გამოვიდა ელექტრონული საინფორმაციო ბიულეტენის მე-10 ნომერი. ის აჯამებს თვის განმავლობაში ჩატარებულ აქტივობებს პროექტში „ქალთა უფლებების გაძლიერება დასავლეთ საქართველოში“.

ნომერში მოთხრობილია ქუთაისის, ხონის, წყალტუბოს, სენაკის, ფოთისა და ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მუშაობისა და  წარმატებული შედეგების შესახებ.

ბიულეტენის მიხედვით, ოქტომბერში ჩატარდა 82 აქტივობა. მონაწილეობა მიიღო 995 ადამიანმა.

 

გადმოწერა

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

  

ოჯახში ძალადობის წინააღმდეგ გასატარებელ ღონისძიებებში ადგილობრივი თვითმმართველობის ორგანოების ჩართვის უზრუნველყოფის მიზნით, ძალადობისაგან დაცვის ეროვნულმა ქსელმა მოამზადა ცვლილებები საქართველოს ორგანულ კანონში „ადგილობრივი თვითმმართველობის კოდექსი“ და საქართველოს კანონში „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ“.

28 ოქტომბერს ფონდ„სოხუმში“ ჩატარდა სამოქალაქო დებატები, სადაც აქტივისტი ქალბატონები გაეცნენ კანონპროექტებს. მათ აღნიშნეს, რომ ადგილობრივი თვითმმართველობის ჩართვა ოჯახში ძალადობის პრევენციის და მსხვერპლთა დაცვის კუთხით ძალიან მნიშვნელოვანია, ვინაიდან ადგილობრივი თვითმმართველობა დეტალურად ფლობს ინფორმაციასადგილზე არსებული საჭიროებების შესახებ.

 

პროექტი ხორციელდება ძალადობისაგან დაცვის ეროვნული ქსელის მხარდაჭერით 

  

ოქტომბრის მეორე ნახევარში ჩატარდა ჯგუფური ფსიქოლოგიური შეხვედრები ქუთაისის 5 კოლექტიურ ცენტრში 42 ქალბატონის მონაწილეობით (მათი ასაკი  23-დან 65 წლამდე). მათგან 4 პირველად ესწრებოდა მსგავს შეხვედრას. გაიმართა აგრეთვე ინდივიდუალური კონსულტაციები კონფლიქტური სიტუაციების საკითხებზე. შეხვედრების ძირითადი თემა იყო საუბარი ოჯახურ კრიზისებზე და მათი დაძლევის გზებზე.

ერთ-ერთმა მონაწილემ აღნიშნა, რომ ეს არის გულითადი საუბრების,  ფინჯანი ყავის ერთად დალევის და საჭირბოროტო პრობლემებისგან განტვირთვის შესაძლებლობა. ეს არის იმის შეხსენება, რომ ქალს აქვს უფლება, იფიქროს თავის სულიერ სიმშვიდეზე ოჯახის კეთილდღეობისათვის.

 

პროექტი ხორციელდება ორგანიზაცია

BrotfürdieWelt – Evangelischer Entwicklunsdienst მხარდაჭერით (გერმანია)

გადაცემა რადიო „რიონის“ ეთერით იყო შეჯამება ფონდი „სოხუმის“ პროექტისა  „ადგილობრივი ხელისუფლების პოლიტიკის შეცვლა გენდერულ ბიუჯეტირებასთან  მიმართებაში“. სტუდია, „დიალოგში“ სასაუბროდ მიწვეულნი იყვნენ პროექტის მონაწილეები - პროექტის კოორდინატორი, გენდერული საკონსულტაციო საბჭოს წევრი, ერთ-ერთი ბაგა-ბაღის მეთოდისტი და ტელეკომპანია „რიონის“ ჟურნალისტი.

გადაცემის მსვლელობისას იყო საუბარი პროექტის ფარგლებში მიმდინარე აქტივობებზე, ბაგა-ბაღებში ჩატარებულ სამუშაოზე, ადგილობრივ თვითმმართველობასთან თანამშრომლობაზე  და სამომავლო პერსპექტივებზე. განსაკუთრებით აღინიშნა პროექტის კეთილი გავლენა მის მონაწილეებზე და ქალაქის გენდერულ პოლიტიკაზე. გამოიკვეთა გენდერული საკონსულტაციო საბჭოს მიერ ინიცირებული წინადადებები, რომლებიც მომზადდა საკრებულოში წარსადგენად და, სავარაუდოდ, გათვალისწინებული იქნება 2016 წლის ბიუჯეტში.

 

პროექტი ხორციელდება ჩეხეთის არასამთავრობო ორგანიზაცია

„დამოუკიდებელი სოციალურ-ეკოლოგიური მოძრაობის“ მხარდაჭერით 

 

ოზურგეთში ჩატარდა ამომრჩეველ ქალთა კლუბის სხდომა, რომელსაც სხვადასხვა  სფეროს წარმომადგენელი ქალბატონები ესწრებოდნენ. ისინი შეხვდნენ ქალაქ ოზურგეთის მუნიციპალიტეტის მერიის სოციალური დაცვის სამსახურის უფროსს თამარ დუმბაძეს. მისი თქმით, მოსახლეობაში, სამწუხაროდ, ინფორმაციის ნაკლებობაა, ბევრმა არც იცის სოციალური პროგრამების შესახებ. 

შეკრებილი ქალბატონებისთვის სიახლე იყო ის, რომ ქალაქში ბენეფიციარებს, რომელთაც 150000 ქულამდე აქვთ, შეუძლიათ 150-ლარიანი დახმარების მიღება, ასევე არის პროგრამები, რომლის ფარგლებში სოციალური სამსახური ოპერაციის დროს გასცემს 30%-იან დაფინანსება.

ქალბატონებმა პასუხი მიიღეს  მათთვის საინტერესო ბევრ კითხვაზე.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

ოზურგეთის გენდერული საკონსულტაციო საბჭო შეხვდა მუნიციპალიტეტის დეპუტატებს და იმ სკოლების პედაგოგებსა და მოსწავლეებს, სადაც ხორციელდება ადგილობრივი თვითმმართველობის მიერ დაფინანსებული პროექტი „ახალგაზრდები გენდერული პოლიტიკის ხელშეწყობისათვის“.

პედაგოგებმა პროექტი დადებითად შეაფასეს. საუბარი შეეხო მის მნიშვნელობას. იმას, რომ ახალგაზრდებს საშუალება აქვთ, მიიღონ არაფორმალური განათლება გენდერისა და ძალადობის საკითხებში და გააქტიურდნენ.

სკოლების წარმომადგენლებს მიეწოდათ ინფორმაცია ქალთა მიმართ ძალადობის წინააღმდეგ დაგეგმილი 16-დღიანი კამპანიის შესახებ, მათ  კამპანიაში ჩართვის სურვილი გამოთქვეს.

ამავე დღეს გაიმართა შეხვედრა იმ ჯგუფთან, რომელიც მუშაობს 2016 წლის ბიუჯეტში საბჭოს მიერ შემუშავებული გენდერული საკითხების ინტეგრირებაზე. აღინიშნა, რომ წინა წელთან შედარებით ამ კუთხით მეტი მზაობაა ადგილობრივი ხელისუფლების მხრიდან.

 

    

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

  

21 ოქტომბერს ტელეკომპანია „რიონის“ ეთერში ტელეგადაცემა გავიდა, რომელმაც მაყურებელს გააცნო ქუთაისის გენდერული საკონსულტაციო საბჭოს მიერ გაწეული საქმიანობა 2016 წლის ბიუჯეტში გენდერული კომპონენტების ინტეგრირებისათვის.

გადაცემისთვის მომზადებულმა ტელესიუჟეტმა საბჭოს რეკომენდაციებისადმი ქუთაისის საკრებულოსა და მერიის მესვეურთა კონსტრუქციული დამოკიდებულება გამოკვეთა და თვალსაჩინო გახადა ის საკითხები,  რომლებიც ახალ ბიუჯეტში აისახება. მათ შორის გენდერული კომპონენტების გათვალისწინება სოციალურ ინფრასტრუქტურაში, აუტიზმით დაავადებული ბავშვების დახმარების პროგრამები და სხვა.  თვითმმართველობის წევრების განცხადებით, საბჭოს  ახალი ინიციატივები აუცილებლად წაადგება ქალაქს.  

გადაცემაზე  საბჭოს წევრების მიერ ხაზგასმული იყო თვითმმართველობასთან ურთიერთობის ახალ, უფრო პროდუქტიული თანამშრომლობის რეჟიმში გადასვლა. ამისი დასტური - მერიის მიერ საბჭოში საკუთარი წარმომადგენლის დელეგირება, რაც უფრო მჭიდრო კომუნიკაციის შესაძლებლობას იძლევა.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

   

დასრულდა ფონდი „სოხუმის“ პროექტი  ჩეხეთის არასამთავრობო ორგანიზაცია „დამოუკიდებელი სოციალურ-ეკოლოგიური მოძრაობის“ (Nesehnuti) მხარდაჭერით.

აქტიურად და საინტერესოდ წარიმართა შემაჯამებელი მრგვალი მაგიდა, რომელსაც ესწრებოდნენ  ააიპ „ქალაქ ქუთისის ბაგა-ბაღების გაერთიანების“ წარმომადგენლები, ბაღების ხელმძღვანელები, აღმზრდელები, საკრებულოს დეპუტატები, ქუთაისის გენდერული საკონსულტაციო საბჭოს წევრები და ამომრჩეველ  ქალთა კლუბის წევრები.

შეკრებილებს მიეწოდათ ინფორმაცია პროექტით შესრულებული აქტივობების შესახებ: ბაღებში ჩატარებული საინფორმაციო შეხვედრები, შეხვედრები პარლამენტის დეპუტატთან - გუბაზ სანიკიძესთან და ქალაქის მერთან - შოთა მურღულიასთან, რადიო და ტელესიუჟეტები. მათ გაიგეს გენდერული საკონსულტაციო საბჭოს  მიერ შემუშავებული გენდერული პოლიტიკის შესახებ. გამოითქვა წინადადებები და რეკომენდაციები  ადგილობრივი თვითმმართველობის მისამართით. 

შეკრებილების თქმით, ყოველი რეკომენდაცია, რომელსაც გაითვალისწინებენ  მომავალი წლის ბიუჯეტში, წინგადადგმული ნაბიჯი იქნება.

 

პროექტი ხორციელდება ჩეხეთის არასამთავრობო ორგანიზაციის

„დამოუკიდებელი სოციალურ-ეკოლოგიური მოძრაობის“  მხარდაჭერით 

წყალტუბოს, სენაკის, ფოთისა და ხონის ქალთა მხარდაჭერის ცენტრებში ჩატარდა იურიდიული კონსულტაციები, რომელთაც ესწრებოდნენ დევნილი და ადგილობრივი ქალბატონები. შეხვედრებზე განხილულ იქნა სხვადასხვა თემა: მსხვერპლის სტატუსის მინიჭების პროცედურები, განქორწინება, ალიმენტის დანიშვნის წესები. ხურჩის ქალთა მხარდაჭერის ცენტრში იურიდიული კონსულტაცია მიეძღვნა საზღვრის უკანონო გადაკვეთის პრობლემებს. ქალთა მხარდაჭერის ცენტრების იურისტებმა დეტალური განმარტებები მისცეს შეხვედრის მონაწილეებს მათთვის საინტერესო საკითხებზე. ჩატარდა ინდივიდუალური კონსულტაციებიც.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

პიროვნული ღირებულებები, მენტალიტეტი და მისი გავლენა ოჯახურ კონფლიქტებზე - ამ საკითხის გარჩევამ ცხარე დისკუსიები გამოიწვია ახალგაზრდებთან გამართულ კონფლიქტოლოგიის ვორკშოპებზე. მოსაზრებები, ძირითადად, ორ ნაწილად გაიყო. ერთი ნაწილი მიიჩნევს, რომ  ხშირად ქართული მენტალიტეტი ხელს უწყობს ოჯახებში ძალადობის განვითარებას. არგუმენტად დასახელდა ის, რომ ოჯახის უფროსობა მენტალიტეტით მამაკაცს აკისრია და ამ უფლების დაკნინებას ის  ვერ ეგუება - ეს შიში იმდენად ძლიერია, რომ ძალადობის  ყველა ფორმის გამოყენება ხდება.

ახალგაზრდების მეორე ნაწილის აზრით, მენტალიტეტი ყველაფერში დამნაშავე არ არის. ხშირად ოჯახის წევრები ცუდად იცნობენ ერთმანეთს, პატივს არ სცემენ ერთმანეთის ღირებულებებს - ეს ხელს უწყობს ძალადობის განვითარებას.

განსხვავებული მოსაზრებების მიუხედავად, ახალგაზრდებმა დააფიქსირეს, რომ მსგავსი შეხვედრები ხელს უწყობს სწორი აზროვნების ჩამოყალიბებას და შეამცირებს ოჯახური კონფლიქტების განვითარების საფრთხეს.

ვორკშოპები ჩატარდა ხონში, ქუთაისში, ფოთში. სულ 41 მონაწილე ესწრებოდა.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)