ახალგაზრდა ლიდერთა სკოლა (203)
ახალგაზრდა ლიდერთა სკოლა – გულისხმობს საქმიანობას ახალგაზრდობასთან მათი გაძლიერებისა და ლიდერული თვისებების ჩამოყალიბებისთვის. მუშაობა მიმდინარეობს დასავლეთ საქართველოს 9 მუნიციპალიტეტში - ქუთაისი, წყალტუბო, ხონი, თერჯოლა, სენაკი, ფოთი, ხურჩა/კოკი (ზუგდიდის მუნიციპალიტეტი), ლანჩხუთი, ოზურგეთი. ტარდება საინფორმაციო შეხვედრები გენდერულ და ოჯახში ძალადობის თემაზე ახალგაზრდულ კლუბებში, კონფლიქტოლოგის ვორკშოპები ახალგაზრდებთან, ეწყობა შეხვედრები ვაჟებთან, ჩამოყალიბდა ახალგაზრდა ტრენერთა ჯგუფი, იმართება ტრენინგები და სხვადასხვა სახის შეხვედრები ახალგაზრდების მონაწილეობით.
ვორკშოპზე კონფლიქტის ესკალაციის სტადიები და კონკრეტული ნაწარმოებები განიხილეს კონფლიქტის მართვის სწავლების ჯგუფის წევრებმა ლიის (წალენჯიხის მუნიციპალიტეტი) №1, გურიანთის (ოზურგეთის მუნიციპალიტეტი) და მელაურის (სამტრედიის მუნიციპალიტეტი) საჯარო სკოლებში. მათთვის საინტერესო აღმოჩნდა ეს საკითხები და ეს ფიდბეკის დროს გაკეთებულმა ჩანაწერებმაც დაადასტურა:
„ასეთი შეხვედრები მასწავლის, ვიყო არაკონფლიქტური და შემდეგში ძალადობაც ნაკლები იქნება.“
„კონკრეტული მაგალითების განხილვით მივხვდი, რომ კონფლიქტის დარეგულირება შესაძლებელია.“
„ერთი სიტყვით - „ბოდიში“ - შესაძლებელია კონფლიქტის შეჩერება.“
„მინდა, მე თვითონ ჩავატარო ასეთი შეხვედრა“.
ქუთაისის №11, ლესის (ლანჩხუთის მუნიციპალიტეტი) და განმუხურის (ზუგდიდის მუნიციპალიტეტი) საჯარო სკოლებში კონფლიქტის მართვის სწავლების ჯგუფებისთვის ჩატარდა ვორკშოპები კონფლიქტის ესკალაციის სტადიებზე. მონაწილეებმა მოიფიქრეს და გაითამაშეს პატარა სცენები და ამ გზით უკეთ გაიაზრეს პრობლემა. უკუკავშირის დროს მათ აღნიშნეს ამგვარი სწავლების მნიშვნელობა და გამოხატეს თავიანთი ემოციები.
1 ნოემბერს დაიწყო და 24 ნოემბერს დასრულდა ვაჟებთან მორიგი შეხვედრები ფოთის, სენაკის, თერჯოლის, ლანჩხუთის, ზუგდიდის, წალენჯიხის, ოზურგეთის, სამტრედიის, ქუთაისის მუნიციპალიტეტებში.
შეხვედრაზე განხილული იყო მამაკაცის როლი ოჯახსა და საზოგადოებაში. ბიჭები ამბობდნენ, რომ მათ გააჩნიათ დამცველის, ოჯახის მატერიალურად უზრუნველყოფის ფუნქცია. მამაკაცის როლზე ბავშვის აღზრდაში და სხვა საოჯახო საქმეებში ნაკლებად ამახვილებდნენ ყურადღებას. ამიტომ სწორედ ამ საკითხებზე გაკეთდა აქცენტი. ბოლოს აღინიშნა, რომ 25 ნოემბერს იწყება კამპანია „16 აქტიური დღეა ქალთა მიმართ ძალადობის წინააღმდეგ“ და დაიგეგმა აქტივობები ყველა ჯგუფისთვის.
ახალგაზრდული კლუბების საინფორმაციო შეხვედრები ჩატარდა ნიგვზიანის (ლანჩხუთის მუნიციპალიტეტი) და ორსანტიის (ზუგდიდის მუნიციპალიტეტი) საჯარო სკოლებში. ტოლერანტობის თემამ დიდი ინტერესი გამოიწვია ახალგაზრდებში.
ფონდი „სოხუმის“ ახალგაზრდა მოხალისე, რომელიც გერმანიიდანაა ჩამოსული, აქტიურად ჩაერთო მუშაობაში ღვანკითის (თერჯოლის მუნიციპალიტეტი) საჯარო სკოლაში. მას ძალიან მოეწონა ახალგაზრდების დამოკიდებულება, როდესაც როლური თამაშის დროს დასვეს პრობლემა - მუსულმანი გოგონას გათხოვება სამეგრელოში. საინტერესო იყო მონაწილეების ანალიზი და დასკვნა: „ნუ მოექცევი სხვას ისე, როგორც არ გინდა, რომ მოგექცნენ შენ.“
ფოთის, სოფელ ნოსირის (სენაკის მუნიციპალიტეტი) და ქუთაისის საჯარო სკოლებში ახალგაზრდული კლუბის საინფორმაციო შეხვედრები ჩატარდა აქტუალურ თემაზე „ტოლერანტობის პრობლემა ახალგაზრდებში“.
კლუბები განსხვავდებიან ერთმანეთისგან, მაგრამ მოზარდებს აერთიანებთ პრობლემის მოგვარების სურვილი. ისინი მიიჩნევენ, რომ საზოგადოებაში დღეს ტოლერანტობის დეფიციტია და თავისებურად ხსნიან მიზეზებს. მათი აზრით, პატივი უნდა ვცეთ ყველა ადამიანის თვითმყოფადობას, ვიყოთ ტოლერანტულები. ამისთვის არ კმარა არაფორმალური განათლების საათები, არამედ საჭიროა სკოლის, მასწავლებლების მაქსიმალური ჩართულობა.
1, 4 და 7 ნოემბერს ფოთის შპს „თამარ ფაჩულიას საავტორო სკოლა-გიმნაზიაში“, სენაკის №3 საჯარო სკოლასა და ზედა სიმონეთის (თერჯოლის მუნიციპალიტეტი) საჯარო სკოლაში კონფლიქტის მართვის სწავლების ჯგუფებთან ჩატარდა ვორკშოპი თემაზე „კონფლიქტის ესკალაციის სტადიები“. მონაწილეებმა კონკრეტული ნაწარმოებების განხილვით და როლური თამაშებით დაასკვნეს, რომ უმნიშვნელო მიზეზმაც კი შეიძლება გამოიწვიოს დიდი კონფლიქტი.
მონაწილეები დიდ მნიშვნელობას ანიჭებენ ვორკშოპებს:
„ჩემთვის ახალი იყო სიტყვა „ესკალაცია“, გავიგე ამ სიტყვის მნიშვნელობა და ძალიან მომეწონა აქტივობებიც.“
„უკვე ვიცი, კონფლიქტის რომელ სტადიაზე ჯობს შეჩერება.“
„რჩევებს, რაც დღეს მოვისმინე, გამოვიყენებ მომავალშიც.“
კიდევ სამი ვორკშოპი ჩატარდა ოქტომბერში - ზედა სიმონეთის (თერჯოლის მუნიციპალიტეტი), ლიის (წალენჯიხის მუნიციპალიტეტი), მელაურის (სამტრედიის მუნიციპალიტეტი) საჯარო სკოლებში. თემა - კონფლიქტის გაჩენა და გამომწვევი მიზეზები.
ფონდი „სოხუმის“ კონფლიქტოლოგთან ერთად მოსწავლეებმა კონკრეტული დავალებები და როლური თამაშები შეასრულეს. ისინი აქტიურად ერთვებიან დისკუსიაში, სწავლობენ გუნდში მუშაობას. მათ აინტერესებთ ვორკშოპები, რადგან ბევრ სიახლეს იგებენ და პრაქტიკულ რჩევებსაც იღებენ.
ახალგაზრდული კლუბების საინფორმაციო შეხვედრები გაიმართა კიდევ სამ სოფელში: ნიგვზიანი (ლანჩხუთის მუნიციპალიტეტი), ორსანტია (ზუგდიდის მუნიციპალიტეტი), ოზურგეთი (ოზურგეთის მუნიციპალიტეტი). ეს იყო მონაწილეთა აქტიური ჩართულობა, განსხვავებული ხედვების დაფიქსირება, როლური თამაშები, დისკუსიები...
ყოველივე ეს ხელს უწყობს მოსწავლეებში არაძალადობრივი, ტოლერანტული ბუნების ჩამოყალიბებას. უკუკავშირის დროს მათ აღნიშნეს, რომ თავისუფლი სივრცე, რომელიც კლუბებზე ეძლევათ, მნიშვნელოვანია მათი განვითარებისთვის.
10, 11 და 16 ოქტომბერს კონფლიქტის გამომწვევ მიზეზებზე ვორკშოპები ჩატარდა სოფელ ლესას (ლანჩხუთის მუნიციპალიტეტი), სოფელ განმუხურის (ზუგდიდის მუნიციპალიტეტი) და სოფელ გურიანთას (ოზურგეთის მუნიციპალიტეტი) საჯარო სკოლებში.
კონკრეტული სავარჯიშოების განხილვის შედეგად მოსწავლეებმა გაიგეს კონფლიქტის გამომწვევი მიზეზები: დამახინჯებული ინფორმაცია, განსხვავებული ღირებულებები და სხვა. ისინი აქტიურად იყვნენ ჩართულები პროცესში და როგორც ფიდბეკზე აღნიშნეს, ეს ცოდნა გამოადგებათ ყოველდღიურ ურთიერთობებში.
დამსწრე პედაგოგების თქმით, თემა აქტუალურია და ასეთი შეხვედრებიც აუცილებელია, რადგან ხელს უწყობს სასკოლო კლიმატის გაუმჯობესებას.
ქუთაისის 33-ე და ფოთის 21-ე საჯარო სკოლაში, აგრეთვე სოფელ ნოსირის (სენაკის მუნიციპალიტეტი) საჯარო სკოლაში ჩატარდა ახალგაზრდული კლუბის საინფორმაციო შეხვედრები ოჯახში ძალადობის პრევენციის თემაზე (მიზეზები, შედეგები, დაცვის მექანიზმები).
აქ იყო საინტერესო ჯგუფები, მონაწილეთა აქტიური ჩართულობა, როლური თამაშები. გამოიკვეთა პრობლემები. ერთ-ერთი მონაწილის თქმით, ზოგან არ შეცვლილა ქალთა მდგომარეობა. ახლაც ის პრობლემებია, რომლებიც ნაჩვენებია შესანიშნავ ქართულ ფილმში „ნატვრის ხე“ - როდესაც ადამიანების ბედს განსაზღვრავდა მახინჯი ტრადიცია, თემის სტერეოტიპული აზროვნება.