ქუთაისის ახალგაზრდული კლუბის ჯგუფმა ფონდ „სოხუმში“ ჩაატარა ღონისძიება „ჩვენ არ ვითვლით ქრომოსომებს“. მოიწვიეს ბავშვები ამ დიაგნოზით, ფსიქოლოგი, სოციალური რეაბილიტაციის ცენტრის მენეჯერი.
ღონისძიება მარი კურტანიძის ინიციატივით გაიმართა. სტუმრებმა ძალიან იხალისეს და მიიღეს საჩუქრები.
ბათუმის ამომრჩეველ ქალთა კლუბის წევრები მორიგი დღის წესრიგით შეიკრიბნენ. ადვოკატირების ჯგუფმა წარადგინა ჩატარებული საქმიანობის მოკლე ანგარიში და ჩაინიშნა ახალი საკითხებიც, რომლებიც კლუბის წინაშე დაისვა ქალთა ჯგუფების მიერ. სხდომაზე მოწვეულმა ადგილობრივი ხელისუფლების წარმომადგენელმა აღნიშნა, რომ ამ საკითხებზე აუცილებლად მოხდება რეაგირება და მადლობა გადაუხადა მათ სამოქალაქო აქტივობისა და ადგილობრივ სოციალურ პოლიტიკაში მონაწილეობისათვის.
კლუბის წევრებმა ასევე გამოკვეთეს საკითხები, რომელთა ადვოკატირება უნდა მოხდეს ცენტრალურ სტრუქტურებთან, კერძოდ შრომის, ჯანმრთელობის და სოციალური დაცვის სამინისტროსთან.
უკუკავშირმა გამოკვეთა კლუბის წევრების ხედვა სამომავლო საქმიანობასთან დაკავშირებით.
მარტი ქალთა თვედ ითვლება, ამიტომაც ახალგაზრდული კლუბების საინფორმაციო შეხვედრებზე მთავარ თემად იქცა ქალთა სოლიდარობა ძალადობის პრევენციაში.
ხონის მე-4 სკოლაში ჩატარებულ საინფორმაციო შეხვედრაზე მონაწილეებმა მოისმინეს ინფორმაცია ფონდი „სოხუმის“ შესახებ და იმსჯელეს ქალთა სოლიდარობის საკითხზე.
ფოთის მე-7 და კოკის საჯარო სკოლაში მონაწილეებმა თემის მიმართ დიდი ინტერესი გამოხატეს და დისკუსიაშიც ჩაერთნენ.
წყალტუბოს 1-ლ საჯარო სკოლაში გოგონები აქტიურობდნენ, სენაკის მე-4 სკოლის მოსწავლეებს შორის კი განსაკუთრებით გამოირჩეოდნენ ბიჭები, რომლებიც გულახდილად ამბობდნენ, რომ ქალებს ყოველდღე უნდა მოუწყო დღესასწაული.
***
„სადა ხარ ჩემო სულიკო“, - ასე ჰქვია რეჟისორ ლია ჯაყელის დოკუმენტურ ფილმს, რომელიც გვიამბობს ვარინკა წერეთელზე - აკაკი წერეთლის „სულიკოს“ ტექსტზე შექმნილი პოპულარული ქართული სიმღერის ავტორზე.
ფილმი არის დავიწყებული საზოგადო მოღვაწე ქალის შესახებ, გადაღებულია 10 წლის წინ და ახლაც საკმაოდ აქტუალურია.
ქუთაისში დემოკრატიული ჩართულობის ცენტრში გამართულ ფილმის ჩვენებას ფონდი „სოხუმის“ ახალგაზრდული კლუბის 8 წევრი დაესწრო. მათ მონაწილეობა მიიღეს დისკუსიაშიც, რომელიც აქტიურად და საინტერესოდ წარიმართა.
ქალთა სოლიდარობის კვირეულის ფარგლებში ფოთის ქალთა მხარდაჭერის ცენტრის ინიციატივით ჩატარდა მრგვალი მაგიდა.
შეხვედრას ესწრებოდნენ კოლექტიურ ცენტრებში მცხოვრები დევნილები. მრგვალ მაგიდაზე მოწვეულნი იყვნენ ქალაქ ფოთის მერიის და მალთაყვის უბნის ტერიტორიული ორგანოს წარმომადგენლები.
მრგვალი მაგიდის დროს დევნილებს ჰქონდათ შესაძლებლობა, გაცნობოდნენ ფოთის სოციალურ და ჯანდაცვის პროგრამებს, ახალგაზრდებისთვის დაგეგმილ ღონისძიებებს. მათ შეძლეს თავიანთი პრობლემების დაფიქსირება ადგილობრივი თვითმმართველობის წარმომადგენლების წინაშე, რაც თანამშრომლობის და პრობლემების მოგვარების საწინდარია.
15 თებერვალს ჩატარდა ქუთაისის ამომრჩეველ ქალთა კლუბის სხდომა. სხდომას ესწრებოდნენ კლუბის აქტივისტი ქალბატონები და ახალი წევრები. მოწვეული იყო მერიის სოციალური სამსახურის უფროსის მოადგილე მამუკა სანიკიძე. მან შეკრებილებს გააცნო 2016 წლის ბიუჯეტის მიხედვით გაწერილი სოციალური პროგრამები და განუმარტა სარგებლობის პირობები. ითქვა, რომ წელს არის ახალი პროგრამა, რომელიც სმენადაქვეითებულთა - კოხლეალური იმპლანტით მოსარგებლე ბენეფიციართა დახმარებას გულისხმობს ელემენტებით და სადენებით. ასევე ახალია პროგრამა, რომელიც საბინაო ფონდის - დროებითი საცხოვრისის შექმნას გულისხმობს.
კლუბის წევრებმა აღნიშნეს, რომ ამ ინფორმაციებს გაავრცელებენ და ბევრი ადამიანი გაიგებს საჭირო პროგრამების შესახებ.
რამდენიმე ქალბატონმა პირადი - სხვადასხვა სახის პრობლემების შესახებ მოახსენა სტუმარს, მან ჩაინიშნა და გარკვევას და დახმარებას შეპირდა.
ადგილობრივი პრობლემის ადვოკატირების მიზნით კლუბის 7 წევრი მიწვეულია გენდერული საკონსულტაციო საბჭოს სხდომაზე, სადაც საქალაქო ტრანსპორტის საკითხს განიხილავენ.
ახალგაზრდული კლუბების საინფორმაციო შეხვედრები გაიმართა კოკის (ზუგდიდის მუნიციპალიტეტი) საჯარო სკოლაში, ხონის ქალთა მხარდაჭერის ცენტრში და ქუთაისის მე-6 სკოლაში.
იყო საინტერესო ცხოვრებისეული ისტორიები სხვა ეროვნებისა და რელიგიის ადამიანების შესახებ, საუბრები რელიგიაზე, შერეულ ოჯახებზე. ზოგიერთმა შედარებით აგრესიულმა ახალგაზრდამ სხვა კუთხით გააანალიზა პრობლემები. ასეთი დისკუსიები ხელს უწყობს თანამედროვე, თავისუფალი, ტოლერანტული ახალგაზრდობის ჩამოყალიბებას, რომელიც შეცვლის საზოგადობას უკეთესობისკენ.
ოზურგეთის დემოკრატიული ჩართულობის ცენტრში ჩატარდა ამომრჩეველ ქალთა კლუბის სხდომა, რომელსაც ესწრებოდნენ მერიის და საკრებულოს წარმომადგენლები, გენდერული საკონსულტაციო საბჭოს წევრები, ცენტრალური ბიბლიოთეკის, ისტორიული მუზეუმის თანამშრომლები, პედაგოგები, ბაღის აღმზრდელები.
შეკრებილებმა დიდი ინტერესით მოისმინეს ინფორმაცია 2016 წლის ბიუჯეტის პროგრამების შესახებ. ქალბატონებმა გამოთქვეს წინადადება, რომ აქ მიღებულ ინფორმაციას ისინი გაავრცელებენ და ამით ბევრი ადამიანი, რომელსაც სჭირდება და არ იცის ამ პროგრამების შესახებ, გაიგებს და ისარგებლებს.
ოზურგეთის მუნიციპალიტეტის სოციალური სამსახურის უფროსმა, მერიის წარმომადგენლებმა ჩაინიშნეს კლუბზე დასმული პრობლემები და შეკრებილებს მათ მოგვარებას შეპირდნენ.
სხდომაზე დაიგეგმა ერთობლივი წერილის მომზადება კულტურის მინისტრის სახელზეისტორიული მუზეუმის რეაბილიტაციასთან დაკავშირებით. ამ წერილის შესადგენად გენდერული საკონსულტაციო საბჭოს იურისტი უახლოეს დღეებში შეხვდება მუზეუმის დირექტორს და თანამშრომლებს.
წყალტუბოს მე-3 სკოლაში,სენაკის მე-7 სკოლაში და ფოთის მე-2 სკოლაში ჩატარდა ახალგაზრდული კლუბების საინფორმაციო შეხვედრები.
შეხვედრებს უკვე ნაცნობ მოსწავლეებთან ერთად ახლებიც ესწრებოდნენ.
თემის განხილვამ გამოიწვია აზრთა დაპირისპირება. დისკუსია იყო აქტიური და დაძაბულიც. ახალგაზრდებს მოჰყავდათ მაგალითები და გულახდილად საუბრობდნენ განსხვავებული მოსაზრების, სარწმუნოების თუ ეროვნების ადამიანების შესახებ.
შეხვედრების მონაწილეთა საერთო მოსაზრება ასეთია:„მე მაღიზიანებს „განსხვავებულები“, მაგრამ აგრესია არ მეუფლება და ამიტომ ვაცხადებ, რომ ვარ ტოლერანტული“.
დემოკრატიული ჩართულობის ცენტრში ბათუმის ამომრჩეველ ქალთა კლუბის წევრები შეიკრიბნენ. შეხვედრის მონაწილეებმა იმ საკითხებზე ისაუბრეს, რომელთა ადვოკატირება ჩატარდა და ახალ ბენეფიციართა საჭიროებები და მათი პრობლემების ადვოკატირების სტრატეგიაც განსაზღვრეს. სხვა საკითხებთან ერთად გადაწყდა, ჯანმრთელობისა და სოციალური დაცვის სამინისტროში შშმ პირთათვის უფასო ფსიქოლოგიური კონსულტაციის საკითხის ადვოკატირება.
კლუბის სხდომაზე მოხდა ინფორმაციის გავრცელება თვითმმართველობის სოციალური პროგრამების შესახებ. კლუბის ადვოკატირების ჯგუფი ადგილზე ეწვევა თვითმმართველობის შესაბამის სამსახურებს, რათა მიიღოს ამომწურავი ინფორმაცია არსებულ პროგრამებზე და იმ ჯგუფებს, რომლებიც მოიაზრებიან ბენეფიციარებად, დაეხმაროს ამ პროგრამებით სარგებლობაში.
ითქვა, რომ ქალთა კლუბი და გენდერული საკონსულტაციო საბჭო სწორედ მოქალაქეების, პირველ რიგში, ქალთა ჯგუფების კომუნიკაციის ხელშეწყობას ცდილობს ადგილობრივ თვითმმართველობასთან.
2 თებერვალს სენაკის ქალთა მხარდაჭერის ცენტრში ჩატარდა ამ წლის პირველი ამომრჩეველ ქალთა კლუბის სხდომა. სხდომას ესწრებოდნენ საკრებულოს დეპუტატები, გენდერული საკონსულტაციო საბჭოს თავმჯდომარე ნანა ალანია და საბჭოს აქტიური წევრები: ინგა ქარდავა და ელისო ცაგურია.
კლუბის წევრებმა მიიღეს ინფორმაცია 2016 წლის ბიუჯეტის პროგრამების შესახებ.
დისკუსიის დროს კლუბის წევრებმა მოწვეულ სტუმრებს მოახსენეს სხვადასხვა სახის პრობლემების შესახებ: სოციალური სტატუსის აღდგენა, საბავშვო ბაღების მომარაგება ინვენტარით, გაზიფიცირება...
საკრებულოს დეპუტატებმა ყველა პრობლემა განიხილეს, ჩაინიშნეს და შეკრებილებს უახლოეს მომავალში შეპირდნენ მათ მოგვარებას.
ეს მოსახლეობასა და თვითმმართველობას შორის თანამშრომლობის კარგი მაგალითია გენდერული საბჭოს ხელშეწყობით.
