ახალგაზრდა ლიდერთა სკოლა (203)
ახალგაზრდა ლიდერთა სკოლა – გულისხმობს საქმიანობას ახალგაზრდობასთან მათი გაძლიერებისა და ლიდერული თვისებების ჩამოყალიბებისთვის. მუშაობა მიმდინარეობს დასავლეთ საქართველოს 9 მუნიციპალიტეტში - ქუთაისი, წყალტუბო, ხონი, თერჯოლა, სენაკი, ფოთი, ხურჩა/კოკი (ზუგდიდის მუნიციპალიტეტი), ლანჩხუთი, ოზურგეთი. ტარდება საინფორმაციო შეხვედრები გენდერულ და ოჯახში ძალადობის თემაზე ახალგაზრდულ კლუბებში, კონფლიქტოლოგის ვორკშოპები ახალგაზრდებთან, ეწყობა შეხვედრები ვაჟებთან, ჩამოყალიბდა ახალგაზრდა ტრენერთა ჯგუფი, იმართება ტრენინგები და სხვადასხვა სახის შეხვედრები ახალგაზრდების მონაწილეობით.
თემამ „ძალადობის პრობლემები მოზარდებში“ - გულახდილი საუბრისთვის განაწყო მონაწილეები. ონლაინ შეხვედრები გაიმართა ხაჯალიის (ლანჩხუთის მუნიციპალიტეტი), ქუთაისის და სენაკის ახალგაზრდულ კლუბებთან. მიუხედავად ინტერნეტის პრობლემებისა, ჩართვები აქტიურად წარიმართა, გაჟღერდა საინტერესო ისტორიები. შეხვედრებზე გამოვლინდნენ ლიდერები, რომლებიც დამოუკიდებლად მუშაობას გეგმავენ.
ოქტომბერში აქტიური მუშაობა დაიწყო ახალგაზრდული კლუბების ახალ ჯგუფებთან. თვის თემაა „ძალადობის პრობლემები მოზარდებში“. ახალგაზრდები ინტერესით ჩაერთნენ მუშაობაში. იგრძნობა აქტიური მხარდაჭერა დირექტორებისგან, პედაგოგებისა და მშობლებისგან.
ქობულეთი, გურიანთა (ოზურგეთის მუნიციპალიტეტი) და ეწერი (სამტრედიის მუნიციპალიტეტი) - ოქტომბრის პირველ დღეებში ამ სკოლების ახალგაზრდულ კლუბებთან გაიმართა ონლაინ ჩართვები. მოტივირებული ახალგაზრდები აქტიურობენ და, რაც მთავარია, აქვთ ინიცირებული ღონისძიებების ჩატარების და ჯგუფური მუშაობის სამომავლო გეგმები, ახალი იდეები, იციან სოციალურ ქსელში მუშაობა - მოამზადებენ ესეებს, ვიდეოჩანაწერებს...
„არსებობს ასეთი პრობლემები მოზარდებში და კარგია ამ თემებზე საუბარი“.
„ინფორმაციის დამახინჯება ხშირად არის კონფლიქტის გამომწვევი მიზეზი“.
„ვხვდები, როგორ უნდა ავიცილო თავიდან კონფლიქტი“...
ასე გამოხატეს თავიანთი მოსაზრებები მონაწილეებმა შეხვედრების დასასრულს.
ონლაინ ვორკშოპები ჩატარდა სამი სკოლის - ქობულეთის №5, ლიის (წალენჯიხის მუნიციპალიტეტი) №2 და გურიანთის (ოზურგეთის მუნიციპალიტეტი) საჯარო სკოლები - კონფლიქტის მართვის ჯგუფების წევრებთან.
მონაწილეებმა ფონდი „სოხუმის“ კონფლიქტოლოგთან ერთად კონფლიქტის გამომწვევ მიზეზებზე, რეალურ და კონკრეტულ მაგალითებზე ისაუბრეს.
განახლდა კონფლიქტების მართვის თემაზე ვორკშოპების ხუთთვიანი ციკლი საჯარო სკოლებში.
ჩატარდა 8 შეხვედრა კოკის (ზუგდიდის მუნიციპალიტეტი), ლიის №2 (წალენჯიხის მუნიციპალიტეტი), მენჯის (სენაკის მუნიციპალიტეტი), გურიანთის (ოზურგეთის მუნიციპალიტეტი), მელაურის (სამტრედიის მუნიციპალიტეტი), ხაჯალიის (ლანჩხუთის მუნციპალიტეტი), ძევრის (თერჯოლის მუნიციპალიტეტი) და ქობულეთის №5 საჯარო სკოლის მოსწავლეებთან.
კოკში „ცოცხალი“ შეხვედრა ჩატარდა - ყველა რეგულაციის დაცვით, დანარჩენ მონაწილეებთან კი მუშაობა გაგრძელდა ონლაინ - დისტანციურად.
ჯგუფების მობილიზებასთან დაკავშირებით უნდა აღინიშნოს ხელშეწყობა სკოლის ხელმძღვანელების და პედაგოგების მხრიდან.
პირველი შეხვედრა მშვიდობისა და კონფლიქტის არსის განხილვით დაიწყო. თავიდანვე გამოჩნდა ახალგაზრდების აქტიურობა და მოტივირებულობა, მეტი გაიგონ კონფლიქტის მართვის კუთხით. ისინი სიამოვნებით დათანხმდნენ ინფორმაციის გავრცელებას და თავიანთ თანატოლებთან უკვე ჩაატარეს შეხვედრები.
„საჭირო თემაა ჩვენს ასაკში“, „მზად ვარ, 5 თვის განმავლობაში ჩავერთო ვორკშოპში“, „დასაწყისი მომეწონა და ყველა შეხვედრაზე ვიქნები“, „როდის გვექნება მომდევნო შეხვედრა?“ - ეს მონაწილეთა სიტყვებია.
ახალგაზრდული კლუბების ახალი ჯგუფები შეიქმნა და პირველი შეხვედრებიც ჩატარდა კოკის (ზუგდიდის მუნიციპალიტეტი), ფახულანის (წალენჯიხის მუნიციპალიტეტი), ნოსირის (სენაკის მუნიციპალიტეტი), გურიანთის (ოზურგეთის მუნიციპალიტეტი), ეწერის (სამტრედიის მუნიციპალიტეტი), ხაჯალიის (ლანჩხუთის მუნციპალიტეტი), ძევრის (თერჯოლის მუნიციპალიტეტი) და ქობულეთის №5 საჯარო სკოლის მოსწავლეებთან.
შეხვედრები, ძირითადად, ონლაინ ჩართვებით ჩატარდა. 5-თვიანი მუშაობის დაწყებას უძღოდა კომუნიკაცია დირექტორებთან და პედაგოგებთან, ჯგუფების დაკომპლექტება, პროგრამის განხილვა.
პირველივე შეხვედრების შემდეგ ცხადი გახდა, რომ სათემო სკოლების მოსწავლეებს განსაკუთრებით აინტერესებთ არაფორმალური განათლება - საკითხები, რომელთაც განიხილავენ ახალგაზრდული კლუბების შეხვედრებზე.
აგვისტოში დაიწყო აქტიური მუშაობა ახალი ახალგაზრდული კლუბების ორგანიზების კუთხით დასავლეთ საქართველოს 9 რეგიონში. მიმდინარეობს კომუნიკაცია სკოლების დირექტორებთან, პედაგოგებთან და სხვადასხვა რეგიონში ჩამოყალიბებული ახალგაზრდული კლუბების წევრებთან.
15 სექტემბრიდან იგეგმება ახალი ჯგუფების ჩამოყალიბება და მათთან 6-თვიანი სამუშაო ციკლის ჩატარება.
ჯერ იყო მოსამზადებელი მუშაობა: კლუბის წევრებთან ონლაინ ჩართვა, მონაწილეთა რაოდენობის განსაზღვრა, საპრეზენტაციო თემების შერჩევა, სტუმრების მოწვევა, ტექნიკური საკითხების მოგვარება.
ბოლოს კი ჩატარდა შემაჯამებელი ონლაინ შეხვედრა 9 მუნიციპალიტეტის ახალგაზრდული კლუბების მონაწილეობით. ესწრებოდნენ ასევე სკოლის დირექტორები, პედაგოგები, მშობლები.
კლუბის წევრებმა თავად მოამზადეს და გააკეთეს ოთხი პრეზენტაცია, რასაც მოყვა საინტერესო დისკუსია. შეხვედრის მონაწილეები საუბრობდნენ ძალადობის პრევენციაზე, დაცვის მექანიზმებზე, სკოლისა და ოჯახის როლზე.
შეხვედრაზე აშკარად ჩანდა, როგორი სხვანაირები გახდნენ ახალგაზრდები, როგორ შეიცვალა მათი დამოკიდებულება პრობლემის მიმართ - ეს იგრძნობოდა მათ გამოსვლებში, ეტყობოდა მათ გულწრფელობას, თავდაჯერებულობას, გაბედულებას.
ივნისში ისევ ონლაინ მუშაობა ჩატარდა ვაჟებთან. აქტივობებში ჩართულნი იყვნენ ჯგუფები თერჯოლის, ზუგდიდის, წალენჯიხის, ქუთაისის, სენაკის, ფოთის, ლანჩხუთის მუნიციპალიტეტების საჯარო სკოლებიდან. იყო საინტერესო განხილვები, ვიდეორგოლების ჩვენება, შემაჯამებელი შეხვედრის დაგეგმვა...
გაგრძელდა ჩართვები პედაგოგებთან - ისინი საუბრობდნენ თავიანთ გამოცდილებაზე, თუ რა გზები იპოვეს ონლაინ მუშაობის გასაუმჯობესებლად. მათი გამოცდილებით, ვიდეორგოლების გამოყენება ერთი საუკეთესო ხერხია ბიჭების დასაინტერესებლად.
იყო კიდევ ერთი სიახლე - დებატების კონკურსი. კონკურსში 8 ბიჭი მონაწილეობდა, იყვნენ გამოცდილი მსაჯები. 27 ივნისს გაიმართა ფინალი და გამოვლინდა დებატების კონკურსის გამარჯვებული დავით გეგუჩაძე, სამტრედიიდან.
ასე საინტერესოდ ჩაიარა ივნისმა...
ჰარმონიული ურთიერთობა ოჯახის წევრებს შორის ძალადობის პრევენციისთვის - ამ თემას მიეძღვნა ონლაინ ჩართვები ფოთის 21-ე საჯარო სკოლის, მენჯის (სენაკის მუნიციპალიტეტი) და ლიას (წალენჯიხის მუნიციპალიტეტი) საჯარო სკოლების ახალგაზრდულ კლუბებთან.
სადისკუსიო თემა იმდენად აქტუალურია, რომ ახალგაზრდები დიდი ინტერესით ჩაერთნენ განხილვაში. ისინი საუბრობდნენ პრობლემებზე, რომლებიც განსაკუთრებული სიმწვავით დადგა პანდემიის პირობებში. მათი თქმით, ოჯახი ყველაზე დიდი საყრდენია... ერთ-ერთ შეხვედრაზე მოზარდებმა სიყვარული „აუხსნეს“ ოჯახის წევრებს, ხმამაღლა ამბობდნენ, როგორ უყვართ დედა, მამა, და, ძმა.. ეს ძალიან შთამბეჭდავი იყო. და როგორც თავად აღნიშნეს, ეს დღე დაუვიწყარი იქნება მათთვის.