ხონის ქალთა საინიციატივო ჯგუფის მორიგ შეხვედრაზე განიხილეს ქსელის შექმნის და მუშაობის პრინციპები: თუ რა სტრატეგიული მიმართულებები უნდა ჰქონდეს ქსელს, რომელიც აქტიურად იმუშავებს ადგილობრივ დონეზე გაეროს რეზოლუცია 1325-ის იმპლემენტაციის კუთხით. ჯგუფის წევრები მოტივირებული არიან როგორც ადგილობრივ, ისე რეგიონალურ ქსელში აქტიური ჩართვისთვის. შეხვედრაზე გამოიკვეთა ადგილობრივი თემისთვის ყველაზე სენსიტიური პრობლემები.
შეხვედრის ბოლოს მონაწილეებმა ნახეს კლიპი, რომელშიც პროექტში ჩართული ქალები ტრენინგების ციკლზე საუბრობენ. ტრენინგების შედეგად ყველა მათგანის კომპეტენცია გაიზარდა სხვადასხვა მიმართულებით. განსაკუთრებით მნიშვნელოვანია, რომ ისინი აქტიურად იმუშავებენ თავიანთ თემში, რათა უკეთესობისკენ შეცვალონ დევნილი ქალების და გოგონების ცხოვრება.
პროექტი ხორციელდება
გაეროს ქალთა ორგანიზაციის მხარდაჭერით
ფსიქოლოგთან შეხვედრები ივლისში ვანის, ქობულეთის, კოკის (ზუგდიდის მუნიციპალიტეტი), წალენჯიხის და სამტრედიის ქალთა მხარდაჭერის ცენტრებმა მოაწყვეს. ამ მუნიციპალიტეტებში გაიმართა ჯგუფური და ინდივიდუალური შეხვედრები 34 ბენეფიციარის მონაწილეობით.
შეხვედრების შედეგები: გამოვლინდა ოჯახში ძალადობის ორი მსხვერპლი, რომლებთანაც გრძელდება მუშაობა.
გასვლითი შეხვედრების გარდა ონლაინ ჩატარდა ინდივიდუალური ფსიქოთერაპიული სესიები რეგიონებში მცხოვრებ 9 ბენეფიციართან.
ქუთაისში, ქალთა ფონდი „სოხუმის“ ოფისში მიმდინარეობდა მუშაობა 16 ადამიანთან და ერთ ოჯახურ წყვილთან.
მუშაობას თანდათან დადებითი შედეგები მოაქვს და ბენეფიციარები მადლობას გამოხატავენ უკეთესი განწყობის, პრობლემების მოგვარების, ოჯახური ფსიქოლოგიური კლიმატის გაუმჯობესების გამო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფატიმა რობაქიძე - ტყიბულის ქალთა მხარდაჭერის ცენტრის მობილიზატორია. ცენტრი გასული წლის აპრილში გაიხსნა და ის ერთ-ერთია, რომელიც აქტიურად მუშაობს 10 მუნიციპალიტეტში პროექტის „ქალთა უფლებების გაძლიერება დასავლეთ საქართველოში“ ფარგლებში.
წარმატების ამ ისტორიაში ტყიბულის ქალთა მხარდაჭერის ცენტრის მობილიზატორის მონოლოგს გთავაზობთ.
ეს არის ამბავი იმისა, ფატიმა რობაქიძე რიგითი პედაგოგიდან როგორ იქცა სამოქალაქო აქტივისტად:
„მე პედაგოგი ვარ და აქამდე მიმაჩნდა, რომ ერთადერთი ფოკუსი უნდა მქონოდა – სასწავლო პროცესი და საგანმანათლებლო-აღმზრდელობითი გარემოს შექმნა ჩემს კლასში და ჩემი მოსწავლეების მშობლებთან. ვფიქრობდი, რომ სხვა რამისთვის დრო არ უნდა დამეხარჯა. ჩემთვის პირველი „ფანჯარა“ მაშინ გაიხსნა, როცა მცირე დროით სამოქალაქო განათლების გაკვეთილების ჩატარება მთხოვეს.
იმ დროს გავეცანი ქალთა ფონდი „სოხუმის“ მუშაობას და მივხვდი, რომ ყველაფერი, რაც სანუკვარად მიმაჩნია – ხელსაყრელი კლიმატის შექმნა ბავშვებისთვის სწავლებისა და აღზრდისათვის, უამრავ ფაქტორზეა დამოკიდებული.
ფორუმ-თეატრს საკმაოდ საინტერესო ისტორია აქვს: უამრავი წარმოდგენა, ათობით მსახიობი, რომელიც წლებთან ერთად იცვლებოდნენ... ახლა ამ ისტორიის დაარქივება დაიწყო - შეიკრიბა სცენარები და ერთ კრებულად დაიბეჭდა. ეს არის ერთგვარი სახელმძღვანელო, რა სახის სცენარებზე იგება ფორუმ-თეატრის წარმოდგენები...
ივლისში აქტიურად მიმდინარეობდა სარეპეტიციო მუშაობა და წარმოდგენები. ფორუმ-თეატრმა ორი გამოსვლა ჩაატარა ქუთაისში - ცენტრალურ პარკში და რიონისპირა ახალ სკვერში.
მაყურებელი ბევრი არ იყო, მაგრამ საინტერესო აღმოჩნდა მათი უკუკავშირი. განსაკუთრებული აღტაცებით საუბრობდნენ უცხოელი ტურისტები, რომლებმაც აუდიტორიასთან დიალოგის ამ უჩვეულო ფორმის მნიშვნელობაზე გაამახვილეს ყურადღება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონიტორინგის ჯგუფმა კიდევ ერთ მნიშვნელოვან საკითხზე დაიწყო მუშაობა - მუნიციპალიტეტების ბაზაზე არსებული ბავშვთა უფლებების დაცვის და მხარდაჭერის განყოფილებების ეფექტიანობის შეფასება და ამჟამინდელი გამოწვევების გამოვლენა.
ამ ეტაპზე მიმდინარეობს პროგრამების და არსებული სტრუქტურის შესახებ ინფორმაციის შეგროვება. მონიტორინგის ჯგუფი აქტიურ კომუნიკაციაშია 10 სამიზნე მუნიციპალიტეტის ბავშვთა უფლებების დაცვის და მხარდაჭერის განყოფილებებთან. ტარდება ჩაღრმავებული ინტერვიუები - როგორც პერსონალთან, ასევე ბენეფიციარებთან და ექსპერტებთან.
ძირითადი ფოკუსი მიმართულია ამ განყოფილებების, როგორც ოჯახში ძალადობასთან ბრძოლის ერთ-ერთი კომპონენტის, მუშაობის მექანიზმების გაანალიზება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ამ სიტყვებს კომენტარები არ სჭირდება…
მ., 40 წლის: - პირველად ვიგრძენი ასეთი დიდი დახმარება, იმედი, პატივისცემა. გავეცანი სოციალურ სერვისებს და ჩემს უფლებებს, რომლებისთვისაც უნდა ვიბრძოლო და მივაღწევ სამართლიანობას. ყველას მადლობას ვუხდი მხარდაჭერისთვის, ყურადღებისა და გულითადობისათვის და დიდ წარმატებებს გისურვებთ ამ რთულ საქმეში.
ნ., 32 წლის: - აქ შევხვდი ყველაზე თბილ, პროფესიონალ და მზრუნველ ადამიანებს. მათგან მივიღე კონსულტაციები ყველა სფროში, რისთვისაც ძალიან მადლიერი ვარ. ბევრი უნდა იყოს ასეთი ორგანიზაცია, სადაც მსხვერპლი საჭირო დახმარებას მიიღებს.
ივლისში ქალთა ფონდი „სოხუმის“ სარეაბილიტაციო ცენტრში 6 ადამიანი იმყოფებოდა - ორი ქალი ბავშვებთან ერთად. ჩატარდა კომპლექსური მუშაობა, რომელშიც აქტიურად იყვნენ ჩართულები პედაგოგი, სოციალური მუშაკი, იურისტი და ფსიქოლოგი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხუთი თვეა, უკრაინაში ომია. სამწუხაროდ, ჩვენს ქვეყანაში მატულობს ლტოლვილთა რიცხვიც.
წინა თვის ბოლოს ჩვენს ბაზაში უკრაინიდან ჩამოსული 122 ადამიანი იყო, ახლა კი 197-ია. მათი ნაწილი ქუთაისში ცხოვრობს, ნაწილი - წყალტუბოში, სენაკში, ზუგდიდში, ტყიბულში, ხარაგაულში, ვანში, სამტრედიაში.
ქალთა ფონდმა „სოხუმმა“ ივლისში 15 ოჯახს გაუწია დახმარება. დაეხმარა ცალკეულ ადამიანებსაც. ვინაიდან აგვისტო საშვებულებო პერიოდია, მხარდაჭერის ჯგუფი ცდილობს, ამ თვეში კიდევ დაარიგოს დახმარების პაკეტები.
2 ივლისს ჩვენი ორგანიზაციის თანამშრომლები მონაწილეობდნენ გაეროს ლტოლვილთა უმაღლესი კომისარიატის ორგანიზებულ შეხვედრაში, სადაც ესწრებოდნენ ჯანდაცვის, საგარეო საქმეთა საინისტროს და სხვა უწყებების წარმომადგენლები. დაისვა ბევრი საჭირბოროტო საკითხი, რომლებიც სასწრაფო გადაწყვეტას საჭიროებს, მაგ., მცირეწლოვანი ბავშვების მკურნალობის, მშობიარობის, უფასო აცრების საკითხი.
სოფელ ფახულანში (წალენჯიხის მუნიციპალიტეტი), კონფლიქტის გამყოფ ხაზზე, ჭრა-კერვის მორიგი კურსები ტარდება. აქ ასწავლიან თანამედროვე ტექნიკის გამოყენებას, ქსოვილების შერჩევას, მარტივიდან ყველაზე რთულამდე - სხვადასხვა ნაწარმის გამოჭრას და შეკერვას. ასე ხდება შემოქმედებითი ენერგიის რეალიზება.
როგორც კურსის მონაწილეები ამბობენ, საოცარი შეგრძნებაა, გააცოცხლო შენი იდეა, საკუთარი ხელით შექმნა სამოსი, შენი განუმეორებელი სტილი და გარდერობი. მათ იციან, რომ მიღებული ცოდნა შეუძლიათ გამოიყენონ საკუთარი მცირე ბიზნესის დასაწყებად, ისევე, როგორც ფახულანის თუ ქუთაისის დღის სარებილიტაციო ცენტრის არაერთმა კურსდამთავრებულმა შეძლო.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
კიდევ ერთი მრგვალი მაგიდა გაიმართა ადგილობრივი რეფერირების სუბიექტების მონაწილეობით - ამჯერად ქობულეთის საკრებულოს სხდომათა დარბაზში.
შეხვედრას ესწრებოდნენ: ქობულეთის საკრებულოს გენდერული თანასწორობის საბჭოს წევრები, მერიის, სოციალური სამსახურების, პოლიციის სამმართველოს წარმომადგენლები. მოწვეულნი იყვნენ ლანჩხუთის მერიის სოციალური და ჯანდაცვის სამსახურის უფროსი და ბავშვთა განყოფილების სოციალური მუშაკი, რომლებმაც თავიანთი მუშაობის სპეციფიკა და პრაქტიკა გაუზიარეს ქობულეთელ კოლეგებს.
შეხვედრაზე ისაუბრეს ძალადობის პრევენციასა და მსხვერპლთა დაცვაზე, ადგილობრივ სტრუქტურებთან თანამშრომლობაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ იურისტი აქტიურად ხვდებოდა ბენეფიციარებს ქალთა მხარდაჭერის ცენტრებში. ივლისში შედგა ჯგუფური და ინდივიდუალური იურიდიული შეხვედრები დასავლეთ საქართველოს 6 მუნიციპალიტეტში: ვანში, ქობულეთში, ზუგდიდში (სოფელი კოკი), წალენჯიხაში, სამტრედიასა და თერჯოლაში. შეხვედრებში მონაწილეობდა 34 ადამიანი.
იურისტმა ასევე სამი ინდივიდუალური კონსულტაცია გასცა ქუთაისში.
უფასო იურიდიული სერვისი სერიოზული მხარდაჭერაა ადამიანებისთვის, რომლებიც თავიანთთვის საინტერესო კითხვებზე იღებენ პასუხს და იურისტის დახმარებით შეუძლიათ კომპეტენტურად მოაგვარონ პრობლემები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)