთარი გამოცდილება, რომელიც ეხებოდა გენდერული ბიუჯეტირების პრინციპების დანერგვას, ადგილობრივი გენდერული პოლიტიკის სამოქმედო გეგმებს.

ითქვა, რომ არსებული გენდერული საბჭოების პრაქტიკა საუკეთესო დასაბუთებაა მომზადებული საკანონმდებლო ცვლილებების დროულად მისაღებად.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

 

ქალაქ ქუთაისის მერიის დარბაზში, ფონდი „სოხუმის“ ორგანიზებით, შეიკრიბნენ საკრებულოს დეპუტატები, სამართალდამცავი სტრუქტურებისა და არასამთავრობო ორგანიზაციების წარმომადგენლები, იურისტები, ფსიქოლოგები, სოციალური მუშაკები, პედაგოგები, ჟურნალისტები - ადამიანები, რომელთაც უშუალო შეხება აქვთ ოჯახში ძალადობასთან.

აქტიური დისკუსია გაიმართა ძალადობისაგან დაცვის ეროვნული ქსელის მიერ მომზადებულ ცვლილებებთან დაკავშირებით საქართველოს ორგანულ კანონში „ადგილობრივი თვითმმართველობის კოდექსი“ და საქართველოს კანონში „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ“.

შეხვედრა მიყავდათ ძალადობისაგან დაცვის ეროვნული ქსელის წარმომადგენლებს. დაფიქსირდა მონაწილეთა გამოცდილება, მათი გულშემატკივრული დამოკიდებულება, კონკრეტული მაგალითები და საერთო აზრი: ადგილობრივი თვითმმართველობა აუცილებლად უნდა ჩაერთოს ოჯახში ძალადობის პრევენციის და მსხვერპლთა დაცვის საქმეში. ეს მნიშვნელოვანია პრობლემის მოგვარებისათვის.

 

პროექტი ხორციელდება ძალადობისაგან დაცვის ეროვნული ქსელის მხარდაჭერით