ქობულეთის ქალთა მხარდაჭერის ცენტრი ახორციელებს მცირე პროექტს „ჰარმონიული გარემო პატარებისთვის“. მუშაობა მიმდინარეობს ქობულეთის მუნიციპალიტეტის ორ საბავშვო ბაღში და მისი მიზანია - პედაგოგების, აღმზრდელებისა და აღსაზრდელთა მშობლების ჩართვა ძალადობისა და ბულინგის პრევენციაში. უკვე ჩატარდა საინფორმაციო შეხვედრები ადგილობრივი თვითმმართველობის წარმომადგენლებთან, ბაღების გაერთიანებისა და სამიზნე ბაღების ხელმძღვანელებთან და სამართალდამცავებთან. პროექტის მონაწილეები ასევე შეხვდნენ ფონდი „სოხუმის“ იურისტს, კონფლიქტოლოგს და ფსიქოლოგს.
+
შფოთვა და განგაში იყო ივლისში ჯგუფური ფსიქოლოგიური შეხვედრების ძირითადი თემა, რადგან ეს ქალების ყოველდღიურობის ნაწილად იქცა. როგორ ავირიდოთ თავიდან მღელვარება, როგორ დავიმშვიდოთ თავი, რომ ოჯახშიც სიმშვიდემ დაისადგუროს – ამაზე საუბრობდნენ ქალთა მხარდაჭერის ცენტრების მიერ ორგანიზებულ ჯგუფურ შეხვედრებზე სენაკში, ქობულეთში, ლანჩხუთში, ფახულანში, ხურჩაში (ზუგდიდის მუნიციპალიტეტი), (წალენჯიხის მუნიციპალიტეტი). მონაწილეთა რაოდენობა ცოტა არ იყო – 42 ბენეფიციარი 16-დან 67 წლამდე.
თვის განმავლობაში ფსიქოლოგმა დისტანციურადაც იმუშავა - მისი ტელეფონის ნომერზე შევიდა ზარები სხვადასხვა რეგიონიდან. ქალებმა მიიღეს ინდივიდუალური კონსულტაციები და მხარდაჭერა.
იურისტის შეხვედრები ივნისში კომბინირებული ფორმატით გაიმართა - იყო დისტანციური, ონლაინ კონსულტაციებიც და უშუალო შეხვედრებიც რეგიონებში, სხვადასხვა ჯგუფთან. ბენეფიციარების საჭიროებების მიხედვით შეხვედრების ორგანიზება გააკეთეს ხონის, სენაკის, ფახულანის (წალენჯიხის მუნიციპალიტეტი), წყალტუბოს, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორებმა.
პირველად გაიმართა იურისტის შეხვედრა ქობულეთში, რადგან აქ ახლა გაიხსნა ქალთა მხარდაჭერის ცენტრი და დაიწყო პირველი აქტივობები.
იურისტმა უპასუხა შეხვედრების მონაწილეთა შეკითხვებს, ასევე გასცა ინდივიდუალური რჩევები.
ივნისში კონფლიქტის მართვის საკითხებზე ოთხ ოჯახურ წყვილთან გაიმართა შეხვედრები: ქობულეთში, ქუთაისში, თერჯოლასა და ზუგდიდის მუნიციპალიტეტის ერთ-ერთ სოფელში. გამოყენებული იყო როგორც დისტანციური, ასევე პირისპირ შეხვედრის ფორმატი.
განხილვის თემები იყო: ვინ რა სტრატეგიას იყენებს ურთიერთობის დასარეგულირებლად; თანამშრომლობა - როგორც კონფლიქტის მართვის ეფექტიანი მექანიზმი.
შეხვედრა, ძირითადად, პრევენციულ ხასიათს ატარებდა, თუმცა მათ შორის იყო კრიზისული ოჯახი, რომელიც სიტუაციის შეფასების შემდეგ იურისტთან გადამისამართდა. ამ ოჯახთან მუშაობა მომდევნო თვეშიც გაგრძელდება.
კოვიდ-19-ის პანდემიამ ბევრი სიძნელე შეუქმნა ადამიანებს. ფონდი „სოხუმი“ ეცადა, ცოტათი მაინც შეემსუბუქებინა მათთვის პრობლემები და 10 მუნიციპალიტეტში ქალთა მხარდაჭერის ცენტრებმა საჭირო პროდუქტების ნაკრები გადასცა 400-მდე ოჯახს (სოციალურად დაუცველები, მრავალშვილიანი დედები, ძალადობის მსხვერპლი ქალები, შშმ პირები).
ამ დღეებში საქველმოქმედო აქციის მეორე ეტაპი განხორციელდა და დამატებით კიდევ სამ-სამ ოჯახს (სულ 30 ოჯახს) გაეწია დახმარება ქუთაისის, ხონის, წყალტუბოს, თერჯოლის, სენაკის, ფოთის, ზუგდიდის, წალენჯიხის, ოზურგეთისა და ლანჩხუთის მუნიციპალიტეტებში.
ქალთა მხარდაჭერის ცენტრებმა დაასრულეს მცირე პროექტების ერთი ციკლი. ახლა ისინი ახალი სამუშაოს დაწყებისთვის ემზადებიან. ამიტომაც მათთვის ცენტრების მობილიზატორებისთვის ჩატარდა ტრადიციული ტრენინგი თემაზე „პროექტის წერა და დიზაინი“. დისტანციური მუშაობის გამო საამისოდ ზუმის ინტერნეტ პლატფორმა გამოიყენეს.
მონაწილეებმა განიხილეს ქვეგრანტების გაცემის დებულება, რომლის მიხედვით მათ თავიანთი პროექტები უნდა შეიმუშავონ. ტრენინგზე მობილიზატორებმა მუნიციპალიტეტების მიხედვით შეარჩიეს პრობლემები და პროექტების სამუშაო ვერსიები მოამზადეს.
ხანგრძლივი ონლაინ მუშაობის შემდეგ დაიწყო ცოცხალი შეხვედრები. პირველი შეხვედრა ქობულეთში შედგა - ზღვის პირას. აქ პირველად მოეწყო ფსიქოლოგის შეხვედრა ქალებთან, რადგანაც ახლახან შეიქმნა ქალთა მხარდაჭერის ცენტრი. ასეთივე უჩვეულო შეხვედრები გაიმართა ხონის, წყალტუბოს, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. დისტანციურად, სათანადო რეგულაციების დაცვით. კიდევ ერთი შეხვედრა - ოღონდ ისევ ონლაინ - ჩატარდა ფახულანის (წალენჯიხის მუნიციპალიტეტი) ქალთა მხარდაჭერის ცენტრის ბენეფიციარებთან. ტრადიციის მიხედვით, იყო ინდივიდუალური შეხვედრებიც.
შეხვედრებზე ყველაზე აქტუალურ საკითხებზე საუბრობდნენ: სტრესთან ბრძოლა, ცვლილებებთან ადაპტირება, ოჯახური ურთიერთობების მოგვარება, რომ კამათი და კონფლიქტები ძალადობაში არ გადაიზარდოს. მუშაობდნენ ჰოლმსის შკალაზე სტრესული სიტუაციების მიხედვით. ქალებმა მადლიერება გამოხატეს ზრუნვისა და მხარდაჭერისთვის.
- მშობლები ძალიან განიცდიან მათი შვილების გამო, რომლებსაც უჭირთ სასწავლო პროგრამებში ჩართვა, რადგან ამ ზონაში ინტერნეტთან წვდომა დაბალია; რამდენად შეეხება სახელმწიფოს ანტიკრიზისული პროგრამა აქ მცხოვრებ ადამიანებს, რომლებიც იზოლაციის გამო უმუშევრები აღმოჩნდნენ; როდის გაიხსნება მოძრაობა, რათა შეძლონ საკვები პროდუქტებით ოჯახების მომარაგება; რა მდგომარეობაში არიან აფხაზეთის ტერიტორიაზე ჩაკეტილი მათი ახლობლები - ამ და სხვა საკითხებზე იმსჯელეს ქალებმა სოფელ ფახულანში (წალენჯიხის მუნიციპალიტეტი) გამართულ ონლაინ შეხვედრაზე.
იდენტიფიცირებული პრობლემის ადვოკატირებისთვის მუშაობა უკვე დაწყებულია.
როგორ გამოვიყენოთ კომუნიკაციის მეთოდები ურთიერთობის ნორმალიზებისთვის, როგორ გავზარდოთ მისი ეფექტიანობა, როგორ მოვახდინოთ კონფლიქტის გამომწვევი რისკების იდენტიფიცირება და რა გავაკეთოთ მისი სწრაფი მოგვარების კუთხით - ეს საკითხები იყო განხილვის თემები ონლაინ შეხვედრებზე ქუთაისში, ხონსა და ფახულანში (წალენჯიხის მუნიციპალიტეტი) მცხოვრებ ოჯახურ წყვილებთან. მსჯელობის პროცესში აქტიურად ჩაერთნენ ბავშვებიც, რომლებმაც გაგვიზიარეს, როგორ ურთიერთობენ მშობლებთან.
ქუთაისის ქალთა მხარდაჭერის ცენტრის მცირე პროექტის „არაძალადობრივი მომავალი თაობის“ ფარგლებში ჩატარდა ონლაინ ტრენინგი აფხაზეთის მეხუთე საჯარო სკოლის მოსწავლეებთან თემაზე „გენდერი, გენდერული ძალადობა, ძალადობის ტიპები, ბულინგი, მისი სახეები და რეაგირების მექანიზმები“.
ყველა მონაწილე აქტიურად იყო ჩართული პროცესში. მათ გაიგეს ძალადობის ტიპებისა და ბულინგის სახეების შესახებ. მათ აღნიშნეს, რომ არაფორმალური სამოქალაქო განათლების მეშვეობით კარგად ერკვევიან გენდერული თანასწორობის, ძალადობის, საკუთარი უფლებების დაცვის საკითხებში. და მთავარია, შეუძლიათ, თანატოლებს გაუზიარონ თავიანთი ცოდნა და უნარები და სხვებსაც დაეხმარონ.