სექტემბერი განსაკუთრებით აქტიური იყო ფსიქოლოგის დღის წესრიგში - შემოვიდა 61 სატელეფონო ზარი ქუთაისიდან და რეგიონებიდან… ბენეფიციარებმა მიიღეს ფსიქოლოგიური მხარდაჭერა. ფსიქოლოგი ეხმარებოდა მათ ემოციური მდგომარეობის გაუმჯობესებაში, საკუთარი რესურსების გაძლიერებაში, სიმშვიდის მოპოვებასა და პრობლემების მოგვარებაში.

ჩატარდა 5 ჯგუფური  ფსიქოლოგიური შეხვედრა სენაკის, ხონის, ხურჩის (ზუგდიდის მუნიციპალიტეტი), წალენჯიხის და წყალტუბოს ქალთა მხარდაჭერის ცენტრებში.    

ფსიქოლოგი აგრძელებს საკონსულტაციო მუშაობას ოჯახურ წყვილებთან და კრიზისულ ოჯახებთან, ატარებს ინდივიდუალურ კონსულტაციებს კლიენტებთან.

შედეგი ყოველთვის დადებითია - კლიენტები აღნიშნავენ თავიანთი ფსიქოლოგიური მდგომარეობის გაუმჯობესებას.

სენაკის ქალთა მხარდაჭერის ცენტრი ორ პროექტს ახორციელებს. ერთი პროექტის თანახმად, ჩატარდა ტრენინგები სენაკის 1-ლი საჯარო სკოლის და სოფელ ნოსირის საჯარო სკოლის მოსწავლეებთან. თემა „გენდერი, ოჯახში ძალადობა და რეაგირების გზები“ - ძალიან საინტერესო აღმოჩნდა მათთვის და აქტიურადაც ჩაიარა. ორივე სკოლაში შეიქმნა აქტივისტთა ჯგუფები, რომლებიც თანატოლებთან განაგრძობენ მუშაობას.

მეორე პროექტის ფარგლებში გაიმართა ონლაინ საინფორმაციო შეხვედრები საბავშვო ბაღების აღსაზრდელების მშობლებთან - მათ მიეწოდათ ინფორმაცია კანონზე ოჯახში ძალადობის წინააღმდეგ და რეაგირების მექანიზმებზე.

მცირე პროექტი „ჰარმონიული გარემო პატარებისთვის“ წარმატებით ხორციელდება ქობულეთში. თუმცა, არსებული სიტუაციიდან გამომდინარე, საბავშვო ბაღების აღმზრდელებთან ქალთა მხარდაჭერის ცენტრმა საინფორმაციო შეხვედრები ონლაინ  ჩაატარა. ბენეფიციარებს მიეწოდათ ინფორმაცია მუნიციპალურ და ზოგადად სახელმწიფო სერვისებზე, ასევე კორონავირუსის პრევენციასთან დაკავშირებულ რეგულაციებზე. 

ხურჩა/კოკის ქალთა მხარდაჭერის ცენტრი აქტიურად მუშაობს ზუგდიდის მუნიციპალიტეტში.

პროექტი „დავიცვათ თავი ბულინგისგან“ ხორციელდება სოფელ კოკში, ხოლო პროექტი „დაარღვიე დუმილი, დაამარცხე ძალადობა“ -  ხურჩაში. 

კოკის სკოლის მოსწავლეებთან ჩატარდა ტრენინგი თემაზე „ბულინგი და მისგან დაცვის მექანიზმები“. მათთვის განსაკუთრებით საინტერესო აღმოჩნდა კიბერბულინგის თემა.

ხურჩაში გაიმართა საინფორმაციო შეხვედრა, სადაც მონაწილეებს მიეწოდათ ინფორმაცია მექანიზმებზე, რომელთა მეშვეობითაც შესაძლებელია ოჯახში ძალადობის ფაქტების გამოვლენა და დროული პრევენცია.  

ფახულანის (წალენჯიხის მუნიციპალიტეტი) ქალთა მხარდაჭერის ცენტრის მცირე პროექტის „ჯანსაღი თაობისთვის“ ფარგლებში ჩატარდა საინფორმაციო შეხვედრები სამიზნე სკოლების მშობლებთან. მათ მიიღეს ინფორმაცია შემდეგ საკითხებზე: ოჯახში ძალადობა, მოზარდი და ძალადობრივი გარემო, ბულინგი, ძალადობის პრევენცია, რეაგირების მექანიზმები. შეხვედრების მონაწილეებმა აღნიშნეს, რომ ასეთი მუშაობა მათთვის მეტად მნიშვნელოვანია.

თერჯოლის ქალთა მხარდაჭერის ცენტრის მცირე პროექტის „საქმით ვებრძვით ძალადობას და სიღარიბეს“ ფარგლებში მიმდინარეობს კულინარიისა და სერვირების შემსწავლელი კურსი - სპეციალური კომისიის მიერ შერჩეულ ბენეფიციარებთან. მონაწილეები აქტიურად არიან ჩართულები პროცესში. იგეგმება მომავალი მუშაობა, თუ როგორ გამოიყენებენ მიღებულ ცოდნას თვითრეალიზაციისთვის.

პარტნიორული პროექტის „ოჯახში ძალადობის პრევენციის, მსხვერპლის მხარდაჭერის და მოძალადესთან თერაპიული მუშაობის სისტემის გაძლიერება“ ფარგლებში ფონდი „სოხუმის“ დღის სარეაბილიტაციო ცენტრში გრძელდება ჭრა-კერვის სწავლება, საბუღალტრო აღრიცხვის, კომპიუტერის, სტილისტისა და მანიკურის სპეციალობის შემსწავლელი კურსები. კურსების მონაწილეები დიდი ინტერესით ეუფლებიან ახალ სპეციალობებს და ცდილობენ კიდეც, პრაქტიკაში გამოიყენონ მიღებული ცოდნა.

ლანჩხუთის საბავშვო ბაღებში ჩატარდა საინფორმაციო შეხვედრები აღმზრდელებთან. მონაწილეებს მიეწოდათ ინფორმაცია, თუ როგორ უნდა გამოავლინონ ძალადობის რისკ ფაქტორის ქვეშ მყოფი ბავშვები და, კანონის თანახმად, რა კუთხით ევალებათ რეაგირება. შეხვედრები იმართება ქალთა მხარდაჭერის ცენტრის მცირე პროექტის  „ძალადობის პრევენცია - ჰარმონიული გარემო პატარებისთვის“ ფარგლებში. აღინიშნა, რომ მსგავს საკითხზე მუშაობა მეტად მნიშვნელოვანია, რადგან აღმზრდელებს არ ჰქონდათ სათანადო ინფორმაცია. 

ფახულანის (წალენჯიხის მუნიციპალიტეტი) ქალთა მხარდაჭერის ცენტრი წარმატებით ახორციელებს მცირე პროექტს „ჯანსაღი თაობისთვის“. პროექტის თანახმად, ფონდი „სოხუმის“ ფსიქოლოგი და იურისტი შეხვდნენ მშობლებს. შეხვედრის მიზანი იყო მშობელთა ინფორმირება იმის შესახებ, თუ რაოდენ მნიშვნელოვანია მათი ჩართვა და მონაწილეობა მოზარდის აღზრდის და სწავლის პროცესში. ასევე მათ მიეწოდათ ინფორმაცია ბულინგის და ძალადობის პრევენციის მექანიზმებზე.

ხურჩის/კოკის (ზუგდიდის მუნიციპალიტეტი) ქალთა მხარდაჭერის ცენტრი ახორციელებს ორ პროექტს „დავიცვათ თავი ბულინგისგან“ და „დაარღვიე დუმილი, დაამარცხე ძალადობა“.

პირველი პროექტის ფარგლებში ჩატარდა საინფორმაციო შეხვედრა კოკის სკოლის პედაგოგებთან. მათ მიეწოდა ინფორმაცია ბულინგისა და კიბერბულინგის ფაქტებზე, რეაგირების მექანიზმებზე. გაიგეს, როგორ უნდა გამოავლინონ ბულინგის მსხვერპლი მოსწავლეები და რა დახმარება უნდა გაუწიონ მათ.

მეორე პროექტის ფარგლებში გაიმართა საინფორმაციო შეხვედრა და მონაწილეებმა მიიღეს ინფორმაცია მექანიზმებზე, რომელთა მეშვეობითაც შეეძლებათ ოჯახში ძალადობის ფაქტების გამოვლენა და დროული პრევენცია. საუბარი შეეხო ასევე ადგილობრივ მუნიციპალურ სერვისებს.