შეხვედრები (638)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ფონდი „სოხუმის“ ქუთაისის წყალტუბოს ქალთა საინიციატივო ჯგუფები აქტიურად არიან ჩართულნი 16-დღიან კამპანიაში. ჯგუფის წევრების ინიციატივით სხვადასხვა უბანში, კოლექტიურ ცენტრებში ჩატარდა საინფორმაციო შეხვედრები. მოსახლეობას მიეწოდა ინფორმაცია ძალადობის საკითხებზე, კამპანიაზე, დაურიგდათ საინფორმაციო ფურცლები, თეთრი ლენტები, კალენდრები. ქალთა საინიციატივო ჯგუფის წევრები თვლიან, რომ ამ აქტივობებს განსაკუთრებული მნიშვნელობა აქვთ ინფორმირების და ქალთა მიმართ ძალადობის პრევენციის თვალსაზრისით.
ქუთაისის, ხონის, წყალტუბოს ქალთა საინიციატივო ჯგუფები მთელი თვის განმავლობაში აქტიურად მუშაობდნენ სხვადასხვა საკითხის ადვოკატირების მიზნით.
ქუჩის განათება, გზის გასწორება სოფლებში, ასფალტის დაგება, სახურავის რეაბილიტაცია, საინფორმაციო შეხვედრები სხვადასხვა თემთან, კომუნიკაცია ადგილობრივი სახელმწიფო სტრუქტურების წარმომადგენლებთან - საინიციატივო ჯგუფების ერთი თვის საანგარიშო პერიოდში სწორედ ეს საკითხები აისახა.
ყოველი მოგვარებული პრობლემა, რომლის უკან კონკრეტული ადამიანები დგანან - პირდაპირ კავშირშია საერთო მიზანთან, რაც საზოგადოებაში ადამიანური უსაფრთხოების ხარისხის ამაღლებას გულისხმობს.
წყალტუბოს ქალთა მხარდაჭერის ცენტრმა ქალთა ადგილობრივი საინიციატივო ჯგუფის შეხვედრას უმასპინძლა. ქალებმა კიდევ ერთხელ განაზოგადეს ფონდი „სოხუმის“ მიერ ჩატარებული კვლევის შედეგები, მოახდინეს ადგილობრივი პრობლემების იდენტიფიცირება, გამოყვეს პრიორიტეტული პრობლემების ნაწილი და შემოგვთავაზეს მათი მოგვარების საკუთარი ხედვა.
ქალთა რეპროდუქტიული ჯანმრთელობის საკითხები და წყალტუბოს სამშობიარო სახლის საჭიროების სერიოზული არგუმენტაცია; ინკლუზიური ბავშვების დედების საჭიროებები; ქალთა ინფორმირების საკითხი, როგორც მათი საზოგადოებრივ- პოლიტიკური აქტივობის ხელისშემწყობი ფაქტორი - შეხვედრაზე დაისახა ადვოკატირების სამომავლო სტრატეგია. ამ სტრატეგიის ნაწილია თანამშრომლობის პერსპექტივა წყალტუბოს მუნიციპალიტეტის გენდერულ საბჭოსთან, რომელიც სულ ახლახან შეიქმნა და ადგილობრივი გენდერული პოლიტიკის გაუმჯობესებას ისახავს მიზნად.
შეხვედრას ესწრებოდნენ შვედეთის ქალთა ფონდ Kvinna till Kvinna-ს წარმომადგენლები, რომელთაც დიდი ინტერესი გამოხატეს აღნიშნული მუშაობის მიმართ.
ქუთაისის, ხონის, წყალტუბოს, სენაკის, ფოთის და ხურჩა/კოკის (ზუგდიდის მუნიციპალიტეტის) ქალთა მხარდაჭერის ცენტრების მობილიზატორები ქუთაისში, ფონდი „სოხუმის“ ოფისში შეიკრიბნენ. გაკეთდა ჩატარებული მუშაობის მოკლე ანგარიში. კოორდინატორმა გააანალიზა მობილიზატორების მიერ ჩაბარებული ანგარიშები, აქცენტი გააკეთა ძირითად ნაკლოვანებებზე, განხილულ იქნა კარგი ანგარიშების მაგალითები.
მობილიზატორებმა ისაუბრეს პრობლემებზე და მომავალ გეგმებზე. ფონდის ხელმძღვანელმა მიაწოდა მათ ინფორმაცია მომავალი ეტაპის მცირე პროექტების დაფინანსების შესახებ. პროექტების ხანგრძლივობა - 1 თვე, ძირითადი მიმართულებები - ძალადობის პრევენცია და მსხვერპლთა დაცვა. ღონისძიებები უნდა ჩატარდეს კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში.
იანვარში ჩატარდა 6 საინფორმაციო შეხვედრა დასავლეთ საქართველოს 6 ქალაქის -ქუთაისი, წყალტუბო, ხონი, სენაკი, ფოთი და ზუგდიდი - ადგილობრივი თვითმმართველობის წარმომადგენლებთან. მათ მიეწოდათ ინფორმაცია ქალთა მხარდაჭერის ცენტრების მუშაობის შესახებ, მომავალ გეგმებზე.
ქალთა მხარდაჭერის ცენტრის მობილიზატორები და აქტივისტი ქალბატონები დაესწრნენ საკრებულოს სხდომებს, გაეცნენ სიახლეებს, ადგილობრივი თვითმმართველობის ინიციატივებს.
სენაკის ქალთა მხარდაჭერის ცენტრის წარმომადგენლები მიწვეულნი იყვნენ გამგებლის მიერ ინიცირებულ შეხვედრაზე სამოქალაქო მრჩეველთა საბჭოს წარმომადგენლებთან, აგრეთვე სენაკის მუნიციპალიტეტის გამგეობის სააქტო დარბაზში გამართულ ეკოლოგიური პროექტის პრეზენტაციაზე.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფონდმა „სოხუმმა“ ქალთა მხარდაჭერის ცენტრებისთვის აპრილში გამოაცხადა საგრანტო კონკურსი. მაისში წარმოდგენილი იქნა 6 საპროექტო განაცხადი. კომისიამ ექვსივე განაცხადს დაუჭირა მხარი. პროექტების განხორციელება 1 ივნისიდან დაიწყო. ყველა პროექტი აქტუალური და საინტერესოა:
წყალტუბოს ქალთა მხარდაჭერის ცენტრი - „ცოდნით ვძლიოთ ძალადობას“ -საინფორმაციო-საგანმანათლებლო მუშაობა საზოგადობასთან წყალტუბოს მუნიციპალიტეტის ორ სოფელში
ქუთაისის ქალთა მხარდაჭერის ცენტრი - „მდიდარი წარსულიდან - მდიდარი მომავლისაკენ“ - 20 ივნისს დევნილთა და იძულებით ადგილნაცვალ პირთა საერთაშორისო დღისადმი მიძღვნილი გამოფენის ორგანიზება
ხონის ქალთა მხარდაჭერის ცენტრი - „ინფორმირებული ქალები ცვლიან მომავალს“ - მუნიციპალიტეტის სამ სოფელში საინფორმაციო-საგანმანათლებლო მუშაობა და ტრენინგი სოფლის რწმუნებულებისთვის
სენაკის ქალთა მხარდაჭერის ცენტრი - „ინფორმირებული ახალგაზრდები ქალთა მიმართ ძალადობის წინააღმდეგ“ - სენაკის მუნიციპალიტეტის ორი სოფლის ახალგაზრდებთან საინფორმაციო, სამობილიზაციო და საგანმანათლებლო მუშაობა და ახალგაზრდების ინიციატივების მხარდაჭერა
ფოთის ქალთა მხარდაჭერის ცენტრი - „ძალადობის პრევენცია ჯანსაღი ცხოვრების წესის პოპულარიზებით“ - სპორტული შეჯიბრების ორგანიზება
ხურჩის (ზუგდიდის მუნიციპალიტეტი) ქალთა მხარდაჭერის ცენტრი - „ოჯახი ძალადობის გარეშე“ - ზუგდიდის მუნიციპალიტეტის სოფლებში საგანმანათლებლო-საინფორმაციო მუშაობა
პროექტები აქტიურ ფაზაშია, მუშაობა დაწყებულია და კიდევ ერთხელ გვინდა, წარმატება ვუსურვოთ ქალთა მხარდაჭერის ცენტრებს!
29 იანვარს გაიმართა ფონდი „სოხუმის“მიერ ჩატარებული კვლევის შედეგების ამსახველი პუბლიკაციის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაცია (ქართულ-აფხაზური პროექტის ფარგლებში, შვედეთის ქალთა ფონდის Kvinna till Kvinna-ს მხარდაჭერით).
პრეზენტაციაზე მოწვეულნი იყვნენ საზოგადოების, არასამთავრობო და სახელისუფლებო სტრუქტურების წარმომადგენლები, რომელთაც მიეწოდათ ინფორმაცია კვლევაზე და კვლევის შედეგად მომზადებულ რეკომენდაციებზე.
შეხვედრის მონაწილეებმა აღნიშნეს, რომ ეს არის კარგი მცდელობა, მოხდეს ქალთა ადამიანური უსაფრთხოების საკითხებში სახელმწიფო პოლიტიკის დახვეწა და ქალთა ჯგუფების მიერ საკუთარი საჭიროებების წამოწევა.
18 ივნისს ფონდი „სოხუმის“ ორგანიზებით ქუთაისის დემოკრატიული ჩართულობის ცენტრში ჩატარდა მრგვალი მაგიდა. შეხვედრაში მონაწილეობდნენ შეზღუდული შესაძლებლობის მქონე პირები, ქალაქის მერიის და საკრებულოს ჯანდაცვისა და სოციალურ საკითხთა სამსახურის და სოციალური მომსახურების სააგენტოს წარმომადგენლები. მათ ისაუბრეს ქალაქის ბიუჯეტის პროგრამებისა და ქვეპროგრამების შესახებ, უპასუხეს დამსწრეთა შეკითხვებს.
როგორც ბენეფიციარებმა აღნიშნეს, მათ ძალიან საჭირო და საინტერესო ინფორმაცია მიიღეს.
17 თებერვალს თბილისში გაიმართა ფონდი „სოხუმის“ კვლევის „ქალთა ხმების გაძლიერება კონფლიქტის ტრანსფორმაციის პროცესში“ პრეზენტაცია, რომელსაც ესწრებოდნენ საზოგადოების სხვადასხვა ჯგუფის, მასმედიის, სახელისუფლებო სტრუქტურების, დიპლომატიური კორპუსის წარმომადგენლები.
ფორუმზე შეკრებილებმა მიიღეს დეტალური ინფორმაცია კვლევის შედეგად დაბეჭდილი ბროშურის „ქალთა მონაწილეობა ჟენევის მოლაპარაკებებში: პრობლემები, წარმატებები, პერსპექტივები“ შესახებ და ნახეს ამავე თემაზე გადაღებული დოკუმენტური ფილმი.
შეხვედრაზე მოხდა იმ საკითხების წამოწევა, რომლებიც აწუხებთ კონფლიქტის ზონაში მცხოვრებთ და რომელთა გარშემო კონსტრუქციულ მოლაპარაკებებსა და შეთანხმებებში ძალიან მნიშვნელოვანია ქალების მონაწილეობა, საკითხების მოგვარებაში მათი ხედვის გათვალისწინება.
გაიმართა დისკუსია კონფლიქტების სამშვიდობო მოგვარების პროცესში მეტი ქალის ჩართვის საკითხებზე. დაფიქსირდა უფრო მოქნილი ფორმატის არსებობის აუცილებლობაც, რომელში ჩართვის საშუალებაც ექნებათ საზოგადოებისა და არასამთავრობო სექტორის წარმომადგენლებს - მათ, ვისაც პრაქტიკული შეხება აქვს პრობლემასთან.
დასრულდა სენაკის გენდერული საკონსულტაციო საბჭოს ექვსთვიანი პროექტი „სამოქალაქო განათლება გენდერული თანასწორობისა და ჯანსაღი გარემოსათვის სენაკის სკოლამდელი აღზრდის გაერთიანებაში“, რომელიც დააფინანსა ადგილობრივმა თვითმმართველობამ და ფონდმა „სოხუმმა“.