ვაჟებთან მორიგი შეხვედრები ამჯერად ფოთში, ხონსა და ლანჩხუთში ჩატარდა. შეხვედრების თემად შეირჩა გენდერული თანასწორობა. შეკრებილებმა იმსჯელეს გენდერულ როლებზე, მამაკაცების დამოკიდებულებაზე თანასწორობის საკითხების მიმართ. მონაწილეები აქტიურად მუშაობდნენ ჯგუფებში, გამოხატავდნენ თავიანთ აზრს, კამათობდნენ. მათი აზრით, თანასწორობის მისაღწევად უმთავრესია სხვისი უფლებების პატივისცემა.

ანკეტირებით მიღებული მონაცემებით მოხდა კონფლიქტური სიტუაციების იდენტიფიცირება. იდენტიფიცირებული პრობლემებიდან სამი კრიზისული სიტუაცია შეირჩა და ანალიზი გაკეთდა კონფლიქტურ მგრძნობელობაზე.

კონფლიქტების ანალიზი საშუალებას იძლევა გაირკვეს, რა არის კონფლიქტის ობიექტი, ვინ არიან დაპირისპირებული მხარეები, რა ინტერესები გააჩნიათ, რა ფაქტორებმა შეიძლება გამოიწვიოს კონფლიქტის განვითარება და, რეალობიდან გამომდინარე, რა ალტერნატიული ვერსიები არსებობს პრობლემის დასაძლევად.

კონფლიქტური სიტუაციების ანალიზი ქუთაისის, წყალტუბოს, ზუგდიდის ქალთა საინიციატივო ჯგუფებს შესაძლებლობას მისცემს, ადვოკატირების გეგმა შეადგინონ და ეფექტურად იმუშაონ კონფლიქტების ადრეულ პრევენციაზე.

გრძელდება ვორკშოპები თემაზე: მოლაპარაკება, ფასილიტაცია, მედიაცია. 

- თუ კონფლიქტი ვერ გვარდება, ასეთ დროს აუცილებელია მესამე მხარე, მას უნდა შეეძლოს ორივე მხარის ინტერესების გათვალისწინება, - ასეთი პოზიცია ჰქონდათ ახალგაზრდებს ხონში ჩატარებულ შეხვედრაზე.

ფოთის მე-11 საჯარო სკოლაში მონაწილეები კონკრეტული ისტორიების ანალიზით შეეცადნენ საუბარს მოლაპარაკების მნიშვნელობასა და ფასილიტაციაზე. რამდენიმე მონაწილემ გულწრფელად აღიარა, რომ არა აქვს ფასილიტატორისთვის საჭირო უნარ-ჩვევები ამიტომ შუამავლობა არ გამოსდის.

როგორი უნდა იყოს მესამე მხარე? ამ საკითხზე პასუხის გაცემას დისკუსიით შეეცადნენ ლანჩხუთში ჩატარებულ ვორკშოპზე.

მონაწილეთა აზრით, ახალგაზრდების ინფორმირება ამ საკითხებზე მნიშვნელოვანია, რადგან მოლაპარაკებებით და ფასილიტაციით შესაძლებელია ნებისმიერი კონფლიქტის ტრანსფორმაცია.    

როგორც წინა თვეებში, მარტშიც ახალგაზრდული კლუბების 9 საინფორმაციო შეხვედრა ჩატარდა. ბოლო სამი შეხვედრა გაიმართა ფოთის, ხონის და სოფელ ლესას (ლანჩხუთის მუნიციპალიტეტი) საჯარო სკოლებში.

ქალთა სოლიდარობა, 8 მარტის ისტორია, ქალთა უფლებები, ძალადობის პრევენცია - განსახილველმა თემებმა  ბევრი კითხვა გამოიწვია და შეხვედრებზევე ეცადნენ გარკვევას.

ახალგაზრდები ინტერესით ჩაერთნენ დისკუსიაში, მაგალითები მოიყვანეს და აღნიშნეს, რომ მსგავსი საუბრები აუცილებელია უფროსი თაობისთვის, რომ მათ არ ჰქონდეთ სტერეოტიპული დამოკიდებულება გენდერული საკითხების მიმართ.

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

კოკი/ხურჩის ქალთა მხარდაჭერის ცენტრი თებერვლიდან წარმატებით ახორციელებს მცირე პროექტს „უთხარი არა ძალადობას - იყავი აქტიური!“ პროექტის ფარგლებში უკვე ჩატარდა საინფორმაციო შეხვედრები  ზუგდიდის მუნიციპალიტეტის სოფლების რწმუნებულებთან. მარტში კი გაიმართა ვორკშოპები ქალებისთვის ორ სოფელში -  ახალკახათსა და ორსანტიაში. ვორკშოპებზე განიხილეს ქალთა მიმართ ძალადობის საკითხი და არსებული სამართლებრივი მექანიზმები.

ორი წარმოდგენა გამართა ფონდი „სოხუმის“ ფორუმ-თეატრმა. თერჯოლის ახალგაზრდულ ცენტრში ითამაშეს 4 სცენა და 5 სცენა - სოფელ ლესას (ლანჩხუთის მუნიციპალიტეტი) საჯარო სკოლაში. წარმოდგენებს საინტერესო დისკუსიები მოყვა. პედაგოგებიც ჩაერთნენ. მათ ისაუბრეს ქალთა მიმართ ძალადობაზე, ერთ-ერთ ძირითად მიზეზად ეჭვიანობა დაასახელეს. ზოგიერთ მაყურებელს პროტესტი გაუჩნდა, რომ ოჯახებში მსგავსი რამ არ ხდება. თუმცა უმეტესობა მიიჩნევს, რომ პრევენციისთვის  მუშაობა  აუცილებელია და ფორუმ-თეატრი ამ მხრივ ეფექტური ფორმაა.

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

ფონდი „სოხუმის“ წყალტუბოს ქალთა მხარდაჭერის ცენტრი მუნიციპალიტეტის გენდერული თანასწორობის საბჭოსთან ერთად ახორციელებს პროექტს, რომლის მიზანია ჰარმონიული გარემოს შექმნა პატარებისათვის. პირველი ტრენინგი ჩაუტარდა საბავშვო ბაღების გაერთიანების ადმინისტრაციის წარმომადგენლებს, საბავშვო ბაღების მენეჯერებს და პედაგოგებს. მონაწილეებმა საინტერესო ინფორმაცია მიიღეს გენდერულ საკითხებზე საბავშვო ბაღის აღსაზრდელებთან მუშაობის კუთხით. პროექტის ფარგლებში დაგეგმილია კიდევ სამი ტრენინგი.