იანვარში ფსიქოლოგმა და იურისტმა 6 ჯგუფური დისტანციური შეხვედრა გამართეს ხონის, სენაკის, წყალტუბოს, ქობულეთის, ხურჩის (ზუგდიდის მუნიციპალიტეტი), ფახულანის (წალენჯიხის მუნიციპალიტეტი) ქალთა მხარდაჭერის ცენტრების ბენეფიციარებისთვის - მონაწილეობა მიიღო 28-დან 67 წლამდე 35-მა ადამიანმა.
შეხვედრებზე საუბარი იყო იმის შესახებ, როგორ უნდა მართონ ნეგატიური ემოციები და რატომაა ეს ასე მნიშვნელოვანი Covid-19 პანდემიის დროს და ოჯახში ძალადობის შემთხვევებში.
ფსიქოთერაპიულ და იურიდიულ კონსულტაციებს იღებენ ასევე ოჯახური წყვილები და ინდივიდუალური ბენეფიციარები დასავლეთ საქართველოს სხვადასხვა რეგიონში. ეს უფასო სერვისი, თანაც - სახლიდან გაუსვლელად, მათთვის ძალიან დიდი დახმარებაა.
ფონდ „სოხუმს“ ქალთა მხარდაჭერის 10 ცენტრი აქვს ქუთაისის, წყალტუბოს, ხონის, თერჯოლის, სენაკის, ფოთის, ზუგდიდის, ოზურგეთის, ლანჩხუთის და ქობულეთის მუნიციპალიტეტებში. ახალი წლიდან ცენტრების მობილიზატორებმა მუშაობა განაახლეს - რთული ეპიდსიტუაციის მიუხედავად, ჩატარდა ონლაინ თუ ოფლაინ შეხვედრები. ამ შეხვედრებში აქტიურად ჩაერთნენ ორგანიზაციის სპეციალისტები - იურისტი, ფსიქოლოგი, კონფლიქტოლოგი.
მონაწილეებს მიეწოდათ ინფორმაცია ძალადობის აღმოფხვრის მექანიზმებზე. აღინიშნა, რომ ამჟამინდელ რთულ პერიოდში იმატა კონფლიქტებმა, ამიტომ მნიშვნელოვანია მსგავსი პროფილის შეხვედრების ჩატარება და სასარგებლო რჩევების მიცემა.
მოზარდებისთვის გასაკვირი იყო, რომ მეტსახელი ხშირად კონფლიქტის მიზეზი შეიძლება გახდეს. მათ თქვეს, რომ არ სწყინთ გვარიდან წარმოქმნილი მეტსახელი, მაგ., ანთია - ანთო, მებონია - მებო და ა.შ. მაგრამ თუ ნაკლზე მიუთითებს, გულსატკენია და შეიძლება კონფლიქტიც გამოიწვიოს.
კონფლიქტის მართვის ჯგუფის წევრებთან ჩატარდა მორიგი ონლაინ ვორკშოპები თემაზე „კონფლიქტის მშვიდობიანად მოგვარების უნარები“.
ფონდი „სოხუმის“ კონფლიქტოლოგმა მათ გააცნო ეს უნარ-ჩვევები. გაიგეს, რა წესები უნდა გამოიყენონ, რომ კონფლიქტი ძალადობაში არ გადაიზარდოს. მათ მესენჯერ-ჯგუფებშიც გაეგზავნათ უნარების ჩამონათვალი, რათა მომავალშიც ხშირად გაიხსენონ.
ვორკშოპებში ჩართულია 10 საჯარო სკოლა: ხაჯალიის (ლანჩხუთის მუნიციპალიტეტი), ლიის №2 (წალენჯიხის მუნიციპალიტეტი), გურიანთას (ოზურგეთის მუნიციპალიტეტი), მელაურის (სამტრედიის მუნიციპალიტეტი), კოკის (ზუგდიდის მუნიციპალიტეტი), მენჯის (სენაკის მუნიციპალიტეტი), ქვედა სიმონეთის (თერჯოლის მუნიციპალიტეტი) №1, ქობულეთის №5, ფოთის №4 და ქუთაისის ქართულ-ამერიკული სკოლა „პროგრესი“.
მონაწილეები ასე აფასებენ შეხვედრებს:
„ბევრი რამ ვისწავლე ძალადობასა და ბულინგზე, მეგობრობაზე და ერთმანეთის პატივისცემაზე, დიდი მადლობა ტრენერს და ორგანიზაციას.“
„მე აუცილებლად ვისწავლი ამ წესებს და გამოვიყენებ ცხოვრებაში.“
„კარგია, რომ ამ თემაზე ვსაუბრობთ. უნდა ვიცოდეთ, კონფლიქტის დროს სად და როგორ გავჩერდეთ.“
ფორუმ-თეატრის იანვრის ცხოვრება ონლაინ მიმდინარეობს, მაგრამ საკმაოდ აქტიურად. ფონდი „სოხუმის“ ფეისბუქგვერდზე განთავსდა ახალგაზრდა მსახიობების მომზადებული ვიდეოჩანაწერები და ფოტოკოლაჟები.
დაიწყო ახალი რუბრიკა - ფორუმ-თეატრის ყველა მსახიობი გადაიღებს პერსონალურ ვიდეოს.
აქტიურად გრძელდება სარეპეტიციო პერიოდიც. უკვე შეიმუშავეს თებერვლის გეგმა. ფორუმ-თეატრის ჯგუფს იმედი აქვს, რომ მალე შეხვდება მაყურებელს...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვაჟებთან მუშაობა იანვარში ონლაინ წარიმართა. თერჯოლის, ზუგდიდის, წალენჯიხის, ქუთაისის, სენაკის, ფოთის, ლანჩხუთის, ოზურგეთის და ქობულეთის მუნიციპალიტეტების საჯარო სკოლებთან ჩართვები მოხდა ჯგუფურად და ინდივიდუალურად.
შეხვედრების უმეტესობა ზუმის პლატფორმაზე ჩატარდა, რამაც ვიდეორგოლების ჩვენების და დისკუსიის უკეთ წარმართვის შესაძლებლობა შექმნა.
- შევარჩიე ვიდეორგოლები ძალადობის, ბულინგის თემაზე, რომ ბიჭებთან კიდევ უფრო ახლოს მიმეტანა სათქმელი, - აღნიშნავს ტრენერი ბექა ფოცხვერია. - ბიჭები აქტიურად მსჯელობდნენ ამ მწვავე პრობლემებზე, ვიდეორგოლებში ასახულ ფაქტებზე. მათი თქმით, ტოლერანტი საზოგადოება უკეთ შეძლებს ბულინგისა და ძალადობის დამარცხებას.
ფონდი „სოხუმის“ ახალგაზრდულ კლუბებში ახალი წელი 16 იანვარს დაიწყო საინტერესო შეხვედრებით. გულახდილი საუბრისკენ განაწყო მონაწილეები შერჩეულმა თემამ „ნაადრევი ქორწინება“. მათ ისაუბრეს სტერეოტიპულ აზროვნებაზე, მშობლებისა და საზოგადოების როლზე. არაერთი მაგალითი მოიყვანეს, როგორ დაინგრა ადრე შექნილი ოჯახი, როგორ დარჩა მარტო 17-18 წლის გოგონა შვილთან ერთად. ჯანმრთელობის თუ ფსიქოლოგიურ პრობლემებთან ერთად დააფიქსირეს განათლების და დასაქმების პრობლემები.
აღინიშნა, რომ ქორწინებას ახალგაზრდები პასუხისმგებლობით უნდა მოეკიდონ და ასეთი საუბრები სწორედ ამის გააზრებას უწყობს ხელს.
ფონდი „სოხუმი“ სისტემატიურად იკვლევს და სწავლობს უსაფრთხოების დაბალი ხარისხისა და ძალადობის მაღალი რისკის ადგილებში, მათ შორის აფხაზეთთან, კონფლიქტის გამყოფ ხაზთან მცხოვრებ დევნილთა და კონფლიქტის შედეგად დაზარალებული ქალებისა და გოგონების მდგომარეობას. მოსახლეობის მდგომარეობის შესაფასებლად, ჩვენ შევიმუშავეთ და დავნერგეთ კონფლიქტების ადრეული გაფრთხილების, გენდერზე ორიენტირებული სისტემა (Gender Responsive Early Warning System), რომელიც წარმოადგენს გენდერულად მგრძნობიარე კონფლიქტის ანალიზის კომპლექსურ მექანიზმს. კვლევა ჩატარდა 2020 წლის სექტემბერ-დეკემბერში და მოიცვა ფონდი „სოხუმის“ სამიზნე 11 მუნიციპალიტეტი - ქუთაისი, წყალტუბო, თერჯოლა, ხონი, სენაკი, ფოთი, ზუგდიდი (კოკი, ხურჩა, შამგონა, კახათი), წალენჯიხა (ფახულანი, წყოუში), ლანჩხუთი, ოზურგეთი, ქობულეთი და ასევე გალის რაიონის გამყოფ ზოლთან მდებარე სოფლები (ნაბაკევი და საბერიო).
ახალი პუბლიკაციაში: „COVID-19 კრიზისის გავლენის გენდერული განზომილება და პანდემიაზე რეაგირების ეფექტიანობა“ აღწერილია პანდემიის გავლენა ფონდი „სოხუმის“ სამიზნე რეგიონებში მცხოვრები ქალებისა და გოგონების ადამიანურ უსაფრთხოებაზე და ასევე ასახულია მოსახლეობის დამოკიდებულება ცენტრალური და ადგილობრივი ხელისუფლების მხრიდან გატარებული პოლიტიკის ეფექტიანობის მიმართ.
ფონდი „სოხუმი“ წარმოგიდგენთ მონიტორინგის ახალ ანგარიშს „ქალთა მიმართ ოჯახში ძალადობის წინააღმდეგ მუნიციპალური პროგრამები და გენდერული ბიუჯეტი“. მონიტორინგის ფარგლებში შესწავლილ იქნა ორგანიზაციის სამიზნე 12 მუნიციპალიტეტის 2020 წლის ბიუჯეტებში ძალადობის მსხვერპლთა დაცვის და ძალადობის პრევენციის პროგრამები და გენდერული თანასწორობის უზრუნველსაყოფად შემუშავებული ადგილობრივი პოლიტიკა. ანგარიშში დეტალურად არის წარმოდგენილი მონიტორინგის შედეგად გამოვლენილი გამოწვევები და მათი ანალიზის საფუძველზე შემუშავებული შესაბამისი რეკომენდაციები ადგილობრივი და ცენტრალური ხელისუფლების და ასევე სამხარეო ადმინისტრაციის საყურადღებოდ.
„მასწავლებლისგან გამიგონია ფრაზა: „ეს საქციელი გოგოს არ შეჰფერის“, თუმცა იქვე მოსწავლისგან პასუხი იყო ასეთი: „მასწავლებელო, საქციელს სქესი არ გააჩნია“ - პუბლიკაციაში დაფიქსირებულია ერთ-ერთი სკოლის დირექტორის ეს სიტყვები.
ფონდი „სოხუმის“ ახალ გამოცემაში გაანალიზებულია ჩატარებული კვლევის შედეგები.
კვლევამ მოიცვა დასავლეთ საქართველოს 11 მუნიციპალიტეტის საჯარო სკოლების დირექტორები, მასწავლებლები, რესურსცენტრის თანამშრომლები, განათლებისა და გენდერის ექსპერტები, არასამთავრობო ორგანიზაციის წარმომადგენლები, რომლებიც მუშაობენ სკოლებში, მშობლები და ყოფილი მოსწავლეები. გაანალიზდა არსებული საკანონმდებლო ჩარჩო, გამოყენებულ იქნა ამ საკითხზე ადგილობრივი და საერთაშორისო ორგანიზაციის მიერ ჩატარებული კვლევები და ანგარიშები.
მონიტორინგით გამოკვეთილმა სურათმა ნათლად დაადასტურა სკოლებში გენდერული სტერეოტიპების წინააღმდეგ მიზნობრივი პოლიტიკის გატარების აუცილებლობა.
ფონდი „სოხუმი“ წარმოგიდგენთ მონიტორინგის მორიგ ანგარიშს „COVID 19-ის გავლენა ოჯახში ძალადობაზე, მსხვერპლი ქალების მდგომარეობასა და სერვისებისადმი ხელმისაწვდომობაზე“. ანგარიში ასახავს ფონდი „სოხუმის“ სამიზნე რეგიონებში, კერძოდ კი დასავლეთ საქართველოს 11 მუნიციპალიტეტში COVID-19 პანდემიით გამოწვეულ, ოჯახში ძალადობის კუთხით შექმნილ მდგომარეობას და მის გავლენას ქალებისა და გოგონების ცხოვრებაზე.
მონიტორინგმა ცხადყო, რომ პანდემიამ გაამწვავა არა მხოლოდ ოჯახში ძალადობის მსხვერპლ ქალთა უკვე არსებული პრობლემები, არამედ დააჩქარა პოტენციური მოძალადეების გამოვლენა. გაუარესდა იმ ქალების მდგომარეობაც კი, ვინც მანამდე შეძლო მოძალადისგან თავის დაღწევა.
არსებული გამოწვევების საპასუხოდ საჭიროა სახელმწიფოს პროაქტიული მუშაობა, განსაკუთრებით რეგიონებში, მათ შორის შესაბამის სამოქალაქო საზოგადოების ორგანიზაციებთან თანამშრომლობით და ჩართულობით. დოკუმენტში წარმოდგენილია რეკომენდაციები პრობლემების დროული და ადეკვატური გადაჭრისთვის.
პუბლიკაცია მომზადდა ქართულ და ინგლისურ ენებზე.
