მორიგ შეხვედრაზე ქუთაისის ქალთა საინიციატივო ჯგუფის წევრებმა სამოქმედო გეგმას გადახედეს და შესრულებული სამუშაოები შეაფასეს. პრობლემა, რომელიც კონფლიქტურ სიტუაციას ქმნიდა კონკრეტულ თემში, ადგილობრივ ხელისუფლებასთან თანამშრომლობით უკვე გადაიჭრა. 

- ჩვენ უნდა შევძლოთ ისეთი ინიციატივების განხორციელება, რომლებიც ხელს შეუწყობს საზოგადოებაში წარმოქმნილი დაპირისპირების დაბალანსებას ადრეულ სტადიაში და შექმნის არაკონფლიქტურ გარემოს, - აღნიშნეს ჯგუფის წევრებმა.    

საინიციატივო ჯგუფი მომდევნო თვეში იმ პრობლემების ადვოკატირებაზე იმუშავებს, რომელიც  საინფორმაციო შეხვედრების დროს გამოიკვეთა სხვადასხვა თემში.

შეხვედრა ქუთაისში მე-17 ბიბლიოთეკაში გაიმართა.

ქალთა კოალიციამ „ქალი და მშვიდობა“ - ადამიანის უსაფრთხოებისათვის კონფლიქტურ სიტუაციაში დაადასტურა ერთად მოქმედების სურვილი და ჩაატარა მუშაობა კოალიციის გაფორმების კუთხით, შეიმუშავა და მიიღო: კოალიციის დებულება, სტრატეგია და 01.05.18 - 30.04.19 პერიოდის სამოქმედო გეგმა.

კოალიციის საქმიანობა მიმართულია იმისკენ, რომ საზოგადოებაში გაიზარდოს ინფორმირების დონე კონფლიქტისა და კრიზისული სიტუაციების  პრევენციაში  ქალის როლის მნიშვნელობის შესახებ.

- კრიზისული სიტუაციების მართვა, ურთიერთობის გაუმჯობესება წყვილებში ინდივიდუალური სქემის გამოყენებით - ფონდი „სოხუმის“ ფსიქოლოგმა და კონფლიქტოლოგმა ამგვარად კონსულტაცია სამ წყვილთან  ჩაატარეს.

მუშაობის სპეციფიკიდან გამომდინარე, შეხვედრიდან შეხვედრამდე წყვილებთან ურთიერთობა ონლაინ გაგრძელდება.

პიროვნული კონფლიქტები და მათი მართვის მექანიზმები - ეს თემა განიხილებოდა სენაკში, ქუთაისში, ოზურგეთსა და ლანჩხუთში ჩატარებულ ვორკოპებზე.

დისკუსიებზე დაფიქსირდა, რომ ახალგაზრდებს უჭირთ ემოციების მართვა, რაც შინაგან კონფლიქტებს უკავშირდება. მათი აზრით, თუ შინაგანად აგრესიული და გაღიზიანებული ხარ, გიჭირს ადამიანებთან ურთიერთობა და ხელს უწყობ კონფლიქტების განვითარებას. 

მონაწილეთა აზრით, ახალგაზრდებში აგრესიის მაჩვენებელი რომ შემცირდეს, აუცილებელია პიროვნული კონფლიქტების მართვა, რაც მხოლოდ ინფორმირებით არის შესაძლებელი.    

ხონის ქალთა მხარდაჭერის ცენტრმა დაიწყო მცირე პროექტის „ახალგაზრდები არაძალადობრივი გარემოსათვის“ განხორციელება. პროექტის ფარგლებში მომზადდა საინფორმაციო ფურცლები და პრეს-რელიზი პროექტის შესახებ. უკვე ჩატარდა პირველი საინფორმაციო შეხვედრა მუნიციპალიტეტის საფინანსო-საბიუჯეტო კომისიის თავმჯდომარესთან.

აგვისტოს მეორე ნახევარში ახალგაზრდული კლუბის საინფორმაციო შეხვედრები ჩატარდა სენაკში, ოზურგეთში, ქუთაისში, ლანჩხუთში. იყო თემის  „ოჯახში ძალადობის პრევენცია, დაცვის მექანიზმები, საზოგადოების როლი“ განხილვა, განსხვავებული ხედვები, ახალგაზრდების აქტიური ჩართულობა.

მონაწილეთა მოსაზრებები:

„ბევრი რამ ვისწავლე კლუბში. არ მეგონა, თუ ასეთი ინტერესი გამიჩნდებოდა“.

„ჩემთვის მნიშვნელოვანია მსგავსი თავისუფალი შეხვედრების ჩატარება“.

„არაფორმალური განათლება დადებით ცვლილებებს იწვევს მოზარდებში, მე ამის ნათელი მაგალითი ვარ“.

ფონდი „სოხუმის“ ფორუმ-თეატრმა ორი წარმოდგენა გამართა აგვისტოში. პირველ წარმოდგენას წყალტუბოს ცენტრალურ პარკში ადგილობრივი მოსახლეობა და დამსვენებლები დაესწრნენ. ნაჩვენები ხუთი სცენიდან ყველაზე შთამბეჭდავი აღმოჩნდა ოჯახური (ცოლ-ქმარი, დედა-შვილი) ძალადობის სცენები. საინტერესო იყო ჩართულობა მაყურებლებისა, რომელთაც შეძლეს კონფლიქტური სიტუაციების დარეგულირება. 

ოზურგეთის ქალაქის ცენტრში ფორუმ-თეატრი პირველად გამოვიდა, ამიტომ გაჩნდა  ბევრი შეკითხვა. გათამაშდა 6 სცენა. პირველმა სცენამ ცოტათი დააფრთხო მაყურებელი, მეორე სცენის შემდეგ კი აქტიური დისკუსიები დაიწყო. იყო აზრთა სხვადასხვაობა, თუმცა ყველა მიიჩნევს, რომ ნებისმიერი სახის ძალადობა დაუშვებელია.

ქალთა მხარდაჭერის ცენტრებმა აგვისტოშიც ჩვეული  გრაფიკით იმუშავეს. მობილიზატორებმა ჩაატარეს 27 საინფორმაციო შეხვედრა 9 მუნიციპალიტეტში - ქუთაისი, ხონი, წყალტუბო, თერჯოლა, სენაკი, ფოთი, ზუგდიდი, ოზურგეთი და ლანჩხუთი.

შეხვედრები ჩატარდა ქალაქებსა და სოფლებში, დევნილთა კოლექტიურ ცენტრებში, სამედიცინო დაწესებულებებში, ადგილობრივ თვითმმართველობებში.

შეხვედრებზე განხილული იყო ადგილობრივი თვითმმართველობის პროგრამები ძალადობის მსხვერპლის მხარდაჭერისათვის.

აგვისტოში წყალტუბოს ქალთა მხარდაჭერის ცენტრმა დაიწყო მცირე პროექტი  „ოჯახი ძალადობის გარეშე“. პროექტის ფარგლებში გაიმართა საინფორმაციო შეხვედრები თვითმმართველობის წარმომადგენლებთან: მუნიციპალიტეტის მერის მოადგილესთან, გენდერული თანასწორობის საბჭოს თავმჯდომარესთან, გენდერული საბჭოს მდივანთან, მერის წარმომადგენლებთან ახალ უბანსა და თერნალში.

შეხვედრებზე გავრცელდა ინფორმაცია პროექტზე, განისაზღვრა სამომავლო გეგმები.

ძალადობის მონიტორინგის 7 ანკეტა შეივსო აგვისტოში ქუთაისის, წყალტუბოს, სენაკის, ფოთის, ოზურგეთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებში. მობილიზატორებმა ანკეტებში აღწერეს რეალური შემთხვევები - ძალადობა ოჯახის წევრების, განსაკუთრებით კი ქმრის მხრიდან. მათ 4 ქალი კონსულტირებისათვის ფსიქოლოგთან გადაამისამართეს, ერთი კი იურისტის კონსულტაციას მიიღებს.