„ჩემთვის აუცილებელია კლუბის შეხვედრებში მონაწილეობა, რადგან ბევრი კომპლექსი მეხსნება და უფრო აქტიური ვხდები“, - ეს ახალგაზრდული კლუბების საინფორმაციო შეხვედრების ერთ-ერთი მონაწილის სიტყვებია.

სექტემბერში კლუბებში 9 შეხვედრა გაიმართა თემაზე: „გენდერული ძალადობა. ფორმები, სახეები და დაცვის მექანიზმები ძალადობის პრევენციისთვის“. ბოლო სამი შეხვედრა ჩატარდა გვიშტიბში (წყალტუბოს მუნიციპალიტეტი), ხაჯალიაში (ლანჩხუთის მუნიციპალიტეტი), ანასეულში (ოზურგეთის მუნიციპალიტეტი).

ამ სკოლებში პირველად ჩამოყალიბდა ახალგაზრდული კლუბები. ამიტომ მონაწილეები გაეცნენ ინფორმაციას ფონდ „სოხუმზე“, კლუბებზე და გაუჩნდათ თანამშრომლობის სურვილი.

თემის განხილვა აქტიურად წარიმართა. მოსწავლეებმა ისაუბრეს სტერეოტიპულ აზროვნებაზე, ცხოვრებისეულ მაგალითებზე, პრევენციის აუცილებლობაზე. კლუბების ახალ წევრებს აქვთ მოტივაცია, ჩაერთონ მუშაობაში და შედგომში თანატოლებს შორის გაავრცელონ მიღებული ინფორმაცია.

21 სექტემბერი მშვიდობის საერთაშორისო დღეა. ფონდი „სოხუმი“ ყოველწლიურად უერთდება მშვიდობის საერთაშორისო დღისადმი მიძღვნილ კამპანიას. ფონდი „სოხუმის“ ქალთა მხარდაჭერის ცენტრებმა და ახალგაზრდულმა კლუბებმა ჩაატარეს სამშვიდობო გაკვეთილები და აქციები დასავლეთ საქართველოს 9 მუნიციპალიტეტში: ქუთაისში, ხონში, წყალტუბოში, თერჯოლაში, ლანჩხუთში, ოზურგეთში, სენაკში, ფოთსა და ზუგდიდში.

და ჩვენს გვერდზეც მეტად შთამბეჭდავი ფოტორეპორტაჟი გამოვიდა სამშვიდობო მოწოდებებით: „მშვიდობა ყველას!“, „მშვიდობა შინ და მშვიდობა გარეთ“, „ჩვენ გვინდა მშვიდობა!“

- მიმუშავია არასამთავრობო ორგანიზაციებთან, მომწონს თქვენი ფორმატი და მინდა, ჩემმა მოსწავლეებმაც მოგისმინონ.

- არაფორმალური განათლება ყველაზე მეტად სჭირდებათ ახალგაზრდებს. მზად ვართ, ვითანამშრომლოთ ამ მიმართულებით.

ასეთი სიტყვებით დაიწყო ფონდი „სოხუმის“ თანამშრომლობა სკოლების დირექტორებთან ნიგვზიანში (ლანჩხუთის მუნიციპალიტეტი), გუმბრინში (წყალტუბოს მუნიციპალიტეტი), დვაბზუში (ოზურგეთის მუნიციპალიტეტი). ახალი სტრატეგიით, შერჩეულ სკოლებში მოსწავლეები ხუთთვიან კურს გაივლიან კონფლიქტების მართვის საკითხებზე. კურსის დამთავრების შემდეგ ყველა სკოლაში შეიქმნება ლიდერთა ჯგუფი, რომელიც ამ თემებზე გააგრძელებს დისკუსიას სხვადასხვა ჯგუფთან.

პირველივე შეხვედრიდან გამოიკვეთა მოსწავლეთა დაინტერესება. მათ გააჟღერეს საკუთარი ინიციტივებიც, რაც სამომავლო სტრატეგიაში  შევა.

სასწავლო პროცესის დაწყების პარალელურად ვაჟებთან ახალი 6-თვიანი სამუშაო პერიოდი დაიწყო. პირველი შეხვედრები გაიმართა სენაკის, ზუგდიდის, ქუთაისისა და ხონის მუნიციპალიტეტებში. შეხვედრები მოიცავდა საინფორმაციო ნაწილს და ასევე გარკვეული დრო დაეთმო ძალადობის საკითხების განხილვას. ვაჟები თავად აღიარებენ საკითხის პრობლემურობას, აქვთ საკუთარი მოსაზრებები, რომელთაც ღიად აფიქსირებენ. პირველმა თვემ მოსალოდნელზე კარგად ჩაიარა. ახალ ჯგუფებში არიან მოტივირებული და მიზანდასახული მოზარდები  და მათთან მუშაობა კარგ შედეგს გამოიღებს.

სულ რამდენიმე თვეა, ფონდ „სოხუმის“ ჩრდილების თეატრის რეპერტუარში გაჩნდა სპექტაკლი „თალგამი“. „თალგამი“, ისევე როგორც წინა წარმოდგენა „პირიმზე“ - არის სიკეთეზე, მეგობრობაზე, თანასწორობაზე, თანადგომაზე. პატარა მაყურებელს ორივე წარმოდგენა ძალიან მოსწონს.

სექტემბერში ფონდის ოფისში ორჯერ გაიმართა „თალგამის“ ჩვენება. მოწვეულმა  ბავშვებმა ძალიან იხალისეს - მოეწონათ უჩვეულო და ახალი გარემო, მუსიკა,   კეთილი ფინალი.

წარმოდგენის დამთავრების შემდეგ მსახიობები ბავშვებს ესაუბრნენ ზღაპრის პერსონაჟებზე, მეგობრობაზე და იმაზე, რომ ერთად ყოფნით ყველა პრობლემის მოგვარება  შეიძლება.

 პროექტის „სამედიცინო პერსონალის გაძლიერება ოჯახში ძალადობის პრევენციისათვის" ფარგლებში ფონდი „სოხუმის“ წარმომადგენლები სამედიცინო კლინიკა „უნიქალ მედის“ დირექტორს - შოთა მარუაშვილს შეხვდნენ და პროექტის შესახებ ინფორმაცია მიაწოდეს.

- რამდენად მაღალია მომართვიანობა, როგორ ხდება ძალადობის მსხვერპლთა იდენტიფიცირება და შესაბამისი რეაგირება სამედიცინო პერსონალის მიერ, - საუბარი ამ საკითხებზე გაიმართა.

კლინიკის დირექტორი მზადყოფნას გამოთქვამს, აქტიურად ითანამშრომლოს ფონდ „სოხუმთან“ და ჩაერთოს სატრენინგო პროგრამაში, რომელიც მიზნად ისახავს სამედიცინო პერსონალის ინფორმირებას ოჯახური ძალადობის პრევენციის საკითხებზე.

„ნუ მოითმენ, დაარღვიე დუმილი“ - ასე ჰქვია ხურჩა/კოკის ქალთა მხარდაჭერის ცენტრის მცირე პროექტს. მისი მიზანია, ინფორმირებით და სამართლებრივი დონის ამაღლებით ხელი შეუწყოს ქალთა მიმართ და ოჯახში ძალადობის შემთხვევების  შემცირებას ზუგდიდის მუნიციპალიტეტის სოფლებში. პროექტის ფარგლებში ჩატარდა საინფორმაციო შეხვედრები ადგილობრივი თვითმმართველობის წარმომადგენლებთან და მერის წარმომადგენელთან სოფელ კახათში. ოჯახში ძალადობაზე და მის გამომწვევ მიზეზებზე შეხვედრები გაიმართა კოკსა და კახათში მცხოვრებ ქალებთან.

წყალტუბოს ქალთა მხარდაჭერის ცენტრის მცირე პროექტის ფარგლებში ჩატარდა საინფორმაციო შეხვედრები ადგილობრივი თვითმმართველობის წარმომადგენლებთან - კერძოდ, მერის მოადგილესთან, საკრებულოს სოფლის დეპუტატებთან, მერიის სოციალური და ჯანდაცვის განყოფილებაში. ადგილობრივი თვითმმართველობის წარმომადგენლები გაეცნენ პროექტის აქტივობებს. დაიგეგმა ტრენინგი, სადაც მონაწილეობას მიიღებენ: მერის წარმომადგენლები სოფლებში, სოფლის ექიმები, სკოლის პედაგოგები, საბავშვო ბაღის პედაგოგები და აღმზრდელები. ტრენინგზე განხილული იქნება შემდეგი თემები: კანონი ოჯახში ძალადობის წინააღმდეგ, დამცავი მექანიზმები, რეფერირების სისტემა და ა.შ. მიღებული ინფორმაცია და გამოცდილება დაეხმარება ტრენინგის მონაწილეებს, აქტიურად ჩაერთონ ძალადობის პრევენციის პროცესში.

ფონდი „სოხუმის“ იურისტებთან შეხვედრებზე მონაწილეებმა ისაუბრეს ოჯახში ძალადობის აღკვეთის მიზნით შექმნილი კანონის იმ მუხლებზე, რომლებიც მათ პრობლემებს ეხება. ორი ინდივიდუალური კონსულტაცია გაიმართა ქუთაისში. იურისტებს მიმართეს ასევე დახმარებისთვის ხონში, სენაკში, ფოთსა და ოზურგეთში. მათ შორის იყვნენ ოჯახური წყვილები, რომლებიც ერთად ეძებენ გამოსავალს თავიანთი პრობლემებიდან.

18 სექტემბერს იურისტმა წყალტუბოს ქალთა მხარდაჭერის ცენტრში ჩაატარა ჯგუფური საინფორმაციო-საკონსულტაციო შეხვედრა, სადაც 13 ადამიანმა მიიღო საჭირო სამართლებრივი ინფორმაცია.

ფონდი „სოხუმის“ მონიტორინგის ჯგუფმა სექტემბერში მოძალადის რეაბილიტაციის საკითხის შესწავლა გადაწყვიტა. თვისობრივი ინფორმაციის შეგროვების მიზნით ჩატარდა ორი ჩაღრმავებული ინტერვიუ ქუთაისში, პრობაციის სააგენტოს პროგრამის „ძალადობრივი ქცევის მართვის“ ბენეფიციარსა და სააგენტოს ოფიცერთან. ფოთსა და წყალტუბოში კი გაიმართა ფოკუს-ჯგუფები, რომელსაც ესწრებოდნენ ადვოკატები, სოციალური მომსახურების სააგენტოს, პრობაციის ბიუროს და საზოგადოების წარმომადგენლები. შეხვედრებზე გამოიკვეთა ამ კუთხით არსებული გამოწვევები, ხაზი გაესვა პრობაციის პროგრამის ეფექტურობას. ერთსულოვანად დაფიქსირდა მოსაზრება, რომ აუცილებელია რისკ-ფაქტორის ოჯახებთან მუშაობა და განსაკუთრებით ისეთი პროგრამების ინიცირება, რომელიც  წყვილებთან მუშაობას მოიაზრებს.