სენაკის, ქუთაისის, ხურჩის ქალთა მხარდაჭერის ცენტრებში ფსიქოლოგი შეხვდა 28 ქალბატონს 22-დან 65 წლამდე.
საუბრის თემა: ქალური შიშები, შიშის ენა და მისი გავლენა ადამიანის ცხოვრებაზე.
შიში ყველას უგრძვნი, მაგრამ ბევრმა არ იცის, როგორ დაამარცხოს შიში.
ფსიქოლოგის რეკომენდაციებიდან:
სანამ შიში მნიშვნელოვან ინტენსივობას არ მიაღწევს და პანიკაში არ გადაიზრდება, გაურკვევლობასა და შიშის მიზეზებზე უნდა იმოქმედოთ - ანუ გააფართოოთ თქვენი ცოდნა, ისწავლოთ პრიორიტეტების დასმა, პრობლემას ყველა მხრიდან შეხედოთ და გააანალიზოთ. თხოვნაც უნდა შეძლოთ, სიამაყის მიუხედავად - თუ არ თხოვთ, ვინ დაგეხმარებათ?

კოკის (ზუგდიდის მუნიციპალიტეტი) სკოლაში ჩატარდა ახალგაზრდული კლუბის საინფორმაციო შეხვედრა, მასში მონაწილეობა მიიღო 15 მოსწავლემ.
როდესაც საუბარი დაიწყო ქალთა უფლებების დაცვაზე, ქალთა მიმართ ძალადობაზე, ერთ-ერთმა მონაწილემ აღნიშნა: „ძალადობის თემა ჩვენთვის უცნობია. კოკი ძალიან მშვიდი სოფელია, სადაც არ ხდება ძალადობის ფაქტები, არ არის ქალის დისკრიმინაცია“.
შეხვედრამ დაამსხვრია მითი, რომ 8 მარტი ქალთა დღესასწაულია და დააფიქსირა, რომ საკუთარი უფლებების ცოდნა და სოლიდარობა თავდაცვის საუკეთესო იარაღია.
ეს შეხვედრა იმის ნიშანია, რომ სამუშაო ჯერაც ბევრია.

ამჯერად ფონდი „სოხუმი“ ოზურგეთის მე-4 საჯარო სკოლას ეწვია. 125 წლის სკოლაში 630 მოსწავლე და 59 პედაგოგია. ქართულენოვან სკოლაში (ადრე ორენოვანი იყო) არიან სხვა ეროვნების (სომხები, უკრაინლები, რუსები, ასირიელები) წარმომადგენლებიც. აქ რამდენიმე პრობლემა გამოიკვეთა - სკოლაში არ არის შემოყვანილი სასმელი წყალი, არა აქვს სპორტული დარბაზი, ე.წ. „ჭკვიანი დაფა“, სკოლა საჭიროებს ეზოს მოპირკეთებას და სტადიონის საფარს.
პრობლემების პაკეტი ადვოკატირებისა და მოგვარების მიზნით ოზურგეთის გენდერული საკონსულტაციო საბჭოს და ადგილობრივ სახელმწიფო სტრუქტურებს გადაეცემა.

ფონდი „სოხუმის“ წარმომადგენლები ნიკეას ქუჩაზე ყოფილ მე-8 ბაღში ჩასახლებულ დევნილებს შეხვდნენ და მათ ყოფა-ცხოვრებას გაეცნენ.
შენობა რეაბილიტირებულია და საკუთრებაშია გადაცემული, მაგრამ იქ ჩასახლებული 21 ოჯახი მაინც არაერთ პრობლემას უჩივის (არ არის შემოღობილი ეზო, დამტვრეულია ეზოში დამონტაჟებული საქანელები...).
ამ პრობლემების ადვოკატირებაში ჩაერთვება ქუთაისის გენდერული საკონსულტაციო საბჭო. 

11 მარტს ქუთაისის ერთ-ერთ კოლექტიურ ცენტრში (ნიკეას ქუჩაზე მდებარე ყოფილი ბაგა-ბაღი) ჩატარდა იურიდიულ-საკონსულტაციო შეხვედრა.
გარეთა ფასადის გარემონტების, კანალიზაციის გამოცვლის და ფანჯრების ჩასმის შემდეგ დევნილებს საკუთრებაში გადაეცათ ფართები. ამ კოლექტიურ ცენტრში მცხოვრებთ მიიღეს სხვადასხვა სახის ინდივიდუალური იურიდიული კონსულტაციები. საერთო პრობლემა კი ის არის, რომ ეზოში შემოდის მსხვილფეხა საქონელი და ანადგურებს ხეებსა და ყვავილებს.შეხვედრის მონაწილეთა სურვილით დაიწერა განცხადება მერიაში, რათა მათთვის გაიცეს თანხა ან გამოიყოს შემოღობისათვის საჭირო მასალა.

ხურჩის (ზუგდიდის მუნიციპალიტეტი) ქალთა მხარდაჭერის ცენტრში, სადაც ცენტრის აქტივისტები შეიკრიბნენ, ჩატარდა მრგვალი მაგიდა თემაზე „ქალთა სოლიდარობა - უკეთესი მომავლისათვის“.
მოწვეული იყვნენ სტუმრები: ზუგდიდის საკრებულოსა და გამგეობის წევრები, სოფლის რწმუნებულები, სოფლის მაჟორიტარი დეპუტატი, სკოლის მასწავლებლები და ეუთოს სადამკვირვებლო მისიის წარმომადგენლები.
მრგვალი მაგიდის მსვლელობის დროს გამოიკვეთა რეკომენდაციები მსხვერპლთა დაცვის და ძალადობის პრევენციის კუთხით, მათ შორის:
- ახალგაზრდების ინფორმირებულობა ოჯახში ძალადობის თემაზე
- სამართალდამცავი სტრუქტურების მეტი მობილიზაცია და საინფორმაციო მუშაობა საზოგადოებასთან
-სოფლის რწმუნებულების გადამზადება ოჯახური ძალადობის ფქტებზე რეაგირებისათვის.

ფონდი „სოხუმის“ ქალთა მხარდაჭერის ცენტრმა სენაკის მუნიციპალიტეტის საკრებულოს სხდომათა დარბაზში ჩაატარა მრგვალი მაგიდა ადგილობრივი თვითმმართველობის - საკრებულო, გამგეობის - წევრებისა და აპარატის თანამშრომლების მონაწილეობით.
შეხვედრის დროს გაჟღერდა ინფორმაცია ქალთა სოლიდარობის დღის ისტორიაზე, გენდერულ სიტუაციაზე საქართველოში, ძალადობის პრობლემების კუთხით, ქალთა დისკრიმინაციაზე.
საუბარი შეეხო ქალთა მხარდაჭერის ცენტრის მუშაობას სენაკში, შედეგებზე და წარმატებულ მაგალითებზე.
მრგვალი მაგიდის დროს დაფიქსირდა რეკომენდაციები ქალთა მიმართ ძალადობის პრობლემის მოგვარებისათვის, პრევენციასა და მსხვერპლთა დაცვის კუთხით.

9 მარტს ფოთის ქალთა მხარდაჭერის ცენტრის ორგანიზებით ფოთის საკრებულოს სხდომათა დარბაზში ჩატარდა ქალთა სოლიდარობის კვირეულისადმი მიძღვნილი მრგვალი მაგიდა.
მრგვალი მაგიდის მუშაობაში მონაწილეობა მიიღეს ქალთა მხარდაჭერის ცენტრის აქტივისტებმა და მოწვეულმა სტუმრებმა.
განხილულ იქნა საკითხი ქალთა სოლიდარობის შესახებ. განსაკუთრებით საინტერესო იყო საუბარი ქალთა მხარდაჭერის ცენტრის მუშაობაზე და შემდგომ დისკუსია აქტუალურ გენდერულ პრობლემებზე.

9 მარტს ქუთაისის საკრებულოს გენდერული საკონსულტაციო საბჭოს სხდომათა დარბაზში მრგვალ მაგიდასთან შეიკრიბნენ საკრებულოს წევრები, საკრებულოს აპარატის თანამშრომლები და ფონდი „სოხუმის“ ქალთა მხარდაჭერის ცენტრის აქტივისტი ქალბატონები.მრგვალი მაგიდა მიეძღვნა ყოველწლიურ ტრადიციულ თემას „ქალთა სოლიდარობა - უკეთესი მომავლისათვის“. ითქვა, რომ ქალთა სოლიდარობას დიდი მნიშვნელობა აქვს იმისათვის, რომ უფრო მეტად იყოს დაცული ქალთა და გოგონათა უფლებები, მეტი ქმედითი ნაბიჯი გადაიდგას ძალადობის პრევენციისათვის. როგორც გამომსვლელებმა აღნიშნეს, ამ საქმეში გარკვეული წვლილი მიუძღვის ფონდი „სოხუმის“ ქუთაისის ქალთა მხარდაჭერის ცენტრს.