სარეაბილიტაციო სესიები ფსიქოლოგმა მანანა გოცირიძემ, ძირითადად, ონლაინ ჩაატარა: 9 სატელეფონო ზარი და 12 შეხვედრა ინტერნეტ პლატფორმებზე.
მუშაობა მიმდინარეობდა ქალთა ფონდი „სოხუმის“ ოფისშიც - გაიმართა 10 ფსიქოთერაპიული კონსულტაცია.
ყველა ბენეფიციარმა მიიღო სათანადო კომპეტენტური დახმარება, საჭირო ინფორმაცია და რჩევა. მათ შეძლეს ფოკუსირება პოზიტივზე.
ფსიქოლოგი აქტიურად მუშაობდა ფონდი „სოხუმის“ სარეაბილიტაციო ცენტრში, სადაც იმყოფებოდა სამი ქალი და ორი ბავშვი. წასვლის წინ ერთ-ერთმა მათგანმა განაცხადა: არ მინდოდა აქ ჩამოსვლა, მაგრამ ახლა ძალიან კმაყოფილი ვარ. ცენტრის თანამშრომლებმა სასიამოვნო, თბილი ოჯახური გარემო შეგვიქმნეს. ჩვენთან მუშაობდნენ ფსიქოლოგი, სოციალური მუშაკი, იურისტი. სიცოცხლის სიყვარული, რწმენა და სიხარული დამიბრუნეს. დიდი მადლობა!
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
26 მაისი საქართველოს დამოუკიდებლობის დღეა. ამ დღეს ქალთა ფონდმა „სოხუმმა“ სასტუმრო „არგოში“ დღესასწაული მოაწყო. შთამბეჭდავი იყო ყველაფერი: ორგანიზაციის ხელმძღვანელების მისალმება, დოკუმენტური ფილმი საქართველოზე, თოჯინების თეატრის წარმოდგენა „გვრიტი“, ცეკვების სტუდია „ოაზისი“, რომელიც უკრაინელმა ქალმა ჩამოაყალიბა ქუთაისში, უკრაინელი და ქართველი ბავშვების მიერ შესრულებული სიმღერები და ცეკვები, მომღერალი და კომპოზიტორი კიევიდან, პოეტი ქალი ბერდიანსკიდან, იუბილარი გოგონებისთვის ტორტის მირთმევა.
ყველა მონაწილე დაჯილდოვდა მადლობის სიგელით.
ქალთა ფონდ „სოხუმში“ ბავშვებს ჯგუფს (უკრაინიდან, ბელარუსიდან, რუსეთიდან ჩამოსული ბავშვები) უტარდება სხვადასხვა კურსი. ფოეიში გამოფენილი იყო ყველა კურსის მუშაობის ამსახველი ფოტოები, პოლიმერული თიხისგან კურსის მონაწილეების მიერ დამზადებული ნამუშევრები, ხოლო კონცერტზე გამოვიდნენ სამსახიობო კურსის მონაწილეები.
ღონისძიება საქართველოს ქეროვნული ჰიმნით დაიწყო და „მრავალჟამიერით“ დასრულდა.
პროექტი ხორციელდება ჩეხური ორგანიზაცია „ადამიანი გაჭირვებაში“
PIN მხარდაჭერით
„ჩვენთვის მნიშვნელოვანია, გვქონდეს სივრცე, სადაც ვისაუბრებთ ყველა იმ თემაზე, რომელიც საგაკვეთილო ფორმატში არ ჯდება. ვეცნობით ერთმანეთის აზრებს და შეგვიძლია, მიღებული ცოდნა სხვებსაც გავუზიაროთ, რაც ხელს უწყობს კონფლიქტებისა და ძალადობის პრევენციას“. - ეს ტრენინგის ერთ-ერთი მონაწილის სიტყვებია.
ახალგაზრდობის გაძლიერების ცენტრებში აქტიურად გრძელდება სატრენინგო კურსები. ხობის და წალენჯიხის მუნიციპალიტეტებში გაიმართა ტრენინგები კონფლიქტის მიზეზების, გენდერული თანასწორობის და სტერეოტიპების საკითხებზე.
ტრენინგებზე არის აქტუალური თემების განხილვა, დისკუსიები, ინიცირებული ღონისძიებების ორგანიზება. ახალგაზრდებს აქვთ არაფორმალური განათლების მიღების მაღალი ინტერესი და მოტივაცია მუშაობისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ მონიტორინგის ჯგუფმა მუშაობა დაიწყო ახალ კვლევაზე, რომლის მიზანია ქალთა მიმართ/ოჯახში ძალადობის მსხვერპლთა არსებული სერვისების ეფექტიანობის შესწავლა და რეკომენდაციების შემუშავება ეფექტიანობის გაზრდისთვის, რათა განისაზღვროს საჭირო სტრატეგიები და ახალი მიდგომები.
შეგროვდება ინფორმაცია ქალთა მიმართ/ოჯახში ძალადობის მსხვერპლთა არსებული (და/ან დაგეგმილი) სერვისების ღონისძიებების შესახებ. მოხდება სერვის პროვაიდერების მუშაობის გაცნობა, სერვისის მიმღებების/ბენეფიციარების დამოკიდებულებების, განწყობების და მოლოდინების შესწავლა. ამ კუთხით არსებული კარგი პრაქტიკის მოძიების მიზნით, მონიტორინგის ჯგუფი გაეცნობა სხვადასხვა დოკუმენტს.
მაისში ჩატარდა 10 ჩაღრმავებული ინტერვიუ ბენეფიციარებთან, რამაც საშუალება მოგვცა, კონკრეტულ ქეისებზე დაყრდნობით შეგვესწავლა ამ კუთხით არსებული სიტუაცია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საზოგადოების ინფორმირება მსხვერპლთა მხარდაჭერის სერვისებზე ქალთა მხარდაჭერის ცენტრების შეხვედრების მნიშვნელოვანი სეგმენტია, რის საფუძველზეც ხდება ქეისების იდენტიფიცირება და შემდგომი რეაგირება. სწორედ აქ ხდება ქალთა საჭიროებების გამოვლენა. გამართულმა შეხვედრებმა უკვე მოიტანა შედეგები. გამოჩნდნენ კონკრეტული ბენეფიციარები, რომლებიც მზად არიან არსებული სერვისების მისაღებად. ქეისების ანალიზის შედეგად მოხდა მათი გადამისამართება საჭიროების შესაბამისად.
ძალადობის პრევენცია და მსხვერპლთა იდენტიფიცირება კვლავ რჩება ქალთა მხარდაჭერის ცენტრების მთავარ მიმართულებად.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გრძელდება ფონდი „სოხუმის“ ქალთა მხარდაჭერის ცენტრების მიერ ინიცირებული საინფორმაციო შეხვედრები სხვადასხვა თემში. კვლავაც აქტუალურია საზოგადოების ინფორმირება ოჯახში ძალადობის მსხვერპლთა დახმარების და მხარდაჭერის სერვისებზე. შეხვედრის მონაწილე ქალები მსჯელობენ თემში არსებულ პრობლემებზე, ქალთა საჭიროებებზე, ეძებენ მოგვარების გზებს.
მაისში მოხდა კრიზისული ოჯახების იდენტიფიცირება - ისინი ქალთა ფონდი „სოხუმის“ სერვისების მომხმარებლები იქნებიან. კონფლიქტებზე ადრეული რეაგირება ძალადობის პრევენციას ისახავს მიზნად, რაც ძალიან მნიშვნელოვანია.
შეხვედრები ჩატარდა ზუგდიდის, წალენჯიხის, სენაკის, ვანის და ჩოხატაურის ქალთა მხარდაჭერის ცენტრებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ახალი პროფესიის ათვისება და შრომის თერაპია საუკეთესო მეთოდია თვითშეფასების ამაღლებისა და გაძლიერებისთვის. ქალთა ფონდი „სოხუმის“ დღის სარეაბილიტაციო ცენტრი ასეთ სასიკეთო გარდასახვებს ხშირად ახდენს ადამიანების ცხოვრებაში. ქალები ცოდნის მიღების შემდეგ დამოუკიდებლად განაგრძობენ მუშაობას.
ამჯერად ჩვენი ქოლგის ქვეშ ჭრა-კერვის ახალი სასწავლო კურსი დაიწყო სენაკის მუნიციპალიტეტში. პრაქტიკული უნარების საბაზო სასწავლო ცენტრი და პროექტის პარტნიორი გახდა სამკერვალო სალონი „MK“ - თავისი მაღალი სოციალური პასუხისმგებლობით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მაისის დასაწყისიდან გაგრძელდა სატრენინგო კურსი ახალგაზრდობის გაძლიერების ცენტრებში. ზუგდიდის, ჩოხატაურის და სენაკის მუნიციპალიტეტებში ჩატარდა ტრენინგები კონფლიქტის მიზეზებსა და გენდერულ ძალადობაზე.
ახალგაზრდები აქტიურად ჩაერთნენ დისკუსიებში - უკვე არიან გამოკვეთილი ლიდერები. ისინი მზად არიან, მიღებული ინფორმაცია გააზიარონ თავიანთ სოციუმში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
კარგი შედეგით დასრულდა ქალთა ურთიერთდახმარების ჯგუფის მორიგი შეხვედრა ვანში - მოგვარდა ოჯახში ძალადობის ერთ-ერთი მსხვერპლის პრობლემა. ჩვენი შეხვედრების შემდეგ ის თვითონ გაძლიერდა, იყო კონსტრუქციული თანამშრომლობაც ადგილობრივ თვითმმართველობასთან. ყოველივე ამან ხელი შეუწყო პრობლემის გადაჭრას და იმედი მისცა ჯგუფს, რომ ბევრი ქალის მდგომარეობა გაუმჯობესდება.
გააქტიურდნენ ზუგდიდის და ჩოხატაურის ქალთა ჯგუფის წევრები. ქობულეთის ქალთა ურთიერთდახმარების ჯგუფმა გენდერული თანასწორობის საბჭოსთან თანამშრომლობით მოაგვარა ერთ-ერთი წევრის პრობლემა, რომელიც საკმაოდ ძნელი ეჩვენებოდათ. თერჯოლის ჯგუფი აქტიურად ჩაერთო საგრანტო კონკურსებში, ჯგუფის წევრებს აქვთ დიდი მხარდაჭერა ფონდი „სოხუმიდან“ და ადგილობრივი თვითმმართველობიდან.
პროექტის ასისტენტმა ჩოხატაურში, წყალტუბოში, ზუგდიდში, ქობულეთში და ვანში გამართა შეხვედრები, დანარჩენ ხუთ მუნიციპალიტეტში კი შეხვედრები ჯგუფის ლიდერებმა ჩაატარეს.
ქალთა ფონდ „სოხუმში“ შექმნილია მეგობრული სივრცე, სადაც თავისუფალ დროს ერთად ატარებენ ბავშვები უკრაინიდან, ბელარუსიდან, რუსეთიდან.
აპრილში ჩატარდა მეცადინეობები 6 კურსის მიხედვით - ქართული ენა, ინგლისური ენა, პოლიმერული თიხისგან ძერწვა, სამსახიობო ხელოვნება, ქარგვა, ფოტო და ვიდეოგადაღება.
17 აპრილს დასრულდა ფოტო-ვიდეო გადაღების პირველი ორთვიანი კურსი და მუშაობას შეუდგა ახალი ნაკადი.
აპრილში მთავრდება ძერწვის ორთვიანი კურსიც. ამ კურსზე ბავშვები არა მარტო ახალ საქმეს სწავლობენ, არამედ ერთმანეთს ამბებს უყვებიან, ქართულად მღერიან, განსაკუთრებით მოსწონთ „სულიკო“.
ნაყოფიერად ტარდება ინგლისურის და ქართულის კურსები. ბავშვები სწავლობენ სიტყვებს, აწყობენ წინადადებებს, მართავენ დიალოგებს...