ტყიბულის, თერჯოლის და სენაკის ქალთა მხარდაჭერის ცენტრების ბენეფიციარებისთვის ქალთა ფონდი „სოხუმის“ იურისტმა საკონსულტაციო შეხვედრები მოაწყო.
იურისტმა ასევე სამი ონლაინ კონსულტაცია გაუწია სამტრედიის, ვანის და ჩოხატაურის ქალთა მხარდაჭერის ცენტრების ბენეფიციარებს - გვარის შეცვლის, ალიმენტების და განქორწინების საკითხებზე.
იურისტი აქტიურად მუშაობდა სარეაბილიტაციო ცენტრში ქალთა ფონდი „სოხუმის“ სოციალურ მუშაკთან და ფსიქოლოგთან ერთად. ცენტრში მყოფ ძალადობის მსხვერპლ ქალებს მათთვის საინტერესო საკითხებზე ესაუბრა და სათანადო რჩევები მისცა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„დღეს სხვა ჭრილში დავინახე ჩემი მოვალეობები, მივხვდი, რომ ბევრი რამ არის ჩემზე დამოკიდებული იმ კუთხით, რომ აქტიური მოსახლეობა მყავდეს თემში.“
„მოვისმინე თემები, რომლებზეც გამიგია, მაგრამ თურმე არ მცოდნია.“
„მერის წარმომადგენლები არიან ჩვენი პოლიტიკის გამტარებლები თავიანთ თემში, ამიტომ ჩვენთვის მნიშვნელოვანია, რომ მათი კვალიფიკაციის ამაღლებაში გვეხმარებით“...
ეს მონაწილეთა შეფასებებია. ონლაინ ტრენინგს ესწრებოდა 82 ადამიანი ბაღდათის, ვანის და თერჯოლის მუნიციპალიტეტებიდან: მერის წარმომადგენლები სოფელში (55 მონაწილე) და მათი ასისტენტები. მათ მიეწოდათ ინფორმაცია სხვადასხვა საკითხზე, მათ შორის: ადგილობრივი თვითმმართველობების როლი გენდერული თანასწორობის, ოჯახში ძალადობის პრევენციის და რეაგირების საქმეში;
ქალთა ფონდი „სოხუმის“ ფსიქოლოგმა ჩაატარა ტყიბულის და თერჯოლის ქალთა მხარდაჭერის ცენტრების ორგანიზებული გასვლითი შეხვედრები. ონლაინ ჯგუფური შეხვედრები გაიმართა ჩოხატაურის, ბაღდათის და ხურჩის (ზუგდიდის მუნიციპალიტეტი) ქალთა მხარდაჭერის ცენტრების ბენეფიციარებთან.
მუშაობა მიმდინარეობდა სხვა მიმართულებებითაც: ონლაინ სესიები ორ ოჯახურ წყვილთან, ონლაინ ინდივიდუალური ფსიქოთერაპიული სესიები, რომლებშიც მონაწილეობდა 18 ბენეფიციარი რეგიონიდან და 13 - ქუთაისიდან. მარტში ფსიქოლოგს დახმარებისთვის პირველად მიმართა 5-მა ადამიანმა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ის ერთ-ერთია იმ მოსწავლეთაგან, ვინც პოლიმერული თიხის კურსს გადის. კურსი წარმატებით ფუნქციონირებს ქალთა ფონდი „სოხუმის“ დღის სარებილიტაციო ცენტრში.
- ვერ წარმოიდგენთ, როგორ ლაგდება ჩემი ცხოვრება. თურმე ბევრი ავადმყოფობა მართლაც შიშებისგან და სტრესისგან იწყება. მადლობელი ვარ მოპოვებული კარგი განწყობისა და მშვიდი ძილისთვის, - ამბობს ის.
ეს დღის სარებილიტაციო ცენტრის ბენეფიციარებთან ფსიქოლოგის მუშაობის ერთ-ერთი შედეგია. ფსიქოლოგი ყოველკვირეულად 5 სარეაბილიტაციო სესიას ატარებს ოჯახში ძალადობის მსხვერპლ ქალებთან, რომლებიც სიღარიბის ზღვარს ქვემოთ ცხოვრობენ. ფსიქოლოგთან ერთად მუშაობაში აქტიურად არიან ჩართულები ქალთა ფონდი „სოხუმის“ სოციალური მუშაკი და იურისტი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქსელი WAVE-ის ორგანიზებით, რომელიც აერთიანებს 150-ზე მეტ ქალთა მიმართ ძალადობის საკითხებზე მომუშავე არასამთავრობო ორგანიზაცია, ჩატარდა უკრაინელი ქალების და ბავშვების მხარდაჭერისადმი მიძღვნილი შეხვედრა. შეხვედრის მიზანი იყო, უკრაინაში ომის შედეგად ქალებისა და ბავშვების ცხოვრებაში გადაუდებელი საჭიროებების შესახებ ინფორმაციის მიღება უკრაინელი კოლეგებისგან, ინფორმაციის გაცვლა პარტნიორების მხრიდან არსებული მხარდაჭერის ინიციატივებზე. ქსელის წევრებმა იმსჯელეს სამომავლო სტრატეგიებზე, რაც უზრუნველყოფს დახმარების მეტ ეფექტიანობას.
ქალთა ფონდი „სოხუმის“ წარმომადგენელმა, ეკა გამახარიამ კოლეგებს გაუზიარა ის კონკრეტული ინიციატივები, რომლებიც უკრაინაში მყოფ მოსახლეობის და საქართველოში უკრაინელ ლტოლვილთა მხარდასაჭერად ხორციელდება ორგანიზაციის მხრიდან - ოკუპირებულ მელიტოპოლში მოსახლეობის ფულადი რესურსებით და ჰუმანიტარული ტვირთით დახმარება; ქუთაისში განთავსებული უკრაინელი ლტოლვილებისთვის საჭირო ნივთების და პროდუქტების შეძენა, დროებით ბინის ქირის გადახდა და დასაქმებაში დახმარება, ასევე - ფსიქოლოგის კონსულტაცია.
ხუთი მუნიციპალიტეტის (ქობულეთი, ჩოხატაური, სენაკი, წალენჯიხა და ბაღდათი) ახალგაზრდობის გაძლიერების ცენტრის წევრები, მათი მშობლები და პედაგოგები, სკოლის დირექტორები, მუნიციპალიტეტების ახალგაზრდული დეპარტამენტის და გენდერული თანასწორობის საბჭოს წარმომადგენლები ესწრებოდნენ შემაჯამებელ შეხვედრებს, რომლებიც ონლაინ ჩატარდა.
ცენტრებმა წარმოადგინეს ექვსთვიანი აქტიური მუშაობის ანგარიში. ახალგაზრდების პრეზენტაციებში და ემოციურ გამოსვლებში ჩანდა საგრძნობი შედეგები და ცვლილებები. ისინი ამბობდნენ, რამდენად მნიშვნელოვანია მათთვის ინიცირებულ ღონისძიებებში მონაწილეობა, გუნდური მუშაობა, სატრენინგო კურსზე სერიოზული ცოდნის და უამრავი უნარ-ჩვევის შეძენა.
ქალთა ფონდმა „სოხუმმა“ სატრენინგო კურსის მონაწილეებს და ახალგაზრდა ტრენერებს სერტიფიკატები გადასცა, პროცესში ჩართულ სკოლებს კი - მადლობის სიგელები მხარდაჭერისა და თანამშრომლობისთვის.
ერთობლივი კომპლექსური ყოველდღიური ინტენსიური ფსიქორეაბილიტაციური მუშაობა მიმდინარეობდა ქალთა ფონდი „სოხუმის“ სარეაბილიტაციო ცენტრში ორ ქალთან. ერთი მათგანს 4 მცირეწლოვანი შვილი ჰყავს, მეორე კი ორი ბავშვის დედაა.
ახალგაზრდა ქალები ოჯახში ძალადობის მსხვერპლები არიან, ბავშვობიდან ტრავმირებულები, სოციალურად დაუცველები. მართალია, თავიანთ მუნიციპალიტეტში იღებენ გარკვეულ დახმარებას და მხარდაჭერას, მაგრამ კომპლექსური მუშაობაც აუცილებელი იყო მათთვის.
სარეაბილიტაციო ცენტრში ორი კვირის მანძილზე მათი რამდენიმე პრობლემა მოგვარდა, გაირკვა სხვა პრობლემების მოგვარების გზებიც. ქალებთან და ბავშვებთან მუშაობაში ჩართულები იყვნენ სოციალური მუშაკი, იურისტი და ფსიქოლოგი.
ქალთა ფონდი „სოხუმი“ წლებია, მუნიციპალიტეტებში აქტიურად ატარებს შეხვედრებს მრგვალი მაგიდის ფორმატით, ძალადობის წინააღმდეგ მიმართული კანონით გათვალისწინებული რეფერირების სუბიექტების ჩართულობით, რათა ხელი შეუწყოს ადგილობრივ დონეზე უწყებებს შორის კოორდინაციის სისტემის დანერგვას.
შეხვედრებმა გამოავლინა ადგილებზე უწყებათაშორისი კომისიის ჩამოყალიბების საჭიროება. ამ ინიციატივის რეალიზებისთვის აქტიური მუშაობა დაიწყო სამიზნე მუნიციპალიტეტებში. ჩატარდა სამი სამუშაო შეხვედრა ბაღდათის, სენაკის და ჩოხატაურის მუნიციპალიტეტების წარმომადგენლებთან. შეხვედრებს ესწრებოდნენ მერის მოადგილეები, მერიის იურიდიული, ახალგაზრდული, სოციალური და ჯანდაცვის განყოფილებების ხელმძღვანელები, ბავშვთა განყოფილების კოორდინატორები, გენდერულ საკითხებზე პასუხისმგებელი პირები.
ქალთა მხარდაჭერის ცენტრები აქტიურად ეხმიანებიან ყველა აქტუალურ მოვლენას. ქალებმა პროტესტი გამოხატეს უკრაინაში მიმდინარე ომის მიმართ. ათივე მუნიციპალიტეტში (თერჯოლა, ბაღდათი, ვანი, ტყიბული, სამტრედია, ზუგდიდი, წალენჯიხა, სენაკი, ქობულეთი, ჩოხატაური) გაიმართა მდუმარე აქციები.
სოლიდარობა მშვიდობისთვის! სოლიდარობა ჩვენი შვილების ნათელი მომავლისთვის! - ასეთი იყო ქალების სამშვიდობო გზავნილები.
ქალთა მხარდაჭერის ცენტრების წარმომადგენლები ასევე მონაწილეობდნენ ქალთა ფონდი „სოხუმის“ მდუმარე აქციაზე, რომელიც 8 მარტს ჩატარდა ქუთაისში.
2022 წლის 17 მარტი, ბერლინი
ძვირფასო დებო და ძმებო,
ძვირფასო მეგობრებო და კოლეგებო,
ძვირფასო პარტნიორებო უკრაინასა და მეზობელ ქვეყნებში!
რთულია, წარმოვიდგინოთ თქვენი მდგომარეობა ამ სიტუაციაში. სიტყვები არ გვყოფნის ჩვენი გრძნობების გამოსახატავად, რადგან ამ დღეებში განუზომელი ტანჯვის მოწმენი ვართ. ომი წარმოუდგენლად საშინელი და სასტიკია, ომს მივყავართ ნგრევამდე და სიკვდილამდე - ომი მოიცავს ყველაფერს, რისი გადალახვაც გვსურდა საერთო ძალისხმევით და პარტნიორობით ღირსეული სიცოცხლისთვის. ომი კავშირების გაწყვეტისა და ადამიანების გაყოფის საშინელი მცდელობაა, იგი ხორციელდება ახლო და გრძელვადიანი ურთიერთობების გასანადგურებლად.
ამ მოცემულობაში, ჩვენი საშუალებები ამ სიტუაციის შესაცვლელად შეზღუდულია. მაგრამ გვსურს დაგამშვიდოთ, რომ გავაკეთებთ თქვენთვის ყველაფერს, რაც შესაძლებელია. ჩვენ გვსურს შეძლებისდაგვარად დაგიჭიროთ მხარი და გვერდით დაგიდგეთ. გთხოვთ, გვიამბეთ თქვენს საჭიროებებზე და სიტუაციაზე, რა შეგვიძლია გავაკეთოთ თქვენთვის ახლა - რადგან მდგომარეობა და საჭიროებები სწრაფად იცვლება. გადაწყვეტილების მიღებისას ჩვენ ვეყრდნობით თქვენი მხრიდან მიღებულ ინფორმაციას. ჩვენ ვცდილობთ ვიმოქმედოთ რაც შეიძლება სწრაფად და ვიყოთ მაქსიმალურად მოქნილები. ჩვენმა ჰუმანიტარულმა ფილიალმა Diakonie Katastrophenhilfe-მ შექმნა გადაუდებელი საჭიროების ფონდი და ჩვენ ვიღებთ შემოწირულობებს ამ ფონდის გასაფართოებლად.