ახალგაზრდა ლიდერთა სკოლა (203)
ახალგაზრდა ლიდერთა სკოლა – გულისხმობს საქმიანობას ახალგაზრდობასთან მათი გაძლიერებისა და ლიდერული თვისებების ჩამოყალიბებისთვის. მუშაობა მიმდინარეობს დასავლეთ საქართველოს 9 მუნიციპალიტეტში - ქუთაისი, წყალტუბო, ხონი, თერჯოლა, სენაკი, ფოთი, ხურჩა/კოკი (ზუგდიდის მუნიციპალიტეტი), ლანჩხუთი, ოზურგეთი. ტარდება საინფორმაციო შეხვედრები გენდერულ და ოჯახში ძალადობის თემაზე ახალგაზრდულ კლუბებში, კონფლიქტოლოგის ვორკშოპები ახალგაზრდებთან, ეწყობა შეხვედრები ვაჟებთან, ჩამოყალიბდა ახალგაზრდა ტრენერთა ჯგუფი, იმართება ტრენინგები და სხვადასხვა სახის შეხვედრები ახალგაზრდების მონაწილეობით.
თერჯოლის, ზუგდიდის, ქუთაისის ახალგაზრდულ კლუბებთან ონლაინ ჩართვები გაიმართა საინტერესო საკითხზე - ჰარმონიული ურთიერთობა ოჯახის წევრებს შორის ძალადობის პრევენციისთვის.
თემის განხილვამ გამოიწვია მონაწილეთა მაქსიმალური ჩართვა. ისინი საუბრობდნენ, რამდენად მნიშვნელოვანია მათთვის ოჯახური იდილია, მშობლების თანადგომა. ახალგაზრდები შეეხნენ ტრადიციებს, მშობლების ჩართულობას პროფესიის არჩევაში.
კლუბის ერთ-ერთმა წევრმა თქვა, რომ ამ თემაზე საუბარმა შეცვალა მისი დამოკიდებულება ოჯახის მიმართ, სიყვარულით აავსო და, როცა სიყვარულზე ფიქრობ, უფრო კეთილი ხდებიო.
2, 3 და 5 ივნისს ჩატარდა ონლაინ შეხვედრები ანაკლიის (ზუგდიდის მუნიციპალიტეტი), თეკლათის (სენაკის მუნიციპალიტეტი) და კულაშის (სამტრედიის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.
მოსწავლეები გაეცნენ ივნისის თემას „კონფლიქტის მშვიდობიანად მოგვარების უნარები“. მოგვიანებით ფონდი „სოხუმის“ ფეისბუქგვერდზე აიტვირთა ეს ვიდეოგაკვეთილი.
შეხვედრების შემდეგ მოსწავლეებმა დაიწყეს დავალებების მომზადება - ვიდეომიმართვები, ესეები, ნახატები და უკუკავშირი - თუ რა გავლენა იქონია საპროექტო მუშაობამ მათზე.
გრძელდება „საუბარი დედებთან“. ივნისის პირველი შეხვედრა უკვე შედგა და ამის შესახებ ინფორმაციაც დაიბეჭდა ფეისბუქგვერდზე.
მაისში ვაჟებთან ონლაინ შეხვედრების თემა იყო „ტოლერანტობა“. ფონდი „სოხუმის“ ტრენერი დაუკავშირდა თერჯოლის, ზუგდიდის, წალენჯიხის, ქუთაისის, სენაკის, ფოთის, ლანჩხუთის მუნიციპალიტეტების საჯარო სკოლებს. ჩართვა მოხდა ჯგუფურადაც და ინდივიდუალურადაც. ვაჟები აღნიშნავენ, რომ ეს სიტყვა მათთვის უცხო არ არის, ხშირად ესმით, თუმცა მის შინაარსზე არასდროს უმსჯელიათ. ამიტომაც პირველი, რაც შეხვედრების დროს კეთდებოდა - იყო „ტოლერანტობის“ განმარტება. დიდი დრო დაეთმო იმაზე საუბარს, შეიძლება თუ არა ისწავლო ტოლერანტობა და რა მნიშვნელოვანია, ცხოვრობდე ტოლერანტულ საზოგადოებაში.
მუშაობაში იყო სიახლეც - ტრენერი ესაუბრა რამდენიმე მასწავლებელს, მათი გამოცდილების გასაზიარებლად. მასწავლებლების თქმით, ისინი მოსწავლეებთან მუშაობის დროს იყენებენ ვიდეორგოლებს, მულტფილმებს, პრეზენტაციებს, თანდათან პოზიტიური ნაბიჯები იდგმება ონლაინ სწავლების მხრივაც.
მაისის დასაწყისში სამი ონლაინ შეხვედრა ჩატარდა ახალგაზრდული კლუბის წევრებთან. ამჯერად ლანჩხუთის, ქუთაისის და სოფელ ნაბაკევის (სამტრედიის მუნიციპალიტეტი) სკოლების მოსწავლეები ჩაერთნენ. შეხვედრებზე განხილული იყო ძალადობის პრობლემა მოზარდებში, სკოლისა და ოჯახის როლი, დაცვის მექანიზმები. შეხვედრების მონაწილეებმა გულრფელად ისაუბრეს ძალადობის მიზეზებზე, მშობლებთან და მასწავლებელებთან ურთიერთობების პრობლემებზე, მოიყვანეს მაგალითები. აქცენტი გაკეთდა პანდემიის პირობებში გაზრდილ შემთხვევებზე და გამოსავალზე.
კონფლიქტის მართვის ჯგუფის წევრებთან მაისშიც ონლაინ გაიმართა მუშაობა. ფონდი „სოხუმის“ ფეისბუქგვერდზე კონფლიქტოლოგმა ატვირთა მორიგი გაკვეთილი „კონფლიქტის შესაძლო შედეგები, ქცევის სტილი კონფლიქტურ სიტუაციაში“.
ონლაინ შეხვედრები გაიმართა - ფახულანის (წალენჯიხის მუნიციპალიტეტი) მეორე საჯარო სკოლის, დვაბზუს (ოზურგეთის მუნიციპალიტეტი) და კულაშის (სამტრედიის მუნიციპალიტეტი) საჯარო სკოლების მოსწავლეებთან. მათ მოისმინეს ვიდეოგაკვეთილი, დაიწყეს ვიდეომიმართვების ჩაწერა კონფლიქტისა და COVID-19-ის თემაზე, ესეების და ნახატების მომზადება და მონაწილეობა საინტერესო რუბრიკაში „წერილი სანდო ადამიანს“.
უკვე მიღებულია პირველი წერილები და გამოქვეყნებულია ფეისბუქგვერდზე.
ფოთის კერძო სკოლის, ღვანკითის (თერჯოლის მუნიციპალიტეტი) და ქუთაისის მე-5 საჯარო სკოლების ახალგაზრდულ კლუბებშიც, როგორც სხვა კლუბებში - ტოლერანტობა იყო მსჯელობის თემა.
შეხვედრა ისევ ონლაინ გაიმართა, რადგან ჯერაც იკრძალება გარეთ გასვლა.
ახალგაზრდები აქტიურად ჩაერთნენ განხილვაში, საინტერესო იყო მათი ანალიზი ტოლერანტობის თემაზე. შეხვედრის შემდეგ მათ გაუჩნდათ ინიციატივები - დაწერონ ესეები, შექმნან ვიდეორგოლები. სკოლის დირექტორებმა და პედაგოგებმა კმაყოფილება გამოხატეს მოსწავლეების აქტიურობის გამო.
კიდევ სამი ონლაინ შეხვედრა გაიმართა კონფლიქტის მართვის ჯგუფის წევრებთან. 13, 15 და 16 აპრილს - ძევრის (თერჯოლის მუნიციპალიტეტი), კულაშის (სამტრედიის მუნიციპალიტეტი) და ქუთაისის №13 საჯარო სკოლებში. სულ თვეში, როგორც ყოველთვის, 9 შეხვედრა მოეწყო.
მოსწავლეებმა მოისმინეს ვიდეოგაკვეთილი და შემდეგ ტრენერთან ერთად ისაუბრეს კონფლიქტის ესკალაციაზე, განიხილეს სტადიები, მიიღეს დავალებები - ჩაეწერათ ვიდეომიმართვები კონფლიქტისა და COVID-19-ის შესახებ, დაეწერათ ესეები, გაეკეთებინათ ნახატები... მოზარდებმა დიდი ინტერესით დაიწყეს საშინაო დავალების შესრულება და ზოგიერთმა უკვე გამოაგზავნა კიდეც.
ონლაინ ჩართვები მოეწყო მენჯის (სენაკის მუნიციპალიტეტის), განმუხურის (ზუგდიდის მუნიციპალიტეტი) და ოზურგეთის საჯარო სკოლების ახალგაზრდულ კლუბებთან.
საუბრის თემა იყო ტოლერანტობა, რომელიც პანდემიის ვითარებაშიც საკმაოდ აქტუალურია -დღესაც არის შემწყნარებლობის, სიყვარულის დეფიციტი. მოსწავლეებმა პანდემიის თემაზე მოამზადეს და ფონდი „სოხუმის“ ფეისბუქგვერდზე განთავსდა სამი ვიდეორგოლი, რაც მათი ინიციატივის და აქტიური ჯგუფური მუშაობის შედეგია.
სამწუხაროდ, ზოგან არის ტექნიკური პრობლემები და ამის გამო ყველა მოსწავლე ვერ ჩაერთო, თუმცა მას პროექტის მოდერატორი ინდივიდუალურად შეეხმიანა.
7, 8 და 10 აპრილს ჩატარდა ონლაინ შეხვედრები სუფსის (ლანჩხუთის მუნიციპალიტეტი), დვაბზუს (ოზურგეთის მუნიციპალიტეტი) და თეკლათის (სენაკის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.
მოსწავლეებმა ტრენერთან ერთად განიხილეს თემა „კონფლიქტის ესკალაცია“, ისაუბრეს კონკრეტულ მაგალითებზე თავიანთი ცხოვრებიდან.
შემდეგ მათ დაიწყეს საშინაო დავალების შესრულება: ვიდეომიმართვები კონფლიქტისა და COVID-19-ის შესახებ, ესეები, ნახატები... ზოგიერთი მათგანის ნამუშევარი უკვე გამოქვეყნდა ფონდი „სოხუმის“ ფეისბუქგვერდზე.
უნდა აღინიშნოს, რომ მშვიდობისმყოფელთა რეგიონულმა პლატფორმამ მადლობა გადაგვიხადა იმ შრომისთვის, რომელსაც მოსწავლეებთან ვეწევით პანდემიის პირობებში.
ფეისბუქგვერდზე აღნიშნულია: ძალიან გვიხარია, რომ ამ სიტუაციაში ჩვენი პარტნიორი ორგანიზაცია კულტურულ-ჰუმანიტარული ფონდი „სოხუმი“ აგრძელებს ონლაინ სემინარებს კონფლიქტების მართვაში. უღრმესი მადლობა ლელა შენგელიას, რომელიც ამ მუშაობას წარმართავს.
2, 4 და 6 აპრილს ჩატარდა ონლაინ შეხვედრები ფოთის შპს „გიმნაზიის“, ანაკლიის (ზუგდიდის მუნიციპალიტეტი) და ფახულანის (წალენჯიხის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.
მოსწავლეებთან ერთად განხილული იყო თემა „კონფლიქტის ესკალაცია“, ხოლო მესენჯერის ჯგუფებში გაიგზავნა მოთხრობები, რომლებშიც მოცემულია კონფლიქტის ესკალაციის მაგალითები.
7 აპრილს ფონდი „სოხუმის“კონფლიქტოლოგმა ფეისბუქგვერდზე ატვირთა მორიგი ონლაინ გაკვეთილი კონფლიქტის ესკალაციის თემაზე.
მოსწავლეებს მიეცათ დავალება, ჩაეწერათ ვიდეომიმართვები კონფლიქტისა და covid 19-ის შესახებ, გამოეგზავნათ ესეები, ნახატები... ფონდი „სოხუმის“ ფეისბუქგვერდზე უკვე გაჩნდა მათი ნამუშევრები, რომელთაც ინტერესით ეცნობა მკითხველი.